ዕስራ ሰነ : ክብርቲ መዓልቲ !!
Posted: 17 Jun 2022, 05:26
ዘልኣለማዊ ዝኽርን ሞገስን ንስዋኣትና !!
ስውእቲ ተጋዳሊት ኤልሳ ዮሴፍ (ገዙ) - ትእምርተ ጽንዓትን ተወፋይነትን ኤርትራዊት ጓል-ኣንስተይቲ
(እዚ ጽሑፍ'ዚ ብተጋዳላይ መኮነን ኪዳነ (ሻባይ) Mekonen Kidane ዝተጻሕፈ ኣደናቒ ጽንዓትን ተወፋይነትን ኤርትራውያን ተጋደልቲ ደቂ-ኣንስትዮ የዘንቱ።)
ነዛ ብዛዕባ ብጸይቲ ኤልሳ ዝጸሓፍኩዋ ንእሽቶ ተዘክሮ ዘንበቡ ክልተ ብጾት ደዊሎም ቁሩብ እንዶ ኣስፍሓልና ኢሎምኒ። ኣብ መጽሓፍ እንተዘይኮይኑ ኣብ ማሕበራዊ መራኸቢ ብሰፊሕ ክትጽሕፍ ጥራይ ዘይኮነ ንምንባቡ'ውን ምቹእ ከይከውን ይኽእል እዩ። ብዝኾነ ንተነባብነት እንተዘይጸጊማ ቁሩብ ኣስፍሕ ከብላ።
ብቐዳምነት፡ ብጸይቲ ኣስቴር ተስፋጋብር፡ ንስእሊ ጅግና ስውእቲ ኤልሳ ዮሴፍ (ገዙ)ን ብጻይ ፍስሃየ ወዲ ፖሊስን ዓቂብኪ ምዝርጋሕኪ ዘሐጉስ እዩ። ደጊመ ንዝኽርታተይ ስለ ዝቐስቀስኪ ብስም ኩሎም ህልዋትን ሕሉፋትን ብጾትና አመስግነኪ።
ስውእቲ ብጸይቲ ኤልሳ ዮሴፍ (ገዙ)፡ ፈለማ ኣባል ብርጌድ 23፡ ኣብዚ ታሪኹ ንዝክሮ ዘለና እዋን ድማ ኣባል ክፍለ ሰራዊት 70 ቦጦሎኒ 46፡ ካልኣይቲ ሓይሊ፡ ካልኣይቲ ጋንታ ኣጋር ከቢድ ብረት'ያ ነይራ።
ነቶም ንኣሽቱ ደቅና፡ ኣጋር ከቢድ ብረት ዝበሃል፡ ካብ ረሻሻት ዶሽካ፡ ብራውን፡ 14.5 ረሻሽ፡ ካብ መዳፍዕ 57 ሚ.ሜ.፡ ቢቴን 75 ሚ.ሜ.፡ ቢቴን 82 ሚ.ሜ.፡ ካብ ሃውናት ድማ፡ ሞርታር 60 ሚ.ሜ.፡ ሞርታር 81 ሚ.ሜ.፡ ሞርታር 82 ሚ.ሜ.፡ሞርታር 120 ሚ.ሜ.፡ ነጥብ ኣራት ዝኣመሰሉ ብመንኩብ ሰብ ተጸይሮም ዝንቀሳቐሱ ከበድቲ ብረታት ዓጢቑ ዝዋጋእ ኮይኑ፡ ኣብ ልዕሊኡ ድማ፡ ከም ኩሉ ኣጋር ተዋጋኢ ሓይልታት ካላሽን፡ ብሬን፡ ኣርፒጂ፡ ቦምባ ዓጢቑ ዝዋጋእ ኣሃዱ እዩ፡፡
