Author and researcher Alemseged Tesfay presented his new book for the second time, at ECCC. The turnout was tremendous, and the questions from the youth were outstanding.
#FeshBahlna
_______________
ሪፖርታዥ
ስነ-ስርዓት መመረቕታ ኮለጅ ምህንድስናን ቴክኖሎጅን ማይነፍሒ
ዓንዶም ግርማይ (ወዲ-ደረስ) @shabait
ስእሊ፦ ኣብርሃም በየነ
ኣብ ኩሉ ኩርናዓት ሃገርና ዝርከባ ላዕለዎት ትካላት ትምህርቲን ኣብያተ ትምህርቲ ቴክኒካውን ሞያውን ስልጠናታትን፡ ብዝተፈላለየ ዓውደ-ትምህርቲ ከምህርኦም ንዝጸንሓ ተመሃሮ የመርቓ ኣለዋ። ኮለጅ ምህንድስናን ቴክኖሎጅን ማይነፍሒ፡ ሓንቲ ካብተን ናይ ምምሃርን ምስትምሃርን ዕማማተን ዘሰላስላ ዘለዋ ኮለጃት ኮይና፡ ሎም ዘበን ብ17 ዓውዲታት ዲግሪን ዲፕሎማን ዘምሃረቶም 383 ተመሃሮኣ ብ19 ሓምለ 2025 ኣመሪቓ።
ኣብቲ ዕለት፡ ተመሃሮን ወለድን ብንግሆኡ’ዮም ኣብ ቀጽሪ ኮለጅ ማይነፍሒ ተኣኻኺቦም። ተመረቕቲ፡ ናይ እንቋዕ ኣብቅዓና ተሓቛቚፎም ሰላምታ ክለዋወጡን፣ ናይ ሓባር ስእሊ ክወስዱን ኣርፊዶም። ሰዓት 8፡50 ቅ.ቐ ብዕልልታን ጨብጨባን ተሰንዮም ስነ-ስርዓት መመረቕታ ናብ ዝፍጸመሉ ኣዳራሽ ኣትዮም። መቓምጦኦም ድሕሪ ምሓዝ፡ እቲ መደብ ብዝኽረ ሰማእታት መጋረጃኡ ጋሊሁ።
ኣብ’ቲ ላዕለዎት ሰበስልጣን መንግስትን ግንባርን፣ መራሕቲ ሃይማኖት፡ ኣምባሳደራት፡ ሓለፍቲ ላዕለዎት ትካላት ትምህርቲ፡ ማሕበረሰብ ኮለጅ፡ ዕድመ ዝተገብረሎም ኣጋይሽ፡ ወለድን ስድራ-ቤት ተመረቕቲን ብዓቢኡ ድማ ተመረቕቲ ኣብ ዝተረኽብሉን ናይ ምምራቕ ስነ-ስርዓት፡ ፈለማ ናይ እንቋዕ ደሓን መጻእኩም ናይ መኽፈቲ ቃል ብዲን ኮለጅ ምህንድስናን ቴክኖሎጅን ማይነፍሒ ዶ/ር
ኣርኣያ ዘርኣይ ቀሪቡ።
ዶ/ር ኣርኣያ ኣብ መደረኡ፡ ህይወት ኮለጅ በዳሂ ጒዕዞ እኳ እንተኾነ፡ ተመረቕቲ እዚ ኮለጅ ተጨባጢ ፍረ ከምጽኡሉ ዝኽእሉ ክእለት ዓጢቖም ኣለዉ። ነዚ ዕለተ መመረቕታ ምብቅዖም ድማ ኣብ ህይወቶም ዓቢ ነጥበ መቐይሮ ምዃኑ ኣረዲኡ።
