Mereja.Forum

[Meleket]

ክብሪ ንኽቡራት ዕንቝታት ባሕርና
ንኽብሪ ጀጋኑ ኣዴታትናን ኣሓትናን ደቅናን ገለ አብነታት ፈይ እናበልና
ንኽብሪ ኩለን ቀዳሞት ሐርበኛውያን አዴታትናን ሳይዳታትናን ብሓፈሻ
ንኽብሪ ሓርበኛዊት ኣዴና ቀደስ ባህታ፡ ሰይቲ ሓርበኛ ተስፋሚካኤል ትኩእ፡ ንጥልያን እምቢ ኣይግዛእን ቢለን ዝሸፈታ፣
ንኽብሪ ኩለን አዴታት ኤርትራ፣ በኣል አደይ ዘይነብን፡ ጓል ሽፍታን ወዘተን
ንኽብሪ ኩለን ስውኣት ተጋደልቲ፣ በኣል ማርያን ሚርያምን መሬምን ወዘተን
ንኽብሪ ኩለን ዘይስገር ዝሰገራ ተጋደልቲ፣ በአል ፊዮሪ ጓል መሓሪን ጓል ጥሮታን ፋጥናን ወዘተን
ንኽብሪ ኩለን ስንኩላን ዅናት ኤርትራዉያን፣ በኣል በቕሊ ገዳምን ጓል ሓጂን ወዘተን
ንኽብሪ ኩለን ምሩኻት ኣብ ኹናት ኤርትራዉያን፣ በኣል ጓል ባጽዕን ጓል የማነን ወዘተን
ንኽብሪ ኩለን ጋዜጠኛታት ኤርትራ፣ በኣል ኣደይ ኢታይ ምቝርን ነጻነት ተስፋሚካኤልን ወዘተን
ንኽብሪ ኩለን ሙዚቀኛታት ኤርትራ፣ በኣል ኣበባ ኃይለን ሰላምን ወዘተን
ንኽብሪ ኩለን ገጠምቲ ኤርትራዉያን፣ በኣል ይርጋኣለም ፍስሓን ገነት ሽጎምን ወዘተን
ንኽብሪ ኩለን ደረስቲ ኤርትራዉያን፣ በአል ገነት ሽጎምን አበባን ራሄልን ወዘተን
ንኽብሪ ኩለን ጽምጻውያን ኤርትራውያን፣ በኣል በኺታ ዓሊን ብርኽቲን ጓል አንኸረን ወዘተን
ንኽብሪ ኩለን ተዋሳእቲ ኤርትራዉያን፣ በኣል ኣደይ ብጫን ቤኪን አጽበሀትን ግዜነሽን ወዘተን
ንኽብሪ ኩለን ሚኒስትራት ኤርትራውያን፣ በኣል ሳልማን ልዑልን ወዘተን
ንኽብሪ ኩለን ብትምህርቲ ዝሰጎማ ኤርትራዉያን
ንኽብሪ ኩለን ኣብ ጉስነት ዚርከባ ኤርትራዉያን
ንኽብሪ ኩለን ኣብ ማሕረስን ውሻጠን ሓርዀትኾት ዚብላ ኤርትራዉያን
ንኽብሪ ኩለን ኣብ ቃለንን ቃልኪዳነንን ገጥ ዝበላ ኤርትራዉያን
ንኽብሪ ኩለን ኣብ ዝተፈላለየ ጽንኩር ኩነት ዚርከባ ደቀንስትዮ ዓለምና በሓፈሻ ንደቀንስትዮ ሃገርና ድማ ብፍላይ!!!

ንሎሚ’ውን እዛ ን’ሓይኹ’ ዝተባህለት ገርሀኛ ተጋዳሊት ዝተገጥመት ግጥሚ ክንደግመልኩም

ኣስተውኢላ ረድያ፣ ንመንፈሱ ሒዛ ፍጹም ከይፍለያ፣
እታ ጻዕዳ ልባ ቃል ኪዳን ኣትያ፣ ምስ ስዉእ ሕጹያ።
ኪዳን ብኪዳኑ ናይ ዘልዓለም ኪዳን፣
ፍጹም ዘይጥለም ኣብ ዝኾነ እዋን።

ጽኑዕ ዝእምነታ፣ ቅንዕና ዓትዒታ፣ ሃቂ ተቀኒታ፣
ኣብ ኵናት ኣብ ሰላም ኣብ ማእከል ብጾታ፣
ዘለቕለቕ ከይበለት ወትሩ ኣብ መሬታ፣
ዓቂባ ክብረታ፣ ጥምረት ሕላገታ፣
እታ ጓል ኤርትራ ንሓሽከት መኪታ፣
እወ ጓል ሃገረይ ክንደይ ተዓዊታ።

ሰለም ከየበለት፣ ድሕሪት ከይተረፈት፣
ሕድሪ ከይጠለመት፣ ሓሽኸት ዝመከተት፣
መቐረት ኣብ ምረት ኮይና ዝተረክበት፣
ንጽህቲ’ያ ንሳ ጸኒዓ ዘጽነዐት ተቢዓ ዘትበዐት።

ኣብ ግዜ ተሻሞ ኣብ ግዜ ሳቮያ፣
ክትሓልፍ ድልውቲ ምእንቲ ብጻያ፣
መኣስ ካልእ ኮይና “ንጽህቲ” ንሳ’ያ!

መምሃሪ ኪከውን ግናይ ከይርከብ፣
ሓቂ እናገለጸት ድሁል ብምግጫብ፣
ንዘድሐርሕር ኩሉ እናበለት “መስከብ”፣
ንጾር ናይ ብጾታ ትስከም ኣብ ሞንኩብ፣
ኣእዳዋ ቆርዲፉ ሽዳ ከተልግብ።

በቲ ግርህናኣ ንኩሉ ተላዝብ፣ ምስ ኩሉ ትላዘብ፣
ብቕንዕና ከይዳ ንፍቕሪ ትከስብ።
ኣብ ጽንኩር ኩነታት ዓቕልኻ ዘጽብብ፣
ድምብርጽ ከይበላ ማእዘናት ትህብር፣ ሜላታት ትጣበብ፣
መስተርሆት ፈጣሪት ፍታሕ እትቕልብ፣
ናታስ ንበይኑ’ዩ ቅድሚት ተወርዊራስ ንብጾታ ተስዕብ!፣
ገበትቲ ትኩብኩብ፣ ስልማት ጋንታኣ ብጾታ ትክብክብ!

