ኣስተውዕል ኤርትራዊ!
(ጓል ፈዳይን ሻዕቢያ ቫይናክ) - ብቕሉዕ ወራርን ዝተፈላለየ መፈላለዪ ኣጀንዳታት ሒዛ ንህዝቢ ኤርትራ ከተንበርክኽ ዘይከኣለት ጃንዳ ወያነ ትግራይ፣ ሕጂ ድማ ንሃይማኖት ከም መፈላለዩ ኣጀንዳ ህዝቢ ኤርትራ ጌራ ከሻሺና ኣቕሪባትልካ ኣላ።
እዚ ኣብ 1940ታት ብመርዘኛታት ገዛእቲ እንግሊዛዊያን ተፈቲኑ ሳላ ከም በዓል ሼኽ
ኢብራሂም ሱልጣንን
ወልደኣብ ወልደማርያምን ዝኣመሰሉ ልዑል ንቕሓት ዝውንኑ ናይ'ቲ ሽዑ እዋን ኣርካናት (elites) ፖለቲከኛታት ኤርትራዊያን ዝበርዓነ ዝበለየ ኣጀንዳ፣ ጃንዳ ትግራይ ካብ'ቲ ተቐቢርዎ ዝነበረ መቓብር፣ ሓመድ ኩዒታ፣ ዶሮናኡ ነጊፋ፣ ሓድሽ ሕብሪ ለኽያ፣ ንሃይማኖት ከም መፈላለዪ ኣጀንዳ ጌራ ኣቕሪባትልና ኣላ።
ነዚ ኣጀንዳ ንምስላጥ ድማ ሓለይቲ ሃይማኖት ምስልምና ዝመስሉ ዕሱባትን፣ ተሓለቕቲ ሃይማኖት ክርስትና ዝመስሉ ወይጦታትን ኣብ ማሕበራዊ ሚድያ ኣዋፊራ ኣላ። ነዚ ኣብ መቐለ ዝተደርሰ ድርሰት እኩያት ዘይተርድእዎ ገለ የዋሃት ኤርትራዊያን ድማ ኣብ'ዚ ጓይላ ንዱያት ኣትዮም ይስዕስዑ ኣለዉ። እቶም ነዚ ኣጀንዳ ዝደርበዩሎም ጃንዳ
ፌስቡክ ወያነ ትግራይ ድማ ኣብ ወሰን ናይ'ቲ ጓይላ ኮይኖም ኣፎም ብነጸላ ሸፊኖም ይስሕቕዎም ኣለዉ።
ዕላማ ጃንዳ ወያነ ትግራይ፣ ነቲ ብተሪር ሓጺናዊ ሓድነት ዝተንደቀ፣ ብኣዕጽምቲን ደምን ዝተጠናነገ ሓድነት ኤርትራዊያን፣ ኣስላማይ ክስታናይ ብምባል በታቲንካ ንኤርትራዊነት ኣዳኺምካ፣ ኣብ ዝተናወሐ ጊዜ ንሕልሚ ዓባይ ትግራይ ምትግባርን ነዛ መተንፈሲ ባሕሪ ዘይብላ ትግራይ፣ ካብ ኢትዮጵያ ገንጺልካ፣ ሪፐብሊክ ዓባይ ትግራይ ክውን ምግባርን እዩ።
ጃንዳ ወያነ ትግራይ፣ ነዚ እኩይ ዕላማ ዘሳልጡላ ብስም "
ጋዕጋዕዝያን" ዝፍለጡ ዕሱባት ደቂ ሃገርን ሰብ ቅልውላው መንነት ተጋሩ፣ ተወልጄን፣ ደቂ ኣርባዓን ገዚፍ ባጀት ሰሊዓ ኣብ ማሕበራዊ ሚድያ ኣዋፊራቶም ኣላ።
እዞም ኣባላት ጋዕጋዕዝያን ኣብ ዝሓለፈ ቀረባ ዓመታት ኣብ ልዕሊ ሃይማኖት ምስልምናን ብሄራት ኤርትራን ዝነዝሕዎ ዘይተኣደነ ጸርፊን ጸለመን ኩሉ ኣብ ማሕበራዊ ሚድያ ዝነጥፍ ኤርትራዊ ክከታተሎ ዝጸንሐን ብትሪ ዝተቓለሶን ዝኾነኖን እዩ።
