Mereja.Forum

[Meleket]

ታሪኽ ሓወልቲ ቅዱስ ፍራንቸስኮስ ኣስመራ - ብኃው እምነቱ ካሕሳይ ኣስመራ-ሳን ፍራንቸስኮ 08.08.2026



መእተዊ

"ሳፊራ ፕረስ" ኣብ ትሕቲ ዚብል ናይ ፈይስቡክ ስም፡ ወርትግ ብዙሓት ሃነጽቲ ሃገራውን ባህላውን ስፖርታውን ስነ ጥበባውን ትሕዝቶ ዘለዎም ናይ ኤርትራ ክብርታት ዚትንክፉ መነቓቓሕቲ ጽሑፋትን ኣሳእልን ዚዝርግሕ ጋዜጠይና ሳምሶን፡ ቅድሚ ሰለስተ መዓልቲ እውን "ንሓወልቲ ቅ.ፍራንቸስኮስ"፡ ኣብ "ሕቶ ሎ'ምሸት" ዚብል ዓምዱ፡ "ኣስመራ ንፈልጣ ዲና፧" ኣብ ትሕቲ ዝብል ኣርእስቲ፡ ስእሊ ሓወልቲ ቅ.ፍራንቸስኮስ ለጢፉ፡ ነዘን ዚስዕባ 3 ሕቶታት ኣቐሚጡ ኣሎ።

1. እዚ ሓወልቲ ናይ ምንታይ እዩ፧ (ናይ መን'ዩ)
2. እዚ ገዛውቲ (ከባቢ) እንታይ ተባሂሉ ይጽዋዕ፧
3. እቲ ቤተክርስቲያን እንዳ ምንታይ ይበሃል፧

መቕድም

መቅድመ ኩሉ ንሓውና ጋዜጠይና ሳምሶም፡ ነቲ ብዲጂታል ዓለም ገይሩ ክብርታት ሃገርና ክንፈልጥ ዚገብሮ ዘሎ ጻዕሪ ኣዝየ ኣመስግን፡ ቀጽሎ ከኣ እብሎ።

ቀጺለ ብማሕበራዊ ጉዳይ፡ ሩባ ዓንሰባ ሰጊረ፡ ጉሽ ዚበሃል ዓዲ ገይሸ፡ ሓሙስ ናይ ምሸት ዕለት 06.08.2026 እየ ነ'ስመራ ተመሊሰ። ዓለም ከመይ ቀንያ ክብልን፡ ናይ ፈይስቡክ መሓዙተይ ከ እንታይ ኣቐሚጦምለይ ኣለው ኢለ፡ ሃሰስ ክብል ከለኹ፡ (ወረ ክእክብ ከለኹ ምባል ዶ ምሓሸኒ፡ ግን ከኣ ዓበይቲ ቁምነገራት ስለ ዘለውዎስ "ልዕሊ ወረ እዩ")፡ ካብቲ ብዙሕ ዘጋጠመኒ ዜሕጉስን ዜጉህን ፍጻሜታት፡ ሓንቲ ቀልበይ ዝሰሓበት ስእሊ፡ ኣብ ዓንዲ-ገጻት ተሰቂላ ርአኹ።

እታ ስእሊ፡ ብሕይወታ ኣብ ኣፍ ደገ ገዛይ ተተኺላ ስለ ዘላ፡ መዓልታዊ እንተወሓደ ክልተ ጊዜ፡ ንስራሕ ወይ ንትምህርቲ ክወጽእ ክኣቱ፡ ከይርኣኽዋ ኣይውዕልን፡ ኣብ ሞባይለይ'ውን ብመልክዕ ስእልን ቪድዮን ኣላ። ስለዚ ከኣ እየ ትሕዝቶኣ ክርኢ ዝተሃንጠኹ። ተቐዳዲመ እውን ኣብ ቦታ ትሕዝቶ ናይ'ታ ገጽ፡ ክጥውቕ ጀሚረ። ግን ኣይከም ዝተጸበኽዎን፡ ጋዜጠኛ ሳምሶን ሕቶ ብሕቶ እዩ ተኽቲኽዋ ጸኒሕና።

