(ጋዜጣ ወይን) - ዕለት 05 ሚያዝያ ጀሚሩ ትማሊ 08 ሚያዝያ 2012 ዓ/ም ብዝተዛዘመ ዳህሳስ ገዛ ንገዛ ቫይረስ ኮሮና 33 ጥርጡራት ከምዝተረኸቡ ቢሮ ሓለዋ ጥዕና ክልል ትግራይ ሎሚ መዓልቲ ንጋዜጠኛታት ኣብ ዝሃቦ መግለፂ ኣፍሊጡ።
እቲ ዳህሳስ ብቐዳምነት ሕብረተሰብ ኣብቲ ሕማም ዘለዎ ግንዛበ እንታይ ከምዝመስል ዝረኣየሉ፣ ኣብ ሕድሕድ ገዛ መከላኸሊ እታወታት ምህላዎምን ዘይምህላዎምን ዝረጋገፀሉን ካብ 01 መጋቢት 2012
ዓ/ም ንነዘ ናብ ትግራይ ዝኣተወ ሰብ ፈሊኻ ዝምዝገበሉን ብኡ ኣቢሉ ድማ ዝተረኸበ ተጠርጣሪ እውን ዝፍለየሉን ከምዝነበረ ዶ/ር ሓጎስ ገሊፆም እዮም።
ይኹን እምበር ሚድያታት ግጉይ ርድኢት ብምሓዝ “ምርመራ ክካየድ እዩ” ኢለን ስለዘመሓላለፋ ሕብረተሰብ ካሊእ ትፅቢት ከሕድር ከምዝገበረ እውን ወሲኾም ሓቢሮም።
ኣብቲ ዳህሳስ ቅድሚ 10 ዓመት ዝተኻየደ ቆፀራ ህዝቢ መሰረት ብምግባር 1.3 ሚልዮን መራሕቲ ስድራ ክካተቱ ተተሊሙ ዝነበረ እንትኸውን ኣብ 1,550,931 መራሕቲ ስድራ ዳህሳስ ተገይሩ ከምዘሎ ንምፍላጥ ተኻኢሉ።
ብርኪ ግንዛበ ሕብረተሰብ ኣብ ሕማም ቫይረስ ኮሮና 58 ምኢታዊ፣ ግንዛበ ሕብረተሰብ ኣብ ኣዋጅ ህፁፅ እዋን 53 ምኢታዊ፣ ብልምዓት ጉጅለ ዝተጠርነፈ 62 ምኢታዊ፣ እታወታት መከላኸሊ 48 ምኢታዊ ምዃኑ ከምዝተፈለጠ እውን ዶ/ር ሓጎስ ይገልፁ።
ብተወሳኺ ካብ መጋቢት 01 ንነዘ ናብ ትግራይ ዝኣተዉ 14,559ን ሰባት ተመዝጊቦም ካብ መላእ ትግራይ 33 ዝኣኽሉ ጥርጡራት ተፈልዮም ኣብ ከይዲ ምርመራ ከምዝርከቡ እዮም ገሊፆም።
እቲ ዳህሳስ ንፈለማ እዋንን ብወለንታን ውፉይነትን እቶም ተሳተፍቲ ዝተኻየደን ምስ ምዃኑ ተተሓሒዙ ኣብ ከይዲ ኣፈፃፅምኡ ገለ ክፍተታት እኳ እንተነበርዎ ኣብዚ ሕዚ ስዓት ዘለናሉ ብርክን ንቐፃሊ ከመይ ክንከይድ ከምዝግበኣና ክንፈልጥን ዝሕግዝ ስለዝኾነን ግና ዓብዪ ምስጋናን ክብርን ክወሃቦ ዘለዎ እዩ እውን ኢሎም።
ናይዚ መቐልታ ድማ ተቓላዕቲ ዝበሃሉ ወገናት (ካብተን ኣዐርየን ዝተጠቕዓ ሃገራት ናብ ትግራይ ዝኣተዉ ወገናት፣ ነዊሕ ጉዕዞ ዝጎዓዙ ሹፌራት፣ ንኻሊእ ሕክምና ናብ ጥዕና ትካላት ዝመፁ፣ ኒሞንያ ዝተረኸቦም፣ ኣብ ICU ዘለዉን ሕሙማትን ኣብ ሃንደበታዊ ክፍሊ ዝሰርሑ ሰብ ሞያ ጥዕናን) ቅድሚያ ተዋሂብዎም ምርመራ ክካየደሎም እዩ ተባሂሉ።
ብልምዓት ጉጅለ ኣቢልካ ኣብ ጣብያታት ዘሎ ምዕባለታት በቢ ሰለስተ መዓልቱ ዝፍለጠሉ መተግበሪ ኣፕሊኬሽን ተዳልዩ ስለዘሎ ኩሉ በቢዝምልከቶ ምላሽ ዝህበሉ መስርሕ ከምዝተኣታቶ እውን ተገሊፁ።
_________
_____________________
Nuclear boy:
