1h ·
መልእኽቲ ንዲያስፖራ ትግራይ!
---
ኣብ ዝሓለፈ ቀረባ ሰሙናት: ብዙሓት ተጋሩ መልእኽትታት ዝሰዱልና ተራእዮም። ብዝተኻእለና መጠን ዝመጸና መልእኽትታት ከነንብቦን ክንርድኦን ሃቂንና ኣሎና። ማ/ም/ስ/ግ/ሃ; ብዛዕባ'ዚ ኣገዳሲ ጉዳይ ክትዛረብን ርድኢታ ከተካፍልን ግድን ስለ ዝኾነ: ንቕሓት ህዝብታት የበርኹ'ዮም ዝበለቶም ጽሑፋት ከተበርክት ጸኒሓ ኣላ።
ኣብ'ቲ መልእኽትታት ምስ እንኣቱ: ተጋሩ፥ መሪሕነት ህወሓትን መንግስቲ ኤርትራን ንነባሪ ሰላም ክልቲኣቱ ህዝብታት ክብሉ ንሰላም ክሰርሑ ኣለዎም ዝብል ጽኑዕ እምንቶ ከም ዘለዎም ክንግንዘብ ክኢልና ኣሎና። ብወገንና ሕማቕ ሓሳብ'ዩ ዝብል ርድኢት ክህልወና ኣይክእልን። እቲ ምንታይ: ሰላም መተካእታ ስለ ዘይብሉ።
እንተኾነ: ኣብ ምጽብጻብ ከይኣተና: ነዚ ኣርእስቲ ስፍሓት ክህቡ ዝኽእሉ ሓሳባት ምምንጫዉ ግድን ስለ ዝኸዉን: 3 ኣገደስቲ ነጥብታት ከነልዕል ኢና።
ቀዳማይ ነጥቢ፥
---
ከም ቀንዲ ሓላኺ ጉዳይ ኮይኑ ዘሎ: ሽሕ'ኳ ኤርትራዊያን ኣብ ልዕሊ ህዝቢ ትግራይ ልዑል ክብሪ እንተለዎም: ኣብ ልዕሊ መሪሕነት ህወሓት ዘለዎም እምነት ምጉዳል ግን ንምስጋሩ ኣዝዩ ዝኸበደ ጉዳይ'ዩ። መሪሕነት ህወሓት ተኣማኒ ክኸዉን ዘይምኽኣሉ: ኣብ ህዝቢ ትግራይ ከቢድ ፖለቲካዊ ሽግራት ፈጢሩ ይርከብ።
ንዝሓለፈ 23 ዓመታት: መራሕቲ ህወሓት ኣብ ልዕሊ ኤርትራ ዝተኸተሉዎ ስትራተጂካዊ ፖሊሲ (strategic policy): ንኤርትራ ከርዲንካ: ካብ ማሕበረሰብ ዓለም ነጺልካ: ኣብ ቅድሚ ህዝቢ ትግራይ ናይ ህላወ ሓደጋ ኣምሲልካ እንዳቕረብካ: ብዓቢኡ ድማ ዉሽጣዊ ፖለቲካዊ ቅልዉላዉ ምስ ዘጋጥመካ ንኤርትራ ገንሸል ጌርካ እንዳቕረብካ ዝኽየድ ፖለቲካ: ኣብ መንጎ ክልቲኡ ህዝብታት ነባሪ ሰላም ክፈጥር ኣይከኣለን ዘሎ። ህወሓት: ኣብ ልዕሊ ህዝቢ ኤርትራ ን20 ዓመታት ዝተኸተለቶ ፖሊሲ: ኣብ ክንዲ መመኽነይታ ፈጢርካ ዝኽየድ: ብትብዓት ክፍተሽን ትምህርቲ ክቕሰመሉን ግድን'ዩ። ነዚ ከይሰገርካ ዝመጽእ ስትራተጂካዊ (strategic) ሰላም ክህሉ ኣይክእልን።
