ፈስቲቫል - ኣቓልቦ ዝሰሓበ ቁሸት ‘ምህዞን ሰንዓን መንእሰያት’
ኣብ ዓውዲ ምህዞን ሰንዓን ኣተኲሮም ዝነጥፉ ዘለዉ ተመሃሮን መንእሰያትን፡ ፈስቲቫል ኤርትራ ከም ኣጋጣሚ ተጠቒሞም፡ ንምህዞታቶም ምስ ህዝቢ ኣብ ምልላይ እዮም ዝርከቡ ዘለዉ።
እቲ ንሳቶም ምሂዞምዎ ዘለዉ ዓይነታት ቴክኖሎጂ፡ ኣብ ጉዕዞ ህይወትና ብዝቐለለን ዝማዕበለን ኣገባብ ክንነብር ዝሕግዝ ጥበብ እዩ።
ኣብ ቀጽሪ ኤክስፖ ኣዳራሽ-3 (G-3) ዝርከብ ቁሸት ምህዞን ሰንዓን፡ መንእሰያት ኣብ መስርሕ ምምሃርን ምስትምሃርን፡ ኣብ ሕርሻዊ ንጥፈታት፡ ኣብ ኣጠቓቕማ ኤሌክትሮኒካዊ ኣቚሑን ካልእን ዘተኰረ ምህዞን ሰንዓን እዮም ኣቕሪቦም ዝርከቡ። ገለ ካብ’ቲ ምህዞታት፡
መኣዝን መቈጻጸሪት ተቐዳዳማይ ብሽክለታ፡ ብዘመናዊ ኣገባብ ዝተዳለወ መብራህቲ ትራፊክ ናይ ጐደናታት፡ ብሶፍትዌር ተሓጊዙ ዕለታዊ ምክትታል ኣታኽልቲ ዘካይድ መሳርሒ፡ ንዓይነ-ስዉራን ብዘይ ሓገዝ ሰብ ክንቀሳቐሱ ዝሕግዝ ቴክኖሎጂን ካልእን ምጥቃስ ይከኣል።
እዞም ዝተጠቕሱ ምህዞታት፡ በቶም ኣብ ቤት ትምህርቲ ፖሊ-ቴክ ዝሰልጠኑ ተመሃሮ ዝተዳለዉ እዮም።
ብዘይካ’ዚ፡ እቲ ዝያዳ ኣቓልቦና ዝሰሓበ፡ ኣብ ኮለጃት ብዝተፈላለየ ዓውዲ ትምህርቶም ዛዚሞም ኣብ ዝተፈላለዩ መንግስታውያን ትካላት ተቘጺሮም ብዝሰርሑ ዘለዉ መንእሰያት ዝፈረየ ምህዞታት እዩ። ገለ ካብ’ቶም ቀሪቦም ዘለዉ ምህዞታት ድማ፡
ብውሑድ ወጻኢታት ዝተሰርሓ ተንቀሳቐስቲ ቴሌቪዥናት፡ መዝሓሊት መኽዘን ማሽንን ቀልጢፋ እተዝሕልን እተውዕን ፍርጅን፡ መዝሓሊት ማይ፡ ብኤሌክትሪክ እትሰርሕ ነፋሪት፡ ተመሃሮ ብዝቐለለ መንገዲ ምስ ኮምፕዩተር ሌላ ክህልዎም ዝሕግዝ ቴክኖሎጂ ወዘተ ኣለዉ።
ቀጺልና እምበኣር፡ ንገለ ካብ’ቶም ዝቐረቡ ምህዞታት ከነላልየኩም፦
ዝተፈላለየ ኣገልግሎት እትህብ ስማርት መዝሓሊት ማሽን
እዛ
ስማርት ዝተሰምየት ምህዞ፡ ብትሑት ባጀት ኣብ ዝተፈላለየ መዓላ እትሰርሕ ናይ መዝሓሊ ማሽን እያ። እዛ መሳርሒት፡ ከም መዝሓሊ መኽዘን ፍሩታታት፡ ኣሕምልቲ፡ ስጋ፡ ጸባን ውጽኢት ጸባን፡ ልስሉስ መስተን ካልእን ተገልግል። ብተወሳኺ ንመመስርሕን መዐቀብን ርግኦ ትኸውን ከምኡ ድማ፡ ካብ 20 ክሳብ 2 ሽሕ ሊትሮ ማይ ከተዝሕል ትኽእል።
