_______________
ስልጠና ‘ስርዓተ ጽሕፈት ትግርኛ’
“ናብ ስሙር ስርዓተ ጽሕፈት ዝወስድ ተበግሶ”
ዮሴፍ ሃይለማርያም @shabait
ቋንቋ፡ ተሰካሚ ታሪኽ፡ ባህልን መንነትን ተዛረብቱ’ዩ። ቋንቋ ይንኣስ ይዕበ ውርሻ፡ ትውፊትን ጸጋን ደቂ ሰብ ድማ እዩ። ቋንቋ፡ መግለጺ ሰብኣውነት እውን እዩ። ደረጃ ምዕባለ’ውን ብቛንቋ’ዩ ዝልካዕ። ምዕቡል ሃገር፡ ምዕቡል ቋንቋ ይውንን። ስለዚ፡ ቋንቋ ንምምዕባል፡ ብዕቱብነት ክስራሓሉ ዘሎዎ’ዩ። ገዛእቲ ሓይልታት፡ ፈለማ ቋንቋ ናይቲ ዝገዝኡዎ ሕብረተሰብ ከጥፍኡ’ዮም ዝጽዕቱ። ብድሕሪኡ፡ ባህሉን መንነቱን ይብርዙሉ። እዚ ፈተነ’ዚ፡ ኣብ ልዕሊ ህዝቢ ኤርትራ ተሰሪሑሉ’ዩ። የግዳስ፡ ህዝቢ ኤርትራ፡ ቋንቋኡ ሳላ ዝዓቀበ፡ ኣይተዓወቱን።
ኣብ ዝሓለፈ ግዜ፡ ቋንቋ ትግርኛ ክምእከልን ስርዓቱ ሓልዩ ክኸይድን ዝሕግዝ ስልጠና “
ስርዓተ ጽሕፈት ትግርኛ” ብሚኒስትሪ ዜና፡ ሚኒስትሪ ትምህርትን ኣሕተምቲ ሕድሪን፡ ተወዲቡ፡ ንልዕሊ 40 ጸሓፍትን ጋዜጠኛታትን ተዋሂቡ ነይሩ። ሰልጠንቲ ድማ፡ ካብ ኢድ ሚኒስተር ዜና ኣቶ
የማነ ገብረመስቀል ወረቐት ምስክርነት ተዓዲሎም። እቲ ብዛዕባ “
ቅጥዒ ምእኩል ኣጸሓሕፋ ትግርኛ” ዝምልከት ስልጠና፡ ብኽኢላ ሴማዊ ቋንቋታት ፕሮፌሰር
ተስፋይ ተወልደ፡ ምስ ወከልቲ ናይ ሰለስቲአን ትካላት ብምትሕብባር ተኻይዱ።
እቲ ስልጠና፡ ካብ 6 መጋቢት ክሳብ 15 ግንቦት’ዩ ኣብ ቀጽሪ ሚኒስትሪ ዜና ተዋሂቡ። ካብ ሚኒስትሪ ዜና፡ ሚኒስትሪ ትምህርቲ፡ ኣሕተምቲ ሕድሪ፡ ክፍሊ ስነዳን ምርምርን ህግደፍ፡ ማእከላይ ቤት ጽሕፈት ህግደፍ፡ ሚኒስትሪ ምክልኻል፡ ሚኒስትሪ ሕርሻ፡ ሚኒስትሪ መጐዓዝያን መራኸቢታትን፡ ሚኒስትሪ ዕዮን ሰብኣዊ ድሕነትን፡ ኮርፖረሽን ዘራእትን ጥሪትን፡ ምምሕዳር ዞባ ማእከል፡ ፖሊስ ኤርትራ፡ ኣገልግሎት ማእሰርትን ተሃድሶን ኤርትራ፡ ሃማመተኤ፡ ሃማደኤ፡ ሃኮሰኤ፡ ኤሪተል፡ ኢሚግረሽንን ዜግነትን፡ ባቡር ምድሪ ኤርትራ፡ ካብ ብሕታዊ ትካላት ሚድያ ዝተወከሉ፡ ከምኡ’ውን ሓደ ውልቀ- ደራሲ ድማ ተሳቲፎም ነይሮም።
