Mereja.Forum

[Meleket]

Please wait, video is loading...

https://www.facebook.com/10009207841022 ... 290318283/

እዚ ዕድመና ንኹሎም መቃልስቱን ፈለጥቱን ኢዩ። ታሪኽ እዚ ጅግና በጽፉፉ ክትስንዱልና ንላቦ፡ ብሽም ተረኽብቲ ሕድርን ሃገርን መንእሰያት ሃገረ-ኤርትራ፡ ንሕና ኤርትራዉያን ደያኑ ማእከልን መስመርን፡ በቲ ልሙድ ኤርትራዊ ጭዉነት ሓበንን ፍናንን!

[Meleket]

ኣርእስቲ እዚ ስዒቡ ቀሪቡ ዛሎ ጽሑፍ ኣብ ክንዲ ብድብድቡ “ኤርትራዉያን ኣብ ኢትዮጵያ” [ካብ ህይወት ስሩዓት ኤርትራውያን ኣብ ኢትዮጵያ ብከፊል] እንተተባህለ ምሓሸ ነቢሩ! ብዝዀነ ከምታ ዘላታ ንቐደም በሉ ደቂ ኤርትራና

ሓዳስ ኤርትራ 4ይ ዓመት ቍጽሪ 7 - ቀዳም 24 መስከረም 1994 – 3ይ ገጽ
ኤርትራውያን ኣብ ኢትዮጵያ
ሙሴ ኪዳነ
ቀዳማይ ክፋል

ጸላኢ ኣብ ውሽጢ ዝቈጻጸሮ ዝነበረ ከተማታትን ገጠራትን ገድላዊ ዓማማት ምስልሳልን፡ ኣብ ልዕሊ’ቲ፡ ኣብ መብዛሕትኡ ኣብነታት፡ ዘይተርፍ ማእሰርትን መስዋእትነትን፡ ኣብ ነፍሲ-ወከፍ መዓልትን ለይትን ንስነ-ኣእምሮኣዊ ጸቕጥን ጭንቀትን ምጽዋር ዝሓትት ኣዝዩ ሓደገኛ፡ ግን ከኣ ክማላእ ዝነበሮ ግቡእ ስራሕ’ዩ።

ኣብ ከምዚ ዝበለ ክሊማ፡ ዓጢቕካ፡ ብድሕረኻ ደጀን ኣቐሚጥካ፡ ኣንጻር ጸላኢ ድሎ-ብድሎ ምግጣም ዝባሃል ነገር የልቦን፡ ነቲ ግድን ክማላእ ዘለዎ ዕማማት ኣብ እትፍጽመሉ እዋን ኣብ ኢድ ጸላኢ ናይ ምውዳቕ ተኽእሎ ብዙሕ’ዩ። ናብ ላዕልን ታሕትን ንጡፍ ምንቕስቓስካ ዝርኢ ተሓባባሪ ጸላኢ መኣስ ‘ይጡቁመካ” ክትፈልጥ እትኽእለሉ ምልክት የልቦን። እጃሙ ንኸበርክት እትቐርቦ ዜጋ ወይ ሓገዝ ንኸወፊ እትሓቶ ርኹብ ኣሕሊፉ ንከይህበካ ኩሉ ግዜ ስግኣት ኣሎ። ምስጢርካ ዚፈልጥ ዝነበረ ሰነፍ መኣስ ሰሊሙ መኣስ ናብ ኣፍ ኣባይ ይስሕበካ ኣቐዲምካ ክትፈልጥ እትኽእለሉ ኣጋጣሚ ዉሑድ’ዩ።

እዚ ብፍላይ ኣብቶም ኣዝዮም ንጡፋትን ዉፉያትን ባእታታት፡ ኣብ ዝዀነ ይኹን ግዜን ኩነትን ገድላዊ ዕማም ንምፍጻም ድሉው፡ በየን ይመጽእ ንዘይፍለጥ ሓደጋ ኩሉ ግዜ፡ ዓሰርተ ዝማሓድርኡ፡ ጥንቁቕ፡ ብኣካል ምስ ስድራ ቤትን ሓዳርን ብግብርን ሕልናን ኣብ ቃልሲ ምምቕቓል ማለት ኪኸውን ይኽእል።

ብዛዕባ’ቶም ኣብ ውሽጢ መስመር ጸላኢ ጥራይ ዘይኰነ ኣብ ዉሽጢ ትሽቱሽ ጸላኢ፡ ኣብ መሬት ኢትዮጵያ፡ ዝንቀሳቀሱ ዝነበሩ ተመሳሳሊ ቃላት ኪበሃል ይከኣል’ዩ። ሓላፋ ግን ኣለዎ።

“ውድባዊ ንጥፈታት ኣብ ኣስመራ ኣብ ምክያድ፡ ዋላ’ኳ መስዋእቲ ከጋጥም ከምዝኽእል እንተፈለጥካ፡ ኣብ እዋን ሓደጋ ጐረባብቲ፡ ህዝቢ ከዕቁበካ ከም ዝዀነ ትርዳእ ኢኻ። ኩነታት ኣዲስ ኣበባ ግን ዝተፈልየ ኢዩ። ኩሎም ጐረባብትኻ ብዓይኒ ጽልኢ ብዓይኒ ቅንኢ ኢዮም ዝጥምቱኻ፡ ብስራሕካ ይቐንኡ፡ ብትምህርትኻ ይቐንኡ ከማኡ’ውን ብትሕዝቶኻ። ጐረባብትኻ ይኹኑ ‘ቀበሌ’ ኩሉ ግዜ ምስ ተኸታተሉኻ ኢዮም። ኣብ ቦታ ስራሕካ’ውን እንተዀነ ካብዚ ዝፍለ ኣይኰነን፡ ኩሉ ግዜ ቅሉዕ ኢኻ። ስለዚ፡ ተንቀሳቂስካ ኣብ ህዝቢ ክትሰርጽ፡ ህዝቢ ክትውድብ፡ ውድባዊ ዕማማት ክትፍጽምን ወረቓቕቲ ክትዝርግሕን ኣዝዩ ኣጸጋሚ ኢዩ ነይሩ”

ይብል ዓመት ዝተኣስረ ኣቶ ሃይሉ ንጉሰ።

ሓሙሽተ ዓመት ዝተኣስረ ኣቶ ክብርኣብ ሃብተሚካኤል ብወገኑ፡ ኣብ ኣዲስ ኣበባ ዝነበረ ትካል ጸጥታ ኢትዮጵያ ዝሓየለ ከምዝነበረ ይገልጽ።