ኣብዚ ከይጠቐስናዮ ክንሓልፍ ዘይንኽእል ጉዳይ እንተሃልዩ: ኣብ ሜድያታት ትግራይ ዝቐርቡ ልሂቃን (elites): ኣብ ልዕሊ ህዝብን መንግስትን ኤርትራን ኣብ ልዕሊ ለኣላዊነት ኤርትራን ዘለዎም ኣመለኻኽታ: ኣብ ህዝቢ ኤርትራ ‘‘ጥርጣረታት‘‘ ከበርኹን ስግኣታት ከዕርጉን ምጽንሖም ቀንዲ ካብ'ቲ ሓንካሪ ጉዳይ ኮይኑ ዘሎ'ዩ። ህዝቢ ትግራይ: ነዞም ሰባት ‘‘ዓገብ‘‘ ክብሎም ዘይምኽኣሉ: ብሓቂ ዘተዓዛዛቢ ኮይኑ ዘሎ'ዩ።
ካልኣይ ነጥቢ፥
---
መሪሕነት ህወሓት ኣብ ስልታዊ (tactical) ዝምድና እምበር: ንነዊሕ ዝጥምትን ዝምድና ክልቲኣቱ ህዝብታት ዘደላድልን ስትራተጂካዊ (strategic) ዝምድና ዘይኣምን ፖለቲካዊ ሓይሊ ብሙዃኑ'ዉን: ቅርዑዉ ጽምዶ ክፍጠር ኣጸጊሙ ዘሎ'ዩ። ህወሓት: ብፖለቲካ ኢትዮጲያ ዝምእዘን ሓይሊ ብሙዃኑን ቀንዲ ፖለቲካዊ መደብ ስርሑ: ኣብ ዉሽጢ ኢትዮጲያ ስልጣን ምጭባጥን ዝብል ብሙዃኑ: ንረብሓ ህዝቢ ትግራይ ኣገደስቲ ዝበሃሉ ሽርክነታዊያን ዝምድናታት ክፈጥር ኣዝዩ ዝጽገም ሓይሊ'ዩ። እዚ ንዝሓለፉ 20 ዓመታት ዝተዓዘብናዮን ከም ተሞኩሮ: ስግኣታት ዝፈጥርን'ዩ።
በንጻሩ ብወገን ህዝብን መንግስትን ኤርትራ: ስልታዊያን (tactical) ዝምድናታት: ኣብ ህዝብታት ነባርነት (longevity) ኣለዎም ዝብል እምነት የሎን።
ሳልሳይ ነጥቢ፥
---
ሽሕ'ኳ ርዕምት ዘይብሎም (unsolidified) ርክባት ክፍጠሩ ምንቅስቓሳት እንተሃለወ: መሪሕነት ህወሓት ንጹር ፖለቲካዊ መደብ ስራሕን (political principle) ኣብ ህዝብታት ምጥርጣራት ከወግዱ ዝኽእሉ ፖሊሲታትን ንህዝቢ ትግራይ ዕላዊ ክገብር ብዲያስፖራ ትግራይ ክግደድ ኣለዎ። ብሓደ ሸነኽ ኣብ ልዕሊ ኤርትራ ቀጻሊ ወቐሳ እንዳገበርካ: ብኻልእ ሸነኽ ድማ ‘‘ነባሪ ሰላም‘‘ ከም እትደሊ ክትዛረብ: ተገራጫዊ መልእኽቲ ካብ ምስዳድ ዝዓግቶ ክህሉ ኣይክእልን።
ኣብ መደምደምታ: ዲያስፖራ ትግራይ ኣብ ልዕሊ መሪሕነት ህወሓት ከቢድ ጽልዋ ከም ዘለዎ መጠን: ነዚ ብብዙሓት ተጋሩ ዝለዓል ዘሎ ናይ ‘‘ሰላም‘‘ ሓሳብ ኣብ ባይታ ክሰርሕሉ ይግባእ። ሜድያታት ትግራይ'ዉን: ኣብ ህዝብታት ነዉጺ ዝፈጥሩ ‘‘ቶኽቶኽቲ‘‘ ኣርእስታት ካብ ምዝርጋሕ ክቑጠቡ ግድን'ዩ። ህዝቢ ዘጋጭዉ ኣርእስታት እንዳመረጽካ: ጥርጣረታት ከም ዝዓርጉ እንዳገበርካ: መንግስታት ተረጋጊኦም ንኸይሓስቡ እንዳሰራሕካ ዝመጽእ ሰላም ከቶ ክህሉ ከም ዘይክእል: ድሮ ታሪኽ ሚሂሩና'ሎ።
