እዞም ክልተ ተጋሩ ምእንቲ ረብሓ ሓፋሽ ህዝቦም፡ ፍልልዮም ኣወንዚፎም፡ ሕድሕድ ክጻመዱ እምበር ሕድሕድ ኪኮሳተሩ ኣይምተገብኤን።
እዚ ናትናኤል ዝተባህለ ወዲ፡ ከም ኣወል ስዒድ ናብ ታሕዲድን ምጕብዕባዕን ዝኣንፈቱ ኣካያዳኡ፡ ብርግጽ ጸገም ናይ ኣተዓባብያ ከምዘለዎ መረድኢ ኢዩ። ጉዳይ ሕወሓት ንኡኡ ንናትናኤል ጥራይ ዚምልከት ንሃይለ ኣረፋይነ ግን ከምዘይምልከት ጌሩ ምዝራቡ ርኡይ ጌጋ ኢዩ። ንሃይለ “ትም በል” ቢልካ ክትድሕል ምፍታን መርኣያ ድኽነት ኣተሓሳስባኻ ኢዩ በልዎ። ከምቲ ኣወል ስዒድ ምስ ብርሃነ ዋጣ ኣብ ዚገበሮ ዕላል፡ ንውርይቲ ትግራወይቲ ዋዕሮ ጋዜጠይና መድህን ገብረስላሰ ኪድሕልን ከጕባዕብዓላን ዚፈተኖ ማለት ኢዩ።
ሃይለ ኣረፋይነ፡ ንናትናኤል ንምውቃስ ዘልዓልካዮ ሓሳባት ፍሹልን ዝንቡዕን ኢዩ። ንነብስኻ ወዲ ተቓለስቲን ሓው ተጋደልትን ጌርካ ስኢልካ፡ ንኡኡ ድማ ወዲ ደርጊ ጌርካ ክትኹንኖ ፈቲንካ። ናትናኤል ወለዱ ኣዝማዱ ኣሕዋቱ ምስ ሕወሓት ዀነ ምስቶም ምእንቲ ትግራይ ደው ኢልና ኣለና ዝብሉ ካልኦት ውድባት ርኽብ ይሃልዎ ኣይሃልዎ ትፈልጦ ነገር የሎን። ወዲ ደርጊ ቢልካ ንናትናኤል ክተቆናጽቦ ፈቲንካ። ደቂ ደርጊ ምእንቲ ትግራይ ኪጋደሉ ኣይኽእሉን ዲዮም? ደርጊ ምስ ደቆምን ደቂ ደቆምን ዲዮም ተዀኒኖም? ኣብ ኤርትራና፡ ወለዶም “ሕብረትን አንድነትን” ዚብሉ ዚነበሩ ዜጋታት፡ ምእንቲ ናጽነት ኤርትራ በሽሓት ተሰሊፎም ንናጽነት ኤርትራ ክዉኡን ኣብ ምግባር እጃሞም ዝገበሩ ወርቃዊ ደሞም ብምፍሳስ ታሪኽ ዝጸሐፉ ብዙሓት ኢዮም። ሰባት ብመትከሎም እምበር ብመትከል ወለዶም ኣይምዘኑን።
ሓደ ሰብ ወለዱ ተቃለስትን ተጋደልትን ስለዝኰኑ ንሱ ተቃላሳይን ተጋዳላይን ኢዩ ክትብሎ ኣይትኽእልን ኢኻ። ንኣብነት ሊላይ ሃይለማርያም ወዶም ነቶም መራሒ ቀዳማይ ወያነ ዚነበሩ ተጋዳላይ ወይ ተቃላሳይ ሃይለማርያም ረዳ ኢዩ። ኣብኡ ክንደይ መስገደል ሰጊሮም ምእንቲ ህዝቢ ትግራይ፡ ንሱ’ከ እንታይ ዓይነት መርገጽ ኣለዎ ንርእዮ ኣሎና።