እታ ስትራተጂ ጃንዳ ወያነ ትግራይ ንጽርቲ እያ፥
ሓላዩ ሃይማኖት ክርስትናን ትግርኛን መሲልካ ብምቕራብ ተጻባኢ ናይ ጽልኢ ፕሮፓጋንዳ ምንዛሕን ብኡ ኣቢልካ ድማ ንሰዓብቲ ሃይማኖት ምስልምና ኤርትራዊያን ብምርሳን ናብ ናይ ቃላት ቆይቂን ጸርፊን ምዕዳም፣ ብድሕሪኡ ድማ ናብ ደማዊ ጎነጽ ምእታው እዩ። ኣብ ዝተናወሐ ድማ ነዚ ናይ ቃላት ጸርፊን ጎነጽን ብዝተፈላለየ ማሕበራዊ ሚድያታትን ናይ ሸቐጥ ትካላት ቴሌቭዥንን ናብ ውሽጢ ኤርትራ import ምግባርን እዩ። በዚ ድማ ነቲ ብስኒትን ምክብባርን ንመዋእል ክነብር ዝጸንሐ ህዝቢ ኤርትራ ንሓድሕዱ ከምዝባላዕ ምግባር እያ።
እዚ ግና ከይተሓልመ ዝተፈትሐ ሕልሚ ዶርሆ እዩ!
ኣብ መፋርቕ 1990ታት ሰዓቢ እምነት ምስልምና ህዝቢ ምዕራባዊ መታሕት ኤርትራ፣ ነቲ ከም መቐጸልታ ኣህጉራዊ ምንቅስቓስ ጀሃድ (International Islamic Jihadist Movement) ኮይኑ፣ ብበዓል ዶክተር
ሓሰን ኣል ቱራቢ ዝመራሕ ዝነበረ ናይ ሽዑ ሃገራዊ እስላማዊ ግንባር መንግስቲ ሱዳን እንዳተኣልየ፣ ኣብ ምዕራባዊ መታሕት ኤርትራ ሰይጣናዊ ስራሕ ዝፍጽም ዝነበረ ምንቅስቓስ ጀሃድ ኤርትራ ባዕሉ እዩ ኣጥፊእዎ። እዚ ድማ ሳላ ንቕሓት ህዝብና ዝተዓወትናሉ እዩ።
ኣብ ኤርትራ ብስም ሃይማኖት ዝመጽእ ዝኾነ ይኹን ፖለቲካዊ ሸርሒ ተቐባልነት የብሉን።
ከም'ቲ ክቡራት ወለድና በዓል ሸኽ ኢብራሂም ሱልጣንን ወልደኣብ ወልደማርያምን ኣብ 1940ታት ኣብ ገዛ እንዳ ኣስላምን ክርስትያንን ኤርትራ ከይዶም ብስሚላሂን በስመኣብን ኢሎም ዶርሆ ሓሪዶም ብሓባር ኮይኖም ዝተቋደስዎ፣ ኣብ መጽሓፍ ቅዱስን ቅዱስ ቁርኣንን ጠቒዖም ናይ ቃል ኪዳን ማሕላ ዝፈጸምዎ፣ ሕጂ እውን ብስም ሃይማኖት ተላኢኹ ዝመጽእ ነጋዳይ ፖለቲካ ኣብ ኤርትራና ቦታ የብሉን።
ኣርማ ታቦት ተሰኪማ ትመጽእ በዓል መንነት ቅልውላው ትግራዋይን እስላማዊት ጂሃዲስትን ኣብ ኤርትራ ሰፈራ ኣብ ትሕቲ ዓሙቕ ናይ ጸልማት ጉድጓድ እዩ። እታ ስፍራ መውጽኢ ዘይብላ፣ ጩራ ብርሃን ዘይተርኢ ናይ ጽልማት ሲኦላዊት ጉድጓድ እያ።