ንሳ ንድያ “ንጽህቲ” ኣብ ኩሉ ትርከብ፣
እታ ጓል ኤርትራ ፍጹም ዘይትርብርብ፣
ሕድሪ ተረኪባስ ሕድሪ ከተርክብ!
ኣብ መትከል ትርከብ ሓድነት ትዕቕብ።

ተሸፊኑ’ዩ ምበር ቲ’ኩሉ መውጋእታ ብማንም ዓለባ፣
ሕዝባ ንኪናገፍ ኪሃልፍ ጸበባ፣
ኣብ ዝባና ኣጽሕያ ነቲ ኩሉ ቦንባ፣
ከም ማይ ብጠያይቲ ንዓመጽቲ ገጪባ፣
ኣጽዋራት ሰሊባ፣ ሓርነት ኪመጽእ ገበትቲ ሸልቢባ፣ ብሓዊ ለብሊባ፣
ክንዲ ዝተጋደለት ሓለፋ ካብ ሰባ፣
ኣየ ተጋደልቲ ኣየ በኣል ማማ ኣየ በኣል ባባ፣
“ሓይኩ” ዶ በልኩማ ነታ ጽላል ሕዝባ! ነታ ገርሂ ልባ?
ኣነስ ምበልክዋ ንጽህቲ ናይ ህዝባ፣ ንሃገር ድባባ፣
ዝያዳ ትሕረ ካብ ንግስተ ኣዜብ ካብ ንግስተ ሳባ።

ምኳን …
ሳለ ከምኡ ኢልኩም እናተጫረቕኩም ዝተወሃሃድኩም፣
ገጽኩም ብብሩሁ ናጽነት ኣምጺእኩም፣
ሓደራ ዝብለኩም፣ ከምታ ናይ ቀደምኩም፣
ከይተጨካከንኩም እናተመሃሃርኩም እናተመሓሓርኩም፣
ዓቕብዋ በሉ ኣጽኒዕኩም ፍቕርኩም፣ ሰሳጓኹም ሂዝኹም።

ፍልፍል መበቖላዊ ዛንታ መጸሐፍ “ሰውራ መቐረት ኣብ ምረት” ብተጋዳላይ ይትባርኽ ሃብተጊዮርጊስ፡ ንክትነብዋ እናዓደምና።

ክብሪ ንደቀንስትዮ ዓለምና በሓፈሻ፣ ንደቀንስትዮ ሃገርና ድማ ብፍላይ!!!

[Fed_Up]

Thank you brother Meleket. Our women deserve all the praise. They are unique.

[Meleket]

ዮሃና ኣዴታት ኤርትራ፡ መምህራን ኤርትራዊ ጭዉነትን ጅግንነትን!

ዮሃና ኤርትራዉያት ኣሓትና፡ መምህራን ኤርትራዊ ጭዉነትን ተወፋዪነትን!

ዮሃና ኤርትራዉያን ደቅና፡ መምህራን ኤርትራዊ ግርህነትን ንጽህናን!

ዮሃና ደቀንስትዮ ዓለምና ንዓለምና ኣብ ማህጸንክንን እንግዳዓኽንን ዚጾርክን ዋዕሮታት! ንብለክን ብምኽንያት ኣህጉራዊ መዓልቲ ደቀንስትዮ መጋቢት 8! ኤርትራዉያን ደያኑ ማእከልን መስመርን፡ ሎሚዉን ከምትማል ንኩሉ ጠርባሽ ጸለመታት 'ቀናኣት ጃጀውቲ' ብዘይክማሕ ጽንዓትና እናፍሸልና።

[Meleket]

ካብ መጸሓፍ “ሰውራ መቐረት ኣብ ምረት” ብተጋዳላይ ይትባርኽ ሃብተጊዮርጊስ ገለ ገለ ጥቅስታት ፈዪ ከነብለልኩም፡ መታን ገዚእኩም ክትነብዋን፡ ንደቀንስትዮ ሃገርና ዝያዳ ክተኽብሩ ብምህላን ትሕዝቶኣ ብዑፍበረር ክነካፍለኩም።

ንጽህቲ ጸጋይ ኢዩ ሓቀኛ ስማ። ስማ ዝዝክሩ ኣባላት ናይታ ጋንታ እንተ ሃልዮም ግን እቲ መራሕ ጋንታ ወይ መራሕ መስርዕ ኢዮም፣ ወይ ከአ ንጣር ኽኮኑ አለዎም። እቶም ሓለፍታ’ውን አብ ኦርኔክ ደኣ እዮም ነቲ ሓቀኛ ስማ ዝጠቅሱዎ’ምበር፣ ከም ሰቦም ሓይኩ ኢሎም ኢዮም ዝጽውዑዋ። …..ሓይኩ ጓል 25 አቢላ ትኸውን ድልድልቲ መንእሰይ ኢያ፣ ኣብ ገጠራት መረታ ሰበነ ተወሊዳ ኣብ መጓሰ ኣጣል ድማ ኢያ ዓብያ። ኣብ 1977፣ ከምኣ ዝበላ ኣዋልድ ጸጕረን ኣጎቲነን፣ ካላሽን ዓጢቐን ክጋደላ ምስ ረኣየት …( ገጽ 6)

ኣብ ኵናት ዝፈርሕ ወይ ድሕርሕር ዝብል እንተ ርእያ ድማ ፣ ንወዲ ይኹን ንጓል፣ “መስከብ” ኢላ ኢያ ትጻረፍ። … ፖለቲካዊ ትምህርቲ ካብ ትቐስም ጀሚራ፣ ንብጻይካ ምንቃፍ ክስገር ዘይብሉ ግቡእ ኢዩ ንዓኣ። (7)

ብቐትሪ፣ጸሓይን ጽላሎታን ተጠቒማ በዚ ኢዩ ሰሜን፣ በዚ ኢዩ ምዕራብ እናበለት ብጾታ ማእዝናት ትሕብር። ብለይቲ ከኣ ኮኾብ ሰሜን ትጥቀም። ዋላ ኣብቲ ኣንፈትካ ንኽትፈልጥ ኣሸጋሪ ዝዀነ ሰጥ ዝበለ ጐላጉል ሰሜናዊ ምብራቕ ሳሕል፣ “ሓይኩ ምሳኻ እንተ ሃልያ መኣዝንካ ኣይጠፍኣካን ኢዩ” ኢዮም ዝብሉ ኩሎም ብጾታ። (14)

“እንድዒ ጓለይ፣ ንሓይኩ ኣዝየ እየ ዝፈርሓ፣ ካብ ቁማል እኮ እያ፣ ሓኸለ ተናዲ!” በለት ጓል ፋፋ። “ንሓይኩ ዲኪ ትፈርሂ ንነቀፌታ?” ሓተተት ዕንሹ ገጻ ዓዕትብ ኣቢላ። “ሓይኩ እንተነቀፈትኪ’ኮ ንናትኪ ምዕባለን ንድሕነት ቃልስናን ኢዩ፣ ከም ካልእ ጌርኪ ኣይትረድእዮ። ሕሰብዮሞ ጸላኢ እንተ ዝረኽባ ብቦንባና ክሃርመና ማለት እኮ ኢዩ ነይሩ… (37)

‘ስድራኣ ርኹባት ኣይኰኑን። ንሳ ድማ ኢያ በዅሮም። ፍርዝን ምስበለት መሓስኣት ትሕሉ ነይራ። ግርዙው ምስ በለት ድማ ኣብ መጓሰ ኣጣል ኣትያ። ጓል 15 ዓመት ኣቢላ ምስ ኰነት ስድራኣ ናብ ወዲ ዓርከቦኣ ኣሕጽዮማ .. እንተዀነ ኣብ ክፍላ 1976 ንኻልእ ክህብዋ ንስድራኣ ነጊሩ ናብ ህዝባዊ ግንባር ሓርነት ኤርትራ ተጸንቢሩ። (45)