ብተመሳሳሊ መገዲ መብዛሕትኦም ቀዳሞት ተጋደልቲ ሕወሓት ደቂ መሳፍንቲ ከምዝነበሩ ይፍለጥ ኢዩ። እንተዀነ ግዳ መስፍናዊ ኣተሓሳስባኦም ገዲፎም ምእንቲ ሓፋሽ ኪጥዕሞ ቢሎም ዝገበርዎ ገድሊን ዝሰርሕዎ ታሪኽን ኩልና ንፈልጦ ኢዩ። ምስ ኢዲዩ ኪስለፉ እትጽበዮም ክንደይ ደቂ ‘ቀኛዝማች’ን ‘ፊተውራሪ’ን ‘ደጃዝማች’ን ምስ ሕወሓት ተሰሊፎም ታሪኽ ብወርቃዊ ደሞም ጽሒፎም ኢዮም።
ክንዲዝዀነ ነፍስወከፍ ሰብ ብግብሩ እምበር ብግብሪ ወለዱን ኣሕዋቱን ኣሓቱን ኣይዀነን ኪምዘን ዚግብኦ። ንስኻዉን ብተጋደልቲ ወለድኻ ወይ ብተጋደልቲ ኣሕዋትካን ኣሓትካን ዘይዀነ፡ ባዕልኻ ብኅልናኻ ሕዝቢ ትግራይ ምእንቲ ኪርህዎ ቢልካ ብእትገብሮ ዘይሕለል ጻዕርኻን ቃልስኻን ራኢኻን ኢኻ ክትምዘን ዚግባእ። እቲ ብመገዲ ደደቢት ሚዲያ እትገብሮ ቅንዕና ዝተሓንገጠ ቃልስኻ ድማ ንራህዋ ሕዝቢ ትግራይ እትገብሮ ዘይሕለል ቃልስኻ ሕያዉ ምስኽር ኢዩ። ካልእ ምስኽር ኣዬድልዬኻን ኢዩ።
ርግጽ ኢዩ፡ ንህዝቢ ትግራይን ንምምስራት ሃገረ ትግራይ ዘለኻ ‘ራእይ’ ዚድነቕን ዚነኣድን እንተዀነኳ፡ ንነፍስኻ ልዕሊ ዓቐን ኣተዓባቢኻን ሰሪዕኻን እትገብሮ ጭደራን እንደራን ንካልኦት ካብቲ ናትካ ኣተሓሳስባ ዝተፈልዩ ሰባት ክተቆናጽብ እትኸዶ ካድሪያዊ ‘ጽንፈይና’ ኣካይዳካ ፍረ ኣልቦ ኢዩ። ንስኻ እቲ ንሰራዊት ሃገረ ኤርትራ ኣራዊት እናበልካ እትጽውዕ ካድር፡ ንስኻ ብትዕግስቱን ጸዋርነቱን ዚልለ ተጋዳላይ ኤርትራ “ጀኖሳይደር” እትብል ካድር፡ ምሕዝነት ምስ ሃገርና ንክትገብርስ ያኢ ‘ሰነድ’ ደሊኻ። ግርም እባ ኣሽኻዕላል፡ ቀይሕ ምንጻፍዉን ደሊካ ናብ ሰፈር ሰማእታት ናብ ሃገረ ኤርትራ ንምእታዉ። ትደልዮ’ሞ የዘንግዓኻ ዚበሃል ከምዚ ናትካ ምስተረኽበ ኢዩ። ንህዝቢ ኤርትራ እንታይ ስለዝገበርካሉን እንታይ ስለዝዀንካ’ከ ኢዩ “ቀይሕ ምንጻፍ” ኪግበረልካ? ወዳጀ ሕንኸት ዚበሃል ነገር ፍለጥ እባ። ናይ ቀይሕ ምንጻፍ ባህጊ እንተልዩካ ግን ክትረኽቦ እትክእል ሕወሓት ወይ ህዝቢ ትግራይ፡ ንሃገረ ትግራይ ክምስርቱ ምስከኣሉ ጥራይ ይመስለና። ኣብ ካልእ ስፍራ ግን “ቀይሕ ምንጻፍ” ትሓልሞ እምበር ክትረኽቦ ኣይትኽእልን።