ኣነ ከኣ፡ እዋእ! እዚ ቀሊል፡ ሎምስ ብግራተይ መጺእኒ በልኩ። ክምልስ ኣብ ቦታ comment ምስ ከፈትኩ፡ ኣእምሮይ ግን ምሕላፍ ከሊእኒ፡ እዚ ናይቶም እናሓለፉ ዝፈልጥዋ እዩ። ንስኻ ግን ... ኢሉ መጐተኒ። እወ፡ ኣብቲ ቦታ ከም ዚቕመጥ ፍራንቸስካዊ ፈላሲ መጠን፡ ከም ኩሉ ሰብ ኣብ comment ጥራሕ ሓሳባተይ ኣቐሚጠ ክሓልፍ ሕልናይ ምግባር ኣብዪኒ።

ስለዚ ኣስፊሐ፡ ብዛዕባኣ ክጽሕፍ ከም ዘለኒ፡ ሕልናይ ረትዓኒ፡ ኣብ ውሳኔ ከኣ በጻሕኩ።

1. ኣባ ዶዚተዮ ተኻሊ እዛ ሓወልቲ

ሽዑ ምንጪ ዝኾኑኒ ጽሑፋት ከናዲ፡ ብዛዕባ'ታ ሓወልቲ ዘንበብክዎም መጻሕፍቲ በእምሮይ ሃሰስ ክብል ጅምር ከብል፡ ይዒንተይ ቀዲመናኒ፡ ኣብ'ታ ቅድሚ ሰሙን 27.07.2026 ክቡር ደራሲ ኣባ ኣማኑኤል ምስጉን፡ ኣብ ጉባኤ ማኅበር እንከለና ዝዘርግሑልና ሓዳስ መጽሓፎም፡ ከንብባ ጀሚረ፡ ብመገሻ፡ ከይወዳእክዋ ኣብ ጣውላ ገምጢለ ዝገደፍክዋ መጽሓፍ፡ ተተኽላ። ኣልዒለ ከኣ ዝደለኽዎ ክረክብ፡ ንድሕሪት ገጸይ ግንጽል ግንጽል ኣበልኩ።

እታ መጽሓፍ "ኣባ ዶዚተዮ ማጎኒ፡ ካፑቺናዊ ሚስዮናዊ " እያ ትብል፡ ብዛዕባ ዕዮን ጻዕርን እቶም ካብ 1939-1980፡ ነ40 ዓመታት ኣብ ኤርትራን ኢትዮጵያን (ኣስመራ፡ ዓሰብ፡ ኣዲስ ኣበባ) ዘሕለፍዎ ገድልን ዝገበርዎ ኣበርክቶን እያ እተዘንቱ።

ኣብታ መጽሓፍ፡ ኣብ ገጽ 59 "ሓወልቲ ቅ.ፍራንቸስኮ ኣብ ኣሥመራ (ገጀረት)" ትብል ንኡስ ኣርእስቲ ኣላ። ኣብኡ ከኣ ኣምጻእን ተኻልን ኣባ ዶዚተዮ ምዃኖም ትነግር።

ኣባ ዶዚተዮ ማጎኒ፡ ንመንግሥቲ ጃንሆይን፡ ኣብ 1950ታት ኣብ ኤርትራ ንዝነበሩ ኣመሓደርትን "ስለ ሕዝቢ ኤርትራ" ብዙሕ ዝተኻትዑን ዘቃልዑን ኣቦ እዮም። ከም ሳዕቤኑ ከኣ ንመቕጻዕቲ ካብ ኣሥመራ ንዓሰብ ዝተቐየሩ እዮም። ኣባ ዶዚተዮ፡ ኣዳላዊ እታ ብ1 ጥሪ 1947 ዝጀመርዋ ጋዜጣ "ሓቅን ሕይወትን" (Veritas et Vita) ብምንባሮም፡ ሓቂ ብምዝራቦም ብሕይወቶም ዝተሓቱን ዝተሳደዱን ኣቦ እዮም።