“እቲ ትካል ናይ ነዊሕ ዓመታት ተመክሮ ዝነበሮ፡ ቅድም ብመርበብ ስለያ እስራኤል፡ ሞሳድ፡ ድሓር ድማ ብናይ ምብራቕ ከርመንን ሶቬት ሕብረትን ዝሰልጠነን ዝተወደበን፡ በዚኦም ዝሰልጠኑ ብዙሓት ምሁራት ኢትዮጵያውያን ዝነበርዎ ኢዩ ነይሩ።”

ይኹን’ምበር ኣብ ኢትዮጵያ ዝቕመጡ ዝነበሩ ኤርትራዉያን በዚ ዕንቅፋታት’ዚ ካብ ድልየታቶምን ስምዒታቶምን ኣይተዓገቱን።

ካብ ግዜ ፈደረሽን ኣትሒዞም ኢዮም ኤርትራውያን ተማሃሮ ንዝለዓለ ደረጃ ትምህርቲ፡ ኤርትራዉያን ሰራሕተኛታት ከኣ፡ ኣብ ኤርትራ ዝነበረ ስራሓት ብውዲት ብሪጣንያን ኢትዮጵያን እናዘሓለ ምስ ከደ፡ ንስራሕ ናብ ኢትዮጵያ ክስደዱ ጀሚሮም። እንተዀነ፡ ንዕለታዊ መነባብሮኦም ኣለይ-መለይ እናበሉ ንሃገሮምን ህዝቦምን’ውን ኣይረስዑን።

“ ካብቲ ግዜ’ቲ ጀሚሩ፡ ኣብ መንጎ እቶም ኣብ ኢትዮጵያ ዝቕመጡ ዝነበሩ ኤርትራዉያን ጽኑዕ ምትሕቍቋፍን ምትሕግጋዝን ነይሩ። ሓዲሩ ንጽቝጣት ብሄራት ኢትዮጵያ ኣብነት ክኸውን ዝኸኣለ ተግባር፡ ቋንቋኦምን ባህሎምን ምዝውታር ኣየቋረጹን። እዚ ኩሉ ምስ ፖለቲካን ጽንዓትን ዝተዛመደ ተርእዮ ኢዩ ነይሩ። ብዘይካ’ዚ ካብቲ ዝነበርዎ ቦታ ብምብጋስ፡ እንታይነት ኢትዮጵያ፡ መግዛእቲ መንግስቲ ኣምሓራ እንታይ ማለት ምዃኑ ብዝያዳ ክርድኡ ዝኸኣሉ ንሳቶም እቶም ኣብ ውሽጢ ኢትዮጵያ ዝነበሩ ኤርትራዉያን ኢዮም”

ይብል አቶ ክብረኣብ።

ስለዚ፡ ከኣ፡ ካብ መጀመርታ፡ ከም ኩሉ ህዝቢ ኤርትራ፡ እቲ ኣብ ኢትዮጵያ ዝነበረ ህዝቢ ኤርትራ ንቃልሲ ኢዩ መሪጹ። ኣብቲ ዝተፈላለየ መድረኻት ሓርነታዊ ቃልሲ 30 ዓመታት ብዝያዳ ከኣ እቲ ውድብ ኣካል ኣብ ተጋድሎ ህዝቢ ኤርትራ እጃሙ እናኣበርከተ፡ እቲ ዝጥለብ መስዋእትነት እናኸፈለ ከቢድ ተወፋይነት ዝሓተተ ዕማማት ፈጺሙ ኢዩ። ኣብዚ መስርሕ’ዚ፡ ንኣረሜናዊ ማእሰርትን መግረፍትን ተጻዊሮም ምስጢር ዓቂቦም ብትብዓት ክቡር ህይወቶም ዘወፈዩ ጀጋኑ ብዙሓት ኢዮም።

ገለ ኣብ ኢትዮጵያ ካብ ዝተሰዉኡ ኤርትራውያን
1. ተመስገን ሃይለ - ኣብ ኣዲስ ኣበባ - 1973
2. ተወልደ ተስፋማርያም - ኣብ ኣዲስ ኣበባ - 1979
3. ኢድሪስ ዓብደልቃድር - ኣብ ኣዲስ ኣበባ - 1979
4. ለኣከ ገበስላሴ - ኣብ ኣዲስ ኣበባ - 1979
5. ኣብርሃ ሰመረ - መቐለ - 1979
6. ህንጻ ክብሮም - መቐለ - 1979
7. ሃይለስላሴ ገብረዝጊ - ኣብ ኣዲስ ኣበባ - 1979
8. ፍስሓጽዮን ኣፈወርቂ - ኣብ ኣዲስ ኣበባ - 1979
9. ተስፋይ ኣረስዕ - ኣብ ኣዲስ ኣበባ - 1979
10. መልኣከ በላይ - ኣብ ኣዲስ ኣበባ - 1979
11. ነጋ ሃይለ - ኣብ ኣዲስ ኣበባ - 1979
12. ሰሎሙን በርሀ - ኣብ ኣዲስ ኣበባ - 1979
13. ፍስሃየ ሃብተኣብ - ኣብ ኣዲስ ኣበባ - 1979
14. ጴጥሮስ ወልደገርግስ - ኣብ ኣዲስ ኣበባ - 1979
15. ሚኪኤል ሃይለ - ኣብ አዲስ ኣበባ - 1980
16. ረድኢ ሃይለ - ኣብ አዲስ ኣበባ - 1980
17. ሰሎሙን መሓሪ - ኣብ አዲስ ኣበባ - 1980
18. ኣብርሃ ብእምነት - ኣብ አዲስ ኣበባ - 1982
19. ሃይለ ኣብርሃ - ኣብ አዲስ ኣበባ - 1983
20. ገብረእግዚኣብሄር የማነ - ኣብ አዲስ ኣበባ - 1985
21. ክፍለየሱስ ኣብርሃ - ኣብ አዲስ ኣበባ - 1985
22. ኤፍረም ንርኣዮ - ኣብ አዲስ ኣበባ - 1985
23. ተኸስተ ሓድሽ - ኣብ አዲስ ኣበባ - 1985
24. ዛይድ በላይ - ኣብ አዲስ ኣበባ - 1985
25. ተኽለ ተስፋማርያም - ኣብ ጅማ - 1990
26. ክፍለ ዮውሃንስ - ኣብ ጅማ - 1990