እቲ ስልጠና ቅድሚ ምክያዱ፡ ብፕሮፌሰር ተስፋይ ዝተመርሐት ኮሚቴ፡ ኣብ ቋንቋ ትግርኛ ብብዝሒ ኣብ ዝርኣዩ ፍልልያት ኣጸሓሕፋ ብዕምቈት ምስ ዘተየት፡ ነዘን ትካላት ኣብ ኣጸሓሕፋ ቃላት ክሰምራ ዘኽእለን መበገሲ ዝኸውን መምርሒ’ያ ኣዳልያ። ነቲ ዝወጽአ መምርሒ ብዕምቈት ንምብርሁን ኣብ ግብሪ ንምውዓሉን ንኽሕግዝ ከኣ፡ እቲ ስልጠና ስነ ፍልጠታዊ ብዝኾነ መንገዲ ብፕሮፌሰር ተስፋይ ተወልደ ቀሪቡ። ምስኡ ተኣሳሲሩ ክኸይድ ዝግባእ ኣገደስቲ ኣርእስትታት ስለ ዝነበረ ከኣ፡ ንሰልጠንቲ ብዛዕባ “
ስርዓተ ነጥቢ” ብ
ኤፍረም ሃብተጽዮን፡
ኣተሃናንጻ ሰዋስው ዝሓለወ ምሉእ ሓሳባትን ሕጡበ ጽሑፍን
ብመም/
ሰረበ እስቲፋኖስ፡
ኣነዳድቓ ቃላትን ሜላታት ፈጠራ ሓደስቲ ቃላትን
ብመም/
ደስበለ መሓሪ፡
ዝውቱር ጌጋታት ኣብ ኣጸሓሕፋ ትግርኛ
ብ
ሰለሙን በርሀ፡ ከም ዝወሃብ ተገይሩ።
ዋና ዳይረክተር ክፍሊ ጋዜጣ ኣቶ ሰለሙን በርሀ፡ ብዛዕባ’ቲ ስልጠና ጽማቚ ጸብጻብ ኣብ ዘቕረበሉ፡ ስርዓትን ደረጃን ዝሓለወ ጽሑፍ፡ ሕግን መጐትን ስነ ቋንቋ መሰረት ብዝገበረ ልዝብ ዝምዕብል ምዃኑ ጠቒሱ፡ ብውሑዱ ሰለስቲአን ትካላት ኣብ ስርዓተ ኣጸሓሕፋ ክሰምራ ዝወሰድኦ ተበግሶ ጽቡቕ ኣንቅዶ ምዃኑ ኣገንዚቡ።
ቋንቋ ትግርኛ ብቓላት ሃብታምን ኣዝዩ ገላጺን ክነሱ፡ ኣብ ስርዓተ ጽሕፈት ግን ኣይወርጸጸን። ሓደ ካብ ጉሉሕ ጸገማት ስርዓተ ጽሕፈት ትግርኛ ድማ፡ ኣብ ኣጸሓሕፋ ገለ ገለ ቃላት ሓደ ዓይነት ወይ ምዱብ (standardized) ዘይምዃን ኮይኑ፡ ጸሓፍቲ ንሓደ ቃል ብዝተፈላለየ ፊደላት ክጽሕፉዎ ይረኣዩ፡
ዝበለ ኣቶ ሰለሙን፡ ከምዚ ዓይነት ፍኑው (ዘይተገርሐ) ኣጸሓሕፋ፡ ቋንቋ ትግርኛ ምስ ዘመናዊ ቴክኖሎጂ ከይስጉም ዓንቂጹዎ ስለ ዘሎ፡ (ንኣብነት ዘይምምዕባል ኣራሚ ፊደል - spelling checker)፡ ኣብ ስነ ጽሑፍ ቅጥዒ እናሓዘን እናተማእከለን ኣብ ምዱብ ደረጃ (standard) ንኽበጽሕ ኣብ መስርሕ ምምዕባል ስለ ዝርከብ፡ ገና ስራሕ ከም ዘድልዮ ኣረዲኡ።
ሰልጠንቲ፡ ነቲ ተዳልዩ ዘሎ “
መምርሒ ስርዓተ ጽሕፈት ትግርኛ”፡ ብዝግባእ’ዮም ተማሂሮምዎን ተኻቲዖምሉን። ተሓቲሙ ምስ ወጽአ ድማ፡ ናብ ኵለን ትካላት ክዝርጋሕን ነቲ ኣብ ኣጸሓሕፋ ዝጸንሐ ፍልልያት ኣብ ምፍዋስ ክጥቀማሉን ትጽቢት ይግበር። ይኹን እምበር፡ እቲ ተዳልዩ ዘሎ መምርሒ፡ ንግዜኡ ኣብቶም ጉሉሓት ጸገማት ዘድሃበ ኮይኑ፡ በብግዜኡ እናተወሰኾ ዝኸይድን ዝመሓይሽን እዩ።