2. እዛ ሓወልቲ ናይ መን እያ፧ መን እዩ፧

ናይ ቅዱስ ፍራንቸስኮ በዓል ኣሲዚ እያ።

ቅ.ፍራንቸስኮስ፡ ልክዕ 800 ዓመት ይገብር፡ ብ04 ጥቅምቲ 1226 ዓ.ም.ፈ. ኣብ 44 ዓመቱ ኣብ ከተማ ኣሲዚ ዓዲ ጣልያን ዝሞተ ጻድቕ ሰብ እዩ። እዚ ቅዱስ፡ ፈታዊ ንስሓ፡ ሕውነት፡ ሰላም፡ ኣፍቃርን ሓቋፍን ኩሉ ፍጡር፡ ንክርስቶስ ብምልኣት ክመስል ዝጋደል፡ ሃብትን ዝናን መኒኑ ድኻን ተራን ሰብ ክኸውን ዝመረጸ፡ ንዓለም ብግብሪ ዝሐደሰ ሰብ እዩ።

ቅ.ፍራንቸስኮ ሰዓብቱን ናቱ ሞዴል ዚኽተሉን ኣዝዮም ኣዝዮም ብዙሓት እዮም። ናይ ቅ.ፍራንቸስኮ መንፈስን ቅዲ ሕይወትን ስርዓትን ኣብ ሃገርና፡ በቶም ንካቶሊካዊት ቤተክርስቲያን ኤርትራ፡ ካብቶም መሰረታ ዝኾኑ ማሕበር ላዛሪቲ ብ1894 ተረኪቦም ንነዊሕ ዓመታት ዝመርሕዋ፡ ልዕሊ መሰረት ዘሎ መንደቅ ኮይኖም፡ ኣብዚ ዘላቶ ደረጃ ክብ ክትብል ዝገብሩን ፍራንቸስካውያን ካፑቺናውያን እዩ ኣትዩ። ልዕሊ 130 ዓመት ገይሩ ኣሎ ማለት እዩ።

ኣበርክቶ ደቂ እዚ ሓወልቱ ኣብ ከተማ ኣስመራ ተተኺሉ ዘሎ ጻድቅ፡ ብዓለም ደረጃ ተዛሪብካን ጸብጺብካ ኣይውደኣን እዩ። ኣብ ሃገርና ከኣ እቲ ዝገበርዎን ገና ዚገብርዎ ዘለዉን ሃይማኖዊ ንቕሓት ንዝምልከቶም ግድፍ ኣቢልና፡ ነቲ ንዂሉ ሕዝቢ ኤርትራ ዚምልከት ምስ እንርኢ፡ ኣብ ትምህርት፡ ሕክምና፡ ስፖርት፡ ምጥዋር ጽጉማት፡ ፖሊትካ፡ ስነ ጽሑፍ፡ ስነ ጥበብ፡ ቋንቋ፡ ኣብ ምዕቃብ ባህልን ስነ ምግባርን፡ ልዑል ኣስተዋጽኦ ዝገበሩ እዮም። ገለ ካብቶም ምርኡያት ኣቦታት ብሞት ዝሓለፉ ክንጠቅስ፡ ኣባ ኣጎስጢኖስ ተድላ (ኣብ መመረቅታ እዛ ሓወልቲ ኣስተርጓሚ ዝነበሩ)፡ ኣባ ተኽስተብርሃን፡ ኣባ ኣየለ ተክለሃይማኖት፡ ኣቡነ ሉቃስ ሚለዚ፡ ኣባ ተወልደ በየነ፡ ኣባ ኢሳቕ፡ ዘርኣይ ደረስ ...ወዘተ።

3. እዚ ሓወልቲ ኣበይ ቦታ ወይ ከባቢ፡ ናይ ኣስመራ ይርከብ፧

እዚ ሓወልቲ፡ ኣብ ኣፍ ደገ ቤተክርስቲያን መድኃኔዓለም ዘቅ.ፍራንቸስኮስ (ሳን ፍራንቸስኮ)፡ ገጀረት ንእሽቶይ ተተኺሉ ይርከብ። ብምዕራብ ፊያት ቴለግሮ፡ ብወገን ሰሜን ኣልፈርማዮ፡ ብወገን ምብራቕ ራድዮ መሪናዮ(ናይ ሎሚ ኣልጌን)፡ ብወገን ዶቡብ ከኣ እንዳ ኖራ ከቢብዎ ይርከብ።