“ከም ዘዕለለትኒ፣ሓደ መዓልቲ ኣብ ምጅማር 6ይ ወራር፣ በጦሎኒኦም ንረዳት ናብ ጸጋማይ ክንፊ ግንባር ሰሜናዊ ምብራቕ ሳሕል ምስ ከደት ኣብ ማእከል ኵናት ኣራእያ በርቂ ተረኣእዮም ነይሮም። ኩናት ጻዕጺዑ ኩነታት ሕማቕ ስለ ዝነበረ ግን፣ ተራኺቦም ከዕልሉ ኣይከኣሉን። ድሕሪ እዛ ዕለት እዚኣ ደሃዩ ኣይረከበትን። … መስዋእቱ ሰሚዓ ትከውን ኢየ ዝብል።… ከመይ ዝበለት ጅግና ተዋጋኢት ይመስለኪ…..እሞ እታ ልዕሊ ብርኪ ናይ የማነይቲ እግራ ዘላ በሰላ ናይ መውጋእቲ ኢያ ማለት ኢዩ? ….ካብ ትስለፍ ንሳ ዘይተሳተፈቶ ኵናት ውሕድ’ዩ …(47)

“ሓይኩ ክትዋጋእ እምበር ከተዋግእ ደስ ኣይብላን እዩ” (48)

ንንጽህትስ ሓይኩ! (48)

አብ መገዲ፣ ዓንጎ ገመል እናበሉ ተጋደልቲ ዝጽውዑዎ ቆልቋል ዝመስል ተኽሊ ከናድዩ ኩላቶም የማነ ጸጋም ናይቲ ቁልቁለት ፋሕ በሉ። ዘዝረኸቡዎ ሒዞም ድማ ኣብ ሩባ ምዖ ተራኸቡ። ነቲ ዓንጎ ገመል ጨፍጪፎም ከም መሕጸቢ ኽዳን ኢዮም ክጥቀሙሉ። እዚ ተኽሊዚ ሓደ ካብ ሳሙናታት ክዳን ገድሊ ኢዩ። እቲ ፍሉጥ ናይ ርእሲ ከዓ ቈጽሊ ጋባ ኢዩ። ንሱ ተጨፍጪፉ ግርም ገይሩ ኢዩ ርእሲ ዘጽሪ። ሻምፖ ሜዳ ኢየን ዚብላኦ ደቂ ከተማ ተጋደልቲ። (95)

“ብእምኒ ተፋሕፊሕካስ ምሕጻብ ይበሃል?” ድማ በለት ሳምና እንተ ዘይትረክብ ለማጽ እምኒ ሩባ ኣናድያ ብኡ ነብሳ ክትፍሕፍሕ ከም ዝነበራ ዘኪራ። ለማጽ እምኒ ሩባ ግርም መሕጸብ ሰብነት ስለ ዝዀነ ገለ ተጋደልቲ ሳሙና ሳሕል ይብልዎ ኢዮም። (99)

ሓይኩ፣ ኩሉቲ ተጋደልቲ ዝፍጽሙዎ ጽቡቕ ተግባር፣ ግቡኦም ስለ ዝዀነ ሞሳ ኣየድልዮምን ኢላ ኢያ ትማጐት። (101)

ኩሹኽ ንተጋደልቲ ከም ቅያር ክዳን፣ ብጃማ ለይቲ፣ ቆብዕ ቀትሪ፣ መሰከም ውጉእ፣ መቕበር ስዉእ፣ ኣብ ግዜ ጓይላ ከኣ ከም መሳዕስዒ ነጸላ ከም ዘገልግል ድማ ዘርዘረ። (104)

ዝተቐደደ ጥራይ ኣይኰነትን ተልግብ። ዝተረኽበ ኣንሶላ ቀቀዲዳ ንኣወዳት ኮስትሞ ንኣዋልድ ድማ ረጂን ሙታንትን ኢያ ትሰፍየሎም። ብሰንኩ ድማ ኩሉ ኣጻብዕታ ብመውጋእቲ መርፍእ ቆርዲፉ ኢዩ። …. “ሓይኩስ ኣደ’ምበር’ ያ” (105)

ይቅጽል . . .

[Meleket]

ካብ ትሕዝቶ መጸሓፍ “ሰውራ መቐረት ኣብ ምረት” ብተጋዳላይ ይትባርኽ ሃብተጊዮርጊስ ገለ ጥቅስታት ይቅጽል . . .

“ኣቶ ዘወልዲ፣ እወ ዘረባ ኢኻ ተዛሪብካ፣ ዘረባኻ ግን ካብ ሞት ኣውጺኣትና። ኣዐዊታትና ኸኣ” በለ እቲ ጨሓም ተጋዳላይ። ሓላፊ ናይታ ኣሃዱ ኢዩ። “ልዕሊ ዅሉ ግን እቲ ተበላሓትነትካ ኢዩ ዘገርም” ድማ ወሰኸ ብኣድናቖት። ህዝባዊ ግንባር ተኣማሚና ዓወትና ናይ ግድን’ዩ ትብለሉ ምኽንያት ከኣ፣ ካብ ከምዚ ዝበለ ደረት ዘይብሉ ደገፍን ተሳትፎን ህዝቢ ተበጊሳ ምኳና ንዅላቶም ገለጸሎም። ሽዑ፣ ኣደታት ብሓያል ዕልልታ፣ ኣቦታት ብጣቕዒት ነታ ህድሞ ነቕነቑዋ። (ገጽ 173)

“ወይዘሮ ተመርጻ ብዙሓት ኢያ ወሊዳ። ሰለስተ ካብኣቶም ናብ ሰውራ ተጸንቢሮም፣ ክልተ ኣብ ተጋድሎ ሓርነት ሓደ ኣብ ህዝባዊ ግንባር። ካብቶም ክልተ ናይ ተጋድሎ ሓርነት እቲ ሓደ ናብ ጸላኢ ኣትዩ ተዓስኪሩ። ሰለስተ ደቂኖ ኣብ ሰለስተ ግንባራት ንዝተፈላለዩ ዕላማታት ኣንጻር ሓድሕድ ተሰሊፎም። ከብዲ ወላዲ ኰይኑ እናኽመጽእዋ ንሰለስቲኦም እቲ ካብ ሓንቲ ኣደ ዝሕተት ዘበለ ዅሉ ብማዕረ ትገብረሎም። ንሳቶም ግን ናይ ዘዝተሰለፉሉ ግንባር መትከል ንምዕዋት ሓደ ናይቲ ካልእ ሓጥያት ኢዩ ዝበሎ እናኣልዓሉ ዓቕላ የጽብቡላ ነበሩ። …ምሒር ስለዝመረራ፣ ገጽ ውላድ አይጽገብን ኢዩ’ሞ፣ ካብ ምምጻኦም ዘይምምጽኦም ክሳብ ምምራጽ በጺሓ። (174)

“ግደፉና’ንዶ፣ ኣቦይ ነደይ ክጸቕጣ ኣይረኣኹን። ኣነ ከኣ ንሓፍተይ ኣይጸቐጥኩዋን። ኣቦይ ነደይ፣ ወይ ሓወይ ንሓፍተይ ጸቒጡዋ ዝብል ሰብ ከኣ ሰሚዐ ኣይፈልጥን” በለ ወዲ ዕጥባኖ ዕትብ ኢሉ። (202)