እቲ ዘገርምን ብዙሕ ሰብ ዘይሰትውዕለሉን ግን እዞም ኣብ ማሕበራዊ ሚድያ ብስም ሃይማኖት ኣብ ናይ ቃላት ኩናት ዝሳተፉ ዘለዉ ፍጹም ሃይማኖት ዘይብሎም እዮም። እቲ ምንታይ፣ ሃይማኖት ክርስትና ይኹን ሃይማኖት ምስልምና ከም'ቲ ንሳቶም ዝገብርዎ ዘለዉ ጸርፊን ጸለመን፣ ሓሶትን በለካ ለኸዓካን፣ ጽልኢን ምቅታልን ኣይምህርን እዩ።
ንሕና፣ ደቂ ሸኽ ኢብራሂም ሱልጣን፣ ደቂ ወልደኣብ ወልደማርያም ኢና! ንሕና፣ ደቂ
ዑመር ሃኪቶ፣ ደቂ ራእሲ
ተሰማ ኣስመሮም (መስራቲ ሰልፊ
ኤርትራ ንኤርትራዊያን) ኢና። ንሕና፣ ደቂ
ኢሳይያስ ኣፍወርቂ፣ ደቂ
ዑስማን ሳልሕ ሳበ ኢና። ንሕና፣ ደቂ
ዓሊ ኢብሪሂም ደቂ
ስብሓት ኤፍሬም ኢና። ንሕና፣ ደቂ
ኢብራሂም ዓፋ ደቂ
ውጩ ኢና። ንሕና፣ ደቂ
ዓሊ ሰይድ ዓበደላ፣ ደቂ
በርሀ ጻዕዳ ኢና።
ንሕና፣ ደቂ ማሕላ ሓንቲ ሰንደቕ ኤርትራዊያን ኢና!
እወ! ሕጂ እውን መዝሙርና እቲ ናይ ቀደም መዝሙር ወለድና እዩ፥
ከም'ቲ ሓርበኛ ስነ ጥበባዊ ኣቦና
ኣተወብርሃን ሰጊድ ዘዜምዎ፥
ኣስላማይ ክስታናይ ወዲ ቆላ ደጋ፣
ንምኽሪ ጸላኢ ኣይትሃቦ ዋጋ
ሕጂ እውን፣ ንምኽሪ ደመኛ ጸላኢና ዋጋ ኣይክንህቦን ኢና።
ከም'ቲ ኣያና ስነ-ጥበባዊ
የማነ ባርያ ዝተላበወና እውን፥
የዋህ ኤርትራዊ ዘረባይ ስምዓኒ፣
ዓፍራ ከይትረግጽ መሲሉካ እምኒ
ሕጂ እውን፣ ገለ ቁንጣሮ የዋሃት ኣሕዋትና ኣብ'ዚ መፈንጥራ ናይ ደመኛ ጸላኢ ንኸይወድቁ ክንምዕድን ከነስተምህርን ይግብኣና እዩ።
እንተ እቶም ኣብ ስደት ኮፍ ኢልኩም፣ ንቤላቤለውን ዓጀውጀውን ከም መኻዕበቲ እቶት ናይ
youtube ጌርኩሞ ዘለኹም ነጋዶ ፖለቲካ ድማ ኣብ ስደት ኣሪግኩም ኣብ ስደት ክትቅበሩ ደኣ'ምበር ተፍርይዎ ነገር ከምዘይብልኩም ከዘኻኽረኩም እደሊ።
እብል ኣለኹ፥
ኣንታ ትፈላሊ ክትብለጽ፣
ኤርትራ ሓንቲ እያ ቅበጽ!
ርሑስ ቅንያት ፋሲካን
ርሑስ ምጅማር ጾም ረመዳንን ይግበረልና!
ዘልኣለማዊ ዝኽርን ክብርን ንስለ ኤርትራን ኤርትራዊነትን ዝተሰውኡ ሓርበኛታት !!
ዓወት ንሓፋሽ !!