እዚ ኣበ'ስመራ ዘሎ፡ ናይ ቅዱስ ፍራንቸስኮ ሓወልቲ፡ ካብ ፊያት ቴሌግሮ ወይ ናቕፋ ሃውስ ንወገን ምብራቕ ዘሎ ጐደና (ብካራቨልን ሳትረብን ዚጅምር ጐደና) ወሲድካ ብቤትትምህርቲ ላ ሳለ (ሎሚ ቤትትምህርቲ ደንደን ተባሂሉ ዚጽዋዕ ዘሎ) ኣቢልካ ምስ ሓለፍካ ዚርከብ ዓቢ ቤተክርስቲያንን ገዳምን ቊምስናን ቅርዓትን ዘጠቓለለ እዩ። እቲ ከባቢ ከኣ ብስሙ "ሳን ፍራንቸስኮ" እናተባህለ ይጽዋዕ ኣሎ።

4. ኣሰራርሓ እዛ ሓወልቲ ቅዱስ ፍራንቸስኮ ከመይ እዩ፧

ንዝርአኻዮ ናይ ስነ ጥበብ ዕዮ፡ መን እዩ ቀቢእዋ፡ መን እዩ ቀሪጽዋ፧ መን እዩ ጽሒፍዋ፧ ኢልካ ምሕታት ልሙድ ቋንቋ ስነ ጥበብ እዩ። ኣብዛ ብልጽቲ ቅርጺ-ቅርጻ ከኣ ሰራሒኣን ዓይነታን ንውሓታን ክንዛረብ ባህርያዊ እዩ።

እዛ ምስሊ ወይ ሓወልቲ፡ ብሓደ ዶመኒክ ትረንታኮስተ (Domenic Trentocoste) ዚበሃል ስነጥበባዊ ኣብ ዓዲ ጣልያን እያ ተቐሪጻ። እታ ሓወልቲ፡ ብነሓስ (bronzo) ዝተሰርሐት ኮይና፡ ቁመታ ከኣ 1.7 ሜትሮ እያ። ምስቲ ተተኺላትሉ ዘላ ጽሩብ እምኒ ተደሚራ ከኣ፡ ካብ መሬት 8.50 ሜትሮ ሓፍ ኢላ ኣላ። ዙርያኣ፡ ማለት እቲ ተተኺላትሉ ዘላ ዓውዲ ድማ፡ 15.60 ሜትሮ ብ10 ሜትሮ እዩ። መሰረት ናይቲ ጽሩብ እምኒ ወይ ዶንጎላ 3 ሜትሮ ንታሕቲ ተዃዒቱ ዝኣተወ እዩ።

ነዛ ሓወልቲ ከመይ ክትቅመጥን ክትከልን ከም ዘለዋ፡ ዲዛይን ዘውጽአ ከኣ፡ ጂኦሜትራ ረንዞ ኣዞኒ ዚበሃል እዩ።

እቲ ተተኺሉን ተነጺፉን ዘሎ ኣእማን ብዝተፈላለየ ቅርጽን ቁመትን ዝተጸርበ ኮይኑ፡ ንሓድሕዱ ዝናበብ፡ ብግቡእ ተሓቋቊፉን ተገጣጡን ዘሎ፡ ሓደ ቋንቋ ዝዛረብ እዩ።

