16 hrs ·
ካብ ዓቕሊ ጽበት ዝነቐደ ዕሸላዊ ጸብጻብ
======
ዓቃቢ ሕጊ መንግስቲ ኢትዮጲያ፡ ኣብ ጉዳይ ምግሃስ ሰብኣዊ መሰላት ከተማ ‘‘ኣኽሱም‘‘ ኣመልኪቱ ጸብጻብ ኣዉጺኡ'ሎ። ኣብዚ ጸብጻብ እዚ- ዓቃብ ሕጊ መንግስቲ ኢትዮጲያ፡ ኣብ ከተማ ኣኽሱም 8 ሰባት ብከቢድ ብረት ከም ዝተቐትሉ፡ 110 ዕጡቓት ጃንዳ ማ/ለ/ሊ/ት ድማ ኣብ ከተማ ኣኽሱም ኣብ ልዕሊ ሰራዊት ኤርትራ መጥቃዕቲ ድሕሪ ምፍጻሞም ብግብረ መልሲ ሓይልታት ምክልኻል ኤርትራ ከም ዝተቐትሉ፡ 40 ሰባት ድማ ካብ ገዝኦም ተወሲዶም ከም ዝተቐትሉ ጸብጺቡ ኣሎ።
እዚ ጸብጻብ እዚ- ካብ 119 ሰባት ብዝተኣከበ ቃል ምስክርነት ዝተጻሕፈ ኮይኑ፡ እቲ መጽናዕቲ ጌና ይቕጽል ከም ዘሎ'ዩ ዓቃቢ ሕጊ ኢትዮጲያ ሓቢሩ ዘሎ።
እዚ ጸብጻብ እዚ፡ ምስ ኩሉ ሕጽረታቱን ብልጫታቱን፡ ብግቡእ ክትንተንን መረዳእታ ክግበረሉን ከም ዘለዎ ዝዝንጋዕ ኣይኮነን። እቲ ቐንዲ ሕቶ ግን፡ ስለምንታይ'ዩ ከምዚ ዓይነት ጸብጻብ ኣብዚ ሕጂ እዋን ክፍኖ ተመሪጹ? ዉሽጣዊ ፖለቲካዊ ኩነታት ኢትዮጲያ ዝደረኾ ክኸዉን ዘለዎ ተኽእሎ፡ ክሳብ ክንደይ ዓቢ እዩ? ደግኣዊ ፖለቲካዊ ኩነታት (ዲፕሎማስያዊ ጸቕጥታት) ዝደረኾ ክኸዉን ዘለዎ ተኽእሎ፡ ክሳብ ክንደይ ዓቢ እዩ? ኣብ ዝምድና መንግስታት ኤርትራን ኢትዮጲያን ከዉርዶ ዝኽእል ሃስያ'ኸ ክሳብ ክንደይ ዓቢ እዩ?
1- ብመሰረት ጸብጻብ ዓቃቢ ሕጊ ኢትዮጲያ፡ ሰራዊት ኢትዮጲያ፡ ካብ ዝኾነ ይኹን ገበናዊ ተሓታትነት፡ ነጻ ዝገብር ተጌሩ ክቐርብ ምምራጹ፡ ሓደ ካብቲ ዝዓበየ ድኽመት ናይቲ ጸብጻብ እዩ። ብዓንደርእሱ፡ መንግስቲ ኢትዮጲያ፡ ካብቲ ዝወርዶ ዘሎ ዉሽጣዉን ደግኣዉን ጸቕጥታት ከምልጥ ይህቅን ምህላዉ፡ ብፍጹም ዝከሓድ ኣይኮነን። እታ ኩዕሶ፡ ናብ ኤርትራ ተደርብያ ምህላዋ ዉን ዝዝንግዕ ሰብ ከቶ ክህሉ ኣይክእልን። ሓደገኝነቱ ድማ ማዕረ ማዕረ ተኣሳሲሩ ዝኸይድ ክኸዉን ይኽእል። እቲ ሕቶ- መንግስቲ ኤርትራ፡ ጸቕጥታት መንግስቲ ኢትዮጲያ ክሳብ ክንደይ እንዳ ተጻወረ ክኸይድ ይኽእል? እንታይ ንምባል'ዩ፡ መንግስቲ ኢትዮጲያ ኩዕሶ በብዝተሰንደወሉ፡ ናብ ኤርትራ ክቐልዓ ይመርጽ ምህላዉ፡ መንግስቲ ኤርትራ ብኸመይ ይትንትኖ? እዚ ብግቡእ ክምለስ ዝግብኦ ጉዳይ'ዩ።