ኮለጅ ምህንድስናን ቴክኖሎጅን ማይነፍሒ፡ ኣብዚ ናይ ሎሚ ዓመት መመረቕታ፡ ኣብ ናይ ዲግሪ ፕሮግራም፡ 13 ብሕርሻዊ ምህንድስና፣ 26 ብከሚካላዊ ምህንድስና፣ 30 ብሲቪላዊ ምህንድስና፣ 39 ብስነ-ፍልጠትን ምህንድስናን ኮምፕዩተር፣ 27 ብምህንድስና ኤለክትሪክ ኤለክትሮኒክስን፣ 16 ብምህንድስና ባሕሪ፣ 27 ብሜካኒካዊ ምህንድስና፣ 28 ብምህንድስና ዕደና ብድምር፡ 206 ክዀኑ እንከለዉ ካብዚኦም እተን 61 ደቀንስትዮ እየን። ኣብ ናይ ዲፕሎማ ፕሮግራም ድማ፡ ጠቕላላ ተመረቕቲ 177 ኮይኖም፡ ካብዚኦም 107 ደቀንስትዮ እየን። ንዝርዝር ምስ እንምልከት ድማ፡ 23 ብተክኖሎጂ ተሽከርከርቲ፣ 28 ብቴክኖሎጂ መተግበርያ ኮምፕዩተር፣ 18 ብቴክኖሎጂ ናውቲ ኮምፕዩተርን ስርዓተ-መርበብን፣ 13 ብቴክኖሎጂ ህንጻ፣ 23 ብቴክኖሎጂ ኤለክትሪክ፣ 24 ብቴክኖሎጂ ኤለክትሮኒክስ፣ 26 ብቴክኖሎጂ ዕደና፣ 11 ብቴክኖሎጂ ስርዓተ መዝሓልን ምጣነ-ኣየርን፣ 11 ድማ ብቴክኖሎጂ ቅየሳን ንድፍን እዮም። ካብ ጠቕላላ ተመረቕቲ እተን 44 ሚእታዊት ደቀንስትዮ እየን።
ብመሰረት መግለጺ ዶክተር ኣርኣያ፡ ኣብ 2017፡ ሃገራዊ ትካል ላዕለዋይ ትምህርትን ምርምርን ወሳኒ ዝኾነ ዳግመ-ስርርዕ ቅርጺ ኮለጃት ድሕሪ ምብጋሱ፡ ኣብ ነሓሰ 2018 ድማ፡ ኮለጅ ምህንድስና ማይነፍሒ ነበር፡ ኮለጅ ምህንድስናን ቴክኖሎጅን ዝብል ስም ሒዙ፡ ገዛእ ርእሱ ዘመሓድር ኮለጅ ንምዃን በቒዑ። ካብ ጥሪ 2019 ጀሚሩ ድማ፡ ዝተገብረሉ ለውጢ ብምልኣት ኣብ ትግባረ ውዒሉን ብኡ ይምራሕ ኣሎን።
ንበመል18 ግዜኡ ዘመርቕ ዘሎ ኮለጅ ምህንድስናን ቴክኖሎጂን ማይነፍሒ፡ ካብ ዝተመስረተሉ 2004 ጀሚሩ፡ ኣብ ምዕባለ ሃገራዊ ቊጠባ ዕዙዝ ግደ ዘለዎም ልዑል ብቕዓት ዝውንኑ ዜጋታት፡ ንናይ ሎሚ ዓመት ተመረቕቲ ደሚርካ ዛጊት