ምዱብ ኣጸሓሕፋ ቃላት፡ ሕግታትን መጎትን ስነ ቋንቋ፡ ብሓባራዊ ምርድዳእ’ዩ ዝምዕብል። ንነፍሲ ወከፍ ቃል ኣጸሓሕፋኡ ብምውሳን ከኣ፡ ኩሉ ብዕቱብ ዝኽተሎ መምርሒታት ምውጻእ የድሊ። ኣብቲ ዝግበር ሓባራዊ ምርድዳእ፡ “
ናተይ ጥራይ’ዩ ቅኑዕ” ከይበልካ፡ ንጸሓፍትን ኣንበብትን ዘይምቹእ፡ ኣብ ስነ-ጽሑፍ ክብሪ ዘይውስኽ፡ ዘየድሊ ምትሕልላኽን ምድንጋርን ዝፈጥር ኣጸሓሕፋ ምግላፍ ከኣ፡ ቋንቋ ንኽምዕብል ይሕግዝ።
ካብ ማእከል ትምህርትን ዳህሳስን ተመሃሮ መም/ ደስበለ መሓሪ፡ ሓደ ካብቶም ነቲ ስልጠና ዝሃቡ መምህራን’ዩ። እቲ ስልጠና፡ ኣብ ሰዋስው (grammar)ን ስርዓተ ጽሕፈት (orthography)ን ቋንቋ ትግርኛ ዘተኮረን ክልሰ ሓሳባውን ግብራውን መዳያት ዘዛመደን ምንባሩ ጠቒሱ ከኣ፡ ተሳተፍቲ ብንቕሓትን ኣፍልጦን ዝተዋስኡሉ፡ ኣብ ዝሰፍሐ መዳዩ ድማ ናብ ሓባራዊ ርድኢት ዝተበጽሓሉ ስለ ዝነበረ፡ ኣገዳስን ንመጻኢ መንገዲ ዝጸርግን ከም ዝነበረ ገሊጹ።
ጸሓፍቲ፡ ቋንቋ ምስ ፍልስፍናን ስነ ኣእምሮን ዘሎዎ ዝምድና ፈሊጦም፡ ማለትነቶም ብዘየሻሙ መንገዲ ዝተቐመጡ፡ ነቲ ዝድለ ዘሎ ትሕዝቶ ዝገልጹን ኣብ ልክዕ ሕቚፊ ዝተሰዅዑን ቃላት፡ ሓረጋት፡ ኣበሃህላታት ወዘተ ክጥቀሙ፣ ፍልስፍናዊ መዳይ ትንታነታቶምን መርትዖታቱን ብግቡእ ክግንዘቡ፣ ትሕዝቶን ኣቀራርባን ጽሑፎም፡ ንስነ-ኣእምሮኣዊ ኣቃውማ፡ ዕድመ፡ ጾታ፡ ማሕበራዊ ቦታ ወዘተ ኣብ ግምት ዘእተዉ ምዃኖም ከረጋግጹ፣ ከምኡ’ውን ኣብ ዝውታረ ላህጃ ልዑል ጥንቃቐ ክገብሩ ዝሕግዞም ትምህርቲ ብኣብነት ተሰንዩ ስለ ዝቐረበ ከኣ፡ ሓሳብ ንሓሳብ ክለዋወጡሉ ዕድል ከም ዝፈጠረ መም/ ደስበለ ሓቢሩ።
ኣብ ክፍሊ ሓፈሻዊ ትምህርቲ፡ ኣብ ፓነል ቋንቋ እንግሊዝ ከም ኣወሃሃዲ ዝሰርሕ መም/ ሰረበ እስቲፋኖስ’ውን፡ ሓደ ካብቶም መምህራን ኮይኑ፡ እቲ ስርዓተ ጽሕፈት ትግርኛ ንምምዕባል ዝተዋህበ ስልጠና፡ ካብ ዝተፈላለያ ኣብ ጽሕፈት ዝነጥፋ ትካላት ዝመጽኡ ጸሓፍቲ ብሓያል ድሌትን ምብህሃልን ዝተሳተፉዎ ስለ ዝነበረ፡ ብዅሉ መዳዩ ዕዉትን ንመጻኢ መሰረት ዘንጸፈን ምንባሩ ገሊጹ።
መም/ ሰረበ ኣስዒቡ፡