2- ጽሬት ፍርዳዊ ትካላት ኢትዮጲያ፡ ኣካታዒ ሙዃኑ ብዙሕ ዘማጉት ኣይኮነን። እዚ ጉዳይ እዚ ንጹር እንዳኾነ፡ ዓቃቢ ሕጊ ኢትዮጲያ ብመደብ ንኤርትራ ኣብ መነጻጸሪ ዘእቱ ጸብጻብ ክወጽእ ምምራጹ፡ ብዙሕ ጥርጣረታት ከለዓዕል ከም ዝኽእል፡ ዝከሓድ ኣይኮነን። እንታይ ንምባል'ዩ፡ ካብ ዉሽጣዉን (ካብ ህዝቢ ትግራይ) ደግኣዉን (ምምሕዳር ባይደን) ጸቕጥታት ንምምላጥ፡ ብስም ኤርትራ ሸቕጥ ምክያድ፡ ድሮ እንዳ ሳዕረረ ይኸይድ ኣሎ ናብ ዝብል ገምጋም ይወስደና። እዚ ንባዕሉ፡ ከቢድ ሕቶ ዘለዓዕል'ዩ።
ሀ) መንግስቲ ኢትዮጲያ- ምልሻታት ትግራይ፡ ልብሲ ሰራዊት ኤርትራ ተኸዲኖም፡ ከቢድ ገበናት ከም ዝፈጸሙ ባዕሉ እንዳ ተኣመነ፡ ዓቃቢ ሕጊ ኢትዮጲያ ነዚ ሓቂ ረጊጹ ክኸይድ ምምራጹ፡ ብኸመይ ቕቡል ጸብጻብ ክኸዉን ይኽእል?
ለ) ጃንዳ ማ/ለ/ሊ/ት- ልዕሊ 10,000 እሱራት፡ ኣብ ከተማታት ትግራይ በቲኑ፡ ኣብ ልዕሊ ህዝቢ ትግራይ ከቢድ በሰላ ምዉርዱ እንዳ ተፈልጠ፡ ዓቃቢ ሕጊ ኢትዮጲያ- ጸግዒ ጸግዒ ክሃድም ምምራጹ፡ ብኸመይ ምኽኑይ ክኸዉን ይኽእል?
ሐ) ዓቃቢ ሕጊ ኢትዮጲያ- ኣብ ልዕሊ 2000 ኤርትራዉያን ስደተኛታት ዝተፈጸመ ከቢድ ገበን፡ ብርኡይ ዕሽሽ ኢሉ ክሓልፎ ምምራጹ፡ እቲ ሕጂ ወጺኡ ዘሎ ጸብጻብ፡ ክሳብ ክንደይ ዘይሻራዊ ክኸዉን ይኽእል?
3- ኣብዚ እዋን እዚ- ምምሕዳር ባይደንን ሕብረት ኤዉሮፓን፡ ኣብ ልዕሊ መንግስቲ ኤርትራ፡ ከቢድ ጸቕጥታት ንምጽዓን ኣብ ዝጓየያሉ ዘሎዋ እዋን፡ መሊሱ ነቲ ዘይምኽንያታዊ ጸቕጥታት ምኽንያታት ዝፈጥር ጸብጻባት ክፍኖ ምምራጹ፡ መንግስቲ ኢትዮጲያ ኣብ ዉሽጡ ከቢድ ፖለቲካዉን ዲፕሎማስያዉን ጸቕጥታት ክጻወር ዝኽእል ዓቕሚ ከም ዘይብሉ፡ ብንጹር ዘመላኽት'ዩ። እንታይ ንምባል'ዩ- መንግስቲ ኢትዮጲያ፡ ዓቕሉ ጸቢብዎ ከምልጠሉ ዝኽእል ቐዳዳት፡ ሃሰዉ ይብል ከም ዘሎ ኣንፈት ዝህብ'ዩ።
ኣብ መደምደምታ- መንግስቲ ኢትዮጲያ፡ ኣብ ትካላዊ ኣሰራርሕኡ፡ ብዙሕ ድኽመታት ከም ዘለዎ ንጹር'ዩ። ካብዚ ድኽመት ዝተበገሰ ክኸዉን ዝክእል ድማ፡ ኣብ መንጎ ህዝብታት ኢትዮጲያን ኤርትራን፡ ኣብ ከቢድ ረጽሚ ከእቱ ዝኽእል ህንዱድ ምንቅስቓሳት ካብ ምግባር ክቑጠብ ኣይከኣለን ዘሎ። ብዓቢኡ ዉን፡ ዕሸላዊ ኣከያይዳታት መራሕቲ ኢትዮጲያ፡ ኣብ ዞባ ቐርኒ ኣፍሪቃ ከቢድ ሽግር ክፈጥር ከም ዝኽእል፡ ብፍጹም ዝከሓድ ኣይኮነን። እቲ ምንታይ- ሰብኣይ ደሊኻን ጭሕሚ ጸሊእኻን፡ ሓንቲ ስድሪ ክሱጎም ስለ ዘይከኣል።
