18 ሜይ 2020
እዚ ምስ አካፍል Facebook እዚ ምስ አካፍል Messenger እዚ ምስ አካፍል Twitter እዚ ምስ አካፍል ኢ መይል ሓበራዊ ምሃብ
ናይ ምስሊ መግለጺ
ነብስሄር ሽሻይ ኪሮስ
ትማሊ ኣብ ከተማ መቐለ ብልሙድ '05 ማይ ዱባ' ኣብ ዝበሃል ከባቢ ሓደ መንእሰይ ብፖሊስ ተቐቲሉ። ክልተ ድማ ቆሲሎም ኣብ ሆስፒታል ሕክምና እናተገበረሎም ይርከብ። እቲ ኩነታት ከመይ እዩ ተኸሲቱ?
እቶም መናእሰይ ከምዝገልፅዎ፡ ኣስታት 13 ዀይኖም ኣብ ጽላል ከፍ ኢሎም ስዋ እናሰተዩ እንከለዉ ክልተ ፖሊስ ይመፅኡ። እቲ ሓደ ብረት እቲ ካልኣይ ድማ በትሪ ሒዞም ናብቶም መናእሰይ ብምቕራብ "ተልዓሉ ናብ ቤት ፅሕፈት ኮሚኒቲ ፖሊስ ንኺድ" ይብልዎም። ካብኡ ዘይምርድዳእ ይፍጠር።
[ብመሰረት ኮሮናቫይረስ ንምክልኻል ዝወፀአ መምርሒ ስዋ ኣብ እንዳ መሸታ ምስታይ ኣይፍቀድን። ገዚእኻ ብምውሳድ ግን ምስታይ ይከኣል እዩ።]
ካብ መንጐ ኣብቲ ቦታ ዝነበሩ መናእሰይ ንቶም ሰለስተ ቢቢሲ ኣዘራሪብዎም ኣሎ።
ዮናስ ተፈራ ከምዚ ይብል። "ሰንበት ስለዝነበረ ኣብ ገዛውትና ኣብታ ወትሩ ኮፍ ንብለላን ስፖርት ንሰርሐላ እግሪ ፅላል ኮፍ ኢልና ስዋ ንሰቲ ነበርና። ኣብ ቀረባ እዋን ናብ ቀጠና ራህዋ ተመዲቡ ዝመፅአ ፖሊስ ምስ መሳርሕቱ ይመፅእ። ንሱ በትሪ እቲ ካልኣዩ ድማ ብረት ሒዞም ነይሮም። ተለዓሉ! ናብ ቤት ፅሕፈት ኮሚኒቲ ፖሊስ ንኺድ ይብለና። በል ፅቡቕ እተን ንሰትየን ዘለና ክንውድእ እሞ ክንከይድ ንብሎ"።
ዮናስ ሐሳቡ ይቕጽል። "ኣብ መንጉኡ ሽሻይ ኪሮስ ዝተበሃለ መሓዛና 'እንታይ ኢና ገይርናካ ግን' ኢሉ በርደግ ይብል። እቲ ፖሊስ ድማ ካብቲ መሳርሕቱ ብረት ትቕብል ኣቢሉ 'ኣንታ ንዓኻ እማ ተኸኽ እየ ዘብለካ' ብምባል ተኵሱ ገንበሩ ወቒዑ ቀቲልዎ" ብምባል 'ብኣካል ስለዝነበርኩ ዝረኣኽዎ' ዝበሎ ምስክርነት ሂቡ።
ብዛዕባ እዚ፡ እቶም ኣብቲ ፍጻመ ነይሮም ዝተብሃሉ ፖሊስ ኮነ ቤት-ፅሕፈት ፖሊስ ምላሽ ኣይሃብሉን።
ሬሳ ጀነራላት ሰዓረን ገዛኢን መቐለ ኣትዩ
መዋቲ ሽሻይ ኪሮስ ኣብ ሞያ ሓፂነመፂን ዝሰርሕን ገና ካብ ንእስነቱ ነቲ ሞያ ዝመለኸን ምንባሩ ካልእ መሓዝኡ ዘርኢሰናይ ገብረእግዝኣብሄር ይገልፅ።
"ምስቲ ፖሊስ ዘራኽብ ነይሩዎም ከይንብል እቲ ፖሊስ ኣብ ቀረባ እዋን ናብ መንደርና ተመዲቡ ዝመፅአ፡ ስሙ እኳስ ብዕሊ ኣይንፈልጦን። ብጉልበት ተባኢስናዮ ከይንብል ብፍላይ ሽሻይ 'እንታይ ኢና ገይርና' ጥራይ እዩ ኢልዎ። እንትብል በቲ ተግባር ምሒር ከምዝሓዘነ ገሊፁ።
ናይ ምስሊ መግለጺ
እቶም መናእሰይ ከፍ ኢሎምሉ ዝነበሩ ቦታ
"ከምዚ ዝበለ ግፍዒ ኣይረኣኹን። እንታይ በዲልና? ብፍላይ ሽሻይ ኣቦ ጓል ሰለስተ ዓመት እዩ ነይሩ። በዓልቲ ቤቱ ድማ ነፍሰፆር ኢያ። ቤተሰቡ ክኣሊ ኣብ ስራሕ ዝውዕል፤ሰንበት ስለዝነበረ ጥራይ ንምህዳስ ምሳና ኮፍ ኢሉ ነይሩ። ሕማቕ ዝበሃል ባህሪ ዘይነበሮ፤ ምስቲ ፖሊስ እውን ብጉልበት ዘይተፈታተነን ብቓላት ዘይተመላለሰን ቅኑዕ ሰብ እዩ ነይሩ" ይብል ዳኒኤል።
ካብ ምንታይ ተበጊሱ ተዅሱ ሰብ ክቐትል ከምዝኸኣለ ምስጢር ዝዀኖም እቶም መናእሰይ፡ ሎሚ መዓልቲ ንጉሆ ድሕሪ ቀብሪ ሰላማዊ ሰልፊ ክገብሩ መዲቦም ምንባሮም ይገልፁ።
ዮናስ "ሰልፊ ምውፃእ ምስቲ ዘለናዮ ኩነታት ፅቡቕ ኣይመፅእን ኢልና ስለዝሓሰብና፡ ገዲፍናዮ። ነገር ግን ናብ ቤት ፅሕፈት ምምሕዳር ክፍለ ከተማ ሰሜን ብምኻድ ጥርዓን ክነስምዕ ኢና" ኢሉ።
እቲ ፖሊስ ናበይ ከይዱ?
