GENERAL
On Aug 14, 2021
Share
ዝኸበርክንን ዝኸበርኩምን ተመረቕቲ 34 ዙርያን 12 ዙርያ ማሞስን፡
ዝኸበርክንን ዝኸበርኩምን ወለድን ኣለይትን ሳዋ ምስ ዕዱማት፡
ፈለማ ንኹሎም ተመረቕትን ወለድን ዮሃን እንቋዕ ሓጎሰኩም!
ንኣለይትን መምህራንን ሳዋ ከኣ ልዑል ምስጋና!
34 ዙርያ ካብ ዝሓለፉ ዙርያታት ናታ ፍሉይ ሕላገትን ዝኽርታትን ዘለዋ ዙርያ’ያ። ኣብ ዓለም ዝተኸስተ ለበዳ ኮሮና ብዘይካ’ቲ ዘኸተሎን ገና ዘኸትሎ ዘሎን ህልቂት፡ ንደቂ-ሰብ ናይ ተበራበር ደሃይ ይህብ። ንብዙሓት ብሰብ ፍሉይ ረብሓ ዝጋውሑ ወይ ክጋውሑ ዝጸንሑ፡ ከም ንቡር ዝተወስዱ ዘይንቡራት ኣምራትን ክብርታትን ናይ ሓዊ ፈተነ’ዩ ነይሩ። ካብኡ ዝውሰድ ትምህርቲ ከኣ ዕቱብ ምርምርን መጽናዕትን መአረምታን ዝሓትት’ዩ። ብተመሰሳሳሊ፡ ምስ ለበዳ ኮሮና ብሃነፍነፍ ክዓኑ ዝጸንሐ ባህርን ጸጋታቱን ኣብ ክሊማዊ ገልበጥበጥ ኣስዒብዎ ዘሎ ክሊማዊ ሃስያ’ውን ተወሳኺ ደሃይ ተበራበር’ዩ።
ለበዳ ኮሮና ብተዛማዲ ምስ ኣብ ጎዶቦናን ዓለምን ዝጥቀሱ ኣሃዛት ቅዝፈት ንእሽቶ’ዩ ክበሃል ዝከኣል’ኳ እንተኾነ ዝንዓቕ ግን ኣይነበረን። ምስ ኩሉ ጸጋ ሰብና ንምስሳን ብድሩት ዓቕሚታት ሓዀት እንብለሉ መደባት ትምህርቲ፡ ብሰበብ ለበዳ ኮሮና ዝወረደ ዕንቅፋትን ምጉታትን ሃስያን ግን ዝኸበደን ዘተሓሳሳብን’ዩ ነይሩ።
ኣብ ውሽጢ ለበዳ ኮሮናን ህዉጽ ክሊማን ዝተኸስተ ጩራ ወይ ጸርጊ ሰላምን ምስ ኩሉ ንወለዶ ምሉእ ዘርኣናዮ ትዕግስትን ጻዕሪን፡ ብኣሸቀልቲ ወያነ ዝተኣወጀ ኲናትን ዝተፈነወ ዓንዳሪ መጥቃዕትን ዳርባ ሚሳይላትን፡ ካልእ ደሃይ ተበራበር’ዩ።
ናይ ርእሰ ምክልኻል ሕጋውን ሕልናውን መሰልና ንኸይንጥቀም ንምስንባድና ዝተኻየደ ወይ ዝካየድ ሕሱር ኣሰይጣኒ ደዋኒ ፕሮፖጋንዳ ሓሶት‘ውን፡ ካብቲ ገበን ዝያዳ ዘስደምም’ዩ ነይሩ።
ካብ ደሃይ ተበራበር ለበዳ ኮሮናን ክሊማዊ ነውጺን ዓንዳሪ ተጻብኦን ዳግም ዝተረጋገጸልና ትምህርቲ ሃገራዊ ኣገልግሎት ብሩህ’ዩ። ርግኣትን ሰላምን ኮነ ራህዋን ጣዕሚን ዝስራሕን ዝስራሓሉን እምበር ሎተርያ ኣይኮነን።
ድሕሪ ናይ ፍርቂ ዘመን ዓሎቕን ኲናትን ዕንወትን ካብ 1941 ክሳብ 1991፡ ምስ ድሩት ጸጋታትን ዕድላትን ቀጻሊ ተጻብኦታትን ሓርነትናን ልኡላውነትናን ሓሊና ናጻ ሃገር ክንሃንጽ ዝተበገስናሉ ጉዕዞን ዝተኸተልናዮ ሕንጻጽን ህያው ምስክር’ዩ።
ብኣጋጣሚ 34 ዙርያን 12 ዙርያ ማሞስን ምስ ፍሉይ ሕላገታቱ ንቐጻሊ ምረሻና ዝህልዉና ሓበርቲ ክብርታት ወትሩ ከይተዛነና ትኩራትን ድሉዋትን፡ ቅድሚን ልዕሊ ኩሉን ከኣ ከይተሓለልና ዓየይትን ኣፍረይትን ምዃን’ዩ።
ንኮሮናን ካልኦት ለበዳታትን ብዝበለጸ ንምምካት፡ ጥዕናዊ ናይ ምክልኻል ብቕዓትና ምሕያል፣ ክሊማዊ ሃውጺ ንምምካት ዝቐየስናዮ ናይ ማይ ፕሮግራማትና ዓጸፋ ምስፋሕ፣ ብሰበብ ለበዳ ኮሮና ተመዛቢሉ ዝበዀረ ትምህርታዊ መደባትና ኮነ ዝተኸስረ ዕድል ንምምላስ፡ ዓይነታዊ ክለሳን ምትዕርራይን ምግባር’ዩ።
ን34 ዙርያ ሃገራዊ ኣገልግሎትን 12 ዙርያ ማሞስን ደጊመ ዮሃና እናበልኩ፡ ፍልጠትን ክእለትን ተመኩሮ ንምድላብ ብዘይ ምዝናይ ጸዓሩ።
ሓበንን ክብርን ንሰማእታትና
ዓወት ንሓፋሽ፡
