ወግዓዊ ስነ-ስርዓት መኽፈቲ ሃገራዊ ፈስቲቫል ኤርትራ 2025
ዮሴፍ ሃይለማርያም @shabait
Aug 10, 2025
መኣዲ ሓድነትናን ባህልናን ዝኾነ ሃገራዊ ፈስቲቫል ኤርትራ 2025፡ ትማሊ 9 ነሓሰ ብውዕዉዕ መንፈስ ኣብ ቀጽሪ ኤክስፖ ተኸፊቱ ኣሎ። ካብ ውሽጥን ወጻእን ዝመጽኡ ዜጋታት ድማ፡ ምስ ደቆም፡ ስድራቤቶምን ፈተውቶምን ብምዃን፡ እናተዘዋወሩ ይዕዘብዎ ኣለዉ።
እቲ ልክዕ ሰዓት 9 ናይ ንግሆ ክቡር ፕረዚደንት ኢሳይያስ ኣፈወርቂ ሪበን ቈሪጹ ዝኸፈቶ ሃገራዊ ፈስቲቫል፡ ክሳብ 17 ነሓሰ ዝቕጽል ኮይኑ፡ ብርክት ዝበሉ ብዞባታት ዝቐርቡ ዝተፈላለዩ ስነ-ጥበባዊ ምርኢት፡ መሸጣ ዝተፈላለዩ ኣቚሑ (ባዛር)፡ ምርኢት መሸጣ መጻሕፍቲ፡ ምርኢት ምህዞን ሰንዓን፡ ከም ቅብኣ፡ ቅርጻን ካልእን ዝኣመሰሉ ስነ ጥበባዊ ስራሓት፡ ሰሚናራት፡ ምርኢት ኣብ ሃገር ዝፈርዩ ፊልምታት ወዘተ ዘጠቓለለ እዩ።
ክብር ፕረዚደንት ኢሳይያስ፡ ብሚኒስተራት፡ ሓለፍቲ ግንባር፡ ኣዘዝቲ ሰራዊት፡ ኣመሓደርቲ ዞባታት፡ ኣብ ኤርትራ ዝመደበሮም ዲፕሎማሰኛታትን ካልኦት ዕዱማት ኣጋይሽን ተዓጂቡ ሪበን ምስ ቈረጸ፡ ንባህልን ኣለባብሳን ብሄራትና ዘንጸባርቑ ብየማኑን ጸጋሙን መስርዕ ዝሓዙ ብኣማኢት ዝቑጸሩ ወከልቲ ብሄራት መንእሰያት ድማ፡ ምዉቕ ሰላምታ፡ ዕልልታ ጣቕዒትን ደርፍን ኣቕሪቦምሉ። ፕረዚደንት ኢሳይያስ፡ ድማ ኣእዳዉ ኣሰንዩ ሰላምታን ፍሽኽታን እናለገሰሎም ናብ’ቲ ቀዲሙ ኣብ ኣደራሻት ተዳልዩ ዝነበረ ምርኢት ፍርያት ዞባታት ኣምሪሑ።
ትሕዝቶታቶምን ምድላዋቶምን ኣጻፊፎም፡ ንፍርያቶምን ትካላቶምን ዝውክል ማልያታት ዝተኸድኑ ኣቕረብቲ ድማ ንኽቡር ፕረዚደንትን ላዕለዎት ሓለፍትን፡ ብቪድዮን ካልእን ዝተሰነየ ሰፊሕ መግለጽን መብርሂን ሂቦምዎም። ክቡር ፕረዚደንት ድማ፡ ነቲ ኣብ ሰለስተ ኣደራሻት ቀሪቡ ዘሎ ፍርያት ሽዱሽተ ዞባታት፡ ንከባቢ ክልተ ስዓት ዝኣክል እኹል ግዜን ኣቓልቦን እናሃበን ተወሳኺ ኣማእዛኒ ሓሳባት እናለገሰን ሓደ ብሓደ ተዓዚቡዎ።
እቲ መግለጽን ሓበሬታትን፡ ዳርጋ ምሉእ ብምሉእ በቶም ቀለስቲ ምዕባለ ሃገር ኮይኖም፡ ኣብ ኩሉ ጽላታት ልምዓትን መኸተን ተዋፊሮም ዝርከቡ ሰብ ሞያ መንእስያት ይቐርብ ብምንባሩ፡ ኣድማዕነት ናይ’ቲ ሞያ ዝዓጠቑ ተረከብቲ ሕድሪ መንእሰያት ኣብ ምፍራይ ዝካየድ ዘሎ ሓያል ጻዕርን ወፍርን ኣጉሊሑ ዘርኢ እዩ።
