Mereja.Forum

[Abe Abraham]

saveAdna wrote :


ኣብ ተምቤንን ካልኦት ከባቢታት ትግራይን ኣሎ ተባሂሉ ብተደጋጋሚ ዝለዓል ዘሎ(ብርግጽ እውን ብፍላይ ኣብ ዝሓለፉ 19 ዓመታት ኣብ ዝተፈላለዩ ኸባቢታት ብስፍሓት ብግልፂን ብሕብሕቢኢተይን ዝዝረበሉ ዝነበረ) "መሓውር መንግስቲ ብናይ ሓደ ኸባቢ ሰባት ተታሒዙ ፤ ዘይፍትሓዊ ፣ ዘይምዕሩይ ዝኾነን ንሓደ ኸባቢ ኣቕሪቡ ነቲ ካልእ ዘጓኒን ምደባ ሽመት፣ ሓላፍነት ኣሎ ወ.ዘ.ተ ኣሎ" ዝብሉ ወቐሳታት ንሓድነትና እውን ጠንቂ ይኾኑ ዘለዉ ኮይኖም ይረኣዩኒ ስለዘለዉ ገለ ክብል፤

ብርግፅ ንዓይ ትግራይ ሓንቲ ፀባብ ኣጉዶ እያ፤ ካብዛ ኣጉዶ እዚኣ ካብ ዝኾነ ከባቢ ይምጻእ ብዘየገድስ ኩሉ ማዕረ ትግራዋይ እዩ፤ ሕድሕድ ጣብያን ወረዳን ትግራይ ድማ ንኹሉ ትግራዋይ ብማዕረ እያ እትብፅሖ፡፡ ስለዚ ዓቕሚ መሰረት ዝገበረ(merit-based) ውድድር ብምግባር ካብ ዝኾነ ኸባቢ ትግራይ ዝመፀ ትግራዋይ ተወዳዲሩ በሊፁ ኣብ ዝኾነ ከባቢ ትግራይ ከይዱ መመሓደሪ ወይ ታሕተዋይ ሰራሕተኛ እንተኾነ ንዓይ ፀገም ዘለዎ ኣይኮነን፡፡እዚ ማለት ብሓቀኛ ውድድር ካብ ሓንቲ ወረዳ ዋላ እውን ካብ ሓንቲ ቑሸት ዝመፁ ተጋሩ ናይ ኩለንወረዳታት ትግራይ መማሓደርቲ፣ ናይ ኣብያተ ዕዮ ሓለፍቲ፣ ዲፓርትመንት መራሕቲ ወ.ዘ.ተ እንተኾኑ ፀገም ዘለዎ ኣይኮነን፡፡

ኮይኑ ግን ነባራዊ ሓቂ ትግራይ ዘረድአና ብሓቀኛ ውድድር ዓቕሚ ካብ ሓንቲ ወረዳ ዝኾኑ ተጋሩ በሊጾም ዝርከቡሉ ዕድል የለን፡፡ (There is no asymmetric distribution of talent, intelligence in Tigray; never!)ብዛዕባ ውድድር እንተርኢና ሓደ ክልተ መርኣያታት ክንወስድ ንኽእል ኢና- ቐላሚኖ፣ ኤም ኣይ ቲ መቐለን ዩኒቨርሲቲታትናን፡፡ ንኣብነት ኣነ ቓላሚኖ ኣብ ዝኣተኹሉ ዓመት ተወዳዲርና ካብ ዝኣተና 60 ተምሃሮ ብግምት 15 እንኸውን ካብ መቐለን ደቡብ ምብራቕን፤ ከባቢ 15 ካብ ዞባ ምብራቕ ፤ ከባቢ 15 ካብ ዞባ ደቡብ፤ 7 ወይ 8 ካብ ዞባ ማእኸል፤ 7 ወይ 8 ካብ ዞባ ሰሜን ምዕራብን ምዕራብን ነይርና፡፡ ናብ ዩኒቨርሲቲታት ኣብ ምእታው ዝነበረ ኩነታት እውን ከብዚ ብዙሕ ዝፍለ ኣይነበረን፡፡