7671 መንእሰያት ኣፍርዩ። ሃገር ኣብ ዓውዲ ምህንድስናን ቴክኖሎጅን እትጠልቦ ዓቕሚ- ሰብ ከምእተጸንበሩ ድማ ሰነዳት ናይ’ታ ኮለጅ የነጽር። እንተኾነ፡ እቲ ኮለጅ ነቲ ክበጽሖ ዝሕልን ደረጃ ብቕዓትን ትምህርታዊ ጽሬትን ከረጋግጽ፡ ዋሕዲ ኤርትራውያን መምህራንን ጸገማት ትሕተ-ቅርጺ ህንጻን መሳለጥያታትን ካብቶም ብቐዳምነት ክፍትሑ ዘለዎም ብድሆታቱ ምዃኖም ኣብቲ ኣጋጣሚ በሪሁ። ዘለዎ ዋሕዲ መምህራን ንምፍታሕ ብሓደ ወገን፡ ዘለዎ ዓቕሚ ሰብ ንምሕያል ድማ በቲ ካልእ፡ ክሰርሕ ጸኒሑን ኣሎን።
ብመሰረት መግለጺ ዶ/ር ኣርኣያ፡ እቲ ኮለጅ ንኤርትራውያን መምህራን ንዝለዓለ ማህደረ ትምህርቲ ዕድል ብምሃብ ብንጥፈት ክሰርሕ ጸኒሑን ኣሎን። ከም ውጽኢት ናይ’ዚ፡ ኣብዚ እዋን’ዚ 18 ካብ መምህራኑ ናይ ማስተርስን ዶክትረይትን ትምህርቶም ኣብ
ሩስያ፡ ቻይና፡ ህንዲ፡ ሃንጋሪን ጃፓንን ኣብ ምክትታል ይርከቡ። እዚ ተበግሶ’ዚ ተስፋ ዝህብ’ዩ። እንተኾነ ንዕላማ ናይቲ ኮለጅ ብምልኣት ዝምልስ እዩ’ኳ እንተዘይተባህለ፡ ኣብ ወጻእተኛታት መምህራን ዘለዎ ጽግዕተኛነት ኣብ ምጒዳል ዘየማትእ ግደ ክህልዎ’ዩ። እቲ ኮለጅ ሕጂ’ውን ዘለዎ ሃጓፋት ንምምላእ ዝተርፉዎ ስርሓት ብዙሓት’ዮም።
ዶ/ር ኣርኣያ ኣስዒቡ፡ ቊጽሪ መምህራን ኮለጅ ምህንድስናን ቴክኖሎጂን ማይነፍሒ ኣብዚ እዋን 44 ወጻእተኛታት፡ 35 ኤርትራውያን ኮይኖም፡ ካብዚኦም ናይ ፒ.ኤች.ዲ ማዕርግ ዘለዎም 7 ጥራይ ምዃኖም ገሊጹ።
እቲ ካልኣይን ዝዓበየን ዶ/ር ኣርኣያ ዝጠቐሶ ብደሆ ናይ’ቲ ኮለጅ፡ ትሕተ- ቕርጺ’ዩ። ኣብዚ እዋን እቲ ኮለጅ ዘለዉዎ ኣብያተ-ፈተነን ኣብያተ-ዕዮን ብመጠን ይኹን ብብቕዓት ንኣድማዒ ስልጠናን ምርምርን ዝኣክል ኣይኮነን። እቶም ዘለዉ ህንጻታት ኣብያተ-ጽሕፈታት፡ መምሃሪ ክፍልታትን መደቀሲ ተመሃሮን ብግዝያውነት ንኸገልግሉ ብፕሪፋብ ቴክኖሎጂ ዝተሰርሑን ነቲ ኮለጅ ምህንድስና ዝጠልቦ ዕዮ ዘማልኡ ኣይኮኑን። እዞም ሰፊሕ ዝርግሐ ኣብ ዘለዎ ቦታ ፋሕ ዝበሉ ብሎካት፡ ንኣካዳምያውን ምምሕዳራውን ሃዋህው ምቹእነት የብሎምን። ብዘይካ’ዚ፡ ናይ ስፖርትን ምዝንጋዕን ትሕተ-ቕርጺ ወሲኽካ ዝተማልአ ህይወት ካምፓስ ናይ ዝህቡ መሳለጥያታት ሕጽረት’ውን ከምዘሎ በሪሁ።
