Mereja.Forum

[Abe Abraham]

ቶኽሲ ምስ ዘሓለ ኣቦይ ሃለቃ ትግራዋይ ክንሶም ማዕጾ ምስ ኣርሐውናዮ ስጋዕ ሕጂ ስለምንታይ " እኔ ሰላማዊ ሰው ነኝ! " ከም ዝበሉ ኣይተረዳኣናን ።(ሒካያ ካብ ሓርነታዊ ቃልሲ ህዝቢ ኤርትራ)

[Abe Abraham]

ኣቦይ ሃለቃ ፥ እኔ ሰላማዊ ሰው ነኝ

ቶኽሲ እንዳ ቀረበ ምስ ከደ ኣቦይ ኣብ ኣስመራ ስለ ዝነበረ ኣነ ብቆልዓይ ሓላፍነት ስለ ዝተሰመዓኒ ማዕጾ ናይ ካንቸሎና ዓጽየ ናብ 'ቲ ምስ ጎረባብትና ናይ ሓባር መዕቆቢ ቦታ እንዳ ኸድኩ እንከለኹ ሓደ ካብ ግንባር ብጠሪጋኡ ዝጓዓዝ ዝነበረ ውጉእ ወተሃደር ብረቱ ኣብ ጥቓ ነብሱ ኣጸጊዑ ስልፈፍ ሰልፈፍ እንዳ በለ ናባይ ገጹ ክቐርብ ምስ ኣስተብሃልኩ ብልበይ ይልክመኒ እኳ እንዳ በልኩ ብቕልጣፈ ንስድራይ ተጸንቢረዮም ።

ኲናት ኣብ 'ቲ ዝነበርናዮ ቦታ ኣትዩ ኣብ ትሕቲ ዓራት ተሓቢአ ካብ ኣሕዋተይ ደቂ ኳዜንን ዓዜንን ዝሰነቕክዋ - ናይ ቆልዓ ነገር - " ብስራት ብስራት ንህዝቢ ኤርትራ ፡ ደቅኹም መጺኦም ከውጽኡኹም ሓራ " ትብል መዝሙር እንዳ ዘመርኩ ሕማቕ ዕድል ኮይኑ ሓንቲ ናይ ጸላኢ ታንኪ ኣብ ጎኒ 'ቲ ተሓቢእናሉ ዝነበርና ቦታ መጺኣ ጠጠው ትብል 'ሞ ብቕርበት ዝኣክል ምሳና ዝነበሩ ዓበይቲ ሓደ ካብ እቶም ታንከኛታት በምሓርኛ ንብጻዩ " ሲጋራ ኣቐብለኒ " ክብል እንከሎ ይስምዕዎ ።

ኩነታት ከም ዝነበሮ ኮይኑ ብተስፋ እንዳ ተጸበና ቶኽሲ ስለ ዝዘሓለ ንዳህሳስ ማዕጾ ክፍት ምስ ኣበልና ምስ ሰለስተ ተጋደልቲ ገጽ ንገጽ ምስ ተራኸብና ኣቦይ ሃለቃ ትግራዋይ ክንሶም ዝሓተቶም ዘይብሎም ናብ ማዕጾ ቀሪቦም " እኔ ሰላማዊ ሰው ነኝ " ዝብላ ቃላት ኣውጺኦም። ኣደይ ኣብ 'ቲ እዋን ንተጋደልቲ ብቐዳምነት ማይ ከም ዘድልዮም ስለ ዝተረደአት ብጎማታት ምስ ኣቐበለቶም ተፋንዮምና ግስጋሴኦም ቀጸሉ ። ሽዑ ካብ ርሑቕ ኣደይ ንጓል ኢሳቕ ትርኢ ። መንእሰይ ጓል ኢሳቕ - ሰብ ካርነሽም - ንውጉኣት ክትሕግዝ ኲናት እንዳ ተኻየደ እንከሎ ንተጋደልቲ ክትጽንበሮም ወሲና ማለት 'ዩ ። ዳሕራይ ጓል ኢሳቕ ተጋዳሊት ኮይና ብዙሕ ታሪኽ ምስ ሰርሐት ምስ ክልተ ኣሕዋታ ብጅግንነት ተሰዊኣ ። እቶም ስድራ ብምሉኣቶም ጸዓዱ እዮም ኔሮም ። ካብ እንዳ ኣዲኦም ድማ ቁመት ወሪሶም ነዋሕቲ ኔሮም ።

ኣብ ግዜ ጭንቂ ዋዛን ጸዎታን ይሕግዝ እዩ ከም ዝበሃል ሓደ ካብ ምሁራት ስድራ-ቤት ደቂ ስመጃና ዝኾነ ሓውና ጠያይቲ ካበይ ከም ዝመጽአ (ካብ ጃጅዮም ዝተሓብኡ ወተሃደራት) ብየማነ-ጸጋም ፊው ፊው እንዳ በለ እንከሎ ሕቋፍ ጓሉ ሒዙ ናብ ግዳም ወጺኡ ናይ ሓደ ወተሃደር ንእሽተ ሽጉጥ ሒዙ ተመሊሱና ። ኣንታ እንታይ ክትኮነካ ተባሂሉ ምስ ተሓትተ '' ንጓለይ ትኾና ! " ኢሉ መሊሱሎም ። ከመይ ዝኣመሰለ ጉልቡትን ነዊሕን ንእሽተይ ሓዉ ዳሕራይ ኣብ መሳርዕ ህዝባዊ ግንባር ተሰሊፉ ምእንቲ ህዝቡን ሃገሩን ብጅግንነት ተሰዊኡ ።

ጸጽርግያ ሓዙ ዝብል ለባም መምርሒ ህዝባዊ ሰራዊት ተኸቲልካ ቤተ-ንብረትካ ገዲፍካ ምውጻእ ምስ ኮነ ኣቦይ ኣሸብር(ትግራዋይ) ግን ኣይሰመዑን ግዲ ኮይኖም ካብ ጽርግያ ወጻኢ እንዳሳጎሙ እንከለዉ ብዘሕዝን ፈንጂ ረጊጾም ካባና ተፈልዮም ። ንሕያዋይ ሓውና ማሕሙድ ወዲ ገብሩ (ንስድርኡ ሓደ ወዲ ) ድማ ብራርያ ጥይት ናይ ህዳምያ ወተሃደራት ጸላኢ ለኪማቶ ። ሞት ናይ ኣቦይ ኣሸብርን ወዲ ገብሩን ንብዙሓት ሰባት ኣሕዚኑ ።



-