1. ብምክንያት ሓዲሽ ዓመት 2023፡ ብረዚደንት ሃገረ ኤርትራ፡ ምስ ሃገራዊ ናይ መራኸቢ ብዙሓን ቃለ መሕትት ከምዘካይዱ ተገሊጹሎ። ኣብቲ ቃለ መሕትት ዚሳተፉ ጋዜጠይናታት ክንደይ ይኾኑ ቢልኩም ትግምቱ፧
ሀ) 6
ለ) 4
ሐ) 2
መ) 9
2. ብረዚደንትና ምስ ሃገራዊ ናይ መራኸቢ ብዙሓን ዜካይድዎ ቃለ መሕትት ክንደይ ግዜ ይወስድ ቢልኩም ትግምቱ፧
ሀ) 4 ሰዓታት
ለ) 6 ሰዓታት
ሐ) 5 ሰዓታት
መ) ልዕሊ 6 ሰዓታት
3. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ዚህብዎ ሸፈነ ናይ ቃለ ምልልሶም ክንደይ ሚእታዊት ይኸውን ቢልኩም ትግምቱ፧
ሀ) 60%
ለ) 50%
ሐ) 75%
መ) 40%
4. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ ብዛዕባ ምብርባር “ነጻ-ፕረስ” ይዛረቡ’ዶ ትብሉ፧
ሀ) እወ፡ ንናይ ውልቂ ጋዜጣታት ኪህተማ ከፍቅዱ እዮም
ለ) እንተተሓቲቶም ኪምልሹሉ እዮም
ሐ) ስለዘይህተቱ ኣይዛረቡን
መ) ለን ሐን
5. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ኣብ ዘቤታዊ ጉዳይ ብዛዕባ ቁጠባን ንግዲን ኣብ ዚምልከት ሸነኽ፡ ግቡኦም ንዘበርከቱ ዜጋታት “ኢምፖርት ኤክስፖርት” ብዘይ ገደብ ኬፍቅዱ እዮም።
ሀ) ሓቂ
ለ) ሓሶት
ሐ) ኣይመስለንን
መ) ዶ!
6. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ብዛዕባ ዜናዊ መኸተ እንተ ተንቲኖም “ሓባ ዓጽሙ” ቢሉ ንዝገልጾም ንዓወል ስዒድ “ዙ 23”፡ ፍናኑ ንኺብርኽ፡ ብፍላይ ብሽሙ ጠቂሶም ኣብ ቅድሚ ሓፋሽ ኪሙግስዎ እዮም።
ሀ) ሓቂ
ለ) ሓሶት
ሐ) ምናልባት
መ) ኣይዝክርዎን እኳ
7. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ብዛዕባ ንዓመታት ኣብ ቀይዲ ዚርከቡ ገዳይም ተጋደልቲን ጋዜጠኛታትን እንተተሓቲቶም፡ ደርጊን ወያነን እኳ ካብ ማሕዩር ይፍነው ኣለዉ ንሕናውን ብስልጡን መገዲ ንብጾትናን ዜጋታትናን ምሉእ ‘ምሕረት’ ጌርና “ሓራ” ብምውጻእ ክንፍንዎም ኢና ክብሉ ኢዮም።
ሀ) ሓቂ
ለ) ሓሶት
ሐ) ብጭራሽ ከምኡ ኣይብሉን እዮም
መ) ኣይዝክርዎምን እኳ
8. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ ብዛዕባ ደስኪሉ ዝጸንሐ ስራሓት ሕንጻ ይዛረቡ’ዶ ትብሉ፧
ሀ) እወ፡
ለ) እንተተሓቲቶም ኪምልሹሉ እዮም
ሐ) ስለዘይህተቱ ኣይዛረቡን
