ዝኽሪ - ኣረሜንነት ስርዓታት ኢትዮጵያ
ብምኽንያት 50 ዓመት ‘
ህልቂት ኣስመራ’፡ ህዝቢ ኤርትራ፡ ‘
ኣይረሳዕናዮን’ ብዝብል ቴማ፡ ነቶም ኣብ 1975፡ ኣብ ኣስመራን ከባቢኣን ብወተሃደራት ኢትዮጵያ ብጭካነ ዝሃለቑ ሰላማውያን ዜጋታቱ ይዝክሮም ኣሎ።
ዓመተ 1975 ኣብ ታሪኽ ኤርትራ፡ ድሕረትን ኣረሜንነትን ገዛእቲ ኢትዮጵያ ደሚቑ ዝወጻላ ዓመተ-ጃምላዊ ህልቂት’ያ። ወተሃደራት ኢትዮጵያ፡ ብባሕቲ ለካቲት ኣብ ማእከል ኣስመራ ገዛ-ገዛ እናኣተዉ ቈልዓ-ሰበይቲ ብጠያይትን ሳንጃን እናተሳህሉ ዝጀመርዎ ወፍሪ ቅተል ሕረድ፡ ናብ ብዙሕ ከባቢታት ኤርትራ’ዩ ልሒሙ። ኣብ ወኪድባ፡ ዓደባዀኻይ፡ ደቀምሓረ፡ ማይዕዳጋ፡ ድባርዋ፡ መንደፈራ፡ ዓዲቐይሕ፡ ኣቑርደት፡ ሕርጊጎ፡ እምበረሚን ካልኦት ሓያሎ ዓድታትን ኣሽሓት ዜጋታት ብዘስገድግድ ጭካነ ዝሃለቑላ ዓመት እያ። ኣብ ኣስመራን ከባቢኣን ጥራይ ኣስታት 3000 ሰላማውያን ኤርትራውያን ብወተሃደራት ኢትዮጵያ ከምእተቐትሉን ከምእተጐይሑን ይፍለጥ።
ሰላማዊ ህዝቢ ኣካል ውግእ ምግባር፡ ባህሊ መሳፍንቲ ኣቢሲንያ’ዩ። ህዝቢ ምሉእ ጸላኢ ሓሲብካ፡ ንብረቱ ምርሳይን ጥሪቱ ምዝማትን ጅግንነት’ዩ ዝውሰድ። ሃጸይ
ሰርጸ-ድንግል፡ ቀዳማዊ
እያሱ፡ ደግያት
ውቤ፡ ደግያት
ሱባጋድስ፡ ሃጸይ
ዮሃንስን ራእሲ
ኣሉላን ካልኦትን ንዝተፈላለየ ከባቢታት ናይ ሎሚ ኤርትራ እናወረሩ ዝፈጸምዎ ግፍዒታት ብምልኣት ዘይተጸውየሉ ኣዝዩ መሰክሕ ዛንታታት እዩ። እዚ ድሕረትን ኣረሜንነትን’ዚ፡ ኣብ ዘመናዊት ኢትዮጵያ’ውን ኣይተቐየረን። ኤርትራ፡ ብውዲት ርእሰ-ሓያላን ምስ ኢትዮጵያ ብፈደረሽን ክትቊረን ኣብ ዝተፈርደትሉ እዋን
እምቢ ያለ ሰው ጥይት ኣጉርሰው!
(እምቢ ዝበለ ጥይት ኣኾልሶ) ኢሉ ዝጀመረ ንሰላማውያን ዒላማ ዝገበረ መጥቃዕቲ፡
ኤርትራ መሬታ እምበር ህዝባ ኣየድልየናን፣ ዓሳ ንምጽናት ባሕሪ ምንጻፍ!
እናተባህለ ን30 ዓመታት ዓሰርተታት ኣሽሓት ዜጋታት ኣህሊቑ።
ብኡ’ውን ኣየብቅዐን።
ድሕሪ ናጽነት ከም ኣካል ናይቲ ንህዝቢ ኤርትራ ንምንብርካኽ ዝተኻየደ ቅሉዕ ወራር፡ እዚ ድሕረትን ኣረሜንነትን ገዛእቲ ኢትዮጵያ ብኻልእ መልክዑ ክደግስ ተራእዩ።
ገዛእቲ ስርዓታት ኢትዮጵያ ኣብ ኤርትራ ክንዲ’ዚ ዝኣክል ጃምላዊ ህልቂት፡ ዓመጽ ኣብ ልዕሊ ሰብኣውነትን ሰፊሕ ናይ ኲናት ገበንን ኣብ ዝፍጽምሉ ዝነበረ እዋን፡ እዛ ብሰብኣዊ መሰል እትመጻደቕ ዓለምና፡ ነዚ ቅሉዕ ኣረሜንነት’ዚ ንምዅናን ብጩቕ ክትብል ኣይተሰምዐትን።
ነቶም ሓያላት ገበን ዝበሃል፡ እቲ ካልኦት ዝፍጽምዎ ጥራይ’ዩ
ይብል ኣመሪካዊ ፕሮፌሰር
ናኦም ቾሚስኪ።
ባዕላቶም፡ መሓዙቶምን ሸቀልቶምን ዝፍጽምዎ ገበን - ገበን ኣይኮነን።
ኣረሜንነት ስርዓታት ኢትዮጵያ ኣብ ኤርትራ ዘይሃስስ ስምብራት ዝገደፈ እኳ እንተኾነ፡ ህዝቢ ኤርትራ፡ ድሕሪ ናጽነት ቂምን ቅርሕንትን ክቛጽር ኣይደለየን። ሕነ ናይቲ ኩሉ ስቓይን ግፍዒን ክፈዲ ከይሓሰበ፡ ናጽነቱ ኣብ ዝተጐነጸፈሉ ቅንያት ዝማረኾም 130,000 ወተሃደራት ኢትዮጵያ፡ ብሰብኣዊ ክንክን ሒዙ ንዓዶም ምፍናዉ ዓለም ዝፈልጦ’ዩ። እቲ በደል፡ ናይቶም መራሕቲ ምዃኑ፡ ሰራዊት ኢትዮጵያ ንባዕሉ ግዳይ ምዃኑ ዝርዳእ ንቑሕ ህዝቢ’ዩ። መራሕቲ ኢትዮጵያ’ውን እንተኾነ ኣገልገልቲ ናይቲ ንህዝቢታት ኤርትራን ኢትዮጵያን ብቐጻሊ እናናቘትካ ዘይዓርፍ ኲናት ብምስዋር፡ ነዚ ዞባ ናይ ምቁጽጻር ግሎባዊ ስትራተጂ እዮም ዝነበሩ።
ህዝብታት ኤርትራን ኢትዮጵያን ብሓባር ክነብሩ ባህርያዊ ዕጫኦም እዩ። ብሰፊሕ ኣእምሮ ጉርብትና ምርቓ እምበር መርገም ኣይኮነን። ናብዚ ንቕሓት’ዚ ንምዕራግ እምበኣር፡ ሕሉፍ ገበናት ምዝካሩ ኣገዳሲ’ዩ። ከመይሲ ህዝብን መራሕትን ካብኡ ትምህርቲ ቀሲሞም ንቕሓት ምስ ዘጥርዩ፡ ንጥዑይን ሰላማውን ስልጡንን ዝምድና ህዝብታት ወሳኒ እዩ።
ቦርድ ክፍሊ ጋዜጣ
. #MoveAUoutOfEthiopia
. #