ነዛ ምህዞ ዘዳለዉ መሃንድሳት፡ ኢ/ር
ዮናስ መንግስትኣብ፡ ኢ/ር
ኣማኑኤል ሚኪኤል፡ ኢ/ር
ሄኖክ ሃብተስላሴ እዮም። እዞም መንእሰያት ኣብ ኮለጅ ማይ ነፍሒ ብዓውዲ ሜካኒካል ኢንጂኒየሪን ዝተመረቑ ኰይኖም፡ ኣብ’ዚ እዋን እዚ፡ ኣብ መዝሓሊ መኽዘን (cold store) ዓዲ- ጓዕዳድ ተመዲቦም ይነጥፉ ኣለዉ። ነዛ ምህዞ ከዳልዉዋ ዘበገሶም ምኽንያት፡ ብውሑድ ወጻኢታት ብውህደት ኣገልግሎት ኣየር ኮንዲሽነር፡ ፍርጅን መዝሓሊ ማይን እትህብ ማሽን ምስራሕ እዩ ነይሩ። ብመሰረት ተበግሶኦም ድማ፡ ድሕሪ ዝተወሰነ ኣዋርሕ፡ ንሓሳባቶም ኣብ ተግባር ብምውዓል ነታ ዝሓለሙዋ ማሽን ክሰርሑዋ በቒዖም።
ንሳቶም፡ ፍሉይነት ምህዞኦም፡ ኣብ መዳይ ሞተረ ናይ ምስትኽኻልን ምውህሃድን መስርሕ ከምዝገበሩላን ብውሑድ ወጻኢታት ድማ ክትግልገለላ እትኽእልን ምዃና የብርሁ። እዛ ስማርት ዝተሰምየት ምህዞ፡ ብዘይካ’ቲ ናይ ምዝሓል ክእለታ፡ ኣብ ውሽጢ ፍርጅ መውዓይ ዘለዋ ገይሮም’ውን እዮም ኣቕሪቦምዋ ዘለዉ። ንኣብነት፡ ኣብ ፍርጅ ዝበረደ ስጋ ክሳብ ዝመክኽ፡ ኣብ ክንዲ ኣብ ጸሓይ ወይ’ውን ኣብ ማይ እተጽንሖ፡ እቲ ስጋ ካብ ፍርጅ ከየውጻእካ ከተምክኾ ዕድል ትህበካ። እዚ ድማ፡ እዛ ምህዞ ኣብ ሓደ እዋን ክልተ ጥቕሚ ክትረክብ ትሕግዘካ ማለት እዩ።
ኣብ’ታ ኣየር ኮንዲሽነር ድማ፡ ኣብ ምድረ- በዳ ይኹን ማይ ክትረኽበሉ ኣብ ዘጸግም ቦታ ምስ እትህሉ፡ እታ ኣየር ኮንዲሽነር፡ ነቲ ኣብ’ቲ ከባቢ ዘሎ ኣየር ብምስሓብ፡ ናብ ማይ ለዊጣ ጽምኣትካ ከተርዊ እትሕግዝ እያ።
እታ መዝሓሊት ማይ ከኣ፡ ብፍላይ ኣብ ሃሩር ቦታ እትጠቅም ኰይና፡ ኣብ ውሑድ ሰዓት ካብ 20 ክሳብ 2 ሽሕ ሊትሮ ማይ እተዝሕል እያ።
ኣብ መወዳእታ እቶም መሃዝታ፡ ዓለማዊ ዋዒ ኣብ ዝውስኸሉ ዘሎ እዋን፡ ኣብ ክንዲ ዝተፈላለየ ሞተራት ተጠቒምካ ኣከባብያዊ ጸገማትን በከልቲ ጋዛትን ምውሳኽ፡ ኣብ ሓደ ዝተጠርነፈ (synchronized) ቴክኖሎጂ ገይርካ፡ ዝተፈላለዩ ጥቕምታት ዘለዎ መዝሓሊ ቴክኖሎጂ ምድላው ምዃኑ የነጽሩ።
