MOI Eritrea
ፕረዚደንት ኢሳይያስ ኣፈወርቂ፡ ኣብ ዋዕላ ሽርክነት ቻይናን ኣፍሪቃን ንምስታፍ በይጂን ኣትዩ።
ፕረዚደንት ኢሳይያስ ኣፈወርቂ፡ ብዕድመ ፕረዚደንት ህዝባዊት ሪፓብሊክ ቻይና ሺ ጂንፒንግ፡ ኣብ 9ይ ዋዕላ ሽርክነት ቻይናን ኣፍሪቃን (FOCAC) ንምስታፍ፡ ሎሚ ብኣቆጻጽራ ቻይና ሰዓት 9 ቅድሚ-ቐትሪ ከተማ በይጂን ኣትዩ።
ፕረዚደንት ኢሳይያስ ኣፈወርቂን ምስኡ ዝተጓዕዘ ሚኒስተር ጉዳያት ወጻኢ ኣቶ ዑስማን ሳልሕ ዝርከቦን ልኡኽ ኣህጉራዊ መዓርፎ ነፈርቲ በይጂን ኣብ ዝኣተወሉ፡ ብናይ ክብሪ ሰልፊ ዝተሰነየ ኣቀባብላ ተገይርሉ።
ኣብ’ዚ ካብ 4 ክሳብ 6 መስከረም ዝቃናዕ ዋዕላ መራሕቲ ቻይናን ኣፍሪቃን፡ ከምኡ’ውን ቅድሚኡ ብደረጃ ሚኒስተራት ጉዳያት ወጻኢ ዝቃናዕ ኣኼባታት፡ ኣብ ምድንፋዕ ዝምድናታትን ሽርክነታዊ ልምዓታዊ ምትሕግጋዝን ዘተኮረ ዘተ ክካየድ’ዩ።
ጎኒ-ጎኒ’ዚ ዋዕላ፡ ፕረዚደንት ኢሳይያስ ምስ ፕረዚደንት ህዝባዊት ሪፓብሊክ ቻይና ሺ ጂንፒንግ፡ ከምኡ’ውን ምስ መራሕትን ሰበ-ስልጣንን ካልኦት ሃገራት ክልተኣዊ ርክባት ከምዘካይድ ተፈሊጡ’ሎ።
ቅድሚ 24 ዓመታት ዝተበገሰ ዋዕላ ሽርክነት ቻይናን ኣፍሪቃን (FOCAC)፡ ኣብ ነፍሲ-ወከፍ 3 ዓመት በብእብረ ኣብ ቻይናን ኣፍሪቃን ይቃናዕ።
|• ኣብ ዋዕላ ኣፍሪቃ - ቻይና ብምስታፍ፡ ኣብ ቤይጂንግ ዝርከብ ፕረዚደንት ኢሰይያስ ኣፈዎርቂ፡ ሎሚ ኣብ ሰዓታት ረፋድ ምስ ፕረዚደንት ህዝባዊት ሪፓብሊክ ቻይና ሺ ዢንፒንግ ወግዓዊ ርክብ ኣካይዱ፡