ይቅጽል

ድሒሩ ተመሳሳሊ ተሞክሮ ቃልሲ ንዘሕለፈ ስዉእ ተጋዳላይ ተወልደመድህን ኣፈወርቂ [ቢሮክራሲ ምስ ቃልሲ ከተማ] ዘርእስታ መጸሓፍ ብማና ባህረ ዝተዳለወት 331 ገጽ ብነሓሰ 2025 ተሓቲማ ኢያ። ብሮክራሲ ኣብታ ስምይቲ ናይ በዓሉ ግርማ “ኦሮማይ” ዘርእስታ መጽሓፍ እውን ቀንዲ ገጸ ባህሪ ዀኑ ተጠቂሱ ኢዩ። ነዛ ብኤርትራዊ ማና ባህረ ዝተጻሕፈት ታሪኽ ህይወቱ ድማ ኣብ ኣማዞን ተዘርጊሓ ስለዛላ ዘየንበብኩም ኣንብብዋ። ቢሮክራሲ ብድፍኢት ሓፍቱ ኣልማዝ ተወልደመድህን ናብ ቃልሲ ዝተጸንበረ ኢዩ። ሓፍቱ ብእኒ ገዲም ተጋዳላይ ሃይለ ወልደትንሳኤ [ድሩዕ] ኣድላይ ውድባዊ ጉስነት ይግበረላ ከምዝነበረ ይጥቀስ። ኣብዚ ሕጂ እዋን ንሚንስትር ዜና ኣቶ የማነ ገብረመስቀል ተመርዕያ ብህይወት ትርከብ። በዚ ኣጋጣም ምልከት ቋንቋ እንግሊዝ ከምዘለዎም ዝጥቀሱ ኣቶ የማነ ገብረመስቀል ንመጽሓፍ ቢሮክራሲ ናብ ቋንቋ እንግሊዝ ተርጕሞም ንዓለም ኪቕርቡ እንተተላበናዮም ግሩም ይመስለና።



ንታሪኽ ህይወት ስዉእ ተመስገን ሃይለ ድማ ብከምዚ ኣገባብ ክትስንዱ ተበግሶ ክትወስዱ ንፈለጥቱን መቃልስቱን ነተባብዕ! እዚ ለበዋና እንኮላይ ንደራሲ መጸሓፍ ቢሮክራሲ ማና ባህረ’ዉን የጠቓልል ኢዩ።

[Meleket]

ሓሳባትናን ርእይቶናን ዝተቀበለ ኪመስል ጸሓፊ እዛ ታሪኽ ኣርእስቱ ዓዕርይዋ ኣሎ፡ ከምታ ዘላታ እንሆ

ሓዳስ ኤርትራ 4ይ ዓመት ቍጽሪ 8 - ረቡዕ 28 መስከረም 1994 – 3ይ ገጽ

መስዋእቲ ዋጋ ሓርነት

ኤርትራውያን ኣብ ኢትዮጵያ ምስጢራዊ ስራሓት
ብሙሴ ኪዳነ
ካልኣይ ክፋል

ኣብ ሱሳታት ዛጊት ብዙሓት ኤርትራውያን ናብ ኢትዮጵያ ተሰዲዶም ነሮም ኢዮም። ቍጠባዊ ኩነታት ዘስዓቦ ስደት ብምንባሩ ከኣ፡ እቲ ኣብ ኩሉ ኤርትራዊ ዝነበረ ሃገራዊ ስምዒት፡ ድልየትን መንፈስን ምስኣቶም’ዩ ተሰዲዱ። ብዘይካ’ዚ፡ ካብቲ ሽዑ ግዜ ካብ ጐረባብታን መብዛሕትአን ሃገራት አፍሪቃን ዝማዕበለት ዝነበረት ኤርትራ ከይዶም ንኢትዮጵያ ብቐረባ ስለዝተዓዘቡ

“መግዛእቲ ኣምሓራ፡ መግዛእቲ ኢትዮጵያ ማለት እንታይ ማለት ምዃኑ ብዝያዳ ከርድእዎ ዝኸኣሉ ንሳቶም ኢዮም ነይሮም”

ይብል ኣቶ ክብረኣብ ሃብተሚካኤል።

ምስ’ዚ ስምዒታት’ዚ፡ ኣብ መፋርቕ ሱሳታት፡ ኣብ ኣስመራ ንናጽነት ኤርትራ ትሰርሕ ‘ምንቕስቓስ ሓርነት ኤርትራ’ ወይ ‘ማሕበር ሸውዓተ’ ዝበሃል ተመስሪቱ ምስ ሰምዑ፡ ከመይ ዝበለ ማሕበር’ዩ፧ ዕላማኡ፡ መስመሩ፡ መትከላቱ እንታይ ኢዩ ንኪምርምሩ’ውን ሰጋእ ከይበሉ ብሓንሳብ ተላዕሉ።

“ኣብቲ ግዜ’ቲ ምልእቲ ኣዲስ ኣበባ ኢያ ተናዊጻ። ኣብ ገዛ፡ ኣብ መንገዲ፡ ኣብ ባራት ዕላል ኤርትራዉያን ብዛዕባ ማሕበር ሸውዓተ ጥራይ ኢዩ ነይሩ”

ይብል ኣብ ኣዲስ ኣበባ ኣባል ማሕበር ሸውዓተ ዝነበረ ኣቶ መንግስትኣብ ተኽሉ።

በብወገኖም፡ በብሸውዓተ ክውደቡ፡ ምስ ኣስመራ ርክብ ንኪምስርቱ ልኡኻት ክሰዱ ጀመሩ። ማሕበር ሸውዓተ ብረታዊ ቃልሲ ክትጅምር’ያ ምስ ሰምዑ ከኣ (ዘይሓቂ)፡ ብረት ገዚኦም፡ በብመዓልቱ፡ ክልተ ጉጅለ ንሜዳ ተበገሱ። ብኣማኢታት ዚቍጸሩ ኤርትራውያን ካብ መዓርፎ ኣውቶቡስ ኣፋነውዎም።