“ወይ ሕጂ ወይ ንዘንተእለት” ሓሰበ ሃይለ ዓማ ከምዛ ድሕሪ ሎሚ ንበይና ኣይክትረክባን ኢኻ ዝተባህለ። ዘለዎ ሓይሊ ኣኻኺቡ ከኣ፣ “ንጽህቲ” ጸወዓ ትሕት ብዝበለድምጺ። … ብሓቀኛ ስማ ምጽውዑ ገሪሙዋ ምጽሓፍ አቋሪጻ፣ “እሂ ዓማ” በለቶ ናብ ስንባደ ብዝመስል ኣጠማምታ። ሽዑ ገለ ነገር ኰይኑ ከም ዘሎ ኣብ ገጹ ኣስተብሃለት። .. “ኣነ ..” ኢሉ ንገለ ካልኢታት ደኒኑ ስቕ ድሕሪ ምባል “ንዝምድና ክሓተኪ ካብ ዝሓስብ ነዊሕ እዋን ኰይኑ ኢዩ። ሕጂ ግን መዓልቱ ዝኣኸለ ኰይኑ ስለ ዝተሰምዓኒ ክሓተኪ እየ መጺኣ” በላ። ነዘን ቃላት ብጥንቓቐ ኢዩ አውጺኡዋን። ….. “ኣታ ሃይለ፣ሕጽይቲ ምዃነይ ትፈልጥ እንዲኻ” መለሰት ሓይኩ ብህድኣት ተኵራ እናጠመተቶን። ብውሽጣ ግን ሕጹያ ኣብ ልዕሊ መሬት ከም ዘየለስ ትኣምን እያ። እቲ ሓደ እዋን ዝሓተተቶ ወዲ ዓዱ፣ ቃል ብቓሉ ደኣ ኢዩ ተሰዊኡ ዘይበላ’ምበር፣ ካብ ዘይረከቦን ደሃዩ ካብ ዘይሰምዕን ነዊሕ ከም ዝገበረስ ገሊጹላ ነይሩ ኢዩ። ኣብ ሜዳ ተሰዊኡ ንምባል ዝወሃብ መልሲ ከኣ ንሱን ከምኡ ዝመስልን ኢዩ። (208)

“እንታይ ደኣ’ሉ እዚ” በለ ናብቶም ብኽልተ ወገን ናይቲ ብሸነኽ ጸጋም እንዳ ብርጌድ ዝነበረ ግፍሕ ዝበለ ስንጭሮ ተፈናትቶም ዝተተኽሉ ቴንዳታት እናኣመልከተ። “ጽቡቕ ድማ ኢዮም ተመሳሲሎም” ….. “ቦታ ሕጽኖት’ዩ፣ ነፈርቲ ደኣ እስትሂና ከብላኦም” … “ዋእ ክንደይ ዲዮም?” ተገረመ ወዲ ዕጥባኖ” …”ነፍሲ ወከፍ ቴንዳ ንሓደ ጽምዲ ኢያ። እታ ኣብ ማእከል ዘላ ዓባይ ከኣ መመገቢቶምን መዘናግዒቶምን” ….”ዕስራን ሸውዓተን ቴንዳታት!” ተገረመ ወዲ ዕጥባኖ እናኣፋጸየ። “ድልድልቲ ሓይሊ እንድያ ደኣ ካብ ድፋዕ ተኣልያ፣ ደርጊ ኣይርኣ” ከኣ በለ ነቶም ተመርዓውትን መገብቶምን ኣብ ግምት ኣእትዩ። (213)

“ወይ ጉ …ድ! ሃገር ደኣ እንታይ ተሪፍዋ!” ኣስቈርቈረ ሓደ ካብ ቀዳመይቲ ቦጦሎኒ ዝመጽኣ ብጻይ ንብዝሒ ናይቲ ተኣኪቡ ዝነበረ ዕንጸይቲ ምስ ረኣየ። ኣብ ምሉእ ሜዳ ኣብ ዝግበሩ መርዓታት ዝነድድ ዕንጸይትን ንድፋዓት ዝቝረጹ ኣእዋምን እናሓሰበ ድማ “መሬት ዕርቃና ወጺኣ” ኣስተንተነ። ንሱ፣ ኣብ ዩኒቨርስቲ ኣዲስ ኣበባ ብጆግራፍ እተመረቐ ኢዩ። ይትረፍ ርሑስ ክቝረጽ፣ ንቑጽ’ውን እንተ ዀነ ክነድድ የብሉን በሃላይ ኢዩ።(217)

ኣብ ሜዳ ብልሙድ መርዓ ሰሉስ ምሸት ኢዩ ዝግበር። ረቡዕ፣ መዓልቲ ዕረፍቲ ኢያ። …መጋቦ ድማ እናዞሩ ንነፍሲ ወከፍ ዕዱም ካብ መሸማዓት እናውጽኡ ታኒካታት ዓደሉዎ። ዋንጫ ሜዳ ታኒካ ኢዩ። ወዲ ዕጥባኖ ዝርከቦም ካልኦት ከኣ ካብ ዓበይቲ በራዳት ስዋ እናቐድሑ ንዅሉ በጽሑዎ። “ካብ ሓንቲ ኣይተዛይዱ፣ አበረቲፍ ጥራይ ሃቡዎም” ኢላቶም’ያ ጓል ቀሺ ኣብ ጥራይ ከብዶም ከየብዝሑ’ሞ ከየሕምሞም ሓሲባ። …..”ኣታ’ዛ ብርጌድ ካብ ኣስመራ ግዲ ኢያ ሰራሕቲ መግቢ ኣምጺኣ” በለ ሓደ ካብ ካልእ ብርጌድ ተዓዲሙ ዝመጽኣ ብጻይ ክበልዕ ጸኒሑ ስዋ ጎጭ ምስ ኣበለ። መግብን ስዋን ካብ ሓድሕዱ ዝበላለጽ ኢዩ ዀይኑዎ።(229)