ዞባታት ኤርትራ፡ ብፍሉይ ዝልለያሉ ፍርያት ወይ ባህርያዊ ሃብቲ ሒዘን ኣብቲ ፈስቲቫል ቀሪበን ኣለዋ። ነቲ ኣብ ነፍሲ- ወከፈን ዝርከብ ፍሉይ ጸጋ ኣድሚቑ ዘንጸባርቕ ትሕዝቶ ዘለዎ ፍርያት ሒዘን ብምቕራበን ድማ፡ ንተዓዘብቲ ዝያዳ መሰጥትን ሰሓብትን፡ ካብን ናብን ዞባ እናተሳገርካ እንክትዕዘበን ፍጹም ዘየሰልኪ ንጥፈታት ገይሩዎ ኣሎ።
ገለ ካብ’ቲ ኣብ ዞባ ደቡብ ቀሪቡ ዘሎ ፍርያት፡ ንኣገዳስነትን መዓላን ናይ’ቲ ብዙሕ ረብሓን መኣዛዊ ትሕዝቶን ዘለዎ ባልደንጓ ዱባን፡ ምምሕያሽ ዘርኢ ዕፉንን ኣገዳስነቱን፣ ያታዊ መግቢ ብሄረ ትግርኛን ሳሆን፡ ንኽልተ ዞባታትን ኣርባዕተ ንኡሳን ዞባታትን ዘራኽብ መስርሕ ስትራተጂያዊ ጽርግያ ጎሎ ታልሃ-ናርዐ፡ ብመልክዕ ‘ንርቃሕ’ን ካልእን ዝካየድ ሕርሻ ገደና፡ ርኽበት ዓታሩ፡ ኣምባርን ካልእ ስልምታትን 11 ጥንታዊ ዓስከሬን ኣብ ማዓል ኣርሓ ይርከቡ።
ኣብ ትሕቲ ዝብል ቴማ ዝቐረበ ፍርያት ዞባ ዓንሰባ፡ ብሄራት ትግርኛ፡ ትግረን ብሌንን ዝሰፍርዋ ዞባ ዓንሰባ መሶብ ቱሪዝማዊ ጸጋታት ኤርትራ ምዃና ዘንጸባርቑ እዮም። ንትሕተ-ቅርጺ ናይ’ቲ ዞባ፡ ንቕዲ ኣርቲደኮ ከተማ ከረን፡ ንገድላዊ ኣሰራትን መግዛእታዊ ግፍዕታትን ዝገልጽ፣ ኣብ’ቲ ዞባ ዝርከቡ ዓይነታት ፍሩታታትን ኣሕምልትን ዓይነት ገረብን ካልእን ዘንጸባርቑ ምርኢት ተዳልዮም ኣለዉ።ዓንሰባ ፈለግ ምዕባለ
ኣብ ኣደራሽ ናይ’ቲ፡
ምዃኑ ዝግለጽ ዞባ ደቡባዊ ቀይሕ ባሕሪ ድማ፡ ምሉእ ብምሉእ ንንጥፈታት ባሕሪ ዘንጸባርቕ ፍርያት ቀሪቡ ኣሎ።ሃብታም ብባሕሪ ሃብታም ብምድሪ
ዝተፈላለየ ናውቲ ምግፋፍ ዓሳ፡ ድሕነት ባሕሪን ፍርያት ባሕሪን፡ ከምኡ ድማ ዓይነታት ዓሳን ንጥፈታት ምግፋፍ ዓሳን ወዘተ ዝሕብር ምርኢት፡ ካብ’ቲ ተዳልዩ ዝርከብ እዩ።
ቀጺልና፡ ናብቲ ምርኢት ፈርያት ናይ’ቲ
እናተባህለ ዝግለጽ ዞባ ጋሽ ባርካ ኢና ኣምሪሕና።መሶብ ሃገር
ኣብ’ቲ ዞባ ዝፈሪ ዝተፈላለየ ዓይነታት ኣእካል፡ ፍረታት፡ ፍሩታታት፡ ጥረታት፡ ላኻን ውጻኢት ላኻን ወዘተ፣ ከምኡ’ውን ንጽላት ሕርሻ፡ ህንጻዊ ልምዓት፡ ማሕበራዊ ኣገልግሎት፡ ሕዛእቲ ሓራምዝ፡ ባህልን ስፖርትን፡ ቱሪዝማዊ ጸጋታትን ካልእን ዝሕብር ምርኢት ከኣ ብሰፊሑ ተኣንጊዱ ይርከብ።
ኣብ’ቲ
ብዝብል ቴማ ዝቐረበ ፍርያት ዞባ ሰሜናዊ ቀይሕ ባሕሪ ከኣ፡ ንልምዓታዊ ንጥፈታት፡ ማሕበራዊ ኣገልግሎታት፡ ጽላት ሕርሻ፡ ቱሪዝም፡ ዓይነታት ዓሳ፡ ታሪኻዊ ቦታታት ካልእን ብቪድዮን ካልእን ኣገባብ ተጠቒሞም ኣቕሪቦም ኣለዉ።ምድሪ ባሕርና ልኡላውነትና