መ) ለ ን ሐ
9. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ ብዛዕባ ከም ብሓዲሽ ይጽሓፍ ኣሎ ዝበልዎ ሓዲሽ ሃገራዊ ቅዋም ይጠቅሱ’ዶ፧
ሀ) እወ፡
ለ) እንተተሓቲቶም ኪምልሹሉ እዮም
ሐ) ስለዘይሕተቱ ኣይዛረቡን
መ) ለ ን ሐ
10. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ ብዛዕባ ቀረብ ጸዓት ዚግበር ዘሎ ሓዲሽ ሃገራዊ ወፍሪ ከብርሑ እተተሓቲቶም እንታይ ክብሉ ኢዮም፧
ሀ) ንጉዳይ ቀረብ ጸዓት ቀንዲ ፍታሕ ኢልና ዘቀመጥናዮ፡ ካብቲ ኣብ ኢትዮጵያ ብጻይ መለስ ዜናዊ ዘሰርሖ ሓጽቢ ህዳሴ ዚፍልፍል ዝኣኽለና መጠን ጸዓት ብሕሱር ወጻኢ ምእታው ኢዩ። ነዚ ንምርግጋጽ ድማ ንሰላም ኢትዮጵያ ቀዳምነት ሂብና ተሓለልና ንሰርሕ ኣሎና።
ለ) ርእስኻ ምኽኣል ወይ ርእሰ ምርኾሳ ዝብል ፈላማዪ ጭርሖና ኣብ ግብሪ ንምውዓል፡ ምስ ገለ ዓለማዊ መሻርክትታት ብምትሕብባር፡ ኣብ ተተካእቲ ምንጪ ጸዓት ብምድሃብ፡ ኣብ ቀረባ እዋን ገዚፍ ናይ ሶላር ፕሮጀክት ብምብግጋስ ኣብ ሃገራዊ ግሪድ ከምዝሕወስ ጌርና 20-30% ናይቲ ዝጸንሔ ፍታሕ ንምርካብ ወጢንና ኣብ ስራሕ ተጸሚድና ኣሎና።
ሐ) ኣብ ምሉእ ምብራቃዊ ኣጻድፍ ብዙሓት ብነፋሳዊ ድፍኢት ዚሰርሑ ተርባይናት ክንተክል ከም መደብ ሒዝናዮ ኣሎና፡ ኣብ መጻኢ ድማ ናይ ጂዎተርማል ሃብትና ክንፍትሽ ኢና
መ) እቲ ሕጂ ዘሎ ቀረብ ጸዓት፡ እኹልን ፈረቓን ኢዩ፡ ካብዚ ንላዕሊ ሸብዳዕዳዕ ኣየድልዪን ኢዩ። ቁጠባና ኣየፍቕደልናን ኢዩ።
ሰ) ለን ሐን መልሲ እየን
11. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ፡ ከምቲ ንደቂ ሶማል ፍሉይ ታዕሊም ፓይሎትነት ዝተዋህበ፡ ንብዙሓት መንእሰያት ኤርትራ ከምዚ ዓይነት ትምህርቲ ብምሃብ፡ ንክኢላዊ ዓቕሚ ሰብና ከይተረፈ ከም ሰደድ ብምውፋር፡ ኣብ ሕንጸት ሃገር እጃሞም ንምብርካት ዝተታሕዘ መደብ ኣሎ’ዶ፧ እንተዝበሃሉ እንታይ ምበሉ፧
ሀ) እወ ኣሎ፡ ካብ ቀረባ ግዜ ዚትግበር በማኢት ዚቁጸሩ መንእሰያትና ከምዚ ዓይነት ትምህርቲ ብምሃብ ኣብ ዝተፈላለዩ ሃገራት ከይዶም ከምዝሰርሑን ኣብ ቁጠባዊ ዕብየት ሃገር እጃሞም ከበርክቱ ክንገብር ኢና
ለ) ሕጂ ኣብ ከምኡ ደረጃ ኣይበጻሕናን፡ ኣብ ቀጻሊ ክንትግብሮ ክንፍትን ኢና
ሐ) ክንድኡ ዝብዝሑ ፓይሎታት ምፍራይ ጽላለ ኢዩ፡ ካልእ ቀዳምነታት ኣሎና
መ) ክሳብ ሕጂ ዘፍረናዮ’ዶ ቀሊል ኮይኑ!
12. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ ብዛዕባ ብመግቢ ርእስኻ ንምኽኣል ዚግበር ዘሎ ሃገራዊ ወፍሪ ከብርሑ እንከለው እንታይ ክብሉ ኢዮም፧
ሀ) ዝሰራሕናየን ገዘፍቲ ዲጋታት ምሕርቲ ብካዕበት ክሕፈሰን ጀሚሩሎ፡ ድሮ ንሰደድ ዝቐንዐ ምሕርቲ ክንሓፍስ ጀሚርና ኣሎና
ለ) ንዝሰራሕናየን ዓበይቲ ዲጋታት ንሰራዊት ኣመቃሪሕና፡ ሰራዊት 100/100 ከምዘልምዐን ክንገብር ኢና
ሐ) ዝጠመየ ዜጋ ከምዘይህልወና ከይተሓለልና ክንሰርሕ ኢና
መ) ዓቕምና ንገብር ኣሎና
ሰ) ኩለን መልሲ እየን
13. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይ ኣብ ዚምልከት ሸነኽ፡ መንግስቲ ኤርትራ ማሕበራዊ አገልግሎት ቀዳምነት ንርሑቕ ገጠራት ከምዚህብ ይፍለጥ፡ በዚ ሽነኽ ቀረብ ኢንተርኔት ኣብ ቃሩራን ማሕሚመትን ከመይ ኣሎ፧ እንተዝበሃሉ እንታይ ይብሉ ይመስለኩም
ሀ) ጽቡቕ ተሰላሲሉ
ለ) መስመር ጽቡቕ ንኪኸውን ልዑል ጻዕርታት ይግበር ኣሎ
ሐ) በዚ ሸነኽ ቀዳምነት ንኮሌጃትን ጻዕቂ ህዝቢ ንዘለወን ከተማታትን ኢና ኣድሂብና ዘሎና
መ) ኣብ ቃሩራን ማሕሚመትን ርሑቕ ገጠራትን ካልእ ኢዩ ቀዳምነታትና
ሰ) ሐን መን መልሲ ኢየን
14. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይን ጉዳይ ጐረባብቲ ሃገራትን ኣብ ዚምልከት ሸነኽ ብዛዕባ ትግባረ “ፊዚካል ዲማርኬሽን” ይትንትኑ’ዶ፧
ሀ) አጸቢቖም እምበር ግዚኡ ስለዝኣኸለ ክትግበር ኢዩ ክብሉ እዮም።
ለ) ብዛዕባ “ቨርቺዋል ዲማርኼሽን” እምበር ብዛዕባ “ፊዚካል ዲማርኬሽን” ኣይግድሶምን ኢዩ
ሐ) ብጭራሽ ብዛዕባ ዶብ ኣይገልጹን
መ) ዶብና ብደምና ኣውሒስና ኢና ኢሎም ብዛዕባ ትግባረ ዓለምለኻዊ ብይን ኣብ ባይታ ማለት “ፊዚካል ዲማርኬሽን” ኣይክዛረቡን እዮም
15. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንኢትዮጵያን ውሽጣዊ ጉዳያታን፡ ካብ ቃለ መሕትቶም ክንደየናይ ሸፈነ ክህብዎ እዮም፧
ሀ) 20 ደቂቕ
ለ) 30 ደቂቕ
ሐ) 15 ደቂቕ
መ) ልዕሊ 30 ደቂቕ
16. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዘቤታዊ ጉዳይን ጉዳይ ጐረባብቲ ሃገራትን ኣብ ዚምልከት ሸነኽ ብፍላይ ብዛዕባ ኢትዮጵያ ኣብ ዚገብርዎ ትንታነ፡ “ወያነ” ወይ “ጁንታ” ንዚብል ቃል ብድምር ክንደይ ግዜ ይጠቅስዎ፧