5. እዛ ሓወልቲ ከመይ ኢላ ንኤርትራ መጺኣን ተተኺላን፧

እቲ ሓሳብን ጠለብን ኣብ ኤርትራ ብዝነበሩ ፍራንቸስካውያን ኣኅዋት ካፑቺኒ 1ይ ማሕበር እዩ ቀሪቡ። እቶም ኣብ ሚላኖ ዝንበሩ ኣባላት "ዓለማዊ ፍራንቸስካዊ ማኅበር" ከኣ፡(እዚ ማሕበር ብዓለማውያን ምእመናን፡ ሰብ ሓዳር ዝቆመ፡ ብ1221 ቅ.ፍራንቸስኮ ባዕሉ ዝመስረቶ፡ ብ3ይ ማሕበር ዚፍለጥ፡ ሎሚ ኣብ ሃገርና ከባቢ 500 ዚኾኑ ኣባላት ዘለውዎ፡ ብዓለም ደረጃ ከኣ ልዕሊ 400 ሽሕ ዚኾኑ ኣባላት ዘለውዎ ዓቢይን ጥንታውን ማሕበር እዩ።) ንልመናን ጠለብን እዞም ኣኅዋት ቀዳማይ ማሕበር ሰሚዖም፡ ምቅራብን ምስዳድን እዛ ሓወልቲ ኣቦና ባዕልና ኣሎና በሉ። በዚ መሰረት፡ ነታ ቊሩብ ካብኣ ዕብይ ትብል፡ ኣብ ሚላኖ፡ ፒያዛ ትሪኮሎረ (Piazza Tricolore) ዘላ ምስሊ ቅ.ፍራንቸስኮ ርእዮም፡ ኣብ ኣስመራ እውን ከምኣ ክትከል ብምባል፡ ብገንዘቦም ገዚኦም ናይ መርከብ መሳፈሪ ከፊሎም፡ ንኤርትራ ኣእተውዋ።

ይኹን እምበር፡ ክልተ ዓመት ዝወሰደ ስራሕ ምትካል ቀሊል ከም ዘይኮነ፡ ብቐሊል ክንግምቶ ንኽእል። እዛ ሓወልቲ ንመትከሊኣ ዘይተኣደነ ገንዘብ እያ ወሲዳ። ነዚ መትከሊኣ ዚኸውን ገንዘብ፡ ኣባ ዶዚተዮ ምስ'ቶም ኣብ ኤርትራ ዝነበሩ ኣባላት ዓለማዊ ፍራንቸስካዊ ማሕበርን ካልኦት መሻርኽንትን ኮይኖም፡ ጽሑፋት እናኣሰናደዉ፡ ስፖርታዊ ውድድራት (ኩዕሶ እግሪ፡ ቮሊቮል፡ ኮርሶ ሳይክልን ውድድር መካይንን፡ ግጥምን ሙዚቃን) እናሰርዑ፡ ካብ ገበርቲ ሰናይን፡ ካብ ተመሃሮን ሰራሕተናታትን እናለመኑ ኣብ ፈጽሚ ኣብጽሕዋ።

6. ምትካልን ምምራቕን ሓወልቲ ቅ.ፍራንቸስኮ

እዛ ሓወልቲ፡ ምጽእ ኢልካ ብቐሊሉ ዝተተኸለት ኣይኮነትን። ንኽትህነጽ ክልተ ዓመት ዝወሰደት ስራሕ እያ። (21 ሚያዝያ 1951-31 ግንቦት 21953)

ብ21 ሚያዝያ 1952 ኣብ ምንባር እምነ-መሰረት እዛ ሓወልቲ፡ ክልተ ጳጳሳት ካቶሊካዊት ቤተክርስቲያን፡ ቤተክህነትን፡ ኣካላት መንግሥትን፡ ቆንስላት ዝተፈላለያ ሃገራትን ተረኺቦም ነይሮም።

እዛ ሓወልቲ ተሰቂላትሉ ዘላ ቦታ፡ ብኣዝዩ ውሕሉል ጥበብ ዝተጸርበ፡ (ኣእማን ካብ ምባሉ፡ ደናጉሉ ወይ ኣኻውሕ ምባሉ ይሓይሽ) ኣኻውሕ እዩ። ኣብኡ ቀሪብካ ምስ እትርእዮ ኣዚኻ ኢኻ እትስድመም፡ ከመይ ዓይነት ሰባት እዮም ሰሪሖሞ፡ እሞ ከኣ ኣብቲ ጊዜ'ቲ ትብል። ኣብ ኤርትራ ዘሎ ህያብ ኣእማን፡ ብጥበብ እንተ ዝጽረብ እንታይ ዓይነት ፍጥረት ምወጽአ እንድዒ።

እቲ ኣእማን ካብቲ ኣብ ነፋሲት ዘሎ፡ ደናጉሉ ተጸሪቡ እዩ ሕይወት ዘለዎ መሲሉ። ኣስመራ ንኽወጽእ፡ ጽርጊያ ዓርበ-ሮቡዕ ኣስጋኢ ኮይኑ ስለ ዝተረኽበ፡ በብሓንቲ ብማይሓባር ገይሩ፡ ብደቀምሓረ ተጠውዩ እዩ ኣስመራ ከም ዝኣቱ ተገይሩ። እዚ እውን ብሓገዝ እቶም ኣብ ቃኘው ዝነበሩ ጉጅለ ወተሃደራት ኣመሪካ ራድዮ ማሪናዮ እዩ ዕዉት ክኸውን ክኢሉ። እዚ ሓወልቲ ንኽትከል ክንደይ ጻዕርን ድኻምን እዩ ሓሊፍዎ።