ብቕጽበት ድማ ኣሰርተታት ተጋደልቲ ተንሲኦም ናብቲ ጓይላ ቕርዓት ወረዱ። ብህይወት ድፍዓት ዝተዋህለለ ጸቕጢ ከራግፉ ዝተሃወኹ ኢዮም ዝመስሉ። ክልተ ኣእዳው ብመንጎ ክልተ ኣእጋር ንታሕቲ ወሪዱ ኣእጋር ጸጸኒሑ የማነጸጋም ይፈናጠር። ሕቖ ንቕድሚት ይጉበጥ፣ ኣፍ ኣይፋጻ ኣይትንፋስ ብዘይዕረፍቲ ፉፍ-ፉፍ ይብል። ኩሉ ድማ ንቕድሚትን ንድሕሪትን ይጠዋወ። ጸጸኒሕ ድማ ኩሹኽ ብኣርባዕተ ኩርናዕ ተታሒዙ ንላዕሊ ዝላ ይኸውን። ኣብ ማእከል ድማ ወዶም ጓሎም እናተቀባበሉ ነቲ ከበሮታት ይድስቕዎ። ሃረርታ ብጾቶም ዝተረድኡ ሙዚቀኛታት’ውን ወይ ኣንዊሖም ይጻወቱ ወይ ከኣ እናልገቡ ጥራይ ደርፍታት ይቐያይርሩ። ሚዶታት፣ ቢሮታት፣ ርሳሳት ኣብ ሓደ ርእሲ ጸኒሖም ኣብ ካልእ ይረኣዩ። ኣይድንጉዩን ድማ ናብ ካልእ ኣፍሮ ይሰግሩ። እቲ ደኺሙዎ ወይ ጸሚኡዎ ካብቲ ጓይላ ዝወጽእ’ውን ስዋኡ ገልቢጡ ንሓጺር ግዜ ኣተንፊሱ ከም ብሓድሽ ይምለስ። ሽዑ ረሃጽ ብመታልሕን ሕቖን ይዛሪ፣ ካምቻታት ድማ ይጥልቅዩ። ደኺመ ከዕርፍ ዝብሉ ውሑዳት እዮም። ገለ ብጐኒ ኰይኖም ዝዕዘቡ እንተ ተረኾቦም’ውን ኣብ ዘለዉዎ ኵይኖም ኢዮም ዝወዛወዙ።እጹብ ድንቅ ዝዀነ ትርኢት ኢዩ። (233)

እታ ንወርሒ መመላእታ ኣብ መሬት ተቐቢራ ዝተረረት ናይ ሩዝ መስተ ንወዲ ዕጥባኖ ጥራይ ኣይኰነትን ኣበላሽያቶ። ከምኡ ደኣ ኣብ መንጎ መርዓውቲ ኣይደቀሱን’ምበር፣ ዝበልዑዎን ዝሰተዩዎን ዘራገፉ፣ መደቀሲኦም ስሒቶም ኣብ ፈቐዶ ደቂሶም ዝሓደሩ፣ ካብ መርዓውቲ’ውን ኣይተንዳኹምን ተባሂሎም ዝተመልሱ፣ሓያሎ ነይሮም ኢዮም። (238)

ይቕጽል . . .

[Meleket]

ካብ ትሕዝቶ መጸሓፍ “ሰውራ መቐረት ኣብ ምረት” ብተጋዳላይ ይትባርኽ ሃብተጊዮርጊስ ገለ ጥቅስታት ይቅጽል . . .

ብዙሕ ወጠጥ ዝመጽእ ግን፣ ብራውናት ዶሽካታት፣ ብሬናት፣ ሳናዱቕ ጠያይቲ፣ መሳርሒታት ድፋዕ፣ መንኩብ ክቐያየሩ ኸለዉ ኢዩ። መጀመርታ ምስ ሓደ ሰብ ነዊሕ ኣይጸንሑን ኢዮም፣ ክምንጠሉ ኸለዉ ከኣ ድሕሪ ክንደይ ወጠጥ ኢዩ። አብ ግዜ ጉዕዞ ምምንጣል ዝጽወር ንብረት ዳርጋ መዘናግዒ ኢዩ ዝመስለካ። (ገጽ 242)

ኣብ መገዲ፣ ሓይኩ ዘይኣመላ ከብሪ ኢላ ብዙሕ ኣይተዋጠጠትን። ንሳ ነቲ የማነ ጸጋም ናይቲ ጥውይዋይ መገዲ ዝነበረ ኣግራብ እናተዓዘበት ትግረምን ትሓስብን ኢያ ነይራ። መብጥዕ፣ ሱልሓ፣ ወይባ፣ ታምቡኽ፣ ዓጋም፣ ኪለዓው፣ ኣውሒጽርጋሕ ምስ ረኣየት ኣዝያ ተሓጎጐሰት፣ ሳሕል ካብ ትወርድ ነዞም ዘዕበይዋ ኣግራብ ርእያቶም ኣይትፈልጥን ኢያ። (242)

ኣብ ሮራ ባቕላ …’’እንታይ ኢዮም ንሶም” በለ ወዲ ሓጂ እናንጸርጸረ። “እዞም ቁንጪ” መለሰሉ ዶቶረ። “እንታይ ኢዩ ቁንጪ” ሓተተ ወዲ ሓጂ። “ባልዕ ኢዮም። ካብ ቁማል ንሶም ይገድዱ” በለ ዶቶረ ዘይምፍላጡ እናገረሞ። ጸኒሑ ግን ኣብ ቆላ ከም ዘይርከቡ ዘኪሩ ዘርዚሩ ኣረድኦ።(243)

ንሓይኩ ..ብግዝፊ ናይቲ ጽሕዲ ክትግረም ምስ ሰምዓ ድማ ‘ኣበይ ከምዘንበብክዎ ደኣ እየ ዘይዝክሮ’ምበር፣ጣልያን ካብ ሮራ ሓባብ ቆቈሪጹ ብብዝሒ ጽሕዲ ናብ ሃገሩ ወሲዱ ኢዩ’ በላ።መተተን ካብ ዝተባህለ ኣብ መንጎ ጽንዓደግለ፣ መሬት ሳሆን ዓረትን ዝርከብ ዓቢ ጎቦ ብተለፈሪካ እናውረደ ብዙሕ ጽሕዲ ከም ዝወሰደ ካብ ኣቦኣ ትሰምዕ ስለ ዝነበረት፣ ሽዑ መሊሳ ንመግዛእቲ ጣልያን ኣጸቢቓ ጸልኣቶ። ነቲ ተወልደ ብዛዕባ ከበሳ ዝነገራ ኸኣ ጽቡቕ ጌራ ኣስተማቐረቶ። (244)

እታ እሾኽ ምስ ወጽኣት እግሪ’ታ ብጸይቲ ቂዕከ እንተ ትብል! ምስቶም ምውጫጭ ናይታ ብጸይቲ ሰሚዖም ሰንቢዶም ዝመጽኡ’ሞ ከቢቦምዋ ዝዕዘቡ ዝነበሩ ብጾት ኰይና ገጻ እናጨማደደት ንቓንዛ ናይታ ብጸይቲ ትርኢ ዝነበረት ሓይኩ፣ ብጉያ ናብቲ ሩባ ወሪዳ፣ ሓንቲ ከባብ ከማጽ እምኒ ኣምጺኣ፣ “እንካ ደምደም ሓረስታይ በለላ” እናበለት ንተወልደ ኣቐበለቶ። …. ሓይኩ ሓጊዛቶም ኣትሪሮም ምስ ሓዙዋን እቲ ሓኪም ቦጦሎኒ ድማ፣ “ደም ደም ሓረስታይ” እናበለ ደጋጊሙ ምስ ሃረማን ግን፣ እዚ ዘይበሃል ደም ቡሕቡሕ በለ። ቃንዛኣ ድማ ብኡንብኡ ተመሓየሸ። (247)

እቲ ዘዝኸኣለ እናተበራረየ ይህንፈፍ፣ እቲ ዝደኸመ ከኣ ቀስ እናበለ ይሳለ። ገለ ድማ፣ ሰከሞም ኣቐሚጦም ተመሊሶም ጾር ካልኦት ደሪቦም ክሳብቲ ቦታ የብጽሑሎም። (248)