ማህበር ሸውዓተ ንሃንቀውታኦም ኣየማለአትን። እንተዀነ እዚ ብዙሕ ዘተሓሳስቦም ጉዳይ ኣይነበረን።

ኣብቲ ግዜ’ቲ ብረታዊ ቃልሲ ህዝቢ ኤርትራ ብተ.ሓ.ኤ. ተጀሚሩስ ይስጉም ነይሩ ኢዩ። ስለዚ፡ ብብዝሒ ኣብኡ ተወደቡ። ኣባላት ተ.ሓ.ኤ. ብዝያዳ ከኣ ብንጥፈት ብዓል (ድሓር ኣብ ከሰላ ዝተሰውአ) ኪዳነ ክፍሉ ኣብ ባህርዳር፡ ኣብ ኣዲስ ኣበባ ከኣ ኣብ ከባቢ ዩኒቨርሲቲ ካልኣይ ደረጃ ኣብያተ-ትምህርቲ ማህበር ተማሃሮ፡ ኣብ ሚኒስትሪታት ቴለኮሚኒኬሽን ኢትዮጵያ ድማ ድልዱል ማህበራት ሰራሕተኛታት መስረቱ።

እንተዀነ፡ በቲ ሓደ ወገን ነቲ ብኢትዮጵያ ዝወርድ ዝነበረ ግፍዕታት ኪቃወሙ፡ በቲ ካልእ ከኣ ተ.ሓ.ኤ. ኣብ ቅኑዕ መስመርን ብቕኑዕ ኣወዳድባን ብዘይምንቕስቓሱ ብዝሰዓበ ኣሉታዊ ተመክሮ ሰውራ ኤርትራ፡ ኣብ መንጎ ተቐርቀሩ።

እቲ ግዜ’ቲ፡ ህዝቢ ኤርትራ ተስፋ ኣብ ምቝራጽ ዝበጽሓሉ ኩነታት’ዩ ነይሩ።

“ብፍላይ ኣብ ኣዲስ ኣበባ ዝነበሩ ኤርትራዉያን መንእሰያት ግን፡ ብተ.ሓ.ኤ. ጥራይ ዘይኰነ በቲ ብሓፈሽኡ ኣብ ሱሳታት ኣብ ዓለም ዝነበረ ናይ ሓርነታውን ጸጋምን ምንቕስቓስ’ውን ተጸልዮም ነይሮም ኢዮም። ምስ’ዚ ተስፋ ምቑራጽ’ዚ ከኣ፡ ናብ ቬትናም፡ ፍረሊሞ (ሓርነታዊ ምንቅስቓስ ሞዛምቢክ) . . . ዘይንኸይድ ዝብል ሓሳባት ኣብ ሓንጎል ገለ ኤርትራውያን መንእሰያት ዝሰላሰለሉ ዝነበረ ግዜ ኢዩ ነይሩ። ናብ ፍረሊሞ ዝኸዱ’ውን ነይሮም”

ይብል ኣብቲ ግዜ እቲ ተማሃራይ ዩኒቨርሲቲ ዝነበረ ሓላፊ ሲቪል ኣቭየሽን ኣቶ እስቲፋኖስ ኣፈወርቂ።

ኣብ 1968 ግን ሓደ ወሳኒ ስጉምቲ ተወሲዱ። ኤርትራውያን ተማሃሮ ዩኒቨርሲቲ፡ ኣብ ኣዳራሽ ፋካልቲ ሕጊ ኣብ ዘካየድዎ ቅሉዕ ኣኼባ ነቲ ምስ ተ.ሓ.ኤ. ምትእስሳር ዝነበሮ ማሕበሮም ኣፍረስዎ። በቲ ተ.ሓ.ኤ. ዝኽተሎ ዝነበረ መስመር ኣብ ዓወት ክብጻሕ ከምዘይክእልን ክሳብ ሓደ ደሞክራሲያዊ ኣንፈት ዚቕልቀሉ ከኣ ነቲ ማህበር ከምዘደስከልዎ ብወግዒ ገሊጹ “እዚ፡ ሓደ ምዕራፍ ዝተዓጽወሉ፡ ካልእ ሓድሽ ተስፋ ከኣ ዝተፈጥረሉ ኩነታት’ዩ ነይሩ”

ይብል ኣቶ እስቲፋኖስ።

ህዝባዊ ሓይልታት ተፈልዩ እቲ ካልኣይ ወገኑ ብሸነኽ ዓላ ምስ ተቐልቐሉ ከእ ርክብ ተጀሚሩ። ምእሳር ናይቶም ዘራኽቡ ዝነበሩ ባእታታት ስለዘጋጠመ ግን እዚ ርክብ’ዚ ቀልጢፉ ክምዕብል ኣይከአለን። ኣብ 72 ግን፡ ምስቲ ዛጊት ኣብ ኢትዮጵያ ዝነበረ ሃገራዊ ስምዒት ኤርትራዉያንን ናይ ጸጋም ጽልዋን፡ ከምኡ’ውን ምስ ምልኣኽ ካብ ሜዳ ናብ ኣዲስ ኣበባ፡ ልዑል ክእለት ምውዳብ፡ ዓቕምን ፍልጠት ኣዲስ ኣበባን ዝነበሮ ተጋዳላይ ህ.ግ. ኣማኑኤል ዮውሃንስ፡ ኣዝዩ ምዕቡልን ምስጢራውን ኣወዳድባ ዝነበሮ ማሕበር ‘ጥሕሻ’ ክምስረት ተኻኢሉ።


ተጋዳላይ ኣማኑኤል ዮሃንስ (ራዲዮ) ኮፍ ቢሉ ዘሎ

‘ጥሕሻ’ ካብ ውሱን ዓንኬል ተማሃሮ ተበጊሱ ናብ ካልኦት ማሕበራውያን ጉጅለታት ከስፋሕፍሕ ዝጀመረ ማሕበር’ዩ ነይሩ። ብኡ-ንብኡ ከኣ፡ ብንጥፈት ብምንቕስቓስ፡ ገንዘብን ንዋትን መድሃኒትን ንሜዳ ክልእኽ፡ ህዝቢ ከጐሳጉስን ‘ጥሕሻ’ እትጽዋዕ መጽሄት ኣዳልዩ ክዝርግሕ፡ ብዛዕባ ጉዳይ ኤርትራ ደሞክራስያውያን ንዝዀኑ ኢትዮጵያዉያን ባእታታት ከረድእን ምስ ኣቶም ክተሓባበርን ጀሚሩ።

ኣብ’72 ከኣ፡ ንፕሮፓጋንዳን ፍናንን ደገፍን ዝዓለመ፡ ምስ መሰል ርእሰ-ውሳነ ህዝቢ ኤርትራ ዝኣምኑ ኢትዮጵያዉያን ብምትሕብባር፡ ዘይተዓወተ ነፋሪት ናይ ምጭዋይ ፈተነ ኣካይዱ። ተጋዳላእይ ኣማኑኤል ዮውሃንስ፡ ዮውሃንስ ፍቓዱን ማርታ መብራህቱን ከኣ ኣብቲ ፈተነ ተሰዊኦም።