ሀ) ትሕቲ 10
ለ) “ወያነ” ወይ “ጁንታ” ኣይብሉን
ሐ) ልዕሊ 10
መ) ሓንሳብ “ጌም ኦቨር” ቢሎም ዝስለዝገለጹ፡ አይዝክርዎምን ከማን
17. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንጉዳይ ዞባና ኣብ ዚትንትኑሉ ክፋል፡ “ብጉዳይ ወልቃይትን ጸ(ጠ)ገደን ርእይቶኦም ኪህቡ እንተዝህተቱ” እንታይ ቢሎም ይምልሱ።
ሀ) እዚ ጉዳይ ብዲሞክራሲያዊ መገዲ (ብረፈረንዱም) ክፍታሕ ኣለዎ
ለ) እዘን ስፍራታት ናይ ትግራይ ኢየን ደምሕት ከመሓድረን ይግባእ
ሐ) እዘን ስፍራታት ናይ ኣምሓራ ኢየን ፋኖ ከመሓድረን ይግባእ
መ) ኣብ ውሽጣዊ ጉዳይ ኢትዮጵያ ኢድና ኣይነእትውን ኢና
ሰ) ከምዚ ዓይነት ሕቶ ኣይሕተቱን
18. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንጉዳይ ዞባና ኣብ ዚትንትኑሉ ክፋል፡ ንሃይልታት ኣምሓራ (ፋኖ)ን ንሓይልታት ኣብዪን ኣብ ዙርያ ጠረጴዛ ከተላዝብዎም በይናዊ ተበግሶ ኪትወስዱ መደብ ኣለኩም’ዶ፧ ተባሂሎም እንተዝሕተቱ እንታይ ቢሎም ይምልሱ።
ሀ) ኢትዮጵያ ነንሕድሕዳ ክትፈርስ ኢድና ኣጣሚርና ክንርእዪ ስለዘይንደሊ እወ ተበግሶ ወሲድና ክነላዝቦም ኢና
ለ) ውሽጣዊ ጉዳይ ኢትዮጵያ ስለዝኾነ ኢድና ኣይነእትወሉን
ሐ) ብትኩርነት ነጽንዖ ኣሎና
መ) መልሲ የለን
19. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዓለማዊ ጉዳይ ኪትንትኑ እንከለው ብፍላይ ኣብ ውሽጢ ሃገሩን ኣብ ደገን ንዚርከብ ንህዝቢ ትግራይ ለበዋ ከመሓላልፉ እዮም።
ሀ) ሓቂ
ለ) ሓሶት
ሐ) ድሮ ለበዋኦም ብኣካልን ብተግባርን ገሊጾምሉ ኢዮም
መ) መልሲ የለን
20. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዓለማዊ ጉዳይ ኪትንትኑ እንከለው ብፍላይ ኣብ ውሽጢ ሃገሩን ኣብ ደገን ንዚርከብ ንህዝቢ ኣምሓራ ለበዋ ከመሓላልፉ እዮም።
ሀ) ሓቂ
ለ) ሓሶት
ሐ) ድሮ ለበዋኦም ብኣካልን ብተግባርን ገሊጾምሉ ኢዮም
መ) መልሲ የለን
21. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ዓለማዊ ጉዳይ ኣብ ዚምልከት ሸነኽ ብፍላይ ብዛዕባ ኣሜሪካ ኣብ ዚገብርዎ ትንታነ፡ “ 'ምምሕዳር' ኣሜሪካ” ወይ “ማወስ” ንዚብል ቃል ብድምር ክንደይ ግዜ ይጠቅስዎ፧
ሀ) ትሕቲ 10
ለ) “ኣሜሪካን ማወስን” ዝጠፈሹ ኣካላት ክንዲ ዝዀኑ ኣይጠቅስዎምን፡ ኣይዝክሩዎምን ከማን!