እቲ ፖሊስ ተኵሱ ምስቀተሎ ካብ ቀበሌ 05 ናብ ዓይደር እዩ ከይዱ። እናተኰሰ ከምዝሃደመን እቶም መናእሰይ ከምዝሳዓብዎን ኣብቲ እዋን ዝነበረ ዳኒኤል ክንደያ ይዛረብ። ካብቲ ከባቢ ምስ ሃደመ ብርክት ዝበለ ህዝቢ ህዝቢ ስዒቡዎ። ኣብ ዓይደር፡ ኣብ ሓደ ህንፃ ደይቡ ዓሪዱ።
ኣብ ሓደ ህንፃ ምስተዓቘበ፡ ዝተቘጠዐ ህዝቢ ተኣኪቡ ነቲ ፖሊስ ዝደየበሉ ህንፃ ኣብ ክባ ኣእትይዎ። እቶም ስዒቦምዎ ዝመፅኡ ዝተቖትኡ መናእሰይ እውን ኣብቲ ከባቢ በፂሖም።
ቀብሪ ጀነራል ኣብርሃ ኳርተር ኣብ መቐለ ተፈጺሙ
ማእሰርቲ ደገፍቲ መቐለ ሰብዓ እንደርታን መዘዛቱን?
ኰይኑ ግና ሓለፍቲ ፖሊስን ፍሉይ ሓይሊን ሰራዊት ብምምፃእ ነቲ ከባቢ ተቘፃፂሮምዎ።
ሓላፊ ምክልኻልን ምፅራይን ገበን ከተማ መቐለ ኮማንደር ኣንድነት ለገሰ፡ እቲ ሰብ ዝቐተለ ፖሊስ ከምዘይሃድም ብምግላፅን ህዝቢ ድማ ክረጋጋዕ ከምዘለዎም ምስ ሓይልታት ፀጥታ ብጥቡቕ ብምስራሕን፡ እቲ ፖሊስ ብረቱ ኣረኪቡ ክተሓዝን ናብ ቤት ማእሰርቲ ክውሰድን ከምዝተገብረ ይገልፁ።
እቲ ተግባር ዘቘጠዖም መናእሰይ ቀበሌ 05 ናብ ቤት ፅሕፈት ኮሚኒቲ ፖሊስ ቐጠና ራህዋ ብምኻድ ድማ ምስ ሓይልታት ፀጥታ ተጋጭዮም።
ኣብቲ ቦታ ምስ ዝነበሩ ኣባላት ፍሉይ ሓይሊን ፖሊስን ኣብ ዝተኻየደ ጐንፂ ድማ ክልተ ሰባት ብጠያይቲ ተወቒዖም።
ኣብዚ ሕዚ እዋን ኣብ ላዕለዋይ ሕክምና ዓይደር ሕክምናዊ ረድኤት ዝረኽቡ ዘለዉ እቶም መናእሰይ፡ እቲ ሓደ ኣብ ኢድ ተወቒዑ ግን ድማ ኣብ ደሓን ኩነታት ከምዝርከብ ተገሊፁ እዩ።
እቲ ካልኣዋይ ግን ኣብ ሽምጡ ስለዝተወቐዐ መጥባሕቲ ተገይሩሉ ኣብ መከታተሊ ክፍሊ ፅኑዕ ሕክምና [ICU] ከምዝርከብ ካብ ክፍሊ ርክብ ህዝቢ ሆስፒታል ዓይደር ዝረኸብናዮ ሓበሬታ ይገልፅ።
---
ስድራ መዋቲ ቃሎም ክህቡ እኳ እንተዘይከኣሉ ናይ ቀረባ ኣዝማዱ ግን ሽሻይ ወዲ 23 ዓመት ምንባሩ ነጊሮምኒ።
ወላዲቱ፣ ሓፍቱን በዓልቲ ቤቱን ኣብ ትኩስ ሓዘን ስለዝርከባ ከዛርባና ኣይከኣላን።
ስነ ስርዓት ቀብሪ ነብስሄር ሽሻይ ኪሮስ ሎሚ ንጉሆ ኣብ መቐለ ኣብ እንዳ ገረመንፈስቅዱስ ንጉሆ ሰዓት ክልተ ተፈፂሙ።