ዓሊ ማይ ክሰቲ ደልዩ ብራሾኡ ሃሰስ እንተ በለ፣ ገረውረው ኢያ ትብል። ኣብቲ ናይ ቅድሚ ትማሊ ዓቐበት ምስ ኣቓበጻ ኣይመልኣን። …. ከም ልሙድ ጋሻ ክመጽኣካ ከሎ፣ ተቐዳዲምካ ንጎረሮኡን ንገጹን ማይ ኢኻ ትቕርበሉ። ቀጺልካ ድማ ሻሂ ተፍልሓሉ። ኣባላት ምልክት ግን ድሕሪ’ቲ ንቡር ምስዕዓም፣ ማይ ኣይሃቡ ሻሂ ኣይቀረቡ፣ ስቕ ኢዮም ኢሎም። እቲ ኩነታት ኣርሚሙዎ ምጽማም ዝሰኣነ መራሕ ብርጌድ፣ “ማይ’ባ ሃቡና፣ ብጽምኢ ተወዲእና ኢናኮ። ልዕሊ ኹሉ እዞም መናጁስ” በለ .. ኩባያታት መጺኡ ወዲርባዕተ ቀዲሑ ክህቦም ክብል፣ “ሽኮርን ቀጠፍን እንተ ሃልዩኩም ሻሂ ኢዩ ዘርውየና፣ እዞም ገባር ከይድንጉዩ” በለ እቲ መራሕ ብርጌድ። ….. “ዓይንካ ኣይትርእይን ደርጋፍ፣ ደርጋፍ ወይ ደርጋፍ” ኢላ ድማ ተጻረፈት። ገለ ክገብር ናብታ ከም ክሽነ ዝጥቀሙላ ገዛ ኣትዩ ንሓንቲ ካብተን ሰለስተ ናይ ጉልሻ ኣእማን ብእግሩ ስለ ዝተንከፋ በራድ ቁልቁል ርእሳ ተደፊኣ፣ ወዮ ሽኮር ውሒድዎ ዝተባህለ ሻሂ ከነ ጭራሹ ፈሲሱ። .. ሕርቕርቖት ግዲ ኰይኑ ሰሰለስተ ኩባያ ኢዮም ሰትዮም።(253)

ሓቲታ ከይተረጋግጽ ድማ “ምስጢር ክትፈልጥ ህርድግ ኣይትበል” ትበሃል ዘረባ’ላ።(256)

“በሊስከ ሎምስ ተሰከፊ ደኣ” በላ ወዲ ሓጂ። ሰማዒት ጥራይ ኣይትኹኒ ነጋሪት’ውን ክትኰኒ አሎኪ ማለቱ እዩ። እቶም ካልኦት’ውን ክትነግሮም ደፋፍእዋ። ….”ሕካያ ኣይትኽእልን ኢኺ መቸም” ኢሉዋ ዓሊ ማንጁስ እታ ዛንታ ስለ ዝሓጸረቶ። ሓቁ ኢዩ፣ ዘረባ ኣቃሚማ ኣይትኽልን ኢያ ሓይኩ።(25?)

ይቕጽል . . .

[Meleket]

ካብ ትሕዝቶ መጸሓፍ “ሰውራ መቐረት ኣብ ምረት” ብተጋዳላይ ይትባርኽ ሃብተጊዮርጊስ ገለ ጥቅስታት

እዚ ዅሉ ቃልሲ ገገዲፉ ዝኸይድኮ ዝሓበጦ ጥራይ ኣይኰነን፣ ነናቱ ምኽንያት ኣለዎ” በለ ወዲ ሓጂ። ቀጺሉ ድማ፣ ሕልንኡ ዘዕረበ፣ ነቲ ቃልሲ ዘይድግፍ፣ ኵናት ዝጸልኣ፣ ብሓቂ ደኺሙ ክቃለስ ዘይከኣለ፣ ውልቃዊ ጽልኡ ምስ ሰባት ምክንያት ገይሩ ነቲ ቃልሲ ዝገድፍ’ኮ፣ ብዙሕ እዩ። እዚ ኹሉ እንተ ኸደ ድማ፣ እቲ ሰውራ ስለ ዝጸሪ ይሕይል’ምበር ከም ዘይደክም ኣስፊሑ ገለጸሎም። ኣብ ኩሉ ህዝባዊ ቓልስታት ዝርኣን፣ ኣብ ቃልስና’ውን ብዙሕ ግዜ ዝተራእየን ስለ ዝዀነ ድማ፣ እምብዛ ክሕድሶም ከም ዘይግባእ ነገሮም። (ገጽ 263)

“ናይ’ዚ (ሱልሓ) በትሪ ካብ ካላሽን ይሕረ” ከኣ በላ ካብቲ ገረብ ዝጸርቦ ዝነበረ በትሪ ተራእዩዋ። “ሃዳዲ፣ በል ሃየ ቈሪጽካ በትሪ ጽረብ’ሞ ኣብ ክንዲ ካላሽን ንሱ ሓዝ” በለቶ ሓይኩ ንኽተዛርቦ። (265)

ዝዀነ ናብቶም ኣብ ውሽጣ ዝነበሩ ጦር ሰራዊት ዝመጽእ ቀለብን ተተኰስትን በተን ክራር ኢልና ንጽውዐን ዝነበርና ነፈርቲ ካብ ሰማይ ኢዩ ዝድርበ። ሽዑ ዘሎ ናይ መን ወሰደ ቕድድም ከምዚ ጭርጭር ዓበደ ንብሎ ኢዩ። ዝበዝሕ ግዜ፣ ነቲ ዝተደርበየ ንዋት፣ ወይ ምስቶም ጦርሰራዊት ንማቐሎ ወይ ዝበዝሐ ንሕና ንወስዶ። ሕጂ ክትዝክሮ ኣዝዩ ኢዩ ዘስሕቕ። …..ሓደ መዓልቲ፣ ኣስታት ሰዓት ዓሰርተ ሓደ ቅድሚ ቐትሪ ኣቢሉ ይኸውን፣ እቶም ኣብ ናቕፋ ዝነበሩ ኣባላት ምልክት፣ “ኣብርሃም”ይመጽእ ከምዘሎ ኣፍለጡ። ንሳቶም፣ ንነፋሪት ውግእ “ኣብርሃም”፣ ነታ ናይ ጽዕነት “ተወልደ”፣ (ክልተ ጭራ ዘለዋ እንተ ዀይና ድማ “ክራር”)፣ ንሀሊኮፕተር ከኣ “በየነ” ኢሎም ኢዮም ዝጽውዑወን ነይሮም። ኣብቲ ግዜ’ቲ፣ ኣብ ምራራ ዝነበሩ ኣባላት ምልክት ካብ ውሽጢ ኣስመራ ብዛዕባ ምንቅስቓስ ነፈርቲ ሓበሬታ ይመጽኦም ነይሩ። ንሳቶም ድማ ናብቶም ኣብ ዛግረ(ሳሕል)፣ ዛግረ ድማ ናብ ኩላቶም ኣብቲ ኸባቢ ዝርከቡ መደበራት ምልክትን ካልኦት ረድዮታትን የመሓላልፍዎ። ብቕጽበት ድማ ኩሉ ፈሊጡ ንምምጽአን ተዳልዩ ኢዩ ዝጽበ።(269)