“ኣብቲ ግዜ’ቲ፡ ህ.ሓ . ካብ ተ.ሓ.ኤ. ብምፍላዩ፡ ኣብ ውሽጢ ጸጥታ ኢትዮጵያ ዓቢ ስግኣት’ዩ ተፈጢሩ ነይሩ። ደገፍ ብዙሓት ክረክብ ምዃኑ ግምት ስለዝነበሮም ከኣ፡ እቲ ዝኸረረ ምክትታሎም ኣብ ልዕሊ’ዚ ማሕበር፡ዚ ኢዩ ነይሩ። ማሕበር ጥሕሻ ዋላ’ኳ ኣዝዩ ምስጢራዊ እንተነበረ ገለ-ገለ ንጥፈታት ኣብ ምክያድ ነብሱ ከቃልዕ ይግደድ ነይሩ”

ይብል ካብ መራሕቲ ጥሕሻ ዝነበረ ኣቶ እስቲፋኖስ ኣፈወርቂ።

ከምቲ መደቡ፡ ኣዐርዩ ከየስፋሕፈሐን ከይበሰለን ከኣ ኣብ’73 ላዕለዎት መራሕቱ ተኣስሩ።

ብጽንዓት’ቶም እሱራት እቲ ማእሰርቲ ናብ ካልኦት ኣባላት ኣይሓለፈን። ንሱ ጥራይ ዘይኰነ፡ መራሕቲ ጥሕሻ መሰል ርእሰ-ውሳኔ ህዝቢ ኤርትራ ንኣምን ኢና ብምባል ምስ መርመርቶም ክትዕ ዝኸፍትሉ ዝነበሩ ኩነታት’ዩ ተፈጢሩ።

ሓደ ካብቶም መራሕቲ ዝነበረ ተመስገን ሃይለ ምስ እስቲፋኖስ ኣፈወርቂ ኣብ ሓደ መዓልቲ፡ ብሓንሳብ’ዮም ተኣሲሮም። ተመስገን ለውጢ ዝፈቱ፡ ንቕድሚት ናይ ምጥማት ልዑል ዓቕምን ፍቕሪ ህዝብን ዝነበሮ፡

“ንሕና እንተዘይጌርናዮ ድሕሬና ካልኦት ክፍጽምዎ ኢዮም”

ዝብል ዝነበረ መንእሰይ ኢዩ ነይሩ። ኣብቲ ቤት-ማእሰርቲ ሓንቲ ለይቲ’ውን ኣይሓደረን ብኡ-ንብኡ ኢዩ ተሰዊኡ።

ኣማኑኤል ዮውሃንስን ተመስገን ሃይለን ብቑዓት መራሕቲ ጥራይ ዘይኰኑ ዓበይቲ መማህራን ኢዮም ነይሮም

ይብል እስቲፋኖስ ኣፈወርቂ።

ይቕጽል

https://www.youtube.com/watch?v=aEQni83DKg8

[Meleket]

ሓዳስ ኤርትራ 4ይ ዓመት ቍጽሪ 9 - ቀዳም 1 ጥቅምቲ 1994 – ካብ 3ይን መበል 12ን ገጻት

መስዋእቲ ዋጋ ሓርነት

ኤርትራውያን ኣብ ኢትዮጵያ - ምስጢራዊ ስራሓት
ሳልሳይ ክፋል
ሙሴ ኪዳነ

መራሕቲ ‘ጥሕሻ’ ተእሲሮም ተመስገን ሃይለ ተሰዊኡ። እንተኾነ እዞም እሱራት’ዚኣቶም ንኻልኦት ኣባላት ኣየቓልዑን፡ ተኸላኪሎምሎም ጥራይ ዘይኮነ፡ ብዛዕባ ዕላምኦም ኣንጻር መርመርቶም ፊት-ንፊት ገጢሞም ገለጹን ተኻትዑን።

ካብ ምእሳር ካብ ዝተረፉ ገለ ብኡንብኡ ንሜዳ ወጹ። ዝተረፉ ከኣ እቲ ዕላማ ኣብ መፈጸምትኡ ንኺበጽሕ ቃልሲ ግድን ኽቕጽል ስለዝነበሮ ከም ብሓድሽ ተወዳዲቦም ግቡእ ስራሖም ጀመሩ። ኣብ መፋርቕ ሰብዓታት ህ.ግ. ብዝሰፍሐን ብሓድሽን መልክዕ ኣብ ከተማታት ኤርትራን ኢትዮጵያን ንዝነበሩ ኣባላቱ ክውድብ ምስ ጀመረ ከኣ ምስቲ ሓፈሻዊ ስርዓት ኣወዳድባ ተዋሃሂዱ።

ኣብቲ ግዜ’ቲ ብዝደከመ ደረጃ’ኳ እንተዀነ ስሩዓት ተ.ሓ.ኤ.’ውን ኣብ ኢትዮጵያ ይንቀሳቀሱ ነይሮም ኢዮም። ኣብ’76 ድማ ምስ ምስላም ‘ተጋዳሊት’ ተ.ሓ.ኤ. ሳራ መኰነን ዝያዳ ተዳኺሙ። ሳራ መኰነን ሕማቕ ኣብነት ደቀንስትዮ፡ (ምኽንያቱ ግቡእ መጽናዕቲ’ኳ እንተዘየሎ፡ ኣብ ታሪኽ ብረታዊ ቃልሲ ህዝቢ ኤርትራ ንጸላኢ ኢደን ዝሃባ ደቀንስትዮ ብተዛማዲ ኣዝየን ውሑዳት ኢየን ኢዩ ዚበሃል)፡ ከም ኣብ ኣስመራ ኣብ ኣዲስ ኣበባ’ውን ሓያሎ ሰባት ስሒባ ኢያ። ምሁራትን ሃብታማትን ዝርከቦም ከባቢ 15 ሰባት ተኣሲሮም።

መፋርቕ ሰብዓታት ደርግ ስልጣኑ ንኸደልድል ንኤርትራውያን ብጃምላ ይኣስርን ይቐትልን ዝነበረሉ እዋን’ዩ። ኣብ መጨረስታ’77 ካብ መቐለ 35 ዝዀኑ ኤርትራዉያን ተኣሲሮም ናብ ኣዲስ ኣበባ ተወሲዶም። ብኸመይ ተኣሲሮም ምስ ውዱባት እንታይ ምትእስሳር ነይርዎም ዝገልጽ ብዙሕ ሓበሬታ የልቦን። ብዙሓት ካባቶም ውዱባት ህ.ግ.ን ተ.ሓ.ኤ.ን ነይሮም ዝብል እምነት ግን ኣሎ። ኣብ ኣዲስ ኣበባ ንሰለሰተ ወርሒ ምስጸንሑ ኣብ መጀመርታ ’78 ኩሎም ተረሺኖም።

