=================================================================================================================
መንግስቲ ትግራይ፡ ተወከልቲ እቲ ክልል ኣብ ኣኼባ ክልቲኦም ባይቶታት ከምዘይሳተፉ ኣፍሊጡ
ቅድሚ 5 ሰዓታት
ኣባል ፈጻሚ ስራሕ ህወሓት
ክልቲኦም ባይቶታት ኢትዮጵያ፡ ማለት’ውን ባይቶ ተወከልቲ ህዝብን ባይቶ ፌዴሬሽንን፡ ሎሚ “ሻድሻይ ዓመት” ናይ ስራሕ ጊዜ ንምጅማር፡ መኽፈቲ ምድላው ሎሚ ድሕሪ ቀትሪ ካካይድ እዩ።
መንግስቲ ትግራይ ግን፡ ንኣኼባ እቶም ኣብያተ ምክሪ (ባይቶታት) “ዘይሕጋዊ እዩ” ኢልዎ ኣሎ።
ኣባል ፈፃሚ ስራሕ ውድብ ህወሓት ኣይተ ጌታቸው ረዳ "ኣብ ዘይሕጋዊ ኣብያተ ምኽሪ ኣይንሳተፍን" እንትብሉ ምስ ቢቢሲ ኣብ ዘካየድዎ ቃለ መሕተት ተዛሪቡ።
ኣብ’ቲ ሎሚ ዝካየድ ኣኼባ ኮነ፡ ኣብቶም ኣብያተ ምኽሪ፡ ተወከልቲ ትግራይ ከምዛይሳተፉ’ውን እዩ መንግስቲ ትግራይ ገሊጹ ዘሎ።
ከም’ቲ ንቡር እንተዝኸውን ነይሩ፡ ዕምሪ ስልጣን ክልቲኦም ባይቶታት ኣብቂዑ፡ እቲ ናይ ሎሚ ኣኼባ፡ ሓደሽቲ ዝተመረጹ ኣባላት ባይቶ ሒዙ እዩ ክጅምር ነይሩ።
"ንሕና ንኣብይ ጸገም ኮይንናዮ ኣይንፈልጥን"
'እናተናቖቱ ዝወዕሉ ውድባት ውህደት ክፈጥሩ ኣይክእሉን'
ህሉው ዝምድና ኤርትራን ኢትዮጵያን ብዓይኒ ተንተንቲ
እንተኾነ፡ መንግስቲ ኢትዮጵያ፡ ብሰንኪ ለበዳ ኮሮናቫይረስ እዋን መረጻ ስለዘናውሖ፡ ኣብ ኢትዮጵያ ክካየድ ዝነበሮ መረጻ ኣይተኻየደን።
ብባይቶ ፌዴሬሽን ኣቢሉ ድማ፡ ዘበን ስልጣን እቶም ኣብያተ ምኽሪ ኣናዊሑ እዩ። ነዚ ስዒቡ እዩ፡ መንግስቲ ትግራይ፡ ነቲ ሕዚ ንሻድሻይ ዓመት ቀጺሉ ዘሎ ባይቶ “ዘይሕጋዊ” ኢልዎ ዘሎ።
ፌዴራል መንግስቲ ኢትዮጵያ ብወገኑ፡ ዘበን ስልጣን ባይቶታት ኢትዮጵያ፡ ሕጊ ሓሊዉ እዩ ተናዊሑ እዩ ዝብል።
ኣይተ ጌታቸው ረዳ፡ ሎሚ ሰዓት 8 ኣብ ዝካየድ ኣኼባ ክእከብን ቀዳማይ ስሩዕ ኣኼባኡ ከካይድ ዝነበሮን መበል 6ይ ቤት ምኽሪ ከምዝኾነ ይዛረብ።
“መረፃ ኣይተገብረን፡ መረፃ ስለዘይተገብረ ድማ፡ እቲ ንሓሙሽተ ዓመታት ዝተኣተወ ኩንትራት ፓርላማ ይኹን፡ ንሱ ዝመስረቶ መንግስቲ ስልጣኖም ኣብቂዑ እዩ” ኢሉ።
"እቲ ሕዚ ተፀዊዑ ዘሎ ኣኼባ እቶም ቅድሚ ሎሚ ኣባላት ክልቲኡ ፓርላማ ዝነበሩ ብኣጋጣሚ ተኣኻኺቦም ክትብሎም እንተዘይኮይኑ: ሕጋዊ ቁመና የብሉን። ዘሕልፎ ውሳነ እውን ተቐባልነት የብሉን" ክብል'ውን ገሊጹ።
ኣብ ኢትዮጵያ “ፓርላማ የለን ኢልና ኢና ንኣምን” ዝበለ ኣይተ ጌታቸው፡ ምስ’ቲ ፓርላማ ኾነ ምስ ቀዳማይ ሚኒስተር ኣብዪ ኣሕመድ፡ ከምኡ’ውን ምስ ካቢኔኡ “ስልጣኖም ስለዘብቀዐ፡ ዝኾነ ዓይነት ርክብ ክህልወና ኣይኽእልን” ክብል ኣፍሊጡ።
“እንተኾነ፡ እቲ ፌዴሬሽን ንምቕጻል ዘኽእሉ ትካላት ግን፡ ዕለታዊ ስርሖም ክቕጽሉ ይግባእ” ብምባል ከም ኣብነት ድማ፡ ፖሊስ፡ ኣብያተ ህንጸትን ቤት ፍርድን ንዝኣመሰሉ ትካላት ፍትሒ ጸሪሑ።
“እዞም ትካላት፡ ናይ ሓሙሽተ ዓመት ናይ ስልጣን ዘበን ተቐቢሎም ብምርጫ ዝጣየሹ ስለዘይኮኑ: እታ ሃገር ኣብ ምቕፃል ዓብዪ ታራ ክህልዎም እዩ" ዝበለ ኣይተ ጌታቸው ሓይሊ ምክልኻል ሃገር እውን ሉኣላውነት ሃገር ናይ ምሕላው ዓብዪ ስራሕ ስለዘለዎ ከምዝቕጽል ኣረዲኡ።
መንግስቲ ትግራይ ነዞም ብሕጊ ክቕፅሉ ዝኽእሉ ኣካላት ኣፍልጦ ሂቡ ምስኦም ርክብ ከምዝህልዎ ድማ ይገልጽ። መንግስቲ ፌደራል ኢትዮጵያን፡ ክልላዊ መንግስቲ ትግራይን ምስሕሓብ ካብ ዝጅምሩ ጸኒሑ’ሎ።
ሕዚ ድማ፡ ነሓድሕዶም “ዘይሕጋዊ እዩ” እናበሉ ናብ ዝካሰስሉ ብርኪ በጺሖም ኣለዉ። መንግስቲ ፌደራል ኢትዮጵያ፡ ክልል ትግራይ ዘካየደቶ መረጻ “ዘይሕጋዊን ተቐባልነት ዘይብሉን እዩ” ምባሉ ይዝከር።
መንግስቲ ትግራይ ድማ፡ እቲ ሕዚ ስልጣኑ ተናዊሑሉ ቀጺሉ ዘሎ መንግስቲን ባይቶታቱን “ዘይሕጋውያንን ተቐባልነት ዘበብሎምን እዮም” እዩ ዝብል።