ብውጽኢት ትምህርቶም ተወዳዲሮም ኣብ ዩኒቨርሲቲታትና መምህራን ኮይኖም ዝተረፉ መናእሰይ እንትንርኢ እውን ናይ ሓደ ዞባ ወይ ወረዳ ልዕልና የለን(ተመጣጣኒ ዝኾነ ክፍፍል ብቕዓት ኢና ንረክብ)፡፡በብዓመቱ ናብ MIT መቐለ
ተወዳዲሮም ናይ ዝኣትዉ ተጋሩ ቑፅሪ እንተርኢና እውን ብፍሉይ ሓደ ኸባቢ ጎሊሁ ዝወፀሉ ዕድል የለን፡፡

ብሓፈሻ፡ ኣብ ትግራይ ብሓቀኛ ኣካዳምያዊ ዓቕሚ፣ ብልሒ ውድድር ናይ ሓደ ኸባቢ ልዕልና የለን፡፡ስለዚ ኣብ መሓውር መንግስቲ ናይ ሓደ ኸባቢ ልዕልና እንተሃልዩ ብሓቀኛ ውድድር፣ ብሜሪት ዘይኮነስ ብኻልእ እዩ ዝኸውን ዘሎ ማለት እዩ፡፡ ስለዚ ከምዚ ዝበለ ልዕልና እንተሃልዩ "ብዓቕሚ ውድድር፣ ብብልጫ፣ ብሜሪት እንተኾይኑ እንታይ ፀገም ኣለዎ!" ኢልና እንገድፎ ኣይኸውን- ስለዘይኮነ፡፡

ሓደ ሓደ ለዋሃት መሓዙትና ኣብ መራኸብቲ ሓፋሽ እንተይተረፈ ወፂኦም ተጠሊዖም "ደቂ እከለ ዝብሃል ወረዳ ዋላ በዚሖም እውን እንተኾኑ ብሜሪት እዩ ክኸውን ዝኽእል" ኢሎም ክዛረቡ ይስማዕ እዩ፤ እዚ ግን ነቲ ኻልእ ትግራዋይ ዘሕርቕ እዩ፤ ብዙሕ ሰብ ድማ "ኣብ ዩኒቨርሲቲ፣ ኣብ ቓላሚኖ፣ ኣብ ኤም ኣይቲ መቐለ ዘየሎ ሓለፋ ብኸመይ ኣብ ምምሕዳር በፂሑ ተፈጢሩ?" ዝብል ሕቶ ከልዕል ክግደድ እዩ፡፡ብዓብዩ ድማ ናይቶም ሰበት ውፅኢታውነት ምፍታሽ እዩ- ኣብ ዝሓለፉ 19 ዓመታት ዘጋጠመና ውድቀት ዝፍለጥ እዩ፤ ሜሪት መሰረት ዝገበረ ሕርያ እንተዝህሉ ነይሩ እዚ ኩሉ ውድቀት ኣይመጋጠመናን ነይሩ፤

በዚ በለ በቲ፣ እቲ ፀገም ብቕንዕና ምፍታሽ እዩ ዝሓይሽ፡፡ ተፈቲሹ እቲ ሓቂ ህዝቢ ብግልፂ ክፈልጦ ምግባር እዩ ዝሓይሽ፡፡ እቲ ኣረኣእያ ብዝኾነ ምኽንያት ኣብ ሰፊሕ ክፋል ሕብረተሰብና ተፈጢሩ ስለዘሎ ነቲ ጉዳይ ፀያፍ ብምግባር፣ ከይለዓል ብምግባር፣ ብምድሃል ምሽፋን ዘኽይድ ኣይመስለንን፡፡ እቲ ጉዳይ ምስፈተሸ ናይ ኣረዳድኣ ፀገም ጥራሕ እንተኾይኑ እቲ ናይ ኣረኣእያ ፀገም ይእረም፤ እቲ ዝብሃል ዘሎ ፀገም ኣብ መሬት እንተሃልዩ ድማ መአረምታ ይግበረሉ፡፡