ስትራተጂ፡ ዋዜማ ውድቀት
ይብል ምስላ ኣምሓራ።ዝጨነቖ ጥንስቲ የእቱ
ኣብ ከቢድ ወጥሪ ዝርከብ ጉጅለ ፕሮስፐሪቲ፡ ጭንቀት ንምፍኳስ ሃንዲሱ ዝነጥፈሉ ዘሎ ስትራተጂ፡ ጥዕና ዘለዎ ኣእምሮ ክሓስቦ ዝኽእል ኣይኮነን፡-
➤ መንግስቲ ኣብ ዝቆጻጸሮ ከባቢታት ህዝቢ ንሰላም ዝጽውዕ ሰላማዊ ሰልፊታት ከካይድ ምስግዳድ፣ ንመራሕቲ ሃይማኖት፡ ዓበይቲ ዓዲ፡ ሰብ ጸጋ፡ ምሁራንን ዲፕሎማሰኛታትን 'ሰላም ንምምጻእ ሓግዙ' እናበልካ፡ ዕጡቓትን መሰሎም ዝሓቱ ሰልፈኛታትን ከም ዘረግቲ ሰላም ምቕራጽ፣ ማዕረ ማዕረኡ፡ ብልጽግና ኣራዓዲ “ቴከኖሎጂ ውግእ" ከም ዝዓጠቐ ኣምሲልካ ምፍርራሕ፣ ዝስልጥን ዘሎ ብዝሒ ወተሃደር ደጋጊምካ ብምርኣይ፣ መንግስቲ ብሓይሊ ክኣልዩ ንዝሓስቡ ተስፋ ምቑራጽ።
➤ ብዝተጋነነ ዜናታት ልምዓትን ዓወትን፡ ምስሊ ቀዳማይ ሚኒስተር ምዕዛዝ፣ ብዘብልጭልጭ መናፈሻታት ህዝቢ እናዓሸኻ፡ ብልጽግና ገዚፍ ሕልሚ ከምዘለዎ: ህዝቢ ክንዮ ግዝያዊ ጸገማት፡ ናብቲ ዝመጽእ ተኣምር ከጥምት ብጻዕቂ ምጉስጓስ፣ በዚ መገዲ'ዚ፡ ነቲ ብጎይቶት ብልጽግና ኣብታ ሃገር ዝፍጸም ዘሎ ገዚፍ ዝምታ መሬትን ባህርያዊ ሃብቲን ምሽፋን፣
➤ "ክልል” ክኾኑ ጠለብ ንዘለዎምን ዘይብሎምን ብምትብባዕ፡ ኣቃውማ ሕብረተሰባት ናብ ዝደቐቐ ምክፍፋል፣ እምነታት ኦሮቶዶክስን ምስልምናን ኣብ ውሽጦም ከም ዝከፋፈሉ ምግባር፡ ምስ ሓደስቲ እምነታት ምትፍናን፣ ኣብ ኣዲስ ኣበባን ከባቢኣን ዝርከቡ ኦሮሞ ምስ ኣምሓሩ፡ ተጋሩን ካልኦትን ምፍጣጥ፣ ኣብ ወሎን ሰሜን ሽዋን ተሓዋዊሶም ዝነብሩ ብሄራት ዓፈር፡ ኦሮሞ፡ ኣምሓራን ትግራይን ፍልልያቶም ንረብሓ መንግስቲ ምምዝማዝ፣ ሓይልታት ምክልኻል ትግራይ (TDF) ንሓድሕዶም ከም ዝዋግኡ ምግባር፣ ንህዝቢ እንድርታን ራያን ተምቤንን ኣንጻር ህወሓት ምልዕዓል፣ ጉዳይ ወልቃይት፡ ጸለምቲን ጸገደን ብዘይ ፍታሕ ኣጽኒሕካ፡ ንህወሓት ምስ ፋኖ ምግጫው፣
➤ ናይ ወሎ፡ ሽዋ፡ ጎንደርን ጐጃምን ፋኖ ብሓይሊ ገንዘብን ካልእን ከፋፊልካ ንሓድሕዶም ምርጻም፣ ንፋኖ ምስ ዕጡቓት ወልቃይት፣ ቅማንት፣ ኣገው፣ ቤንሻንጉል ጉምዝን ሱዳናውያንን ኣብ ውግእ ምጽማድ፣ ብሄረሰባት ቤንሻንጉል፡ ኣንጻር ኣብ ክልሎም ዝርከቡ ኣምሓራን ተጋሩን ኣገውን ምርስሳን፣ ኣብ ክልል ኦሮምያን ህዝብታት ደቡብን፣ ኣብ መንጎ ብሄረሰባት ወላይታ: ሲዳማ፡ ጉራጌ፡ ስልጤ፡ ጋሞ፣ ጌዶዎ፣ ጉጂ፣ ኮንሶ፣ ማጂ ዝጸንሐ ዘይምቅዳው ብስውር መገዲ ምምዝማዝ፣ ህዝብታት ደቡብን ኦሮሞን ኣንጻር ሶማልን ምስቶም ኣብ ከልሎም ዝሰፈሩ ኣምሓራን ካልኦት ዓሌታትን ከም ዝተፋነኑ ምግባር፣
➤ ምስ ኤርትራ ኲናት ዘይተርፍ'ዩ! ብዝብል ጽዑቕ ፕሮፖጋንዳ ንህዝቢ ኢትዮጵያ ቅሳነት ምኽላእ፣ ናይ ዕጽዋን ክርደናን ጭኑቕ ስነኣእምሮ ብምፍጣር፡ ኢትዮጵያዊ “ባሕሪ” መፍትሕ ኩሉ ሽግራት ገይሩ ንክወስዶ ብጻዕቂ ምጉስጓስ፣ በዚ መገዲ'ዚ ኣቓልቦ ካብ ውሽጢ ናብ ግዳም ምቕናዕ። ብዘይ ባሕሪ ሃገር ምዃን ከምዘይክኣል እናጋዋሕካ ንጎረባብቲ ሃገራት ምሽቓል፣ ንማሕበረሰብ ዓለም
እናበልካ ኣብዚ ናይ ጻዕረ-ሞት ጸወታ ምጽንባር።ኣብ ውግእ ከይንኣቱ ዕረቑና
ከምዚ ዓይነት መትሓዚ ዘይብሉ ሓድሕዳዊ ግጭትን ሕንፍሽፍሽን ፈጢርካ ስልጣንካ ክትዕቅብ ምሕሳብ፣ ብርግጽ ናይ ጥዕና ኣይኮነን። ናይ ፕሮስፐሪቲ ጋኔን ደም ዝጸግብ ኣይመስልን፡፡ ህዝቢ ኢትዮጵያ ልቦና ይሃቦ። ነዚ ውጥን ህልቂት'ዚ ከበርዕን ዝኽእል፡
ዝብል ንቕሓትን ውሳነን ህዝቢ ጥራይ እዩ።ደም ምፍሳስ ይኣኽለና፡ ሰላም'ዩ ምርጫና!
