‘ሰለብሪቲ ኢቨንትስ’ ዚበሃል ጉጅለ፣
ጫጪሓ ኢሎማ እታ ቍርዲድ መቐለ።
ዘየሓፍር ድሙ ዘይሓፍር ድሙ፣
ምስ ጠለምቲ ናይ ቃል፡ ከኹድድ ከሪሙ፣
ኣለኩ ይብል ኣሎ ሕጂ ደጋጊሙ፣
ጉዳይ ኪሓናኽር ናይ ስርቂ ዶላራት ጎሲሙ ጎሲሙ።
‘ሰለብሪቲ ኢቨንትስ’ ውዲት ናይ ወያነ፣
ምስ ሓሽከት ጃንዳካ ብሕጊ ተዳነ፣
ንፍትሒ ትሕቲ ምድሪ መንዲ’ዩ ዝዳጎነ፧
ምስቶም ለኣኽትኻ ብሕጊ ተዳነ፣
ይብለካ ኢዩ ዛሎ ኤርትራዊ ወነ፣
ብመትከል ዚኣምን ቃሉ ዝወነነ።
ዓመጽ እተሳሲ ጠበቓ ዓመጽቲ፣
ኣይትጉዳእ ቁስልና መሲልካ ‘መጽዋቲ’፣
ንስለ ሓቂ እንዲዩ እቲ ኩሉ መስዋእቲ፣
ንስለ መሬት እንዲዩ እቲ ኩሉ መስዋእቲ፣
ንስለ ዶብ እንዲዩ እቲ ኩሉ መስዋእቲ፣
ጸግዕኻ ሓዘልና ድለ መቋምርቲ።
ፈለማ ምውጻእ ኢዩ ካብ መሬት ኤርትራ፣
ደጊም ድሕሪ ሕጂ ናይ ቃላት ጥበራ፣
ኣየፍቕድን ኢዩ ሕዝቢ ናይ ኤርትራ፣
ነታ ብይን ናይ ዶብ ፈለማ ተግብራ።
‘መዝሙር ሰላም’ ኢልካ ኣመና ተሽኻዕልል፣
‘ካብመዓስ’ከ ኢዩ፧’፡ ‘ሰላም’ ዚብል እቲ ገበል፧
ደጊም ኤርትራዊ ጭራሽ ነይድህለል፣
ቢሉ ተሲኡ ኢዩ ዝሃለፈ ይኣኽል።
እምበር ሰላም ደኣ ዚጸልኣ መን አሎ፣
እንከይተደመረ ዚኩሕኩሕ ካንሸሎ፣
ከም ናይ ‘ሰለብሪት ኢቨንትስ’ ተንኮል ዝተደጎሎ፣
እንተኰይኑ ግና ‘ቆብ’ ኢና ነብሎ፣
እቶም ኤርትራዉያን ነቦይ እዝጊ ሒዝና ኩሉ ዝከኣሎ።