ቋንቋ ትግርኛ፡ ሕጊ ዘሎዎ ስርዓተ ጽሕፈት ዝኽተል’ዩ። ከም መጽሓፍ ቅዱስ ተተርጕምሉ፡ ዓበይቲ ጽሑፋት ናይ ፖለቲካ፡ ማሕበራዊ፡ መጽናዕታዊ፡ ትምህርታዊ ወዘተ ዝተጻሕፈሉ ስለ ዝኾነ፡ ኣብ ስነ ጽሑፍ ምእኩል’ዩ። እንተ ኮነ፡ ከም ዝኾነ ቋንቋ፡ ክፍተት ወይ ግድፈት ስለ ዘሎዎ፡ እዚ ስልጠና፡ ኣብ መንጎ ጸሓፍቲ ዝነበረ ዘይምንባብ ኣብ ሓደ ኣምጺእካ፡ ጸሓፍትን ደረስትን ተናቢቦም ዝኸዱሉ ባይታ ኣብ ምፍጣር ዝሕግዝ’ዩ። ስለዚ፡ ነቲ መምርሒ፡ ሰልጠንትን ኣሰልጠንትን ኴንና ኣሃብቲምናዮ ስለ ዘለና፡ ነቲ ዝርአ ሓላፍ ዘላፍ ኣጸሓሕፋና ብብዙሕ መልክዓቱ ዝፍውስ ክኸውን ተስፋና’ዩ፡
ክብል ኣብሪሁ።
ጋዜጠኛ ኤፍረም ሃብተጽዮን’ውን፡ ሓደ ካብቶም ኣሰልጠንቲ’ዩ። ንሱ፡ ካብ ማእከላይ ቤት ጽሕፈት ህግደፍ ዝመጽአ ኮይኑ፡ ነቲ ስልጠና ኣመልኪቱ ክገልጽ ከሎ፡
ኣብ ጽሕፈት ቋንቋ ትግርኛ ርኡይ ጸገማት ኣሎና። እቲ ዝዓበየ ጸገምና፡ ‘ምእኩል ስርዓተ ጽሕፈት’ ስለ ዘይጸንሓና እዩ። ብተናጸልን ከም ዘዝለመድናዮን ክንከይድ ስለ ዘየዋጽኣና ከኣ፡ እዚ ስልጠና’ዚ ሓደ ስጉምቲ ናብ ስሙር ጽሕፈት ዝወስድ’ዩ ክበሃል ይከኣል። ብምሁር ስነ ቋንቋ፡ ፕሮፌሰር ተስፋይ ተወልደ፡ እናተመርሐ፡ ኣብ ስነ ፍልጠት ተመርኲሱ ዝተኻየደ ብምዃኑ ድማ ብልጫ ኣሎዎ። ‘ኣነ ከምዚ እየ ዝጽሕፍ’ ገዲፍና፡ ‘እቲ ቅኑዕ ከምዚ እዩ’ ናብ ምባል ክንስጉም ድማ ክሕግዘና’ዩ። ናይ ብዙሓት ሰሃሮ ወይ ስክፍታ ዝፍውስ ብምዃኑ ከኣ ዝያዳ ኣገዳሲ ይገብሮ
ድሕሪ ምባል፡ እዚ ስልጠና ከም መበገሲ ተወሲዱ፡ እቲ መምርሒ ጽሕፈት ምስ ተሓትመ፡ ንኹሉ ክጥቀመሉ ዝደሊ ከም ዝዝርጋሕ ኣፍሊጡ።
ሚኒስትሪ ዜና፡ ሚኒስትሪ ትምህርትን ኣሕተምቲ ሕድሪን፡ ኣብ ስርዓተ ጽሕፈት እንተ ደኣ ሰሚሮም፡ ዝፈላሊ’ውን የብሎምን፣ እዚ መምርሒ ጽሕፈት’ዚ፡ ኣብ ቀረባ መጻኢ ዝህሉዎ ጽልዋ ቀሊል ኣይክኸውንን’ዩ። እንተ ወሓደ ኣብ መምሃሪ መጻሕፍትና፡ ኣብ መጻሕፍትና፡ ኣብ ዜናዊ ሸፈነና ሓደ ዓይነት ስርዓተ ጽሕፈት ክንክተል ኢና። እቲ መምርሒ ጽሕፈት ኣብ ስራሕ ምስ ወዓለ ከኣ በብግዚኡን ከም ኣድላዪነቱን ቀጻሊ ምሕዳስ እናተገብረሉ ኣብ መስርሕ ዝውርጽጽ ስለ ዝኾነ፡ ንብዙሓት ጸሓፍቲ ቋንቋ ትግርኛ ጽቡቕ ዜና’ዩ፡