ብዘይካ’ዚ ኣብ’ቲ ኣደራሽ፡ ብዕድመ ዓበይትን ንእሽቱን ዜጋታት ዝተደርሱን ዝተተርጐሙን መጻሕፍቲ ንምርኢት ቀሪቦም፣ ክቡር ፕረዚደንት’ውን ሓደ ብሓደ እናተዛወረ ተዓዚቡዎም። ብኣባላት ሓይልታት ምክልኻል ኤርትራ ንዝካየድ ዘሎ መኸተን ጽንዓትን፡ ልምዓትን ህንጸትን ዝገልጽ መሳጥን ገላጽን ስእላዊ ኤግዚብሽን’ውን ብሓይልታት ምክልኻል ኤርትራ ቀሪቡ። ኣብ’ቲ ኣደራሽ፡ ዘይነጽፍ ፍርያትን ትሕዝቶን ኮርፖረሽን ዘራእትን ጥሪትን’ውን፡ ነቲ ቦታ መሊኡዎን ናይ ህዝቢ ኣቓልቦ ዝሰሓበን ኮይኑ፡ ክቡር ፕረዚደትን’ውን ግዜ ሂቡ ተዓዚቡዎ።
ብድሕሪ’ዚ ፕረዚደንት ኢሳይያስ፡ ናብ ቁሸት ዞባታት ኣምሪሑ፣ ብደርፍን ሳዕስዒትን ክልሃዩ ዝጸንሑዎ ጉጅለታት ባህሊ ናይ ሽዱሽቲአን ዞባታት ድማ፡ ብድሙቕ ጓይላን ትልሂትን ተቐቢሎሞ። ዘድሊ ምትብባዕን ሰላምታን ምስ ለገሰሎም፡ ናብ’ቲ ኣብ ኣደራሽ ዞባ ደቡብ ተዳልዩ ዝነበረ ናይ ቁርሲ እንግዶት ኣምሪሑ።
ፈስቲቫል ኤርትራ፡ ንደቂ ሃገር ጥራይ ዘይኮነ ኣቓልቦ ወጻእተኛታት’ውን ወትሩ ዝስሕብ ድሙቕ ምርኢት እዩ። ንገለ ካብ ወጻእተኛታት ተሳተፍቲ፡ ርእይቶኦም ክህቡና ተወኪስናዮም ነይርና። ፈጻሚ ጉዳያት ኤምባሲ ደቡብ ሱዳን ኣብ ኤርትራ ሚስተር ጆሰፍ ማመየር፡ ንፈስቲቫል ኤርትራ 2025 ክገልጾ እንከሎ፡ ብዝግባእ ዝተወደበን መሳጥን ኮይኑ ከምዝረኸቦ፣ ብባህሊ ኤርትራውያን ከም ዝተደነቐ፣ ከምኡ’ውን ዝትግበር ዘሎ ልምዓታዊ ንጥፈታት፡ ሕርሻዊ ፍርያት፡ ሰንዓን ምህዞን ብጽቡቕ ይግስግስ ስለ ዘሎ፡ ናህሩ ከየቋረጸ ብዓጸፋ ክቕጽል ተላብዩ።
ናብ ኤርትራ ካብ ዝመጽእ ሰለስተ ወርሒ ጥራይ ገይሩ ዝርከብ ኣምባሳደር ንግስነት ስዑድ ዓረብ ኣብ ኤርትራ መሽዓል ኣል ሮቒ ብወገኑ፡
ኢሉ።ኣብ’ዚ ፈስቲቫል ምስታፈይ ሕጉስ’የ፣ ደስ ዘብል ባህሊ ኤርትራውያንን ፍርያት ኢደ ጥበብን ድማ ተዓዚበ። ካልእ፡ ኣብ ቀጽሪ ኤክስፖ፡ ሓድነትን ፍቕርን ኤርትራውያን ብግብሪ ርእየያ
ኣብ ኤርትራ ዝመደበሮም ዲፕሎማሰኛታት፡ ኣብ ከምዚ ዓይነት ፈስቲቫል ምስታፎም፡ ብዛዕባ ኤርትራ ብቐረባ ኣፍልጦ ክረኽቡ ዝገብርን ኣብ ዝምድና ሓጋዝን ምዃኑ ከኣ ሓቢሩ።
እቲ ኣብ ቀጽሪ ኤክስፖ ዝተኸፍተ ምልክት ሓድነትን ጥምረትን ህዝቢ ኤርትራ ዝኾነ ፈስቲቫል ኤርትራ፡ ክሳብ 17 ነሓሰ ክእንገድ እዩ።