7. ጽምብል ሓዳስ ሓወልቲ ቅ.ፍራንቸስኮ

ሥራሕ ህንጸት፡ ኣብ ክልተ ዓመት ምስ ተዛዘመ፡ ኣዝዩ ገፊሕ ጽምብልን ምርቓን እዩ ነይሩ። ብሳልስቱ ኣብ ካተድራለ፡ ምሸት ምሸት መቀራረቢ ጸሎት-ሳልስቲ ክግበር ቀነየ። ኣብ ዕለቱ 31 ግንቦት 1953 ከኣ ውሃ ዘበለ ጽምብልን በዓልን ተገይሩ። ኣብቲ በዓል ከኣ ሰበ ስልጣን መንግስቲ ግራዝማች ተድላ ባይሩ ዝመራሒኦም፡ ሰበ ስልጣን ቤተክርስቲያን ኣቡነ ያዕቆብን ኣቡነ ማሪኖኒን ዝመራሕቶም፡ ቆንስላት ዝተፈላለያ ሃገራት፡ ዓበይቲ ዓድን ብዙሓት ምእመናን ተሳቲፎም ነይሮም።

ሓፈሻዊ ስእሊ ንምሓዝ፡ ኣብቲ መደብ ዝተሳተፉ ዝተፈላለዩ ጉጅለ መዘምራን ክንርኢ ኢና።
- መዘማራን መድኃኔዓለም ገጀረት፡
- መዘምራን ፍራቲኒ ገዳም ፍልሰታ ማርያም ዘርአ-ፍልስና መንደፈራ፡
- መዘምራን ሓደርቲ-ተመሃሮ ቤት-ማኅተም ቅ.ዮሴፍ ኣስመራ፡
- ኣባላት ጒጅለ ሙዚቃ ማዛጋጃ ቤት ከተማ ኣስመራ፡
- ካብ ጋሽ ባርካ፡ ንባህላዊ ደርፍን ሳዕስዒት ተሰናድዮም ዝመጹ፡ ጉጅለ ብሄረ ኩናማ ተሳቲፎም።

ካልእ መሰናድኦታትን መደረታትን ግጥምታት ናይ ድራር እንግዶትን እውን ነይርዎ።

ስለዚ ስቅ ኢልካ፡ ብኸምኡ ዝተገብረ ዘይኮነስ፡ ብመጽናዕትን ብርቱዕ ጻዕርን ሓሊፉ ዝተሃንጸ ሓወልቲ እዩ።

8. ሓዳሴ ሓወልቲ ቅ.ፍራንቸስኮስ

ብ1996 ብኣባ ተስፋልደት ኣባይ፡ ረሲሑ ዝነበረ ኣእማን ብልዑል ጥንቃቀ ብሰብ ሞያ ኣጽረይዎን ኣሓደስዎን። ምስቲ ዝቐደመ ኣእማን ዝመሳሰል ወይ ኣሕዋቱ ክንብሎ ንኽእል፡ ብዕላማ ካብ ነፋሲት ተጸሪቡ ብዝመጻአ ምዕሩግ ኣእማን፡ ሓጺር መካበብያ ገበርሉ። ኣትክልቲ እውን ኣብ ዙርያኡ ከም ዝትከል ገበሩ።