ስውእቲ ብጸይቲ ኤልሳ ዮሴፍ፡ ሓንቲ ካብቶም ብሉጻት መድፍዓጂታት ሞርታር ናይ ኣሃዱና እያ ነይራ። ብጀካ እቲ ጓለንስተይቲ መድፍዓጂ ሃውን ምንባራ፡ ብሰንኪ ተኹሲ ከበሮ እዝና ተቐዲዱ፡ ብሓገዝ ear phone ትንቀሳቐስ ምንባራ ፍልይ ካብ ዘብላ ረቛሒ እዩ። ምስ ኩሉ ጸገማ ካብ ድፋዕ ከይወረደት ተጋዲላ። ከምኡ ኢላ ከላ እያ ድማ ሃውና ትሽምሽሞን ብካላሽንን ቦምባ ኢድን ትደራገምን ዝነበረት ጅግና እያ።
ነዛ ስእሊ ምስ ረኣኹዋ፡ ንሓንቲ ካብ ሕድሮታትና ምስ ብጸይቲ ኤልሳ ዮሴፍ (ገዙ) ኣዘኻኪራትኒ። ኣብ ወራር ባሕረ ነጋሽ፡ ጥቅምቲ 1985 እዩ።
ልክዕ ንምዃን ዕለት 10 ጥቅምቲ 1985፡ ደብዓት - ፓሪስ ጠልጠል፡፡ ስርዓት 8፡30። ክልተ ኣንተኖቭ ዝዓይነተን ነፈርቲ ብልዕሌና ናብ ሰሜናዊ ምብራቕ ሳሕል ገጸን ሓሊፈን። ሰራዊት ኣውሪደን ቀዲመናና ድፋዓትና ክሕዝኦ ይጓየያ ምህላወን ፍሉጥ'ዩ ነይሩ። እንተቐዲመናና፡ ንምውጽአን ዝኽፈል ዋጋ ከቢድ ምዃኑ ኣጸቢቑ ስለ ዝርዳኣና ቀልጢፍና ክንከይድ ተሃንጠና።
ጀነራላት ደርግ፡ እቲ ኣብ ውግእ ባረንቱ ንተጋደልቲ ህ.ግ. ንምድምሳስ ዝወጠኑዎ ወፍሪ፡ ውድብ ህ.ግ. ብምዝላቕ ምስ ኣፍሸሎ፡ ብባሕረ ነጋሽ ዝፍለጥ ወራር እዮም ኣበጊሶም። ሓደ ካብቲ ሓደገኛ መደቦም ድማ፡ በቲ ቅድሚ ዓመትን መንፈቕን ንውቃው ዝተባህለ ደርማስ እ'ዞም ኣብ ጎላጉል ማህሚመት፡ ኣውገትን ክራይን ጥሒንና፡ ዝቕተል ቀቲልና ዝማረኽ ብምምራኽ፡ ብዘይካ ውሑዳት ፋሕ ፋሕ ኢሎም ንማርሳ ጉልቡብ ገጾም ዝሃደሙ፡ ደምሲስና ናብ ባሕሪ ዘጥሓልናሉ፡ ሰብ ዘይነበሮ ግንባር ሰሜናዊ ምብራቕ ሳሕል ተመኹልዮም ንምግራህና እዩ።
እዚ ሓደገኛ ውጥን'ዚ እንተሰሊጡዎም ብቐሊሉ ንደጀንና ክቈጻጸሩ ጸገም የብሎምን። ብመሬት፡ ብባሕርን ብነፈርትን ድማ ዘይተኣደነ መዳፍዕ፡ ታንክታትን ረሻሻትን ዝዓጠቐ ሰራዊት ናብ ግንባር ሰሜናዊ ምብራቕ ሳሕል ኣውሓዙ።
ሓደ ካብቶም ነቲ ወራር ዓጊትካ ንምፍሻሉ ዝተጓየዩ ኣሃዱታት፡ ብብርጌዳት 23 ን 44 ዝቖመ ክፍለሰራዊትና 70 እዩ ዝነበረ። እቲ ግንባር፡ ንነዊሕ ዓመታት ዝዓረድናሉ ግንባርና ብምንባሩ ዳርጋ ኩሉ ተጋዳላይ ናይቲ ክፍለ ሰራዊት ነቲ ቦታ ከም ኣጻብዕቲ ኢዱ እዩ ዝፈልጦ፡፡ ኣብ ኩናት ቀዲሙ ቦታ ዝሓዘ ስለ ዘድምዕ ዝሓዝካ ሒዝካ ኣርክብ ኮይኑ።
ኣብቲ ሳልስቲ፡ ብጸይቲ ኤልሳ ምጉሊ ኣንጭዋ ኣብ ረቃቒቶኣ ወጺኣታ ብቓንዛ ክትልሎ'ያ ቀንያ፡፡ ፈውሲ ረኽሲ መድሃኒት ብመርፍእ ጀሚረላ ነይረ። ነታ ቁስሊ ድማ መዓልታዊ ይሕክማ። እንተኾነ ግን ኣብ ጥቓኣ ካልኣይቲ ሕበጥ ገይራ ገዲዳታ፡፡ ረኽሲ ኣይተመሓየሸን፡፡ ክትሓዊ እንተወሓደ ሓደ ሰሙን የድልያ ነይሩ። ናብ ሕክምና ቦጦሎኒ ክትከይድ እናሓሰብኩ'ዩ ጉያ ንኩናት ኮይኑ፡፡ እታ ዝተበገስናላ ንጉሆ ክሕክማ ከለኹ፡ ኣብ ጉዕዞ ስለ ዝሓደርና፡ ክልቲኡ ሰለፋታ እናተፋሓፍሐ ተጎዲኣ በሻዕሻዕ ኢላ ጸኒሓትኒ። ብቓንዛ ምቕራብ ከሊኣትኒ። ክትጽመም ነይሩዋ። ሓኪመ ምስ ጀነንኩላ ፈውሲ ረኽሲን ፈውሲ ቃንዛን መራፍእ ወጊአያ። ወዲአ ኣቕሑተይ እናጠራነፍኩ "ሻባይ ሞጎስ ደኣ ዘይትሕግዘኒ" ኢላትኒ። ንሞዴስ ዘውጻእናሉ ሳጓ እዩ። ነዋልድና ባህርያዊ ጸገመን ስለ ዝርዳኣና ካብ ዘለዋና ባንደጅ ንሕግዘን ኢና። ክልተ ዕኹላላት ባንደጅ ሂበያ፡፡ በቲ ዓዳይ ክውል ኢላ ከም ዝጥዕማ ገይራ ተመሊሳ። ዕጥቃ ዓጢቓ ነብሳ ንኩናት ድልውቲ ገበረታ፡፡ ሽዑ ንሽዑ ድርብ ጸገም ከም ዘለዋን ኣብ ጉዕዞ ክጽግማ ምዃኑን ንብጻይ ዓብለል ረዘነ (ስዉእ) መራሒ ጋንታና ሓቢረዮ። ስለ ሓበሬታ'ምበር ግንባር ምሉእ ንቕይር ስለ ዝነበርና ምርጫ ኣይነበረናን። ኣብቲ ንኸዶ ቦታ ከም ኩነታቱ ክንሕግዛ ተረዳዲእና። ኣብ ምጥርናፍ ንብረትናን ምምስሳልናን ኣቲና።
ኣነን ኤልሳ (ገዙ)ን ዝነበርናያ ካልኣይቲ ሓይሊ ብቐትሪ ኢና ካብ ደብዓት ተበጊስና። ነታ ክትወስደና ዝመጸት ማጅሩስ ዝዓይነታ መኪና፡ ዓበይቲ ዓዳያት ብምቑራጽ ኩሉ ነብሳ ሽፊንና ኣመሳሰልናያ። ኣብ ዝባና ክንድይብ ከለና'ውን ነፍሲ ወከፍና ቁራጽ ዓዳይ ሒዝና ብምድያብ ኣብ ልዕሊ ኣራእስና ሰቒልና ካብ ርእየት ነፈርቲ ውግእ ደርግ ተመሳሰልና። ንሕና ይኹን እታ መኪና ዓቢ ገረብ ኢና መሲልና።