ዝበለ ጋዜጠኛ ኤፍረም፡ እቲ ስልጠና ብተወሳኺ ናብ ዝተፈላለያ ትካላት ወሪዱ ብዝሰፍሐ ኣገባብ ክወሃብ መደብ ከም ዘሎ፡ ድሮ’ውን በብውልቀን እዚ ስልጠና ከም ዘድልየን ዝገለጻ ትካላት ምህላወን ሓቢሩ።
ወኪል ሰልጠንቲ፡ ኣቶ
ኣሮን ተስፋኣለም፡ ካብ ባቡር ምድሪ ኤርትራ ብግደኡ፡ ብሰንኪ ዘይምፍላጥ፡ ዘይምግዳስን፡ መግዛእትን ባህላዊ ወራርን፡ ኣብ ሰዋስው ቋንቋ ትግርኛ፡ ፍልልያት ክረአን ነቲ ቋንቋ ንኸይስጉም ክዕንቅጾን ከም ዝጸንሐ ጠቒሱ፡ እቲ መበቆላውነትን ላዛን ቋንቋ ትግርኛ ሓልዩ ዝተዋህበ ስልጠና ግና፡ ንዝጸንሐ ጸገማት ዘቃልልን፡ ቋንቋ ትግርኛ ስርዓቱ ሓልዩ ክጸሓፍን ክጸፍፍን ዝሕግዝን ምንባሩ ሓቢሩ። ንሱ ወሲኹ፡ ባህላዊ ንጥፈታት ምክያድ፡ ዋዕላታት ምውዳብ፡ ስነ ጽሑፍ ምትብባዕን መጻሕፍቲ ሰዋስውን መዝገበ ቃላትን ምፍራይን ወዘተ፡ ዝብሉ ቀዲሞም ዝተወስዱ ተበግሶታት፡ ኣብ ምዕቃብን ምምዕባልን ስርዓተ ጽሕፈት ትግርኛን ካልኦት ሃገራውያን ቋንቋታትናን ልዑል እጃም ከም ዝነበሮም ገሊጹ።
ካብ ኣሕተምቲ ሕድሪ ዝመጽአ መንእሰይ
ዮሴፍ ኣስመላሽ፡ ነቲ ስልጠና ካብ ዝተኸታተሉ’ዩ። ንሱ፡ ብኤርትራዊ ቋንቋታትን ስነ ጽሑፍን ካብ ኮለጅ ዓዲ ቀይሕ ብቐዳማይ ዲግሪ ዝተመረቐ ኮይኑ፡ እቲ ዝቐሰሞ ትምህርቲ፡ ምስ ሞያኡ ዝኸይድን ኣብ ቋንቋ ዝነበሮ ፍልጠት ዝድርዕን ኮይኑ ከም ዝረኸቦ ጠቒሱ፡ ኣብ ቋንቋ ትግርኛ ልዑል ምልከት ብዘሎዎም መማህራን ስለ ዝተዋህበ፡ ኣብ ስርዓተ ጽሕፈት ቋንቋ ንዘጋጥሙ ዝውቱራት ጌጋታትን ብድሆታትን ክምሃሩዎም ብምኽኣሎም፡ ምእኩልን ስርዓቱ ዝሓለወን ጽሕፈት ክጽሕፉ ዝሕግዞም ፍልጠት ቀሲሞም ከም ዘለዉ ገሊጹ።
ቋንቋ፡ ባህልን መንነትን ታሪኽን ሕብረተሰብ ሓቚፉ’ዩ ዝጐዓዝ። መዐቀኒ ምዕባለ ብምዃኑ ድማ፡ ኣብ ክንዲ ብፍኑውን ቅጥዒ ዘይብሉን ዝጸሓፍ፡ ብስነ ፍልጠታዊ መንገዲ ተፈሊጡ ክጸሓፍን ንወለዶ ክሰጋገርን ይግባእ። ንኣሽቱ ወለዶ’ውን፡ ፍልጠት ንምኽዕባት ዝያዳ ናብ ናይ ባዕዲ ቋንቋታት ኣብ ክንዲ ዘድህቡ፡ ብቋንቋ ኣደኦም ክምዕብሉን ክመራመሩን ከም ዝኽእሉ ኣቓልቦ ክገብሩ፣ ኣብ ኣዘራርባ ምድብላቕ ኣወጊዶም፡ ቋንቋኦም ከማዕብሉ አዘኻኽር
ድማ ኢሉ።