“ክቱር ጽምኢ ተቐዳዲምካ ማይ ክትሰትየሉ የብልካን፣ ርእስኻ ኣጠልቂኻ፣ ገጽኻን እግርኻን ተሓጺብካ ጥራይ ክትጸንሕ ነይሩካ” ኢሉዎ ኣሕመዲን ምስ ፈለጠ። እዚ ካብ ሰበኽ-ሳግም ዝርከብ ዓቢ ትምህርቲ ምዃኑ ገሊጹ፣ እቶም ካልኦትውን ከምኡ ከይገብሩ ኣዘኻኸሮም። “ከምዚ ናይ ሎሚ ጉዕዞ ኣብ ዘጋጥመኩም ግዜ፣ ማይ ከኣ እንተ ዘይሃልዩኩም፣ ንእሽቶ ኣዝሒት ኣብ ትሕቲ መልሓስኩም ግበሩ፣ ይጠቕመኩም’ዩ” ከኣ ብምባል መኸሮም።(273)

“እንታይ’ሞ ዓወታትስ ጥዑም’ዩ፣ዋግኡ እንዶ’ሞ መሪር ኮይኑ” በለት ዕንሹ ርእሳ የማነ-ጸጋም እናኣንቀሳቀሰት፣ ኩላቶም ድማ ዘረባ ኣቋሪጾም ዝን በሉ። ድሕሪ ቑሩብ “እንታይ ደኣ’ሞ ደሊና፣ ናጽነትኮ ክቡር’ዩ ዋጋኣ። መቐረት ሰውራ ከኣ ኣብ ምረቱ’ኳ ኢዩ” ምስ በለ ወዲ ሓጂ ግን፣ ኣይከም ቅድምን’ምበር ዕላል ጀመሩ። በቲ ዕላል ቁሩብ ፍዅስ ኢሉዋ ዝጸንሐት መርየም፣ “እምበኣር ኣብ መስዋእትስ መቐረት ኣሎ ኢዩ?” ሓተተት ናብ ወዲ ሓጂ እናጠመተት። ንሱ ኣይመለሰላን። ሃይለ ዓማ ግን ትቕብል ኣቢሉ፣ “እዚ ከነስተማቕሮ ዝቐነና ዓወት’ኮ መሰረቱ እቲ ምረት ናይ መስዋእቲ እዩ። እታ ወትሩ ብዓይኒ ሕልናና ንርእያ፣ ሰላም፣ ፍትሒ፣ ማዕርነት፣ ደሞክራሲ ዝሰፈና ምዕብልትን ስልጥንትን ኤርትራ ድማ እዚ ምረት’ዚ ኢዩ መሰረታ። ንሳ ድማ ኢያ ምንጪ ናይዚ ኹሉ ጽንዓት፣ ሐቦ፣ ተወፋይነትን ቅሩብነት ንመስዋእትን፣ ኣይመስለክን?” ተገልቢጡ ሓተታ።(284)

እዘን ካብ "ሰውራ መቐረት ኣብ ምረት" እትብል መጽሓፍ ዘካፈልናኩም ጥቅስታት ኣብዡዪ ኪንዛዝም ከሎና፡ንደራሲ መጸሐፍ ተጋዳላይ ይትባርኽ ሃብተጊዮርጊስ ልባዊ ምስጋናና እናቕረብና፡ መጸሓፉ ገዚእኩም ንኽትነብቡ እናተባባዕና፡ ንትሕዝቶ ጽሑፍና ንኽብሪ ቃልሲ ህዝቢ ኤርትራን ንኽብሪ ቃልሲ ህዝቢ ዩክሬንን ብምውፋዪ ኢዩ። ሰብ ፍሉይ ረብሓታት (ሰ.ፍ.ረ.) ነዡይ ንጽሕፎ ዛሎና ተንብቡ እንተሊኩም ነዚኣ ዘለዓለማዊት ሓቂ ዘኽሩ፡ ወረርቲ ወትሩ ይሰዓሩ!

[Meleket]

ክብሪ ንኽቡራት ዕንቝታት ባሕርና
ንኽብሪ ጀጋኑ ኣዴታትናን ኣሓትናን ደቅናን ገለ አብነታት ፈይ እናበልና
ንኽብሪ ኩለን ቀዳሞት ሐርበኛውያን አዴታትናን ሳይዳታትናን ብሓፈሻ
ንኽብሪ ሓርበኛዊት ኣዴና ቀደስ ባህታ፡ ሰይቲ ሓርበኛ ተስፋሚካኤል ትኩእ፡ ንጥልያን እምቢ ኣይግዛእን ቢለን ዝሸፈታ፣
ንኽብሪ ኩለን አዴታት ኤርትራ፣ በኣል አደይ ዘይነብን፡ ጓል ሽፍታን ወዘተን
ንኽብሪ ኩለን ስውኣት ተጋደልቲ፣ በኣል ማርያን ሚርያምን መሬምን ወዘተን
ንኽብሪ ኩለን ዘይስገር ዝሰገራ ተጋደልቲ፣ በአል ፊዮሪ ጓል መሓሪን ጓል ጥሮታን ፋጥናን ወዘተን
ንኽብሪ ኩለን ስንኩላን ዅናት ኤርትራዉያን፣ በኣል በቕሊ ገዳምን ጓል ሓጂን ወዘተን
ንኽብሪ ኩለን ምሩኻት ኣብ ኹናት ኤርትራዉያን፣ በኣል ጓል ባጽዕን ጓል የማነን ወዘተን
ንኽብሪ ኩለን ጋዜጠኛታት ኤርትራ፣ በኣል ኣደይ ኢታይ ምቝርን ነጻነት ተስፋሚካኤልን ወዘተን
ንኽብሪ ኩለን ሙዚቀኛታት ኤርትራ፣ በኣል ኣበባ ኃይለን ሰላምን ወዘተን
ንኽብሪ ኩለን ገጠምቲ ኤርትራዉያን፣ በኣል ይርጋኣለም ፍስሓን ገነት ሽጎምን ወዘተን
ንኽብሪ ኩለን ደረስቲ ኤርትራዉያን፣ በአል ገነት ሽጎምን አበባን ራሄልን ወዘተን
ንኽብሪ ኩለን ጽምጻውያን ኤርትራውያን፣ በኣል በኺታ ዓሊን ብርኽቲን ጓል አንኸረን ወዘተን
ንኽብሪ ኩለን ተዋሳእቲ ኤርትራዉያን፣ በኣል ኣደይ ብጫን ቤኪን አጽበሀትን ግዜነሽን ወዘተን
ንኽብሪ ኩለን ሚኒስትራት ኤርትራውያን፣ በኣል ሳልማን ልዑልን ወዘተን
ንኽብሪ ኩለን ብትምህርቲ ዝሰጎማ ኤርትራዉያን
ንኽብሪ ኩለን ኣብ ጉስነት ዚርከባ ኤርትራዉያን
ንኽብሪ ኩለን ኣብ ማሕረስን ውሻጠን ሓርዀትኾት ዚብላ ኤርትራዉያን
ንኽብሪ ኩለን ኣብ ቃለንን ቃልኪዳነንን ገጥ ዝበላ ኤርትራዉያን
ንኽብሪ ኩለን ኣብ ዝተፈላለየ ጽንኩር ኩነት ዚርከባ ደቀንስትዮ ዓለምና በሓፈሻ ንደቀንስትዮ ሃገርና ድማ ብፍላይ!!!

