Read his bio at BBC https://www.bbc.com/tigrinya/news-49280929
ብ1989 ዓ.ም "ግዳይ" ዝብል ኣርእስቲ ዘለዋ ልበ ወለድ መጽሓፍ ደሪሱ ኣሰናዲእዋ። ደሓር ድሕሪ ክንደይ ሕልኽልኽ ብ1997 ዓ.ም ተሓቲማ ናብ ህዝቢ ቀሪባ።
ደራሲን ጋዜጠኛን ቢንያም፡ ብ1996 ዓ.ም "ኣጣይሱኒ" ብምባል ካብ ገድሊ ብዕሊ ወጺኡ ሰቪላዊ ህይወት ጀመረ።
ብድሕሪኡ ምሉእ ግዜኡ ኣብ መጽሓፍቲ ምጽሓፍን ምትርጓምን ከሕልፎ ወሲኑ፡ እቲ መንገዲ ግን ጥጡሕ ኣይነበረን።
እንተዘይጽሒፉ ክነብር ዘይኽእል ቢንያም፡ ብ1997 ዓ.ም ኣብ ውልቃዊ ጋዜጣ ሌላ፡ ኣሰናዳኢ ኰይኑ ድማ ክሰርሕ ተቘጺሩ። ንዝተወሰነ እዋን ኣብታ ጋዜጣ ሰሪሑ።
ብድሕሪኡ እታ ጋዜጣ ስለዘይቀጸለት ንሱ ድማ ናብ ስነ ጽሑፋዊ ህይወቱ ተመሊሱ ኣተወ።
ግዜ እናተቐያየረ ከደ፡ 1998 ዓ.ም መንግስታት ኢትዮጵያን ኤርትራን ስለዝተጓነጹ፡ ጻውዒት ክተት ተቐቢሉ ተመሊሱ ናብ ባህላዊ ጉዳያት ህግደፍ ኣትዩ ስራሕ ቀጸለ።
ኣብቲ እዋን ዝተመስረተ ኣብ ዓመታዊ ውድድራት ስነ ጥበብን ስልማትን ዘድሀበ 'ራይሞክ' ንዝተብሃለ ትካል ሓላፊ ቤት ጽሕፈት ብምዃን ተመዚዙ ክሳብ 2001 ዓ.ም ድማ ኣገልጊሉ።
ሃገራዊ ግቡኡ ምስ ፈጸመ፡ ብድሕሪኡ ናብቲ ድቃስ ዝኸልኦ ፍቕሪ ስነ ጽሑፍ ድማ ተመሊሱ፡ ብ2002 ዓ.ም "መን ይፈልጥ" ዝብል ኣርእስቲ ዘለዋ ተኸታታሊት ፊልም ጽሒፉ፤ ኣብ ኤሬ-ቲቪ ናብ ህዝቢ ቀረበት።
ደራሲ ቢንያም ዮሴፍ፡ ኣብ ኤርትራ ብፍላይ ኣብ ፊልም ትግርኛ፡ ንፈለማ እዋን ፊልም ኣኒሜሽን ዝተርጐመ ስነ ጥበባዊ እዩ።
ብ2002 ዓ.ም 'ንጉስ ኣንበሳ' ዝብል ኣርእስቲ ዘለዋ ተርጕሙ ኣቕሪቡ።
ብ2004 ዓ.ም ነታ 'ግዳይ' ዝብል ኣርእስቲ ዝሓዘት ልበወለድ መጽሓፉ፡ ናብ 26 ክፋል ተኸታታሊ ፊልም ቴሌቪዥን ቀይሩ ኣሰናዲኡዋ ብ2008 ዓ.ም ናብ ህዝቢ ቀሪባ፤ ብህዝቢ ጽቡቕ ተቐባልነት ድማ ረኺባ።
ነቲ ዝጀመሮ ስራሕቲ ትርጉም ኣጸቢቑ ብምቕጻል፡ ብ2005 ዓ.ም 'ኒሞ' ብዝብል ኣርእስቲ ዝተርጐማ ፊልም ኣኒሜሽን ኣሰናዲኡ ኣቕሪቡ።
