ኤርትራ- ተሰማዒት ሃገር ኣብ ቀርኒ ኣፍሪቃ
ዞባዊ ተሰማዕነት፡ ኣብቲ እትርከበሉ ዞባ ጽልዋ ክትፈጥርን ልቕየት(leverage) ክህልወካን ኣገዳሲ ረቂቕ ሓይሊ ኢዩ። ጸላዊ ወይ ተሰማዒ ንምዃን ግን ኣብቲ ዞባ ካብ ዝርከባ ሃገራት ዝሓየልካ ምዃን ጥራይ እኹል ኣይኮነን። ብሓይልኻ ትፍራሕ ጥራይ ዘይኮነስ ብእተሰላስሎ ሓሳባትን ብእትኽተሎ መትከላትን” ውን ተበሃግን ተኣማንን ክትከውን ኣለካ። ኣብ ዞባዊ ምርግጋእ”ውን ብንጥፈት ናይ ምውሳእ ድሌትን ቅሩብነትን ከተርኢ ይግባእ። ነዚ ሓሳብ”ዚ ከም መበገሲ ወሲድና፡ ኤርትራ ኣብ ዞባ ቀርኒ ኣፍሪቃ ጸላዊት ዘይትጉሰ ሃገር ዝኾነትሉ ምክንያት ንርኣዮ።
ዞባ ቀርኒ ኣፍሪቃ ብዙሓት ሓይልታት ዝቃጸጻሉ ተሃራፊ ቦታ’ዩ። ቀላጽም ኣለና ዝብላ ሃገራት ኩለን እግረን ኣብዚ ዞባ ኣንቢረን ኣለዋ። ኣብ መብዛሕትአን ሃገራት ዞባና ብዘይካ ኣብ ኤርትራ ቁጽሩ ዝፈላለ መዓስከር ሓያላት ሃገራት ተኸፊቱ ኣሎ። ኤርትራ ንዶባታን ውሽጣዊ ጸጥታኣን ዝሕሉ ህዝባዊ ሓይሊ ክትሃንጽ ብምኽኣላ ጸጥታኣን ልኡላውነታን ንምውሓስ ናብ ካልእ ቁሊሕ ዘይትብል እንኮ ሃገር’ያ። ካብዚ ሓሊፋ፡ ሃገራት ዞባና ናይ ምፍራስ ዕላማ ሒዙ ዝተላዕለ ዝተፈላለየ ግርጭታት ንምእዳብ፡ ህዝብታት ኢትዮጵያ፡ ሶማልን ሱዳንን እናዘከርዎ ዝነብሩ ኣበርክቶ ክትገብር ጸኒሓ። ነቲ ዞባ ክፍውስ ዝኽእል ሓሳብ ብወግዒ ብምቕራብ ክትወስዶ ዝጸንሐት ተበግሶታት ውን ኣብቲ ዞባ ተሰማዒት ካብ ዝገብራ ረቛሒታት’ዩ። ርእሰ-ምርኮሳ፡ ኣብ ውሽጣዊ ጉዳያት ጣልቃ ዘይምእታው፡ ኣብ ዜግነት መሰረት ዝገበረ ሃገራዊ ፖለቲካ፡ ሓራ ፖለቲካዊ መስመር ወዘተ ዝኣመሰሉ ኤርትራ ክትሕብሕቦም ዝጸንሐት ሓሳባት ንቀልቢ ህዝብታት ናይቲ ዞባ ይስሕቡ ኣለዉ። “ከምዚ ኤርትራ ትገብሮ/ትኸዶ ዘላ ንግበር/ንኺድ” ዝብል ድምጽታት ይስማዕ ኣሎ። ንቕሓት ህዝብታት ዞባና ቀስብቐስ እንዳበረኸ ይመጽእ ምህላዉ ዝሕብር ከኣ ኢዩ።
ናይ መልሕቕ ሃገራት ከም ዞባዊ ሓይሊ ክጥፍጠፋ ብዓበይቲ ሓይልታት ክግበር ዝጸንሐ ናብዮት ብፍሽለት ተደምዲሙ’ዩ። ማዕረኡ ንኤርትራ ቀይድካ ንምሓዝ ክእለም ዝጸንሐ ፍሕሶ ከኣ ተበቲኑ። ኤርትራ ከይተቐላብዐት ተጸሚማ ክትሓኹሮ ዝጸንሐት ገደል ወዲኣ መሰስ ኢላ ኣላ። እዚ ቦታ’ዚ ተሓዚኡ ንኤርትራ ክጽበ ዝጸንሐ ቦታ ከም ዘይኮነ ክፍለጥ ይግባእ። ነዚ ብገድልን መስዋእትን ዝበጻሕናዮ ደረጃ ንምዕቃብ ንኤርትራውያን ልዑል ትኹረት ክሓተና እዩ። ስለዚ ሓይልና ከነሰስስን፡ ነዃላትና ክንዓብስ፡ ዓቕልና ከነዛይድ፡ ሓያል ቁጠባ ክንሃንጽ፡ ብስነፍልጠትን ቴክኖሎጅን ክንራቐቕ፡ እጅገና ምስብሳብ የድሊ ። ተሰማዕነትና ክዓቢ ኣብ ዞባዊ ሰላምን ርግኣትን እጃምና ከነበርክት፡ ንዘዋህለልናዮ ሓይሊ መመሊስና ክንምልኣሉ ኣለና።
ርሑስ በዓላት ሓድሽ ዓመት!
