ሕጂ’ውን ስቕታ እዩ- ዋልታን ሓይልን መንግስቲ ኤርትራ
=====
ቅድምን ድሕርን ደምዳሚ ብይን ውዕል ኣልጀርስ፡ መንግስቲ ኤርትራ፡ ነቲ ድሕሪ ፈጽሚ ክፍጠር ዝተሃቀነ ጸወታ ሓሸውያ ምዕራባውያን ሓይልታት ከሎ ገና እዩ ጎሪሕሉ። ንዕንኪላሎ ጉዳያት፡ መውጽኢ ኣብ ዘይርከቦ በዓትን ንምእታዉ ዝተነጽፈ ወርቃዊ መንጸፍ ይኹን ዝተራሕወ ናይ ኣልማዝ ማዕጾ ኣይተገርሃሉን። ንዘወናውን ድምጽን መቓልሕን መራኸቢ ብዙሃን’ውን ኣይሰድዓሉን። ምኽንያቱ፡ ደድሕሪ ንፋስ ምጉያይ ከንቱነት ምዃኑ ኣጻዕድዩ ክፈልጥ ታሪኹ ስለ ዝመሃሮ። ክንዮኡ’ውን፡ እቲ ቀጻልን ብዘይዕረፍትን ኣንጻር መሰለቱ ዝካየደ ዝነበረን ዘሎን ናይ ምድዋን ዘመተ ይኹን መሀውተትን መደንቆርን ዛዕባታትን ልዕሊ ዓቐኑ ሚዛን ኣይሃቦን። ዕርፊ ሓቂ ኣጽኒዑ፡ ናይ ውሽጥን ናይ ግዳምን መደባት ስርሑ መምስመድረኹ ክገጥም ምእንቲ ሓይሉ ከዋህልል ጥራይ እዩ መሪጹ። ከምኡ ክንዲ ዝሰርሐ ከኣ፡ ነቲ “ሓሶት እንተተደጋገመ ሓቂ ይቕየር እዩ” ዝብል ዝመኸነ ዘርኢ ሓሳብ ከበርዕኖ ዘይተጸገመ።
ሓደ ተዓጽዩ ካልእ ዝኽፈት ኣንፊ ማዕበላዊ ተጻብኦታት ግን ብዝተዓጻጸፈ ቁጽርን ዓይነትን ክሳብ እዚ እዋን እዚ ክቕጽል ተራእዩን ዝቕጽልን ዘሎ። ሎሚ ከም ትማሊ ከኣ ዘይንቕነቕ እምባ ፈጢሩ ንኹሉ እቲ ቃፍላይ ተጻብኦ ተገቲሩን ብጥበብን ገጢምዎ። ክልተ ሓይሊ ተራጺሙ። ሓይሊ መንግስቲ ኤርትራ ብዕጽፍታት ተራቢሑ፡ ጭንቅት ተጻባእቲ ሓይልታት ድማ ብእኡ መጠን ሰማይ ዓሪጉ ይርከብ። ዕላምኡን ሽቶን እዚ ተጻባኢ ሓይሊ ካብ 1941 እዩ ዝጅምር።
ካብ ዓበይቲ ስትራተጂያዊ ኣጀንዳታት ምዕራባዊ ሓይሊ ንኹሉ ዝጭበጥን ዘይጭበጥን ጸጋታት ዓለም ክግብትዎን ክብሕትዎን ምዃኑ ዝተፈልጠ ሓቂ እዩ። ንቕሓት ሕብረተሰብ ዓለም ናብ ነገራዊ ሓይሊ ኣብ ዝቐየረሉ ዘሎ መድረኽ ከኣ እዚ ሓሳባት ናብ እንዳ ጐሓፍ ቀሪቡ ንምባል ዘድፍር ኣይኮነን። ምኽንያቱ፡ ንዕኡ ዝዕብልል ሰፊሕ መደባት ዳግመ ስርርዕ ስለ ዘካይድ። ተክኖሎጂያዊ ምዕባለ ናብ ዝለዓለ ምንጪ ስለያዊ ሓበሬታ ምፍጣር ራዕድን ሕንፍሽፍሽን ከውዕሎ እምበር ናብ ልምዓትን ምዕባለን ክወስዶ ኣይመረጸን።
ድሕሪ ምኽታም ዝሑል ኲናት፡ ማእከል ወኪል ስለያ ኣመሪካ፡ ቁጽሪ ስሩዓትን ወከልትን ኣባላቱን ክንክይን ናብ ካልእ ዓውድን ከውፍርን ዝብል ገርሃዊ ግምት ብዙሓት ሕብረተሰብ ዓለም ከም ዝነበረ ኣይከሓድን። በንጻሩ ክውስኽን ንኹለን እተን ኣቐዲሙ ዝሰርሓለን ዝነበራ ትካላት ከማዕብለንን ክሰስንን ተራእዩ። መልክዕ ናይቲ ስራሕ ከኣ ድሕሪ ሚልየኒም ንማዕከን መራኸቢ ብዙሓን ገዚኡ መወዳእታ ዘይብሎም ኲናት ኣእምሮን ቁጠባዊ ሽርሒን ኣካይዱ። ትኹረቱ ናብ መንእሰያትን ምሁራትን ብምቕናዕ፡ ስምዒታውያን ቀለም ቀመሳትን ግዳያት ክገብር እዩ ተራእዩ። ኤርትራውን ሓንቲ ካብዚ ናይ ከምዚ ሽርሒ ብዝተወደበ መገዲ ኲናት ዝተኻየደላ ሃገር እያ።
ልኡኽን ከዳምን ምዕራባዊ ሓይልታት ክኸውን ብገዛእ ርእሱ ዝተዓስበ ናይ ደቂቕ ፍሩይ ጉጅለ ወያኔ’ውን ብዓቕሙ፡ ትሕቲ ጻዕዳ እግሪ እናኸደ፡ ክዕቅንፍን ክሕንኩልን ዓቕሙ ዝፈቕዶ ኣብ ጽምዶ ከእትዉ ህርድ ኢሉ። ብቐደሙ ንዑቕ ዝኾነ ባህርያትን ተግባራትን ስለ ዝተዓደሎ ትሕቲ ሚዛን ግምት ብምሃብ ትኹረት ናብ ኣሸቀልቱ ጥራይ ኣቕኒዑ- እቲ ሓያል መንግስትን ህዝብን ኤርትራ።
ሰብ ፍሉይ ረብሓ፡ ኣብ ዝሓለፈ ሰማንያ ዓመታት ኣንጻር ህዝቢ ኤርትራ መወዳእታ ዘይብሉ ሽርሒታት ካብ ምፍሓስ ኣየዕረፉን። ዝመልክዎን ዘመሓድርዎን ፖለቲካዊ ጸወታ ምህውታትን ምድንቋርን ከኣ ብርኪ ብርኪ ዝድይብን ገጻት ብገጻት ዝቕጽልን ኣጀንዳታት እዮም ኣቐሚጦም። ፍሽለት ናይዚ ሓይልታት እዚ ብግህዶ ኣብ ዝንጸባረቐሉ ዘሎ መድረኽ ከኣ፡ ሓይሊ ህዝቢ ኤርትራ ምዃኑ ብግሉሕ ይጋሃድ ኣሎ። ስቕታ- ዋልታን ሓይልን መንግስቲ ኤርትራ!
