ሚኒስተር ጉዳያት ወፃኢ ኣሜሪካ ኣንቶኒ ብሊንከን፡ ኣብ መንጎ መንግስቲ ፌደራልን ሓይልታት ትግራይን ኣብ ደቡብ ኣፍሪቃ ብዛዕባ ዝካየድ ዘሎ ዘተ ሰላም፡ ምስ ቀዳማይ ሚኒስተር ኣቢይ ከምዝተዘራረበ ገሊጹ።
ሚኒስተር ጉዳያት ወፃኢ ኣሜሪካ፡ ትማሊ ሰሉስ 15 ጥቅምቲ 2015 (ኣቆጻጽራ ግእዝ) ኣብ ዘውጽኦ መግለጺ፡ ብሊንከን እቲ ግጭት ብቕልጡፍ ደው ብዛዕባ ዝብለሉ ኣገባብ ምስ ቀዳማይ ሚኒስተር ኣብይ ከምዝተዘራረበ ሓቢሩ።
ብተወሳኺ፡ ብሊንከን ምስ ፕረዚደንት ኬንያ ዊልያም ሩቶን ሚኒስተር ኣህጉራዊ ዝምድናን ምትሕግጋዝን ደቡብ ኣፍሪቃ ፓንዶርን እውን ብዛዕባ’ዚ ጉዳይ ከምዝተዘራረበ ገሊጹ።
እቲ ሚኒስተር ጉዳያት ወጻኢ ኣብ መግለጺኡ፡ ነቲ ግጭት ፖለቲካዊ ፍታሕ ንምርካብ ምስ ሕብረት ኣፍሪቃ ምምኽኻር ክቕጽል እየ ኢሉ።
ወተሃደራዊ ስጉምቲ ነቲ ግጭት መፍትሒ ከምዘይከውን ዝገለጸ ኣንቶኒ ብሊንከን እቲ ልዝብ ሰላም ንኹሉ ኢትዮጵያዊ ቀጻሊ ሰላም ከምጽእ ተስፋ ዘለዎ መገዲ ከምዝኾነ ኣፍሊጡ።
ኣብ መንጎ መንግስቲ ፌደራልን ሓይልታት ትግራይን ኣብ ደቡብ ኣፍሪቃ ዝግበር ዘተ ሰላም፡ ትማሊ ሰሉስ ከምዝተጀመረ ተገሊጹ’ዩ።
Continue reading https://www.bbc.com/tigrinya/articles/crgndz5z4n4o