መጻኢ ሰላም ህዝብታትና ዘገድሰካ እንተዀይኑ፡ ቅድሚ ትግባረ ውዕል ፕሪቶርያ ንትግባረ ውዕል ኣልጀርስን ብያነ ሄግን ትግሃሉ፡ ምኽንያቱ ንሱ ይቕድም። እወ ፈለማ ኣብ ፊዚካል ዲማርኼሽን ርገጽ። ድሕሪ ትግባረ ፊዚካል ዲማርኼስን ድማ ኣብ ርክብ ህዝብታት ርገጽ። ድሕሪኡ ድማ ኣብ ርኽብ ውድባትን መንግስታትን ርገጽ። ስታሊን ሰላሕ ቢሉ ኣብዚ መስመር ዝረገጸ ይመስል። ምእንቲ ሰላም ህዝብታትና ቀልጢፉ ኣብ ግብሪ ኪውዕል፡ ስታሊን ንነብሱ ኣተዓባብዩ ቀይሕ ምንጻፍ ኣይተጸበዬን። ሰላሕ ቢሉ ስርሑ ይሰርሕ ኣሎ። ንስኻዉን ንነፍስኻ ምትዕብባይ ዚዓብሰልካ ነገር ዬብሉን። ትሕትና ይሕሸኻ።
እንተ “ስታሊን ምስ ብረዚደንት ሃገር ኤርትራ ኪራኸብ ኢዩ’ሞ፡ ሕቶ ስደዱለይ” ዝበልካዮ፡ ሕቶ ሓፋሽ ምላሽ ዚረኽብ እንተዀይኑስ በጪሑኻስ ሰዲድካሉ ክትከውን ተስፋ ንገብር። “ካብ ኤርትራ ምስ ተመልሱ ንስታሊንን ንናትናኤልን ኣብ ደደቢት ሚዲያ ኣቕሪብና ቃለመሕትት ክንገብረሎም ኢና” ቢልካና ነቢርካ። ናትናኤል ናትካ ሕቶ ንምምላስ ብቝዕ ከምዘይዀነ ኣነጺሩልና ኣሎ። እንተ ስታሊን ንሕቶታትካ ድልዊ ዀይኑ ብሕቶ ክተዋጥሮን ምላሹ ክንሰምዕን ኣይምጸላእናን፤ ስለምንታይ መገዲ ሰላም ብምብህሃል ጥራይ እምበር ብምውጣይን ምውጥይጣይን ክዉን ኣይትኸውንን ኢያ ዚብል ኢዩ ርድኢትና ንሕና ኤርትራዉያን ደያኑ ማእከልን መስመርን።
እቲ እንኮን ፋልማይን መገዲ “ጽምዶ” ትግባረ ፊዚካል ዲማርኼሽን ኢዩ!
ሽሕ እኳ ቨርቺዋል ዲማርኼሽን ኣገዳሲ እንተዀነ፡ ኣብ ዶባት ናይ ዝርከቡ ህዝብታትና ደረጃ ንቕሓትን ትምህርቲን ኣብ ግምት ብምእታው፡ ልዕሊ ቨርቺዋል ዲማርኼሽን፡ ዜጋታትና ዝርእይዎን ዚድሕስስዎን ምልክት ኣብ ዶብ የድልዮም። ንሱ ድማ ነባሪ ህያው ህጋዊ ሰነድ ናይ ክልቲኡ ህዝብታት ኪኸውን ይኽእል። ስዒቡ ዚመጽእ ፍቕሪ ህዝብታት ድማ ንውዕል ፕሪቶርያ ኮነ ንካልእ ግሩም መንጠሪ ባይታን መንጸፍን ከምዚኸውን ንግምት፡ ንምባል’ኡ በቲ ልሙድ ኤርትራዊ ጭዉነት ሓበንን ፍናንን።
ክብሪ ንሰማእታት ዞባና! . . . ሰላም ንህዝብታትና! . . . ልቦና ንመራሕትና! . . . ትብዓት ንጋዜጠይናታትና! . . . ሓርነት ንቕዩዳትና! . . . . ጥሉል ክራማት ንሓረስቶትና! እናተመነና . . . !