ትምህርቲ ኮምፕዩተር እተስፍሕ ምህዞ
እዛ ምህዞ፡ ብሶላር እትሰርሕ ኮምፕዩተር ኰይና፡ ሸውዓተ ኣገልግሎት ትህብ። ንሳቶም ድማ፡
ሌላ ምስ ኮምፕዩተር፡ ዲጂታላዊ ቤት-ንባብ፡ ዲጂታላዊ ትምህርቲ፡ ኦዲዮ-ቪዥዋል፡ ኮምፕዩተር ፕሮግራሚን፡ ምስርሐ ሮበት ከምኡ ድማ፡
ኣብ ቤት ጽሕፈትን ምምሕዳርን ጥቕሚ ዘለዋ እያ።
እዚ ከም መደብ ኣብ 2018 ዝተጀመረ ኰይኑ፡ ኣብ 2022 ድማ ተፈጺሙ። ነዚ ምህዞ ንመጀመርያ ግዜኡ ንኽትከል፡ ሓደ ሰዓት ይወስድ። እዛ ኮምፕዩተር ጸሓይ ኣብ ዘላትሉ ግዜ ብቐጥታ ክትሰርሕ እንከላ፡ ብርሃን ጸሓይ ኣብ ዘይብሉ ድማ፡ ብባተሪ ክትሰርሕ ትኽእል።
መምህር
ብርሃነ ተኽላይ፡ ነዛ ምህዞ ዘዳለወ መንእሰይ እዩ። ኣብ ሃገርና፡ ብፍላይ ኣብ ገጠራትን ሓውሲ ከተማታትን፡ እኹል ቀረብ ኤሌክትሪክን መሳለጥያታት ኮምፕዩተርን ዘይብለን ኣብያተ ትምህርቲ ኣለዋ። መምህር ብርሃነ ድማ፡ ነዚ ጸገም ከም ፍታሕ ክኸውን ዝኽእል ብሶላር እትሰርሕ ናይ ኮምፕዩተር ምህዞ ከቕርብ እዩ ተበጊሱ።
እቲ ቀንዲ ኣተኵሮይ ኣብ መስርሕ ምምሃርን ምስትምሃርን ኰይኑ፡ ተመሃሮ ብቐሊሉ ሌላ ምስ ኮምፕዩተር ክህልዎም ምግባር እዩ። እዛ ኣቕሪበያ ዘለኹ ብሶላር እትሰርሕ ናይ ኮምፕዩተር ምህዞ ከኣ፡ ብቐንዱ ንተመሃሮ መባእታን ማእከላይን ደረጃ ዘተኰረት ኰይና፡ ተመሃሮ ኣብ ክፍሎም ኰይኖም መሰረታዊ ንቕሓት ኮምፕዩተር ክመሃሩ እትሕግዞም እያ። ብሶላር ክትሰርሕ ስለእትኽል ድማ ተወሳኺ ብልጫኣ እዩ። ኣብ መጻኢ ድማ፡ ንካልኣይ ደረጃን ላዕለዋይ ደረጃን ተመሃሮ፡ ናይ ኮምፕዩተር ትምህርታዊ ሓገዛት ክትህቦም እትኽእል ዝተመሓየሸ ምህዞ ከቕርብ ዓቕሚ ኣለኒ
ይብል።
ቅድሚ ብቕዓትን ምልከትን ኮምፕዩተር ምህላው፡ ሌላ ምስ ኮምፕዩተር ክህልወና ኣለዎ። እዚ ድማ ኣብ ኣብያተ ትምህርቲ ተኣታትዩ፡ ተመሃሮ ትምህርቲ ኮምፕዩተር ከምዝመሃሩ ይግበር ኣሎ። እዛ መምህር ብርሃነ ኣቕሪቡዋ ዘሎ ድማ፡ ተመሃሮ ብዝማዕበለ ኣገባብን ብውሑድ ወጻኢታትን ክመሃሩ ትሕግዝ ስለዝዀነት፡ ኣብ ኣብያተ ትምህርቲ ተተኺላ ኣገልግሎት ክትህብ ጸገም ከምዘይብላ እዩ ዝሕብር።
