ብስምኦን ቃ ሓጎስ
- ንቡዙሓት ሰባት ከደናግር ዝጸንሐ ዛንታ'ዩ። ዛንታ ጀነራል ሳሞራ ዩኑስ።
ኩልና ከም እንፈልጦ፡ ጀነራል ሳሞራ ዩኑስ፡ ሓደ ካብ ገበርትን ሓደግትን ማፍያ ስርዓት ወያኔ ኮይኑ ክሰርሕ ዝጸንሐ ጀነራል'ዩ። ጀነራል ዩኑስ፡ ኣብቲ ህወሓት ንኣስታት ክልተ ዓሰርተ ዓመታት ሒዛቶ ዝጸንሐት ፖለቲካዉን ቑጠባዉን ዓብላልነት፡ ሰፍ ዘይብል ጽልዋ ዝነበሮ ሰብ ጥራይ ዘይኮነ፡ ዝበዝሕ ወተሃደራዉን ጸጥታዉን ዉሳኔታት ብዉልቁ ይወስድ ምንባሩ ይንገር።
ካድራት ህወሓት፡ ምስሊ ጀነራል ዩኑስ ንምዕባይ ተባሂሉ፡ ኣብቲ ምስ ኤርትራ ዝተገብረ ኩናት፡ ከም ሓደ ሰራሒ ቅያ ዘምስል ቕብኣ ክቐብኡ ምጽንሖም ይንገር። እቲ ምኽንያታት ብዙሕ'ኳ እንተኾነ፡ ህዝቢ ኢትዮጲያ ንምድሃልን ንምርዓድን ተባሂሉ ይግበር ምንባሩ ብዙሓት ይዛረቡ።
ኣብ ሜድያ ብዝተገብረ ሰፊሕ ናይ ፕሮፖጋንዳ ስርሓት፡ ካብቲ ሓቀኛ ታሪኹ፡ ሕልፊ ክዝንተወሉ ዝጸንሐ ጀነራል ሳሞራ ዩኑስ፡ ኣብቲ ኣብ 2017 ዝነበረ ምልዕዓል ህዝቢ ኢትዮጲያ፡ እቲ ሓቀኛ ምስሉን ግብሩን ክረኣይ ብምኽኣሉ'ዩ ሎሚ ስሙ ከም ኣብ ማይ ዝኣተወት ኣንጭዋ ቒሂማ እትርከብ። ጀነራል ሳሞራ ዩኑስ፡ ኣብቲ ካብ 1998 ክሳብ 2002 ዝተገብረ ኩናት ኤርትራ ኢትዮጲያ፡ ድንቂ ዝኾነ ታሪኽ ከም ዝሰርሐ'ኳ ክዝንቶ እንተጸንሐ፡ ኣብቲ ዝካየድ ዝነበረ ዓዉደ ዉግኣት፡ ብኮሬነላት ሓይልታት ምክልኻል ኤርትራ፡ ብተደጋጋሚ ክብለጽ ይረኣይ ምንባሩ ኣብቲ ኩነታት ዝወዓሉ ሰባት ሎሚ ከዘንትዉ ጀሚሮም ይርከቡ። ብርግጽ ካብቲ ዝልሑኽ ዘሎ ሓበሬታታት ክንርድኦ ከም ዝኸኣልና፡ ህወሓት፡ ብፍላይ'ድማ መለስ ዜናዊ፡ ምስሊ ጀነራል ሳሞራ ዩኑስ ንምዕባይ ተባሂሉ ሰፊሕ ዘመተ የካይዱ ምንባሩ'ዩ።
ጀነራል ዩኑስ፡ ኣብ 2017፡ ኣብ ኣዲስ ኣበባ ኣብ ዝነበረሉ እዋን፡ ብሓለፍቲ ጭፍራ ወያኔ፡ ነቲ ከም ሓዊ ዝጓሃሃር ዝነበረ ተቓዉሞ ብሓይሊ ክዶቅሶ ኣብ ዝተኣዘዘሉ እዋን፡ ብዝወስዶ ዝነበረ ስጉምትታት፡ ናይ ብሓቂ ብቕዓቱ ተራእዩ'ዩ። ድሒሩ ኣብ ዝሰዓበ፡ ኩነታት ክቆጻጸሮ ከም ዘይክእል ኣብ ዝተረድኣሉ እዋን፡ ነቶም ኣብ ትሕቲኡ ዝነበሩ ኣዘዝቱ ኣኻኺቡ፡ ብእምንን ዱላን እናተጎየ መቐለ ክረኣይ ከም ዝተገደደ ይዛረቡ። በዚ ምኽንያት'ዩ እምበኣር፡ ኣብ መንጎ ጌታቾው ኣሰፋን ሳሞራ ዩኑስን ድሒሩ ባእሲ ተራእዩ ዝብል ወረታት ክስማዕ ዝጀመረ። ኣብዚ ሕጂ እዋን፡ ብዙሓት ካብ መራሕቲ ጭፍራ ማለሊት፡ ጀነራል ዩኑስ፡ ቐንዲ ጠንቂ ናይ ዉድቀቶም ምንባሩ ብጋህዲ ክዛረቡ ይስምዑ ኣለዉ። እቲ ምኽንያት፡ ጀነራል ዩኑስ፡ ንኸምዚ ዝኣመሰለ ተኽእሎታት ክቋጻጸር ተባሂሉ፡ ኩሉ ዓይነት ቐረባት ዝተዳለወሉ ጀነራል ብምንባሩ።
