OPINION | POLITICS
ዕሱባት ናይ መወዳእታ መጣልዒት ወረቀቶም ”ዕርቂ”!
By NP
https://nakfapress.com/archives/1412
December 26, 2024
ክትብትኖ ዘይካኣልካ ሰራዊት!
ከተውድቖ ዘይካኣልካ መንግስቲ!
ክትስዕሮ ዘይካኣልካ ህዝቢ!
ሕጂ ዕርቂ የድልየና’ሎ ይብሃለለይ!
ምስ መን ኣታ!
እወ! ምስ መን ዕርቂ?
ቆብዕ ኣግዚፍካ፥ ዝዋውዕ ኣሲርካ፥ ተዳህልሎ ገርሂ፥ ተዐሽዎ የዋህ ሓደ’ኳ የለን። መድረኽ ተቐይሩ እዩ፥ ግዜ መልሲ ሒዙ መጺኡ እዩ። ባቡር መኸተ ናህሪ ወሲኹ ናብ ልምዓትን ምዕባለን ዘሰጋግረሉ ስዓት በጺሑ። ጸላእቲ ኣላሽ ኢሎም፥ ሓንካሮ ኣሚኖም ዝልእክዎ ስኢኖም። ግዜ ተቐይሩ በቃ! ኩሎም ዝለኣኽዎም ሓንቲ ከየፍረዩ ማይ ዓሚኾም ተሪፎም።
መበገሲ ጽሑፈይ ሓደ ብዓል ገዚፍ ቆብዕ ግዳ ንእሽቶ ርእሲ፥ ሃገርን መንግስትን ክሒዱ ኢደ በይዛ ገናዞ ክኸውን ዝተዓስበ ምስሉይ ሰብ፥ ኣብዚ ሶሻል ሚድያ ብስም ሃገራዊ ዕርቂ ሃለውለው ክብል ስለዝሰማዕክዎ እዩ።
እዚ ሰብ እዚ ከም ሳዕቤን መግዛእቲ ኣብ መዓስከራት ላጅን ሱዳን ዝዓበየ፥ ድሕሪ ሃገር ሓራ ምኳና ናብ ሃገሩ ተመሊሱ ምሉእ ናይ ትምህርቲ ዕድል ዝረኸበ ክሳብ ዩኒቨርስቲ ተማሂሩ ከም ዜጋ ኣብ ዝለዓለ ናይ ስራሕ ሓፍነት ዝተመደበ፥ ጸኒሑ ብወጻኢታት መንግስቲ ዝለዓለ ደረጃ ትምህርቲ ክቐስም ናብ ኣሜሪካ ተላኢኹ፥ ትምህርቱ ጨሪሱ ከብቅዕ ሕድሪ ጠሊሙ ኣገልጋሊ ገናዞ ክኸውን ነብሱ ዝሸጠ ካሕዳም እዩ።
እዚ ሰብ እዚ ኣብ ኣብ ዝሓለፈ ናይ መኸተ ዓመታት ኣንጻር ህዝብን መንግስትን ኤርትራ ምስ ኩሎም ዓይነታት ተጻባእቲ መጋበርያ ኮይኑ ህዝቢ ኤርትራ ክሰዓር፥ ዶክተር እየ፥ ፕሮፈሰር እየ እናበለ ዝተዛረቦ፥ ዝተኣከቦ መጋባኣያታ ሓንካሮ ኩሉ ኣብ ማሕበራዊ መራከቢታት ብዙሕ ሰብ ሰሚዕዎ እዩ።
ከም መቀጸልታ ናይ ዝሓለፈ ሕጂ ኣምጺእዎ ዘሎ “ሃገራዊ ዕርቂ” ዝብል ድራማ ድማ ቅድሚ ሕጂ ብጽሑፍ ክፍንዎ ዝጸንሐ እሞ ብዙሕ ትርጉም ዘይተዋህቦ ሕጂ ንምድጋሙ በታ ልሳን ገናዞ ዝኮነት ሬድዮ ሃበስ ቀደስ ክብል ምፍታኑ እዩ። እቲ ዝብሎ ብዙሕ መጎት ዘለዎ ኣርእስቲ ኣይኮነን፥ ኮፒ ፔስት ናይ ገናዞ ከም መስሎኺ ናብ ውሽጣዊ ጉዳያት ሃገራት ዝጥቐምሉን ንብዙሓት ሃገራት ብስም ዕርቂ ናብ ዝኸፍአ ሕድሕዳዊ ግጭት ዝሸመምሉ ብሓንካሮ ከም መድሃኒት ዝእዘዝ (Prescription) ኮይኑ ግዳ ግዚኡ ዝሓለፎ (expired) ዝኾነ ጥራይ ዘይኮነ ከም ብዕሪር ተሓይኹ ጡፍ ዝተባህለ ብሉይ ዛዕባ እዩ። እቲ ፍሉዩነቱ ብትግርኛ ይዛረቦ ምህላው እዩ፥ ንናይ መን ህዝቢ እዩ ዝዛረቦ ዘሎ ግን ኣይርድኣካን እዩ። ምኽንያቱ ሓምሳ ዕመት ንድሕሪት ተመሊሱ፥ ዝነቐጸ ደም እዩ ዝቁስቁስ፥ ነቶም ህዝቢ ኤርትራ ልኡላውነት ሃገሩ ንምውሓስ ምስ ናይ ርሑቕን ቀረባን ጸላእቱ ኣብ ግብግብ ከሎ ርዒዶም “ኢድና ንሃብ” ዝበሉ፥ ንሱ ከይኣክል ናብ ዝሕሾም ከይዶም መጋበርያ ታሪኻውያን ጸላእቲ ዝኾኑ፥ መቐለ ከይዶም መደብ ስራሕ ዝወስዱ ዝነበሩ እሞ ሕጂ ካቦት ኣግዚፎም ኣብ ጣዕሳን ቅልውላውን ምስ ቀዝሕን ጽምዋን ምዕራብ ንዝሰራጠዩ ዘለው ሓተላታት ታሪኽ ብስም ዕርቂ ከለላ (protection) ክህብ እዩ ዝፍትን። ካልእ ነቲ ናይ መኸተ ኩነታት ዝፈጠሮ ስእነት ስራሕ፥ ቁጠባዊ ጸገም፥ ስደትን ሽርሕታት ጸላእቲ ዝፈጠሮ ናይ ዕሸላት በጨቕታትት ናብ ፖለቲካዊ ሽግር ቀይሩ ህዝቢ ኤርትር ዕርቂ ይደሊ ኣሎ እዩ ዝብል፥ እዚ ብዓል ገዚፍ ቖብዕ።
ግዳ ብዓል ገዚፍ ቆብዕ ምስ ጠፈሸ ዝብሎ ዘሎ ሃጠው ቀጠው ገዲፍና፥ ኤርትራ ኣበይ ነይራ ፣ ኣበይ ኣላ ፣ ናበይ እያ ትምርሽ ዘላ ጽቡቕ ገይሩ ዝርዳእ ህዝቢ ካብኡ ናብኡ ከኣ እዚ ሓዲሽ ወለዶ ገዚፍ ቆብዕ ዘይኮነ ጉዳይ ሃገሩን ህዝቡን ብዕምቆት ክርዳእ ሳዋ ምኻድ ጥራይ ዝኣኽሎ ፥ ገዚፍ ልቦና ዝውንን ፥ ተመኩሮ ዘጥረየ፥ ሃገር ልዕሊ ኩሉ ‘ኣሎኒ ትብሎ ሃብቲ‘ ተባዕ፥ በሊሕ፥ ብዓል ራኢ መእሰይ ዘለዋ ምስ ሕሉፋን መጻኢኣን ዝተዓረቐት፥ ርሑቕ ዝሰጎመት ሃገር ዝውንን ንቑሕ ህዝቢ’ዩ ህዝቢ-ኤርትራ።
እዚ ብዓል ገዚፍ ቆብዕ ኣብቲ ዝጽሕፎን ብቓሉ ዝዛረቦን፥
ኣብ ዘሕዝንን ዘሰክፍን ኩነታት ዘሎ ህዝቢ፥ ኣብ ትራጀድን ስግኣትን ዘሎ ህዝቢ፥ ኣብ ጽልእን ምትፍናንን ዘሎ ህዝቢ
እናበለ ይደጋግም ።
የግዳስ ንዝሓለፈ ዕቁድ ህዝቢ ኤርትራ ከምኡ ክኸውን እብ ሕድሕዱ ክተሃናኾት እሞ ክሰዓር መጻወቲ ከደምትን ኣኸደምትን ክኸውን ሰሪሑ ኣይሰለጦን ብዓል ገዚፍ ቆብዕ። ግዳ ርሑቕ ከይከድና ህዝቢ የመን፥ ህዝቢ ሱዳን፥ ህዝቢ ልብያ፥ ህዝቢ ኢትዮጵያ …ነቲ የዋህ ህዝቢ ከምዚ ብዓል እዚ ዕሱባት መውዓሊኦም ምስ ገበርዎ፥ እነሀለው እቲ ንሳቶም ጎይቶቶምን ዝመልክዎ ሓረጋት መዓልታዊ ሂወቶም ኮይኑ፥ ከመይ ዝበላ ሃገራት ጠፊአንን ይጠፋኣ ኣለዋን።
እንተ ህዝቢ ኤርትራ ግን ዘእትዎን ዘውጽኦን ዝፈልጥ ብዙሓት መረርቲ መድረኻት ብሓድነትን ጽንዓትን ዝሰገረ፥ ንሰላሙን ልኡላውነቱን ክቡር ዋጋ ዝኸፈለ ስለዝኾን፥ ሰላማ ዘውሓሰት ሃገር ዝውንን ብሩህ መጻኢ ዘለዎ ክሩዕ ህዝቢ’ዩ።
ዓወት ንሓፋሽ !
ናቕፋ ፕረስ’የ ካብ ቶሮንቶ