ብኤሌክትሪክ እትሰርሕ ናይ ሕርሻ ነፋሪት
ተመሃራይ
ናሆም የማነ፡ ኣብ ቤት ትምህርቲ ሓላይ 10ይ ክፍሊ ዝመሃር እዩ። ንሱ ኣቕሪብዋ ዘሎ ምህዞ፡ ኤሌክትሪካዊት ናይ ሕርሻ ነፋሪት ኰይና፡ ኣብ ቅድሚት ወገና ተፈንጃሪ መትሓዚ ቦምብ ዝመስል ዝተገጥመላ እያ። እቲ ቦምብ ዝትኰስ ኣጽዋር ዘይኰነ፡ መድሃኒት ባልዓት ዝሓዘ እዩ።
ምህዞኡ ብቐንዱ ኣብ ሕርሻዊ መዳይ እተገልግል ኰይና፡ ብዛዕባኣ ከምዚ ክብል’ዩ ዘብርህ።
ሓደ ፓይሎት ኣብ እዋን በረራ፡ ብልዕሊ ሕርሻዊ ቦታታት እናሓለፈ፡ ብኣንበጣን ባልዓትን ዝተጠቕዐ ዘራእቲ ኣተኲሩ ይትኩስ። እቲ ፓይሎት ልክዕ ናብ’ቲ ዘራእቲ ምስ ተኰሰ፡ እታ ቦምብ ናብ መሬት ክትበጽሕ ከባቢ 30 ሜተር ምስ ተረፋ ትፍንጀር። ምስ ተፈንጀረት ድማ፡ እቲ ኣብ ውሽጣ ዝጸንሐ መድሃኒት ኣብ ኣየር ፋሕ ይብል። ከም ዝናብ ኰይኑ ከኣ፡ ኣብ ልዕሊ እቶም ባልዓት ይወርድ
ብምባል ተመሃራይ ናሆም የማነ፡ ንጥቕሚ እታ ምህዞ የነጽር።
ቅድሚ ሕጂ ኣብ ሕርሻዊ ቦታታት ዘገልግላ ተመሳሳሊ ምህዞታት ነይረን እየን። እንተዀነ፡ ብነዳዲ ዝሰርሓ ብምዃነን ተጠቃምነተን ተቛሪጹ ጸኒሑ። እዛ ምህዞ ፍልይቲ ዝገብራ ግና፡ ጸዓት ኤሌክትሪክን ጸሓይን ተጠቒማ ኣገልግሎት እትህብ፡ ከምኡ ድማ፡ ነቲ መድሃኒት ዝሓዘ ቦምብ ኣብ ውሑድ ደቓይቕ ኣብ’ቲ ክትትኩሶ ዝኣዘዝካያ ቦታ፡ ብሓንሳእን ብቕልጡፍ ግዜን ክትበጽሖ ትኽእል ብምዃና እያ። እንተደኣ ብዝማዕበለ ኣገባብ ተዳልያን ዘድሊ ነገራት ተማሊኡላን ድማ፡ ነቲ ኣብ ሃገርና ዝርአ ኣንበጣ ኣብ ምጥፋእ ክትሕግዝ እትኽእል ምህዞ ምዃና ተመሃራይ ናሆም የማነ ይሕብር።
ተንቀሳቐስቲ ቴሌቪዥናት
ቴክኒሻን
ኤፍሬም ተኽለ፡ ካብ ንኡስ ዞባ ዒላ በርዒድ እዩ መጺኡ። ንሱ፡ ነተን ካብን ናብን ሒዝካየን ክትጓዓዝ ዘየጸግማ ተንቀሳቐስቲ ቴሌቪዥናት ሒዙ’ዩ ኣብ ቁሸት ምህዞን ሰንዓን ቀሪቡ ዘሎ። እዘን ቴሌቪዥናት ብውጽኢት ዕንጨይቲ፡ ከምኡ ድማ፡ ካብ ዝኣረጋን ዝተጓሕፋን ኮምፕዩተራት ሰኒዑ ዝሰርሐን እየን።
