NationalEr Interest
1h ·
Yemen
|• ኣብ ሓደ ቤት-ማእሰርቲ የመን ብዝተኻየደ ናይ ኣየር መጥቃዕቲ፡ 68 ስደተኛታት ክሞቱ ከለዉ፡ ካልኦት 47 ድማ ቆሲሎም፡ትማል 28 ሚያዚያ 2025፡ ኣብ ሓደ ስደተኛታት ዝዳጎንሉ ቤት-ማእሰርቲ ዞባ ሳዳ የመን፡ ብናይ ኣሜሪካ ነፈርቲ ብዝተኻየደ መጥቃዕቲ፡ ኢትዮጲያዉያን ምኳኖም ዝተነግረሎም 68 ስደተኛታት ክሞቱ ከለዉ፡ 47 ድማ ቆሲሎም። እቲ መጥቃዕቲ፡ ብሰኑይ ልክዕ ሰዓት 5፡00 ናይ ድ/ቀትሪ እዩ ተፈጺሙ።
ብመሰረት ጸብጻብ ሮይቶርስ፡ እቶም ካብ'ቲ መጥቃዕቲ ዝተረፉ ግዳያት፡ ብኣምሓሪኛ ክዛረቡ ከም'ዝስምዑ'ዩ ዘረድእ። ኣብ'ቲ ቤት-ማእሰርቲ፡ ብጠቅላላ 115 ስደተኛታት ተዓቒቦም ምንባሮም ዝጠቀሰ እቲ ጸብጻብ፡ ዳርጋ ብምልኦም ምዉታትን ቁሱላትን ብምኳን ድማ እዮም ግዳይ እቲ ናይ ኣየር መጥቃዕቲ ኮይኖም ዘለዉ።
ኣሜሪካ፡ ኣንጻር ዕጡቓት ኣንሳሩላህ ሑቲ ብተካይዶ ዘላ ናይ ኣየር ደብዳባት፡ ክሳብ ሎሚ 800-ዒላማታት ከም'ዝሃረመት እያ ትጠቅስ። እንተኮነ፡ እዚ መጥቃዕቲ ኣብ ተራ በርጌስ ሰለማዉያን ዜጋታት፡ ንክትገልጾ ዉን ዘሰንብድ ሰብኣዊ ክሳራታት የስዕብ ምህላዉ ዝተፈላለዩ ወገናት ይገልጹ።
ካብ ህሉዉ ዉሽጣዊ ፖለቲካዉን ቁጠባዉን ቅልውላዋት ኢትዮጲያ ንምህዳም፡ ወርሓዊ ብዓሰርታት ኣሽሓት ዝቁጸሩ ስደተኛታት፡ ብቀይሕ ባሕሪ ቆሪጾም፡ ብየመን ኣቢሎም ናብ ሃገራት ዓረብ ንምእታዉ፡ ሓደገኛ ጉዕዞ ከም'ዘካይዱ ይፍለጥ።