ንሎሚ’ውን እዛ ን’ሓይኹ’ ዝተባህለት ገርሀኛ ተጋዳሊት ዝተገጥመት ግጥሚ ክንደግመልኩም

ኣስተውኢላ ረድያ፣ ንመንፈሱ ሒዛ ፍጹም ከይፍለያ፣
እታ ጻዕዳ ልባ ቃል ኪዳን ኣትያ፣ ምስ ስዉእ ሕጹያ።
ኪዳን ብኪዳኑ ናይ ዘልዓለም ኪዳን፣
ፍጹም ዘይጥለም ኣብ ዝኾነ እዋን።

ጽኑዕ ዝእምነታ፣ ቅንዕና ዓትዒታ፣ ሃቂ ተቀኒታ፣
ኣብ ኵናት ኣብ ሰላም ኣብ ማእከል ብጾታ፣
ዘለቕለቕ ከይበለት ወትሩ ኣብ መሬታ፣
ዓቂባ ክብረታ፣ ጥምረት ሕላገታ፣
እታ ጓል ኤርትራ ንሓሽከት መኪታ፣
እወ ጓል ሃገረይ ክንደይ ተዓዊታ።

ሰለም ከየበለት፣ ድሕሪት ከይተረፈት፣
ሕድሪ ከይጠለመት፣ ሓሽኸት ዝመከተት፣
መቐረት ኣብ ምረት ኮይና ዝተረክበት፣
ንጽህቲ’ያ ንሳ ጸኒዓ ዘጽነዐት ተቢዓ ዘትበዐት።

ኣብ ግዜ ተሻሞ ኣብ ግዜ ሳቮያ፣
ክትሓልፍ ድልውቲ ምእንቲ ብጻያ፣
መኣስ ካልእ ኮይና “ንጽህቲ” ንሳ’ያ!

መምሃሪ ኪከውን ግናይ ከይርከብ፣
ሓቂ እናገለጸት ድሁል ብምግጫብ፣
ንዘድሐርሕር ኩሉ እናበለት “መስከብ”፣
ንጾር ናይ ብጾታ ትስከም ኣብ ሞንኩብ፣
ኣእዳዋ ቆርዲፉ ሽዳ ከተልግብ።

በቲ ግርህናኣ ንኩሉ ተላዝብ፣ ምስ ኩሉ ትላዘብ፣
ብቕንዕና ከይዳ ንፍቕሪ ትከስብ።
ኣብ ጽንኩር ኩነታት ዓቕልኻ ዘጽብብ፣
ድምብርጽ ከይበላ ማእዘናት ትህብር፣ ሜላታት ትጣበብ፣
መስተርሆት ፈጣሪት ፍታሕ እትቕልብ፣
ናታስ ንበይኑ’ዩ ቅድሚት ተወርዊራስ ንብጾታ ተስዕብ!፣
ገበትቲ ትኩብኩብ፣ ስልማት ጋንታኣ ብጾታ ትክብክብ!

ንሳ ንድያ “ንጽህቲ” ኣብ ኩሉ ትርከብ፣
እታ ጓል ኤርትራ ፍጹም ዘይትርብርብ፣
ሕድሪ ተረኪባስ ሕድሪ ከተርክብ!
ኣብ መትከል ትርከብ ሓድነት ትዕቕብ።

ተሸፊኑ’ዩ ምበር ቲ’ኩሉ መውጋእታ ብማንም ዓለባ፣
ሕዝባ ንኪናገፍ ኪሃልፍ ጸበባ፣
ኣብ ዝባና ኣጽሕያ ነቲ ኩሉ ቦንባ፣
ከም ማይ ብጠያይቲ ንዓመጽቲ ገጪባ፣
ኣጽዋራት ሰሊባ፣ ሓርነት ኪመጽእ ገበትቲ ሸልቢባ፣ ብሓዊ ለብሊባ፣
ክንዲ ዝተጋደለት ሓለፋ ካብ ሰባ፣
ኣየ ተጋደልቲ ኣየ በኣል ማማ ኣየ በኣል ባባ፣
“ሓይኩ” ዶ በልኩማ ነታ ጽላል ሕዝባ! ነታ ገርሂ ልባ?
ኣነስ ምበልክዋ ንጽህቲ ናይ ህዝባ፣ ንሃገር ድባባ፣
ዝያዳ ትሕረ ካብ ንግስተ ኣዜብ ካብ ንግስተ ሳባ።

ምኳን …
ሳለ ከምኡ ኢልኩም እናተጫረቕኩም ዝተወሃሃድኩም፣
ገጽኩም ብብሩሁ ናጽነት ኣምጺእኩም፣
ሓደራ ዝብለኩም፣ ከምታ ናይ ቀደምኩም፣
ከይተጨካከንኩም እናተመሃሃርኩም እናተመሓሓርኩም፣
ዓቕብዋ በሉ ኣጽኒዕኩም ፍቕርኩም፣ ሰሳጓኹም ሂዝኹም።

ፍልፍል መበቖላዊ ዛንታ መጸሐፍ “ሰውራ መቐረት ኣብ ምረት” ብተጋዳላይ ይትባርኽ ሃብተጊዮርጊስ፡ ንክትነብዋ እናዓደምና።

ክብሪ ንደቀንስትዮ ዓለምና በሓፈሻ፣ ንደቀንስትዮ ሃገርና ድማ ብፍላይ!!!

[Meleket]

ኣዋልድ ሓበሻ እስከ ተሓበና፡
ኣዋልድ ኤርትራ እስከ ተሓበና፡
ምስ በኣል ሮቤርቶ ንኸይትቝረና፡
ንባህታ ወሊድኽን ጅግና ወዲ ጅግና፡
ንርስቲ ዓደቦ በጃ ዝዀነልና።

ምኒልክ ከሸዋ ሳይነሳ ገና [ሰሞንኛው ኤርትራዊ ግጥም] ሓላይ ወዓድዋ

ሓላይ ወዓድዋ

እቶም ተፋልስዋ፡
ኣብ ኣዘናትዋ፣
እስከ ጥመርዋ፡
ከምዚያ እታ ጽዋ፣

ንኵናት ናይ ሓላይ ጎስዩ ኣትሪፉ፡
ዓድዋ ዓድዋ ይብል ሓበሻ ብኣፉ፡፡

ኣዋልድ ሓበሻ እስከ ተሓበና፡
ኣዋልድ ኤርትራ እስከ ተሓበና፡
ምስ በኣል ሮቤርቶ ንኸይትቝረና፡
ንባህታ ወሊድኽን ጅግና ወዲ ጅግና፡
ንርስቲ ዓደቦ በጃ ዝዀነልና።

https://m.youtube.com/watch?v=X0wLckWSPa8



ይህ ምስል የኤርትራዊው ጀግና የደጃዝማች ባህታ ሓጎስ (ኣባ ጥመር) ነው።