Mereja.Forum

[Abe Abraham]

• መስደመም ፥ ጥንታውያን ግብጻውያን ካርካርን ታታ/ታተ ዝባሃላ ቃላት ይጥቀሙ ኔሮም !
  
  
  1_ሓደ ግዜ ምስራዊ ኣል-ሸይኽ ኣል-ሻዕራዊ ኣብ ቃላት ኣቃውማ ኣትዩ ንቋንቋ ፈትፊቱ ንሃይማኖት ናይ ምትንታን ልምዲ ስለ ዝነበሮ - ከም በዓል ኢብራሂም ዒሳ ዝኣመሰሉ ኣዳለውቲ መደባት ቲቪ ሓድሽ ነገር ዘምጽኦ የሎን እንተ ኣምጸአ ከኣ ሃይማኖትዊ ትርን ምትራኽን ዝብልዎ - ብዛዕባ ክንዲ ኣስማት ክዛረብ እንከሎ ንመመልከቲ ንጥቀመሉ እዚን እዛን ብዓረብ ክረአ እንከሎ መሰረቱ ፊደል " ዘ " ኮይኑ ንቐረባ ዘርእይ ድማ " ሃ " ኣብ ቅድሚኡ ለጢፍካ " ሃዛ/እዚ " ን " ሃዚሂ/እዚኣ " ትብል ኢሉ ክዛረብ ምስ ሰማዕክዎ ነቲ ትንተና ፍሽኽ እንዳ በልኩ ኣብ ሓንጎለይ ከም ዝምዝግቦ ጌሩኑ ።
  
  2_ሓንቲ ጸረ-መንግስቲ ምስሪ ዝኾነት ሙና ትበሃል ሰበይቲ ካብ ዓዲ እንግሊዝ ድማ ካብ ባሻይ ጉግል ወሲዳ እንዳ ሰሓቕት ብዛዕባ ከይተወድኡ ዝፈረሱ 36 ቢንቶታት ሃገራ ክትዛረብ ጸኒሓ ኣብ ስራሕ ህንድስናን ኮንክሪትን ኣትያ ንስካፎልዲን ዝበሃል ቃል ናይ እንግሊዝ ጠቒሳ ከይቀደምክዋ " ሰቓላ! ሰቓላ! " ኢላ ዘረባኣ ቀጺላ ። እቲ ብዓረብ ሰቓላ ዝበሃል ዘሎ - ኣጋጣሚ ይኹን ኣይኹን - 'ቲ ናትና ነዳቖ ኣብ ልዕል ዝበሎ ቦታ ተሰቒሎም ስርሖም ክገብሩ ዝሕግዞም ማለት እዩ ።
  
  3_ሸይኽ ኣል-ጁንዲ ኣሰር ናይ ኣል-ሸይኽ ኣል-ሻዕራዊ ተኸቲሉ ኣብ ቃላት ኣትዩ ክዛረብ እንከሎ ን " ሰደቓ/ጸደቕ " ዝብል ቃል ኣልዒሉ ክትንትን እንከሎ " ንተኽሊ ምስ ተተኸለ ጠጠው ኢሉ እንተቀጺሉ ጸዲቑ ንብሎ " ዝብል ኣብነት ኣቕሪቡ ። ኣነ በዛ ልበይ ንሕና 'ውን ከምኡ ኢና ንብል ኢለ ።
  
  4_ነዘን ኣብ ላዕሊ ዝጠቐስክወን ካብ ሴማውያን ቋንቋታት ስለ ዝመጽኣ ቅሩብ ጠጠው ዘብላኻ እኳ እንተኾና ዘደንጽዋ ግን ኣይኮናን ። እቲ ምንታይ መግለጺ ስለ ዘለወን ። እቲ ዘደንጹ ንምስሪ ናይ ገዛእ ርእሶም ቋንቋ -- ንቤተ-ክርስያን ኦርቶዶክስ ገዲፍካ -- የብሎምን ንዝብል ሕሜታ ንምክልኻል ሓደ ምስራዊ ዋላ ዓረብ ወሪሮም ቋንቋኦም ኣብ ሕብረተ-ሰብና ኣስሪጾም ናይ መንነት ምድንጋር እኳ እንተ ኣምጽኡልና ኣብ 'ቲ መዓልታዊ ቋንቋና ንጥቀመሎም ብዙሓት ዝተረፉ ጥንታውያን ቃላት ኣለዉና እንዳ በለ ንካርካርን ታተን ይጠቅስ !! በቲ ሑቡን ምስራዊ መሰረት ካርካርን ታታ/ታተ ናይ ጥንታውያን ግብጻውያን ቃላት ማለት 'ዮም !!!!
  
  ሓደ ኣብ ኣሜሪካ ዝነብር የመናዊ ዝመስል ወዲ ሓበላ/ሓማሴን ( ኣብ ኣድያቦ ዘሎ ስድራና ዝመስረትዎ ደንበ ሓበላ ትፈልጥዎ እንዲኹም ? ) ኣብ ሰንዓ ኣብ ዝሰርሓሉ ዝነበረ እዋን ንሕና ጥራሕ ዘይኮነስ የመናውያን 'ውን " ክርፍስ " ዝብል ቃል ይጥቀምሉ እዮም ምስ በለና ካርካር ኢልና ስሒቕና ። ሕጂ ድማ ወያ ካርካር ምስ ታተ ናይ ቀዳሞት ግብጻውያን ቃላት ኮይነን ። ክትመሃር እንተደሊኻ ኩሉ ግዜ ዕድል ኣሎ ። እቲ ዘድሊ ኣዕንትኻን ኣእዛንካን ምኽፋት እዩ ።