እቲ ዓዳይ ካብ ርእየት ነፈርቲ ጥራይ ዘይኮነ ካብታ ኣቃጻሊት ጸሓይ ሰሜናዊ ምብራቕ ሳሕል'ውን ጽላል ኮነና። እንተኾነ ግን እተን ብጽርግያታት ሰሜናዊ ምብራቕ ሳሕል ንዝንቀሳቐስ ተጋዳላይ ንምድምሳስ ትሒተን በብድርብ ዝውንጨፋ ዝነበራ ሚጋትሲ ኣይመሓራናን፡፡ ኣብ ጽርግያ ደሮና እናገደፈ ዝንቀሳቐስ ገረብ ዘይኮነስ ተጋደልቲ ዝጸዓነት መኪና ምንባራ ፈሊጠን ፋክረሳት ኣዝነባልና። ዝዘርየልና ጸረ ነፈርቲ ረሻሽ ኣይነበረን። ሓንሳብ ብቕጽበት ወሪድና ፋሕ ብምባል፡ ሓንሳብ ብጽዑናትና ካብ ጽርግያ ብምእላይ ሽክዕ ተተሓሓዝናዮ፡፡ ደው ምባል ግን የለን። ነፈርቲ ቦምባ ክጽዕና ወይ ናብ ካልእ ቦታ ክድብድባ ግልል ክብላ ከለዋ ምቕጻል'ዩ። ናይ ሞትን ሕየትን ጉዕዞ! ብዕድል ድማ ዝሃረማልና ሰብ ይኹን ንብረት ኣይነበረን። መሬት ብብርሃኑ ኣብቶም ጽኑዓት ድፋዓትና በጺሕና።
ኣብቲ ኣባላት ክፍሊ ታዕሊምን ኣብቲ ከባቢ ዝነበሩ ካልኦት ክፍልታትን ተኣኻኺቦም ብገለ ሸነኹ ዘጻንሑዎ ግንባር ሰሜናዊ ምብራቕ ሳሕል፡ ቅድሜና ዝበጽሓ ገለ ቦጦሎኒታት ናይ ክፍለ ሰራዊትና ምስቲ ህንዱድ ሰራዊት እናተቐዳደማ ካብን ናብን ድፋዓት እናተወናጨፋ ክቋሻመዳ'የን ጸኒሐናና። ንሓያለይ ክፋል ካብ ዕርድታትና ድማ ከየድፈርኦ ጸኒሐን፡፡
ብዛዕባ'ቲ ውግእ ብሰፊሑ ኣብዚ ክለዓል ኣጸጋሚ እዩ። ዕድመን ጥዕናን ይሃበና፡ ንምጽሓፉ ዝጀማመርናዮ ስራሕ ኣሎ። ንመፈጸምታኡ የብቃዓና፡፡ እዛ ስእሊ ስውእቲ ብጸይቲ ኤልሳ ዮሴፍ (ገዙ) ዝቐስቀሰቶ ተዘክሮይ ብጥማዕ'የ ከካፍለኩም ሓሲበ።
ኣብቲ መግሃር ኩናት፡ ሓይልና ካብ ደብረ እበን ክሳብ ሽግለት ዘሎ ድፋዓት ኢና ዓሪድና። ከየዕረፍና ድማ፡ ብዘይካ መድፋዓጂታት ዶሽካን ሞርታራትን ኩላ ከም ኣጋር ሓይልታት፡ ኣብ ምብርዓን ህጁማት ጸላኢን ህልኽ መልሰ-መጥቃዕትን ተጸመድና። ኣብ ሓድሕድካ ክትረዳዳኣሉ ዘየገላብጥ ሓዊ ኩናት!