ስነ ጥበባዊ ቢንያም ነዚ ኹሉ ስራሕቲ ስነ ጥበብ ክሰርሕ እንከሎ፡ እዚ እዩ ዝበሃል ብዛዕባ ኣጸሓሕፋን ኣተኣላልያን ፊልም ብዕሊ ዝተመሃሮ ኣይነበረን፤ ብልሙድ እዩ ዝጽሕፍን ዝመርሕን ነይሩ።
ብዛዕባ እዚ እንክዛረብ "ተመሊሰ ክርእዮ እንከለኹ ድፍረተይ ዘሰክሕ እዩ። ዝተመሃርክዎ ኰነ ዘንበብክዎ መጽሓፍ ኣሰነዳድኣ ፊልም ኣይነበረን።
ብዛዕባ ፊልም መጽሓፍ ንምንባብ ብ2009 ዓ.ም ኣብ ዓዲ እንግሊዝ ንዝቕመጥ ወዲ ሓትነይ፡ መጽሓፍ ለኣኸለይ ኢለዮ ልኢኹለይ፤ ብዝግባእ ኣንቢበ ንገዛእ ርእሰይ ብፍልጠት ኣዕጢቐ፤ ዓቕሚ እውን ኣጥርየ" ይብል።
ኣሽንኳይ'ዶ መጽሓፍቲ ኣንቢቡን ተወሳኺ ፍልጠት ኣኻዕቢቱን፡ ብቐደሙ እኳስ ነቲ ብተፈጥርኡ ብልግሲ ዝረኸቦ ህያብ ጥበብ ኣማዕሪጉ ዘቕርብ ዝነበረ፤ ድሕሪ ንባብ ብዝበለጸ ምስራሕ ከምዝቐጸለ ይዛረብ።
ብ2011 ሳልሰይቲ ፊልም ኣኒሜሽን ካብ ፈረንሳ ተርጕሙ 'ረሚ ኣንጭዋ' ብዝብል ኣርእስቲ ኣቕሪቡ። ኣብዛ ፊልም ተርጓምን ኣላዪን ብምዃን ሰሪሑ።
ብ2013 ዓ.ም "ወይ ሰብ ደቀይ" ዝብል ኣርእስቲ ዘለዋ ን15 ክፋል ዝቐረበት ተኸታታሊት ፊልም ቴሌቪዥን ናብ ህዝቢ ኣቕሪቡ።
"እዚኣ፡ መጽሓፍ ኣንቢበን ዝያዳ በቒዐን ዝሰራሕክዋን ዝሕጎሰላን ፊልም እያ" ብምባል ፍሽኽታ ኣሰንዩ የውግዕ።
ስራሕቲ ስነ ጥበባዊ ቢንያም ኣዝዮም ብዙሓት እዮም። ኣብ ካቶሊካዊ ሃይማኖት ትሕዝቶ ዘለወን ኣርባዕተ ዓበይቲ መጽሓፍቲን 10 ንቈልዑ ዘገልግላ መጽሓፍቲን እውን ተርጕሙ ናብ ኣገልግሎት ዘብቀዐ ኩለመዳያዊ ዓቕሚ ዝወነነ በዓል ሞያ ኢዩ።
ስነ ጥበባዊ ቢንያም ዮሴፍ፡ ወላ እኳ ምጽሓፍን ምትርጓምን ኣየቋርጽ፤ ድሕሪ 2015 ዓ.ም ግና ናብ ህዝቢ ዘቕረቦ ስራሕ ኣይነበረን። ስራሕቱ ኣብ ልቡ ጥራሕ እንተይኰነስ ኣብ ወረቐት እውን የስፍር ኣሎ።
ኣብ ኢዱ "መላጸ" ዝብል ግዚያዊ ኣርእስቲ ዝሃቦ ጽሑፍ ፊልም ተወዲኡ ንስራሕ ተቐሪቡ ኣሎ።
ፊልም ኣኒሜሽን ድማ ብስፍሓት ይትርጉም'ሎ።
ስነ ጥበባዊ ቢንያም ዮሴፍ "ኣብ ስነ ጥበብ እቲ ዝዓበየ ማሕለኻ 'ኣይትስራሕ' እዩ" ይብል።
ቢንያም ኣቦ ሓንቲ ጓልን ሰለስተ ኣዋዳትን እዩ። ኣብዚ እዋን እዚ ምስ ምሉእ ስድራኡ፡ ኣብ ከተማ መቐለ ይነብር ኣሎ።