ቴክኒሻን ኤፍሬም ከምዝሓበረና፡ ምሂዙወን ዘሎ ተንቀሳቐስቲ ቴሌቪዥናት፡ ፍላሽ ዘእትዋን ምስ ረሲቨር ተተሓሒዘን ክሰርሓ ዝኽእላን ኰይነን፡ ምስ ምዕባለ ዝጓዓዛ እየን። ብውሑድ ሃልኪ ባተሪ ናይ ማኪና፡ ብኤሌክትሪክን ሶላርን ዝሰርሓ፡ ኣብ ኩሉ ቦታ ድማ ኣገልግሎት ክህባ ዘይጽገማ፡ ፍሉይነት ከምዘለወን’ዩ ዝገልጽ።
ኣብ መጻኢ ከኣ፡ ነዘን ተንቀሳቐስቲ ቴሌቪዥናት፡ ዝተፈላለየ ምዕባለታትን ኣገልግሎትን ዝህባ ገይሩ ከቕርበን መደብ ከምዘለዎ ሓቢሩና።
ኣብ ቀጽሪ ኤክስፖ ዝካየድ ዘሎ፡ ናይ ሎሚ ዓመት ፈስቲቫል ኤርትራ፡ ብዝቐርብ ዘሎ ትሕዝቶታት ምህዞን ሰንዓን ኩሉ በጻሒ ኣድናቖቱ እናገለጸ እዩ ዝዕዘቦ ዘሎ።
ኣብ ቀጻሊ ድማ ናይ ፈስቲቫል ኣጋጣሚታት ተጸቢኻ ጥራይ ዘይኰነ፡ ነዚ ናይ መሃዝነት መንፈስን ድሌትን መንእሰያት ዘበራብር ምርኢት ምህዞን ሰንዓን፡ ብብዝሒ ክካየድን ውድድራት እናተገብረሉ ክድፍኣሉን ስለዝግባእ፡ ዝምልከቶ ኣካል ቈላሕታ ክገብረሉ ለበዋ’ውን ዘድልዮ ኣይኰነን።
ኣብ’ቲ ኣጋጣሚ ዝረኸብናዮም ነጋድያን ኤክስፖ ድማ፡ መሃዝትን ሰናዕትን መንእሰያት፡ ተጠርኒፎም ደገፍን ምትብባዕን ከምዘድልዮም ርእይቶኦም ገሊጾምልና።
@shabait
_____
Pic of the Festival:
@GhideonMusa
| 10 Eritreans, including 2 Eritrean internationals, will play in the Swedish Cup 2nd round this week, which began last Wednesday when a Fesshaie-less AIK beat Dalkud FF 3-0! 
-The MoH and national blindness prevention/control program works to eliminate trachoma, the world's leading cause of preventable blindness. @FikreJesus
who paid a working visit to our embassy. It was an opportunity 2 foster relations & catch up on developments, in our respective regions. @MichealHagos