ኣብቲ ኩናት ገዙ ምንቅስቓስ ጸጊሙዋ ብቓንዛ ተለለወት። እናተቐንዘወት ክትዋጋእ ሓዲራ። ካብ ቃንዛ ንላዕሊ ግን እቲ ቁስሊ ምስቲ ሓደ ሰለፋ እናተላገበ ምንቅስቓስ ከልኣ። ኩናት ዝግ ክብል ከሎ ክሹኽ ክትዕጠቕ ጀሚራ። ክውል ኢላ ትቑንዞ። ፈውሲ ቃንዛ ወጊአያ ኣይጠቐማን። ኣብቲ ጁባታት ናይ ድፋዕና የዕርፊ ኢለያ ኣብያ። ንጋንታና ጸገማ ከይነግረላ ተማሕጺናትኒ።
ኣብ ካልኣይ መዓልቲ ናይቲ ውግእ ክልተ ሞርታር ስለ ዝመጻና ኣነን ገዙን ሓሓዴና ክንሕዘን ተመዲብና። ብዕድል ምሳይ ምምዳባ ተሓጉሳ፡፡ ኣብ ከምዚ ናይ ድርብራብ ጸገማታ እዋን ሓኪም ጥቓኣ ክህሉ ቀሊል ስለ ዘይነበረ። እንተኾነ ግን ቃንዛ መሊሱ ገደዳ። ከመይ ኣለኺ እንተበልኩዋ እቲ ረኽሲ ናብ ብልዕታ ገጹ ይልሕም ከም ዝነበረን እምብዛ ከም ዝበርትዓን ነጊራትኒ። ካልእ ይትረፍ ጽርየታ ትሕልወሉ ማይ'ውን ኣይነበረናን። ብራሾኣ ወዲኣታ ስለ ዝነበረት ብራሾይ ካብ ዕጥቀይ ኣውጺአ ክትሕጸበላ ሂበያ።
ከም ሓኪም ናይቲ ኣሃዱ ክውስን ነይሩኒ። ምስ መራሕቲ ጋንታታትና ስዉእ ዓብለል ረዘነን ብጻይ ዘርእዝጊ ዳዊት (ገናውኖ)ን ናብ ርእሲ'ቲ ከረው ኣቢሉ ሒዙዋ ዘሎ ቁስላ፡ ወርሓዊ ጽግያት'ውን ተደሪቡ ቃንዛ፡ ድኻምን ርኡይ ናይ ምንቅስቓስ ጸገምን ስለ ዘለዋ፡ ናብ ሕክምና ቦጦሎኒ ክትከይድ ከም ዘለዋ ተረዳዲእና። እንተኾነ ግን፡ "ጋንታይ ኣብ መግሃር ውግእ ተጸሚዳ ከላ ኣነ ሓሚመ ኢለ ካብ ድፋዕ ክወርድ ሕልሚ እዩ" ኢላ ኣቕቢጻትና። ንዓይሞ "ሕጂ ናብ ሕክምና ትብል ቃል ከይትደግመለይ" ኢላ ኮርያትለይ። ኣወሃሃዲ ናይተን ምሳኣ ሒዝናየን ዝነበርና ክልተ ሞርታራት ወዲ ሃይለ (ስዉእ) ምስ ነገርኩዎ'ውን ናብ ሕክምና ቦጦሎኒ ክትብገስ ነጊሩዋ። "ዋላ ሓንቲ ጸገም የብለይን" ኢላ ኣብያቶ፡ ደሓር ንዓይ ንምንታይ ትነግረለይ ኢላ ተቛይቛትኒ። ክሹኽ ተዓጢቓ ኣብ መንጎ እናተቐንዘወት ተኹሳ ቀጺላቶ።
ናብ ዕለት 15 ዘውግሐት ለይቲ፡ ጸላኢ ብምሉኡ ግንባር ሰሜናዊ ምብራቕ ሳሕል ብሓፈሻ፡ ብሩባ ኣልጌንን ደብረ እበንን ድማ ብፍላይ ፈንጢሱና ክሓልፍ ዝተሃንደደላ መራር ናይ ኢድ ብኢድ ውግእ ለይቲ'ያ ነይራ።