9. መበል 60 ዓመት ሓወልቲ ቅ.ፍራንቸስኮስ

ብ2013 ተመሃራይ 1ይ ዓመት ነገረ መለኮት እንከለኹ፡ ብፍራንቸስካዊ ስድራ ዝተወደበ፡ ኣባ ክፍለኢየሱስ ገብረሥላሴ ዝመርሕዎ፡ መበል 60 ዓመት ምትካል እዛ ሓወልቲ ከም ዘብዓልና እዝክር። ብዛዕባ ታሪኻን ኣተኻኽላኣን፡ በቶም ኣብቲ ዕለተ-ጽምብላ ዝወዓሉ፡ ከም በዓል ነ/ር ኣባ መድኃኔ ገ/ሔር ክዝንቶ እዝክር። ንሕጂ ከም ቀንዲ መወከሲ ዝጠቐመኒ እውን፡ ኣብቲ ዕለት (ብ2013) ዝወጽአ፡ "ሓወልቲ ቅ.ፍራንቸስኮ ግርማ ከተማ ኣሥመራ" ዚብል ቡለቲን እዩ።

ዝመጽእ ክልተ ዓመት፡ ግንቦት 2028 ድማ መበል 75 ኣልማዛዊ ኢዮቤል ከተብዕል እያ።

ነዛ ሓወልቲ መሊሱ ክብሪ ኣብ ርእሲ ክብሪ ዚውስኸላ፡ ኣብ ከተማ ኣስመራ ጥራሕ ዘይኰነትስ፡ ኣብ መላእ ኣፍሪቃ'ውን ብጥንታውነታ ቀዳመይቲ ከይኮነት ኣይክትተርፍን እያ ዚብል ግምታት ኣሎ።

መደምደምታ

ነቲ ኣብ ልበይ ዘይነበረ፡ ግን ብሳፊራ ፕረስ ኣለዓዒሉ፡ ብዛዕባ እዛ ሓወልቲ ናይ ኣቦይ ክጽሕፍ ዝገበረ ኣምላኽ ምስጋና ይኹኖ። ንጋዜጠይና ሳምሶን ከኣ ስለ እቲ ኩሉ ዝገብሮ brain storm ኣዝየ ኣድንቆ።

ኣብ መወዳእታ፡ እዚ ሓወልቲ ሓደ ካብቶም መስሕብ በጻሕቲ ወይ ቱሩስት እዩ ክንብሎ ንኽእል። ብዓለም ደረጃ፡ ብፍላይ ካብ ምዕራባዊ ዓለም ዝመጹ፡ ነዚ ዓቢይን ፍሉጥን ቅዱስ ዘይፈልጥ ዳርጋ የለን ክንብል ንኽእል።

እቲ ብእሴ-ሰላም (ናይ ሰላም ሰብ) ተባሂሉ ዚፍለጥ ቅ.ፍራንቸስኮስ፡ መጋበርን ሰባኽን ሰላም ጥራሕ ዘይኮነስ፡ ብርእሱ ናብ ሰላም ተለዊጡ ዝነበረ ሰብ እዩ። ንዕኡ ክትርኢ እንከለኻ ሰላም ትርኢ፡ ስሙ ክትሰምዕ ከለኻ ሰላም ትሰምዕ፡ ንዕኡ ክትዝክር ከለኻ ሰላም ትዝክር፡ ኮታስ ኩልንትናኡ ናብ ሰላም ዝተለወጠ ሰብ እዩ ነይሩ።

ሎሚ ከኣ እዚ ከየቋረጸ ሰላም ዚዝምር ሰብ፡ ኣብ ማእከል ከተማና፡ ጸሓይን ንፋስን ዝናብን ዶሮናን ተጻዊሩ፡ ለይትን ቀትርን ከይረብረበ ኣእዳዉ ዘርጊሑ፡ ክባርኸናን ክጽልየልናን ሰላም ክህበናን እንከሎ፡ ነስተውዕሎ ዶ ንኸውን፧፧፧፧

ለቡ፡ እዙ ጽሑፍ ንውሕ ዝበለ ይመስል። ካብ ኣነ ጽሑፍ ዝቆራርጽ፡ ኣንባቢ ጊዜ እናቆራረጸ፡ ኣብ ዘዝጥዕሞ ከንብቦ ይሓይሽ ብዝብል ኣተና እየ፡ ከም ዘለዎ ብምሉኡ፡ ኣብዚ መጽሓፊ-ገጻት ጻ/ሻሕ ኣቢለ ዘርጊሐዮ ዘሎኹ።

ኃው እምነቱ ካሕሳይ
ኣስመራ-ሳን ፍራንቸስኮ
08.08.2026
https://www.facebook.com/people/Abba-Em ... 109495484/