ቅድሚ’ዚኣቶም ኣብ ትግራይ ጸላኢ ሰፊሕ ዘመተ ብምክያድ ኤርትራዉያን መማህራንን ተሓጋገዝቲ ሓካይምን ካልኦትን ክኣስር ጀሚሩ ነይሩ። መብዛሕትኦም ንሜዳ ኣምሊጦም። ኣብርሃም ተኪኤ ጠርናፊ ስሩዓት ተ.ሓ.ኤ. ኣብ መቐለ እንዳ ጐልፎ ዝነበሮ፡ ከምኡ’ውን ካልእ ኣብርሃም (ስም ኣብኡ ዛጊት ዘይፈለጥናዮ) ተሓጋጋዚ ሓኪም ብጭካኔ ተቐቲሎም።

ብዘይካ’ዚ 14 ሰባት መብዛሕትኦም ትግራዎት ኣብ መቐለ ተኣሲሮም ንኣዲስ ኣበባ ዝተበገሱ ነይሮም። አዲስ አበባ ግን ኣይበጽሑን፡ ኣብ መንገዲ ኣብ ከባቢ ደሴ ተረሺኖም ተደርብዮም።

ኣብ ኣዲስ ኣበባ’ውን ኣብቲ ጊዘ’ቲ ዘጋጠመ ማእሰርቲ ኤርትራዉያን ሰራሕተኛታት ተለኮሚኒከሽን ነይሩ። ብ’ጥቆማ’ ድዩ ይከታተልዎም ስለዝነበሩ ብርግጽ ዚፍለጥ ኣይኰነን። ኣብ ውሽጢ ሓደ ገዛ ወረቓቕቲ ኣብ ጣውላ ተዘርጊሑ እናተመያየጡ ብጭብጢ ኢዮም ተታሒዞም።

ምኽሓድ ትርጉም ስለዘይነበሮ ውዱባት ህ.ግ. ምዃኖም ነጊሮም። እንተዀነ ምስ’ዚ ከኣ ዋላ ሓደ ካልእ ኣባል ክስሕቡ ከምዘይኰኑ ብዘየወላውል መንገዲ ብሓደ ቃል ንመርመርቶም ኣፍሊጦም።

መርመርቲ ኩሉ’ቲ ጭካነታት ፈቲኖም ምስተሓለሉ ቅድሚ ንገብረመድህን፡ ተኽለሚካኤል፡ ደበሳይ፡ የዕብዮን ብርሃነን ምቕታሎም ጽዮን ገብረንጉስ ንእትበሃል ካብኣታቶም ናጻ ለቐቑ።

ወጺኣ ምስ መን ኪትራኸብ ትፍትን፡ መን’ከ ንዓኣ ኪረኽባ ይፍትን ምክትታል ጥራይ’ዩ ዘድልዮም ነይሩ። ብድሕሪ’ዚ ተመሊስካ ምእሳራ።

እዚ ኣገባብ’ዚ ብዘኸተሎ ሳዕቤን ከኣ ፍስሓጽዮን ኣፈወርቂ ተታሒዙ። ፍስሓጽዮን ሓደ ካብቶም ኣብቲ ግዜ እቲ ማኣከላይ ሽማግለ ተባሂሎም ዝጽውዑ ዝነበሩ መራሕቲ ሓፋሽ ውዱባት ህ.ግ. ኢዩ ነይቱ። ኣይሓገዞምን ግን። ዝነግር ዓይነት ኣይነበረን።

ፍስሃጽዮን ከም ተመስገን ሃይለ ከምዚእሰር ኣቐዲሙ ይፈልጥ ነይሩ ኢዩ። ክእሰሩ ምዃኖም ዝእምት ምልክታት ነይሮም። ሰባት’ውን ቀልጢፎም ንኸምልጡ መኺሮሞም። ተመስገን

“ንሕና እንተሓለፍና ካልኦት ይቕጽልዎ ኣብ ቤት-ማእሰርቲ’ውን ክንፍተን፡ ክንተብዕ ኣለና”

ኢዩ ኢሉ። ፍስሃጽዮን ከም መራሒ መጠን፡ ሰባት ነቲ ብባህሪኡ ሓደገኛ ምስጢራዊ ስራሓት ከተማ ገዲፎም ንሜዳ ንኸይወጹ ኩሉ መስዋእቲ ምዃኑ ምርዳእን ምኽልካልን ስሪሑ ከምኡ’ውን ዝኣምነሉ መሪጹ ይብሉ ሽዑ ዝቐረብዎ።

መተሓሳሰቢ

ኣብተን ዝቐደማ ክልተ ጽሑፋት ተኽለ ተስፋማርያም ተባሂሉ ዝነበረ ተኽለ ፍስሃጽዮን ተባሂሉ ንኪንበብ ነዘኻኽር። ብዘይካ’ዚ ብዛዕባ’ዞም ኣብ መቐለ ዝተኣስሩ ኤርትራዉያን ይኹን ብዛዕባ ኣብዚ ጽሑፍ’ዚ ዝወጽእ ካልእ፡ ካብ ኣንበብቲ ተወሳኺ ሓበሬታ እንጽበ ምዃና ከነዘኻኽር ንፈቱ።

ኣብ ’77 ካብ መቐለ ተወሲዶም ኣብ ኣዲስ ኣበባ ካብ ዝተቐትሉ

1. ቦኽረጽዮን ኣብርሃ
2. ሓድጉ ሃይለ
3. ፍስሃ ገ/እግዚኣብሄር
4. ፍስሃየ ኣርኣያ
5. ኣስማማው ሓድሽ
6. ፍስሃ መንግስ
7. ኣበባ (ሰይቲ ፍስሃ መንግስ)
8. ሲስተር ኣስካሉ
9. ብስራት ዬሴፍ
10. ምሕረተኣብ ኣበድ
11. መሓመድ ታሂም
12. ኣደም ሒጎ
13. መም ኪዳነ
14. መም ኪዳነ
15. ታደሰ ሰቢኖስ
16. ረዘነ ኪዳነ
17. ብርጭቆ
18. ሂወት
19. ወዘነሽ
20. ፍረወይኒ
21. ሩቕያ