ሐ) ልዕሊ 10
መ) ልዕሊ 20
22. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዓለማዊ ጉዳይ ኪትንትኑ እንከለው ብፍላይ ብዛዕባ መርገጺ መንግስቲ ኤርትራ ብዛዕባ ወራር ሩስያ ኣብ ልዕሊ ልዑላዊት ሃገረ ኡክሬን ኣብ ምንጻር እንታይ ክብሉ ኢዮም፧
ሀ) ንወራሪ መንግስቲ ሩሲያ ኪኩንንዎ ኢዮም
ለ) ኡክሬን ጠልቀፍቀፍ ስለዝበለት ኢያ ተወሪራ ክብሉና እዮም
ሐ) አሜሪካን ሃይልታት ኔቶን ኢዮም ነዚ ኩናት ኣንበድቢዶሞ ክብሉና ኢዮም
መ) ሩሲያ ልዑላዊነታ ትከላከል ኣላ ክብሉና እዮም
ሰ) ለን ሐን መን መልሲ ኢየን
23. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንዓለማዊ ጉዳይ ኪትንትኑ እንከለው ኤርትራ ካብ ሃገረ ኡክሬን እንታይ ትመሃር ተባሂሎም እንተዝሕተቱ እንታይ ምበሉ ትብሉ
ሀ) ምእንቲ ልዑላውነትካን ክብረትካን፡ ምስ ርእሰ ሃያል ሃገር ፊትንፊት ክትገጥም ግቡእ ከምዝዀነ
ለ) ኣብ ግዜ ዲቕ ዝበለ ኵናት ከይተረፈ፡ ብመግቢ ርእስኻ ክኢልካ ንዓለም’ውን ክትኸውን ከምዚኸኣል
ሐ) ወረርቲ ኃይልታት ንትካላት ጸዓትካ እንተዕነውወን እውን፡ ቀልጢፍካ ጸጊንካ ንዜጋታትካ ግልጋሎት ምቕራብ ከምዚኸኣል
መ) ዲፕሎማሰኛታትካ ኣክቲትካ፡ ንወራሪ ኃይሊ ዕርቃኑ ከምዚተርፍን፡ ኣብ መድረኽ ዓለም ከምዚፍንፈንን ምግባር
ሰ) ኩሎም መልሲ እዮም
24. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት “ኣብ ሞንጎ ሕልሚ ዓባይ ትግራይን ሕልሚ ዓባይ ሩስያ(ራሻ) ዘሎ ተመሳሳልነት ብኸመይ ክግለጽ ይከኣል፧ እንተዝበሃሉ’ከ እንታይ ምበሉ ይመስለኩም
ሀ) ክልቲኡ ዘይጭበጥ ሕልሚ ሕማም ምስፍሕፋሕ ኢዩ ምበልና’ሞ ምስ ራሻ ከይንቀያየም ገባቲ ኃይሊ ኣማሪካ ድማ ዲል ከይረክብ ንስከፍ
ለ) ብመሰረቱ እቲ ቀዳማይ ሕልሚ ብዛዕባ ምዃኑ ኣቀዲምና ንፈልጥ ኔርና፡ እቲ ካልኣይ ሕልሚ ግን ከምዝሕለም ዝትዅትዅ ዘለዉ ምዕራባውያን ሰብ ፍሉይ ረብሓ ኢዮም፤ ቀደም ከምዘይነበረ ኢና ንፈልጥ
ሐ) ሕልሚ ደደቢትን ሕልሚ ክረምሊንን ብዘይ ቃል ዓለም፡ ዘይናትካ ናይ ምድላይን ናይ ምግባትን መንፈስ ዝመርሖ ብጭራሽ ፍልልይ ዘይብሉ ሓደ ዝዓይነቱ ርዅስ ሕልሚ ኢዩ
መ) ክልተ ቍጥባዊ ዓለም ስለንደሊ እምበር ንሓደ ሕዝቢን ሃገርን’ዶ ብጐነጽ ምሳይ ስመር፡ ኣብ ማሕበረይ እቶ ይበሃል ዀይኑ፡ ሰገጥ ከይበልና ክንገልጾ ንደሊ ሓቂ ክልቲኡ ሕልምታት ሕልሚ ደርሆ ኢዮ።
ሰ) ኩለን መልሲ ኢየን
25. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት “ኣብ ሞንጎ ጉዳይ ወልቃይትን ጉዳይ ክሬሚያን ዘሎ ተመሳሳልነት ብከመይ ክግለጽ ይከኣል፧” እንተዝበሃሉ’ከ እንታይ ምበሉ ይመስለኩም
ሀ) መን ኢዩ ተመሳሳልነት ኣለዎ ዝበለ፧ ብከመይ፧ መኣስ፧ ኣበይ፧ ምእንቲ ክልተ ቍጥባዊ ዓለም እናተጋህና ከለና ምስ ራሻ ዲኹም ክተባእሱና ደሊኹም፧
ለ) ጋዜጠኛታት ስለዝዀንኩም ባዕልኹም ኣብ ቦታ ፍጻሜ ኬድኩም ክተጻርይዎ ይግባእ።
ሐ) እዚ ምዕራባውያን ገበትቲ ኣካላት ዘንበድብድዎ ዛዕባ ኢዩ፤ ዝሓየለ ኣካል ድሌቱ ኪገብር ይኽእል ኢዩ ዚብል ኣጠማምታ ንልዕልና ሕጊን ልዑላውነትን ኪጎሲ ምርኣይ፡ ብሽም ምኽባር ሃገራዊ ድሕነት ኣብ ልዕሊ ሰላማዊ ሕዝቢ ብኣልማማ ብከቢድ ብረት ዕንወት ምግባር ምርጫ ነዳያን ኢዩ። ፑቲን ይጋገዪ ኢዩ ዘሎ፤ ሎሚ ክሬሚያ ናተይ ኢያ ይብል ኣሎ ጽባሕ ደምቢያ ናተይ ኢዩ ክብል ኢዩ፡ ብኸምኡ እንተቀጺሉ ተዀምብያ ናተይ ኢያ ክብለና ኢዩ፤ ክንዲዝዀነ ብኣግኡ ጌጋኡ ክሕበሮን መግትኢ ክግበረሉን ይግባእ።
መ) ንሕና ኣብ ዘይ ጉዳይና ኣብ ወልቃይት ኰነ ኣብ ክሬሚያ ኢድና ኣይነእትውን ኢና፡ እዚ ጉዳይ ልዑላውነት ሃገረ ኢትዮጵያን ልዑላውነት ሃገረ ኡክሬንን ኢዩ፡ ንሕዝቢ ኢትዮጵያን ሕዝቢ ኡክሬንያን ኢዩ ዚምልከት
26. ብረዚደንትና ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ምምሕዳር ኣብዪ ወይ መንግስቲ ኢትዮጵያ፡ ምስ ኔቶ ምሕዝነትን ኾሸምሸምን እንተብዚሑ፡ ግብረመልሲ መንግስቲ ኤርትራ እንታይ ኪከውን ኢዩ፧ ተባሂሎም እንተዝሕተቱ መልሶም፧
ሀ) ብ“ይኸውን” ኣይንዛረብን ኢና፡ ሽዑዑ ንርእዮ
ለ) መንግስቲ ኢትዮጵያ ኣብ ጐረቤትና ተቆዲጩ ንኔቶ ከቀምጠልና ፈጺምና ኣይንፈቅድን ኢና
ሐ) ንጉዳይ ሃገራዊ ድሕነትና አስጋኢ ስለዝዀነ ስጉምቲ ክንወስድ ኢና
መ) ከምዚ ዓይነት ሕቶ ኣይሕተቱን
ሰ) ሀን ለን ሓን መልሲ ኢየን
27. ብረዚደንት ሃገረ ኤርትራ ምስ ሃገራዊ ናይ መራኸቢ ብዙሓን ኣብ ዜካይድዎ ቃለ መሕትት ንህዝቢ ኤርትራ ዘመሃላልፍዎ ለበዋ እንታይ ዚብል እዩ፧
ሀ) ሕጂውን ተጻብዖ ስለዘሎ መክት፡ ዕጥቕኻ ገጥ ኣብል።
ለ) ተሓበን፡ ለበዋ ኣየድልየካን እዩ።
ሐ) ሰላም መጺኡ'ሎ፤ ልዑላውነትካ አውሒስካ ኣሎኻ፡ ጸላእትካ ተደምሲሶም እዮም፤ ንትግባረ ሃገራዊ ቅዋም ተዳሎ
መ) ኩለን መልሲ እየን
ርሑስ ሓዲሽ ዓመተ 2023 ምስ በዓለ ልደት ከምኡውን ቅሳነት ሰላም ምዕባለን ዝሰፈኖ ዓመተ 2023 ተመኒናልኩም፡ ንሕና ኤርትራውያን ደያኑ ማእከልን መስመርን ብኤርትራዊ ጭዉነት ሓበንን ፍናንን!