ተጸጊዐናና ዝነበራ ወተሃደራት እምብዛ ብዙሓት ብምንባረን እታ ለይቲ ጽልልቲ ምዃና ፍሉጥ'ዩ ነይሩ። ሓንቲ ወዲ ኣቤል ዝተባህለ ብጻይ ዝመርሓ ኣርቢጂ ዝዓጠቐት መስርዕ ድማ ንሓገዝ ተደሪባትና። ድሕሪ ፍርቂ ለይቲ ጽዑቕ ህጁማት ጀሚረናና። ተሓናነቕ ኮይኑ።
ኣብታ ለይቲ፡ ናይተን ኣነን ገዙን ሓሓዴና ሒዝናየን ዝነበርና ሞርታራት ቦምባታት ኩሉ ቀልጢፍና ስለ ዝወዳእናዮ፡ ብቐንዱ'ውን ሕውስውስ ምስ ኮነ፡ ምስ ኣወሃሃዲና ወዲ ሃይለን ቦምባ ዘዳልወልና ዝነበረ መርሃዊን ብጉያ ናብታ ብትሕዞ ትጠማጠም ዝነበረት ጋንታና ተሓዊስና ብቦምባታት ኢድን ጠያይቲን ተረጋረግና። ናይ ለይቲ ኩናት ዝፈተኖ ጥራሕ'ዩ ዝፈልጦ። በቲ ግብ ዝበለ ጸልማት ብጻይካን ጸላኢኻን ምፍላይ እምብዛ ከቢድ'ዩ። ነንሓድሕድካ ምትህርራም ካብቲ ዝኸፍአ ሸነኹ እዩ። ዓይንኻ ብነዊሕ ዘይትርእየሉ፡ ብኣንፈት ተኹሲ ጥራሕ መኣዝንካ ትፈልጠሉ ግናይ እዩ። ምሉእ ለይቲ ተሓናነቕ ኮይኑ፡፡ ኣብ ወጋሕታ ነተን ገለ ክፋል ድፋዓትና ተቘጻጺረን ዝነበራ ወተሃደራት ደርግ ኣውጺእና ንቑልቁል ኣጽዲፍናየን። ገለ ካብኣተን ግን ኣብቲ ካናለታትና ተሪፈን ብኹሊትና እናሃረማ ብተኹሲ ምቕራብ ከልኣና። ካብቲ ናይ ቅድሚት ጽዑቕ ተኹሲ እቲ ናይ ጎኒ ውሑድ ተኹሲ ከፊኡና። ነንሓድሕድና ክንተሓጋገዝ፡ ውጉኣትና ክንውግን ጸጊሙና።
ኣይደንጎየን፡ መራሒ ጋንታና ብጻይ ዘርእዝጊ ዳዊት (ገናውኖ) ቀልጢፍና ካብ ካናለታትና ከነውጽአን ህጹጽ ትእዛዝ ኣመሓላለፈ። ኤልሳ ዘላቶም ጉጅለ ከኣ ንህጁም ተዳለው። ብዘለና ብረታት ጉልባብ እናገበርናሎም ብጉያ ዘዘሊሎም ኣብቲ ካናለታት ተደቕደቑ። ብቦምባታት ኢድን ጠያይቲን ድማ ብትሕዞ ተሳሃሉወን። እተን ምንቅስቓስ ከሊአናና ዝሓደራ ወተሃደራት ዝቕተል ተቐቲሉ ዝሃድም ንገደሉ ጸደፈ። ተኸስተ ላምፐንን ኤልሳ (ገዙ)ን ድማ ኣብታ ህጁም ክልቲኦም ኣብ ከብዶም ተወጊኦም ወደቑ። ጎቲትና ናብ ከውሊ ኣጸጊዕናዮም፡፡