ኣብ ’77 ኣብ ኣዲስ ኣበባ ካብ ዝተቐትሉ
1. ኣብርሃ ተ/ሃዋርያት
2. ዮውሃንስ ገብሪሂወት
3. ይስሓቅ ጸጋይ

[ይቕጽል]

[Meleket]

ሓዳስ ኤርትራ 4ይ ዓመት ቍጽሪ 10 - ረቡዕ 5 ጥቅምቲ 1994 – 3ይ ገጽ

መስዋእቲ ዋጋ ሓርነት

ኤርትራዉያን ኣብ ኢትዮጵያ - ምስጢራዊ ስራሕ
ራብዓይ ክፋል
ሙሴ ኪዳነ

ኣብ ኢትዮጵያ ብፍላይ ኣብ ኣዲስ ኣበባ፡ 1978 ካብተን ቅድመኣ ወይ’ውን ድሕረኣ ዝነበራ ዓመታት ዝተፈለየት’ያ። ነዛ ዓመት’ዚኣ ሰጊሩ ን1979 ዝረኣየ መንእሰይ አዲስ አበባ ዕድለኛ’ዩ ኪበሃል ይከኣል።

እቲ እዋን ከምኡ’ውን መጨረሽታ ’77 ደርግ ነቲ ሽዑ ኣብ ኢትዮጵያ ዝነበረ ዘይርጉእ ፓለቲካዊ ሃዋህው ንምቍጽጻር ብኣረሜናዊ ተግባራቱ ናብ ዝለዓለ ጥርዙ ኣብጺሑ ንተቓወምቲ ሓይልታት ምጭፍላቕ ዝፈተነሉ ዝኸፍኣ ግዜ ኢዩ።

ነዚ ዕላማ’ዚ ንምፍጻም፡ ደርግ ሓደስቲ ኣብያተ-ማእሰርትን ምርመራን ከም ኣብያተ-ንግድ ኣብ ፈቐዶ ኩርናዓት ኣዲስ ኣበባ ከፊቱ፡ ኣብ ነፍሲ ወከፍ ከባቢ መንበሪ ኣባይቲ ነፍሲወከፍ ቀበሌ ባዕላ እትቈጻጸሮን እተመሓድሮን ቤት-ማእሰርቲ ኣቝማ፡ መብዛሕትኡ መዓስከራት ሰራዊትን ቤት ጽሕፈት ደርግን ናብ ኣብያተ-ማእሰርቲ ተቐይሩ።

ነቲ ዝወጠኖ ኣረሜናዊ ህልቂት ንምክያድ ወተሃደራት እዅላት ኣይነበሩን። ስለዚ ‘ናጻ እርምጃ’ ወይ ‘ቀይ ሽብር’ ዝብል ዘመተ አበጊሱ። እቲ ዘመተ’ቲ፡ ዝዀነ ይኹን ሰብ፡ ከም ዊንታኡ ሓሳባቱን ድልየቱን ንኻልእ ዘዀነ ይኹን ሰብ ን’ኽጥቁም፡ ከጋፍዕ፡ ክኣስርን፡ ኣሳቕዩ ክቐትልን ዘክእል ኩነታት ፈጠሩ። ኣብታ ዓመት’ቲኣ ጥራይ ኣስታት 10 ሽሕ ዚግመቱ መንእሰያት ኣዲስ ኣበባ ብዘስካሕክሕ ኣገባብ ተቐቲሎም ኣብ ፈቐዶ ጐደናታት ተደርብዮም።

ግዜ ሕንፍሽፍሽ’ዩ ነይሩ። ርዱእ ከምዝዀነ ከኣ ኤርትራውያን ቀዳሞት ዒላማታት ናይ’ዚ ዘመተ’ዚ ኰይኖም።

ኣቶ ሃይሉ ንጉሰ፡ ኣብ መፋርቕ ሰብዓታት፡ ንኣስመራን ኣዲስ ኣበባን ስርዓት ኣወዳድባ ሓፋሽ ውድባት ህ.ግ. ንምውህሃድ ካብ ኣስመራ ካብ ዝኸዱ መራሕቲ ሓደ ኢዩ። ካብዚ ግዜ’ዚ 1978፡ ኣትሒዙ ከኣ ኣብ ኣዲስ ኣበባ ንትሽዓተ ዓመታት ተኣሲሩ።

“ጸላኢ ኤርትራዉያን ንኺእሰሩን ንኪቕተሉን መምርሒ ኣመሓላሊፉ ነይሩ” ይብል ኣቶ ሃይሉ። “ንኹሎም ኤርትራውያን ኣኪብካ ምስ ዝኽትከቱ ገለ ምስጢር ክርከብ ይከኣል’ዩ” ዚብል መጐተ ነይርዎ። ስለዚ ከኣ ኤርትራዉያን ካብ ጐደናታትን ኣብያተ ጽሕፈትን ተተገፊፎም ይእሰሩ ዝነበርሉ ግዜ ኢዩ። ኤርትራዊ ምዃን ጥራይ ዘይኰነ ትግርኛ ምዝራብ’ውን ዘእስር’ዩ ነይሩ። በዚ ዝተኣስሩ ተዛረብቲ ቋቋ ትግርኛ ደቂ ወሎ ብዙሓት’ዮም።

“ኣብያተ ማእሰርቲ ቀበሌ፡ ዝዀነ ሰብ ድላዩ ንኪገብረካ ዘኽእል መምርሒ ኣገባብን ኣዛዝን ዘይነበሮ ቦታ ኢዩ። እቲ ዝወርድ ዝነበረ ዝኸፍአ ግፍዕታት ከኣ ኣብ ልዕሊ ኤርትራውያን’ዩ። ኣባላት ‘ኣብዮት ጥበቃ’ ተበራርዮም ንኤርትራዊ ቀጥቂጦም ምስ ደኸሙ፡ ነቲ ተግባር ብኻልኦት እሱራት ተቓወምቲ ናይ’ቲ ስርዓት ዝዀኑ ኢትዮጵያውያን ኢዮም ዝቕጽልዎ። እናሰሓቑ ድማ ኮፍ ኢሎም ይዕዘቡ። ካብ ኩሉ ዝኸፍኣ፡ ምሸት ምሸት ንኹላትና እሱራት ኣኪቦም ዝርሽኑ 20-30 ብሃዉሪ ከም ኣባጊዕ ይሓርዩ’ሞ፡ ‘እሰይ እሰይ ደስ ማለቱ፡ የሻዕብያ ቅጥረኛ በመንገድ ላይ ተዘርግቶ ማየቱ’ እናበልና ንክንዝምርን ንከነጣቕዕን ይግድዱና።”