ዶ/ር ኣርኣያ ኣስዒቡ፡ ተመረቕቲ፡ ዝተሓላለኹ ኣምራት ምህንድስና ንምርዳእ ከምእተረባረቡ፣ ንብቕዓቶም ዝፈታተን ጽንኩር እዋናት ሰጊሮም፤ ክምህ ዘይብሉን ዝተሳሕሉን ሞያውያን ኮይኖም ምውጽኦም ብምግላጽ፡ ዝቐሰሙዎ ትምህርቲ ኣብ ሃገርና ንዘሎ ብደሆታት ከም ዘላቒ መፍትሒታትን ምምላእ ተተካኢ ጸዓትን ፍታሕ ከምጽኡ ከምዝሕግዞም ኣረዲኡ። ኣብ መወዳእታ ድማ፡ ተመረቕቲ ሃገር ዝጠቅምን ንቚጠባኣ ዘማዕብልን ኣበርክቶ ክገብሩ ትጽቢት ከምዝግበረሎም ብምምልካት፡ ኣብዚ ናብ ሓድሽ መድረኽ ዝሰጋገሩሉ ዘለዉ እዋን፦
• ወኒ ናይ ምህዞኣዊ ባህጊ ክህልዎምን ነቲ ዝተለምደ ኣገባብ እናፈተሹ ዝሓሸ ፍታሕ ከናድዩን፣
• ዓውዲ ምህንድስና ኩሉ ግዜ ኣብ ፍልቀት ስለዝርከብ፡ ነፍሶም ዘማዕብሉ ናይ ምሉእ-ዕምሪ ተመሃሮ ክኾኑ፣
• ክእለቶምን ብቕዓቶምን ኣብ ኣገልግሎት ሕብረተሰቦም ከውዕልዎን ስሞም ኣብ መዝገብ ዕዉታት ኤርትራውያን ዝሰፍር ግብራዊ ስራሕ ከፍርዩን ተላብዩ።
ቀጺሉ ቃል ብናይ ክብሪ ዕዱም ሚኒስተር ህንጻ ኣቶ
ኣብርሃ ኣስፍሃ’ዩ ስዒቡ። ሚኒስተር ኣብርሃ ኣብ መግለጺኡ፡ እታ ዕለት፡ ተመረቕቲ ነቲ ንዓመታት ብዘይሕለል ጻዕሪን ኒሕን ተጓዒዞም ብዕላማ ንፍልጠቶምን ክኢላዊ ዓቕሞምን ንምድራዕ ዘንቀድዎ ራኢ ክዉን ዝገበረትን ኣብ ታሪኽ ህይወቶም ዕዝዝቲ ምዃናን በቲ ኣጋጣሚ ተኻፋሊ ተበሃጊ ዓወቶም ብምዃኑ ድማ፡ ዕዙዝ ክብሪ ከምዝስምዖ ኣረዲኡ።
መቐረት ዓወት ኣዝዩ ጥዑም’ዩ። ብዘይ ዋጋ ግን ኣይርከብን። ዓቢ ዓወት ንኽትጐናጸፍ ዓቢ ዋጋ ክትከፍል ኣለካ። ነዚ ዓወት’ዚ ድማ ሰዓታት ድቃስኩም እናቖረጽኩም፡ ለይቲን መዓልቲን ምስ መጽሓፍቲ እናተቓለስኩም፡ ግዝያዊ ድሌታትኩም ወዘተ እናገታእኩም ኢኹም ክትጐናጸፍዎ ክኢልኩም። ነዚ ኩሉ ሰጊርኩም ምስ ዝሓፈስኩሞ ዓወት ዘይዳረግ ኣይኹን’ምበር፡ ቀሊል መሰናኽል ኣይሓለፍኩምን፡
ብምባል ዝገለጸ ሚኒስተር ኣብርሃ፡ ተመረቕቲ ኣብ ልዕሊ’ዚ፡ ምስጢር ዓወቶም ክዉን ንክኸውን፡ ምዕባለ ሰብኣዊ ጸጋ ዓቕሚ ሰብ፡ ካብ ቀዳሞት ዕላማታቶም ገይሮም፡ ኩሉ መደያዊ ወጻኢታት ብምግባር፡ ጥጡሕ ናይ ምምሃርን ምስትምሃርን ባይታ ዝፈጠሩ መንግስትን ህዝብን መጒሱ።
