MOI:
ፕረዚደንት ኢሳይያስን ፕረዚደንት ሓሰን ሼኽ ማሕሙድን፡ ርክብ ኣካዪዶም።
ፕረዚደንት ኢሳይያስ ኣፈወርቂን ፕረዚደንት ፈደራላዊት ሪፓብሊክ ሶማል ሓሰን ሼኽ ማሕሙድን፡ ሎሚ ኣማስይኦም ርክብ ኣካዪዶም።
ኣብ’ቲ ኣብ ኣዳራሽ ሃገር ዝተገብረ ርክብ፡ ፕረዚደንት ኢሳይያስን ፕረዚደንት ሓሰንን፡ ኣብ ምድንፋዕ ክልተኣዊ ዝምድና፡ ከምኡ’ውን ሓባራዊ ኣገዳስነት ኣብ ዘለዎም ዞባዊ ጉዳያትን ኣህጉራዊ ምዕባለታትን ዘትዮም።
ኣብ’ቲ ኣካል ቀጻሊ ናይ ምምኽኻር ርክባት ዝዀነ ዘተ፡ ክልቲኦም መራሕቲ፡ ሶማል ከም ዓባይ ሃገር ኣብ ቀርኒ ኣፍሪቃ መጠን፡ ርግኣታ ምርግጋጽን ምውሓስን፡ ንሰላምን ጸጥታን ቀርኒ ኣፍሪቃ ኣገዳሲ ከምዝዀነ ብምግንዛብ፡ ነዚ ኣብ ዝሕግዝ ዛዕባታት ብዕምቈት ተዘራሪቦም።
ፕረዚደንት ኢሳይያስ፡ እቲ ዞባ ካብ’ቲ ጠንቂ ዕግርግርን ሕንፍሽፍሽን ዝኸውን ኣጀንዳታት ሒዙ ዝመጽእ ግዳማዊ ምትእትታዋት ናጻ ኰይኑ፡ ጉዳያቱ ባዕሉ ከመሓድርን ክፈትሕን ኣገዳሲ ከምዝዀነ ኣገንዚቡ።
ኣብ መንጎ ኤርትራ፡ ሶማልን ግብጽን ኣብ ኣስመራ ዝተበጽሐ ስሉሳዊ ስምምዕ፡ ብቐንዱ ነቲ ዝጸንሐ ታሪኻዊ ዝምድናታትን ምትሕግጋዝን ንምድንፋዕ፣ ሰላምን ርግኣትን ሶማል ንምውሓስ፣ ብሰፊሑ ድማ ንረብሓታት ዞባታት ቀርኒ ኣፍሪቃን ቀይሕ ባሕሪን ዘገልግል እምበር ካልእ ዕላማ ከምዘይብሉ፡ ፕረዚደንት ኢሳይያስ ኣስሚሩሉ።
ፕረዚደንት ሓሰን ንኤሪና ኣብ ዝሃቦ ሓበሬታ፡ ርግኣት ሶማል ንምውሓስ መንግስቲ ኤርትራ ኣብ ህንጸት ሃገራዊ ሰራዊትን ልኡላዊ ትካላትን ዓቢ ኣበርክቶ ይገብር ከምዘሎ፣ እዚ ድማ ኣብ ርግኣት ሶማልን ቀርኒ ኣፍሪቃን ልዑል ተራ ከምዘለዎ ብምሕባር፡ ሽርክነታዊ ጽምዶ ዝያዳ ንምዕዛዝ ኣብ ዝካየድ ጻዕሪ፡ ካብ ሃብታም ተመክሮ ፕረዚደንት ኢሳይያስ ብዙሕ ትምህርቲ ከምዝቐሰመ ኣረዲኡ።
ኣብ’ቲ ርክብ፡ ሚኒስተር ጉዳያት ወጻኢ ኣቶ ዑስማን ሳልሕ ተረኺቡ ነይሩ።
ፕረዚደንት ሓሰን ሼኽ ማሕሙድ፡ ናይ ስራሕ ምብጻሕ ንምፍጻም ትማሊ ኣብ ሰዓታት ድሕሪ-ቐትሪ’ዩ ኣስመራ ኣትዩ።
ፕረዚደንት ኢሳይያስ ኣፈወርቂ ድማ፡ ኣብ ኣህጉራዊ መዓርፎ ነፈርቲ ኣስመራ፡ ብናይ ክብሪ ሰልፊ ተቐቢልዎ።
======================================================================================================================
=====================================================================================================================