ኣብቲ ኣቶ ሃይሉ ዝነበረሉ ‘ከፍተኛ 23’ ጥራይ ኣስታት 75 ኤርትራዉያን ነይሮም። ካብዚ እቶም ሰለስተ ብማህረምቲ ተቐቲሎም ኣብ ዓይኒ-ምድሪ ዝተደርበዩ ኢዮም።

ኣብ’ቲ ግዜ ሕንፍሽፍሽ’ቲ ክንደይ ኤርትራዉያን ተቐቲሎም በዓል መን’ከ ብርግጽ ንምፍላጥ ኣሸጋሪ ኢዩ። ብዘይካ’ቶም ዝእሰሩ ዝነበሩ፡ ከም ኩሎም ኢትዮጵያውያን ተረሺኖም ኣብ ጐደናታት ዝተደርበዩ፡ ንገንዘብ፡ ብጽልእን ቅንእን ካብ ፈቐዶ ከባቢታትን ኣብያተ-ጽሕፈትን ተሳሒቦም ዝተቐትሉን ደሃይ ዘጥፍኡን ብዙሓት ምዃኖም ይግመት።

ኣብ ከምዚ ዝኣመሰለ ኩነታት ውድባዊ ስራሓት ምስልሳል ይትረፍ ኤርትራዊ ምዃን ጥራይ’ውን ሓደገኛን ኣጸጋምን ምንባሩ ርዱእ’ዩ። እቲ ስራሕ ግን ብንጥፈት ይቕጽል ነይሩ። እቶም ብዝተፈላለየ ምኽንያታት ሽዑ ዝእሰሩ ዝነበሩ ኣባላት’ውን ንምስጢራቶም ብጽንዓት ሒዞም ነቲ ቀንዲ ሕመረት ናይቲ ምንቅስቓስ ዓቂቦምዎ።

ኣብ መጨረሽታ’78 ግን ነዚ ዘፍርስ ኩነታት ተፈጢሩ።

እቲ ዝነበረ ኣገባብ ኣወዳድባ ኣዝዩ ምስጢራዊ ኢዩ። ነፍስ-ወከፍ ዋህዮ ብኣርባዕተ ኣባላት ትቐውም። እቲ ራብዓይ ማለት እቲ መራሒ ናይ’ታ ዋህዮ ጥራይ ኢዩ ንካልእ ዋህዮ ዚፈልጥን ምስኣ ዝራኸብን። ኩሉ ካልእ ኣባል ንኣባላት ዋህዩኡ ንሰለስተ ሰባት ጥራይ’ዩ ዚፈልጥ። ኩሉ ሰብ ግን ሓደ ኣይኰነን። ንኪስለፍ ንሜዳ ኪኸይድ ስለዝዀነ መራሕቲ ካብን ናብን ንጡፋት ኣባላት ዝልእክዎን ከም መራኸቢ መስመር ዝጥቀምሉን ዝነበሩ ውልቀ-ሰብ ድሕሪ ሰለስተ ዓመት ካብ ሜዳ ‘ተመሊሱ’ ስለ ዝኸድዐ ከኣ፡ ኣብ ብዙሕ ኣብነታት፡ ክሳብ ዝተሓተ ደረጃ ስለዝጨማለቑ፡ ንኹሎም’ቶም ዝፈልጦም ናብ ኣፍ ጸላኢ ኣእትይዎም።
ገለ’ኳ እንተምለጠ አርብዓ ዝኰኑ መራሕትን ንጡፋት ኣባላትን ተኣሲሮም። ንማእሰርቶም ከእ ብትብኣትን ሓበንን ተቐቢሎም። ንተሽዓተ ወርሒ ምሉእ ኣካላውን ስነኣእምሯውን ስቅያት ዝነበሮ ምርመራ’ኳ እንተኣሕለፉ፡ ዝያዳ ሻቕሎቶም ብዛዕባ ገዛእ-ርእሶም ዘይኰነ ብዛዕባ ኩነታት ሰውራ ኢዩ ነይሩ።

“ድሕሪ ምዝላቕ ደቀምሓረ ኢና ተኣሲርና። ብድሕሪ’ዚ ኩነታት ክንከታተል ኣይከኣልናን። ከረን ብጸላኢ ተታሒዛ ምስ ሰማዕና፡ እቶም መርመርቲ ከኣ ሓደ ሰብ ይኹን መሳርያ ከምዘይተረፈ ገይሮም ምስ ነገሩና ምሉእ ለይቲ ተሓቢእና ክንበኪ ንሓድር ኔርና” ይብል ኣቶ ኣባዲ ሃይለ።

ኣብ መጀመርያ ’79 ከኣ፡ መብዛሕትኦም ኣባላት ማእከላይ ሽማግለ ዝነበሩ ሸሞንተ ሰባት - ኣቐዲሙ ምስ ሰራሕተኛታት ቴሌኮሚኒከሽን ተኣሲሩ መንነቱን ብጾቱን ዓቂቡ ዝነበረ ፍስሃጽዮን ኣፈወርቂ (ብኤለክትሪካል ኢንጂነሪን ባችለር)፡ ጴጥሮስ ወልደግዮርጊስ (ብስታትስቲክስ ባችለር)፡ ሃይለስላሰ ገብረዝጊ (ብከሚስትሪ ማስተርስ)፡ ሰሎሞን በርሀ (ብሕጊ ባችለር)፡ ፍስሃየ ሃብተኣብ (ብኬምስትሪ ዲፕሎም) መልአከ በላይ (ብስታትስቲክስ ባችለር)፡ ተስፋይ ኣረስዕ (5ይ ዓመት ተማሃራይ ኢንጅነሪን) - ብግፍዒ ተረሺኖም።

ካብቲ ተኣሲሮምሉ ዝነበሩ ቦታ ንኪርሸኑ ኪውሰዱ ከለዉ

“ዕላማናን ቃልስናን ክቡር’ዩ። ንሕና ቀንዴል ክንከውን ኢና። ካብ ኣረሜናውያን እንጽበዮ ፍትሒ ከኣ የለን”

እናበሉ ክሳዶም ኣቕኒዖም ከምዝኸዱ ምስኦም ዝነበሩ ኢትዮጵያውያን ናይ ፖለቲካ እሱራት ይገልጹ።

[ይቕጽል]