ተቐልቂሉ ዝነበረ መዓናጡኦም ብዝነበረኒ ፋሻታት ጀኒነ ቀዳማይ ረዲኤት ገበርኩሎም። እምብዛ ጸልማት ስለ ዝነበረ መውጋእቶም ባዕላቶም ብዝሕብሩኻን ብኢድካ ዳህሲስካን እምበር፡ ብዓይንኻ ምርኣዩ ኣጸጋሚ እዩ፡፡ "ገዙ ካልእ ኣለኪ ድዩ ማህረምቲ?" ምስ በልኩዋ "እንድዒ ክሳብ እግረይ እንድዩ'ሞ ደም ጨቅዩ ክፈልዮ ኣይከኣልኩን" ኢላትኒ። ብኢደይ ክድህስሳ ከለኹ ናይ ሰለፋ ቀናዪ ቁስሊ ጎዲአያ "ሃይ!" ኢላ ተቐንዝያ። "ደሓን እቲ ናይ እግርኺ ደም ብጻይ ሞጎስ ሓለዋ ኣቋሪጹ ስለ ዘሎ እዩ" ኢለያ። "ኣርኪብካ ከኣ ንስኻ!" ኢላትኒ እናተቐንዘወት። ነቶም ውጉኣት ኣብቲ ናይ ድሕሪት ጁባታት የእቲና ውግእና ቀጸልና። መሬት ብርህ ክብል ከሎ ድማ፡ ንጸላኢ ጠቕሊልና ጸራረግና ንድፋዓትና ምሉእ ብምሉእ ተቘጻጸርናዮ።
ኣብታ ለይቲ ካብ ጋንታና፡ ወዲ ታፍላ፡ ወዲ ወዲ ሃይለን ናይታ ክትሕግዘና ዝመጸት መስርዕ መራሒ ወዲ ኣቤል ዝርከቦም ክልተ ብጾትን ብጠቕላላ ሓሙሽተ ብሉጻት ብጾት ከፊልና። ገዙ፡ ተኸስተ ላምፐን፡ ሃብታይ፡ ወዲ ኮማንድስ፡ ወዲ ሰጊድን ኣነን ድማ ተወጊእና፡ ወዲ መለስ ብተኹሲ እዝኑ ጸሚሙ።
መሬት ምስ በርሀ ስውኣትና ተቐቢሮም፡ እቶም ውጉኣት ከኣ ናብ ሕክምናታት ዓምበርበብን ዓራርብን ኬድና። ምስቶም ብድሮ ተወጊኦም ዝጐደሉና ፍረወይኒን ዓብለልን ጋንታና ዳርጋ ተፋሪቓ እያ፡፡ ኣብ ክልቲኡ ገጻት ናይቲ ወራር ንጸላኢ፡ ምስቲ ኩሉ ብዝሑን ኣጽዋሩን ረጊጹና ክሓልፍ ኣየፍቀድናሉን። ከም ሕሱም ኣርጊፍናዮ፡፡ ድፋዓትና ገጥ ኣቢልና ደጀንና ኣውሒስናዮ።
እዛ ስእሊ ንብጸይቲ ኤልሳ (ገዙ) ነቲ ኣብቲ ጽንኩር እዋን ዘጋጠማ መኻልፍ ናይ ጥዕና ጸገም፡ መሪር ቃንዛኣ፡ ተደራቢ ወርሓዊ ጽግያት ዝፈጠሮ ድኻማ፡ ጽንዓታን መውጋእታን ኮታ ድምር ብድሆታትያ ኣዘኻኺራትኒ፡፡ ኣውራ ከኣ ንኹሉ ጸይራ፡ ንሕክምና ኣይወርድን እየ ኢላ እናተቐንዘወት ክትዋግኦ ዝቐነየት።
ብዓቢኡ ድማ፡ ጽንዓት ጋንታናን ክጥሕረና ዝህንደድ ዝነበረ ሓይሊ ጸላኢን መኸተናን፡ ድፋዓትና፡ ስዉኣትና ኮታ ኩሉ ተራእዩኒ።
ብጸይቲ ኤልሳ ዮሴፍ፡ ኣብ ድሕሪ ናጽነት፡ ብሕማም ተሰዊኣ። ታሪኻ ግን ህያው እዩ።
ዘልኣለማዊ ዝኽሪ ንሰማእታትና!
መኮነን ኪዳነ (ሻባይ)
03 ሰነ 2019
ሚላኖ