ዕለተ መመረቕታ፡ ንዓመታት ዝተማሃርዎ ትምህርቲ ዛዚሞም ናብ ግብራዊ ስራሕ ክዋፈሩ ድልውነቶም ዘረጋግጹላ ኣጋጣሚ ምዃና ብምሕባር ድማ፡ መመረቕታ ማለት፡ ናብ ካልእ ስራሕ፡ ጻዕርን ኣበርክቶን መድረኽ መሰጋገሪ ደኣ’ምበር፡ መዛዘሚ ከምዘይኮነ፣ ተመረቕቲ ድማ ንዝተመረቑሉ ዓውድታት ትምህርቲ ምስ ዘመናዊ ቴክኖሎጂ ኣወሃሂዶም፡ ኣብ ዝተዋፈርሉ ስራሕ፡ ሽግራት ሕብረተሰብ ኣብ ምፍታሕ ክሰርሑሉ ጽኑዕ እምነቱ ገሊጹ።
ዓለምና ካብ ሰዓት ናብ ሰዓት ብቴክኖሎጂን ምህንድስናን ትውንጨፈሉ ዘላ ህሞት ኣገዳስነት ናይዚ ተጐናጺፍኩሞ ዘለኹም ዓወት፡ ንምዕሩይነትን ተወዳዳርነትን ኤርትራ ምስ ካልኦት ሃገራትን ህዝቢታትን ዝድርዕ ሓደ ስጉምቲ እዩ’ሞ፡ ዝያዳ ጻዕሪን ኣተኩሮን ሂብኩም ናብ ዝለዓለ ደረጃ ንምብጻሕ ክትምርሹ ድሌት ህዝቢን መንግስቲን’ዩ፡
ብምባል መደረኡ ዝቐጸለ ሚኒስተር ኣብርሃ፡ ተመረቕቲ በጺሖሞ ዘለዉ ፍረ፡ ውጽኢት ሓያል ጻዕሮም ምዃኑን ዝተመረቑሉ ዓውዲ ብግብራዊ ስራሕ ከሰንይዎን ካብ ሎም ጀሚሮም እጅገኦም ሰብሲቦም ክብገሱ ኣተሓሳሲቡ።
ኣብ መወዳእታ ድማ ትካላት፡ ከገልግሉወን ዝተመደቡወን ምሁራት ዜጋታት፡ ፍልጠቶምን ክእለቶምን ኣብ ምድንፋዕ ሃገራዊ ዕብየት እጃም ክህልዎ ጥጡሕ ባይታ ክፈጥራሎም ተማሕጺኑ።
ወኪል ተመረቕቲ
ሃና ሃይለ ብግደኣ፡ ናብ ደረጃ መመረቕታ ክበጽሑ ነዊሕ ከም እተጓዕዙን ኣብዛ ዕለት ድማ ፍረ ናይቲ ዝቐሰምዎ ትምህርቲ ክሓፍሱ ምብቅዖም ልዑል ሓጐስ ከም ዝስምዖምን ጠቒሳ፡ ንዝተመሃሩዎ ኣብ ጥቕሚ ህዝብን መንግስቲን ከውዕልዎ ድሉዋት ምህላዎም ኣፍሊጣ።
ቤቲኤል ሃብቶም፡ ብዓውዲ ሲቪል ምህንድስና፣
ሲራክ ወልዱ ድማ ብስነ- ፍልጠትን ምህንድስናን ኮምፕዩተርን ክልቲኦም ብልዑል መዓርግ ማለት ብምሉእ ነጥቢ (4) ናይ ኮለጅ ትምህርቶም ዛዚሞም መዳልያ ካብ ዝተሸለሙ እዮም።
ቤትኤልን ሲራክን ኣብ 2ይ ደረጃ ሃገራዊ መልቀቒ መርመራ (ማትሪክ) ምሉእ ነጥቢ (4) ሒዞም እዮም ናብ ኮለጅ ምህንድስናን ቴክኖሎጂን ማይነፍሒ ተጸንቢሮም። ብቕዓቶም ኣይጐደለን፣ 5 ዓመት ናይ ኮለጅ ትምህርቶም ብምሉእ ነጥቢ (4) ዛዚሞም፡ ቤትኤል ብሲቪል ምህንድስና፡ ሲራክ ድማ ብስነ-ፍልጠትን ምህንድስናን ኮምፕዩተርን ተመሪቖም።
