እወ ግርማ
እወ ግርማ ግርማኣለም፡
ዝወዓለ ኣብ ጥምጥም፡
ኣብ ሳሊና ኣብ’ቲ ህጁም!
እወ ግርማ ግርማኣለም፡
ሽም ስውኣቱ ዘቕድም፡
መብጽዓኡ ዘይጠልም።
ዝኽሪ ህልዋት ብጾቱ በራቢሩ፡
መዝገብ ውዕሎታቱ ፈሓሒሩ፡
ምስጢራዊ ሰነዳት’ዉን መራሚሩ፡
ታሪኽ ሳሊና ደብቲሩ፡*
ውዕሎ ስውኣቱ ዘርዚሩ፡
“ወዲ ዕንጨይቲ” ግሩም ግብሩ፡
ወዲ ባሻይ ኣመስኪሩ፡
ነቲ ታሪኽ ጠማሚሩ፡
ሂቡና’ሎ፡ ትንዋሕ ዕምሩ!
ኤርትራዊ ዓቢ ንኡስ፡
ብሃገርካ እትግደስ፡
ስውኣትካ እትውድስ፡
መቓቐልቲ እትደቑስ፡
ታሪኽ ሓበን እስከ ተቋደስ።
እወ ግርማ ጽኑዕ ደጎል፡
እወ ግርማ ኳዕናን ደግለል፡
ከም ናይ ሳሊና ህያው ታሪኽ፡
ናይ ናቕፋ’ውን እንክት ትርኽ፡
ንኣምሰሉታት እተሕንኽ።
ናይ’ቲ ናቕፋ ናይ ሰዓቱ ኩነታቱ፡
ኤርትራና ትጽበ’ላ ንውዕሎኻ ከተዘንቱ፡
እቶም ሰብ መልሓስ ዚዉህትቱ፡
‘ቦተሊካ’ ዚዉስልቱ፡
እቲ ትዕቢቶም ኴይኑ ከንቱ፡
ናብ ሕፍረቶም ኪስክተቱ፡
ናብ በዓቶም ኪኽተቱ።
“ግርማ ሳሊና ኴንኻ ወርቂ፡
ግርማ ናቕፋ ኴንኻ ብርቂ፡
ሽም ስዉኣት ወራራቒ፡
ዝወጻእኻ ካብ’ቲ ጭንቂ፡
ምስ ገለጽኻ ነቲ ሓቂ፡
ዜዘንትዉ ታሪኽ ስርቂ፡
ውዕሎ ስውእ ዜቋስሉ ፍርቂ ፍርቂ፡
ከምዝሃረሞም ብርቱዕ በርቂ፡
ቀዘዝ ኪብሉ ክንርኢ ድንቂ፡
በቲ ማሕታ ናይ ብርዕኻ ኪዕነዱ፡
ዓቕራዉ ኴይንካ ኣይግዳዱ፡ **
ሓንቲ ቃሉ ሓንቲ ፍርዱ፡
ወትሩ ድልዊ ንሃገሩ ነታ ዓዱ፡
ብርቱዕ ድምጽኻ ኣንጎድጕዱ፡
ንመቓቐልቲ ጎማሚዱ፡
ኣዬድፈረን ነታ ዕርዱ።”
ቢልና ክንጽሕፍ እቶም ደቕኻ፡
ምስ ኣሕዋትካ ምስ ኣሓትኻ፡
ኣሎናልኻ ኣብ ጐድንኻ፡
ስክፍ እኳ ኣይበልካ።
ሓዉ ጀጋኑ፡ ወዲ ጅግና፡ ኣቦ ጀጋኑ እንደኣልካ።
......................
ግእዝ
*ደብተረ- ጸሓፈ
**ዐቈረ - ኣከበ፡ ኣዋህለለ፡ ገቲኡ ኅዝ፡ ዘጊቡ ኅዘ፡
መንቀሊ ኣርእስትና ዝኰነት መጸሓፍ ሳሊና 77 ንምርካብ ንደራሲኣ በዙይ ኣድራሻኡ [email protected] ምውካስ ይከኣል ኢዩ።