ቤቲኤል ኣብ ዕድመ ቊልዕነታ፡ ከም ቈልዓ ነገራት ርኢኻ ናይ ምፍታን ባህሪ ነይሩዋ። ንባብ ሓደ ካብኡ’ዩ ነይሩ። ኮምፕዩተር ኣብ ትረኽበሉ ምጥዋቕ ትፈቱ ነይራ። ኣብ መኣዲ ትምህርቲ ምስ ተጸንበረት ኣብ ጒዕዞ ትምህርታ ብዙሕ ከምዝሓገዛ ትገልጽ።
ትምህርቲ ንዓይ ስራሕ ዘይኮነ፡ ደስ እናበለኒ ዝሰርሖ መዘናግዒ’ዩ፡
ብምባል፡ ብዝለዓለ መዓርግ ክትምረቕ ከምዝሓገዛ ትኣምን።
እዛ ገና ካብ ቊልዕነታ ጀሚራ ፊዚክስ፡ ስነ-ሕሳብን (ብምቕማር ዝስርሑ) ዓውደ ትምህርቲ ትፈቱ ምንባራ እትገልጽ ቤቲኤል፡ ኣብ ኮለጅ ምስተጸንበረት ካብ ክሊ’ዞም ዝተጠቕሱ ዓውዲታት ከይረሓቐት፡ ኣብ ልምዓትን ስነ-ህንጻን ሃገር ኣገዳሲ ዝበለቶ ስቪላዊ ምህንድስና ከተጽንዕ ወሲና።
ሲራክ’ውን ካብ ናይ ቤቲኤል ዘይፍለ ክኾኖ ዝደልዮ ብዙሕ ሕልምታት ነሩርዎ። ነዚ ደረጃ’ዚ ክበቅዕ ዝጥቀመሎም ዝነበረ ሜላታት መጽናዕቱን ከምኡ ድሕረ-ባይታ ኣብ ትምህርቱ ክጸውየና ተወኪስና ነይርና። ኣብ ክፍሊ፡ መምህር ክምህር ከሎ ጽን ኢልካ ምክትታል፣ ውጥን ሰሌዳ መጽናዕቲ ብምውጻእ ግብራዊ ስራሕ ምስራሕ፡ ወዘተ. ምንባሮም፣ ንነብሱ ድማ በዞም ክልተ ረቛሒታት ጸሚዱ ሳላ ዝተጐዓዘ፡ ብምሉእ ነጥቢ ክዛዝም ከምዝኸኣለ ኣረዲኡ።
ብሳላ ጻዕሮምን ዘይሕለል ደገፍ ወለዲን መምህራንን ከም ድሌታቶምን ምርጫኦምን ድሕሪ 5 ዓመት ብምሉእ ነጥቢ ትምህርቶም ዝዛዘሙ ቤቲኤልን ሲራክን፡ ዝተርፎም ጾር፡ ህይወት ዝቕይርን ተዘካሪን መነባብሮ ዜጋታት ዘፋዅስ ሓፋሽ ዝረብሓሉ ኣበርክቶ ምግባር ምዃኑ’ዩ። ዕድል ኣብ ዝረኸቡሉ ደረጃ ትምህርቶም ከበርኹ ካብ ናይ መጻኢ መደባቶም’ዩ። ኣብ መወዳእታ፡ ንኹሎም ተመረቕቲ ብጾቶም፡
ዮሃና፡ እንቋዕ ኣብቅዓና!
ድሕሪ ምባል፡ ንዘምሃርዎም ወለዲ፡ ህዝብን መንግስቲን ክኽሕሱ፡ ኣብ ዝተመደብሉ ስራሕ ድማ ብምሉእ ሕልናን ዓቕምን ብተወፋይነት ክሰርሑ ምዃኖም ቃል ኣትዮም።