http://www.danielkibret.com/2012/05/225-197.html ይህ የዲ/ን ዳንኤል እይታ ካህናተ-ደብተራን በተመለከተ ነው
https://mereja.com/tv/watch.php?vid=02e69105b ይህ ለዲ/ን ዳንኤል ክብረት ከሃብታሙ አያሌው የተለገሰ ምክር ነው
ይህ ደግሞ ስለ 'ካህናተ ደብተራ' ለትግርኛ ተናጋሪዎች የቀረበው ግርድፍ የትግርኛ ትርጉም ነው። ዕውቀት ነጻ ያወጣል!
Meleket wrote: ↑29 Nov 2018, 08:58እዚ ‘ካህናተ ደብተራ” ዚብል ትምህርቲ ብዲያቆን ዳንኤል ክብረት ዝተጻሕፈ ኢዩ። ንህና ድማ እዋናውነቱ ኣስተማቒርና ናብ ቋንቋና መሊስናዮ ኣሎና። እስከ በሉ ነፍስወከፍና ካብ ሰሜን ክሳብ ደቡብ ካብ ምዕራብ ክሳብ ምብራቅ ዘሎና ኩልና ነፍስና ንፈትሽ ደቂ ዓበይቲ! ሰናይ ንባብ።
“ካህናተ ደብተራ”
“ብዘይካ እቶም ደባትር እትብሃሉ ነዚ ኩሉ ጸይቂ መን’ዶ ጌርዎ ኢዩ፧ ተመስግንዎ፣ ትውድስዎ፣ ከማኻ መን’ዶ ኣሎ ኢዩ፧ ትብልዎ፤ ከማኻ ወትሩ ዕውት መን’ዶ ኣሎ ኢዩ፧ ከማኻ ለጋስ’ከ መን’ዶ ኣሎ’ዩ፧ ከማኻ መጽዋቲ ብጭራሽ ኣይተራእየን! ትብልዎ። ከምዚ ጌርኩም ከተመስግንዎ ከለኹም ከኣ ኣብ ልዕሊ ኅጢኣት ኅጢኣት ይውስኽ።”
ነዚ ቃል ቅድሚ ሸውዓተ ሚእቲ ዓመታት ዝተዛረበ እቲ ገዲም ተጋዳላይ ኣቦ ማለት ኣባ በጸሎተ ሚካኤል በዓል ደብረ ጎል ኢዩ። ንጉሥ ዓምደ ጽዮን ወጻኢ ካብ ሕጊ ክርስትና ንሰበይቲ ኣቦኡ ስለዘእተወ ከም ዮሓንስ መጥምቕን ከም ዮሓንስ ኣፈወርቅን ከይፈርሐን ከይሓፈረን ትክ ንትኽ ስለዝገሰጸ ማእለያ ዘይብሉ መኸራ በጺሕዎ። ተገሪፉ፣ ተኣሲሩ፣ ተሰዲዱ’ዉን።
ኣቐዲማ ሰይቲ ንጉሥ ዝነበረት ድኂሩ’ውን እቲ ንጉሥ ንሓደ ካብ ወተሃደራቱ ዚሃባ ሓንቲ ሰበይቲ ነበረት። እዛ ሰበይቲ ነቲ ከርፋሕ ሕይወታ ንዒቓ ንስሓ ብምእታው ሥጋ ወደሙ ተቐበለት። ንጉሥ ዓምደ ጽዮን ድማ “ኬድኩም ኣምጽእዋ፤ ኣብ መደቀሲየይ ድማ ከርኽሳ ኢየ” ቢሉ ብድፍረት ተዛረበ። መልዕኽተይና ናብታ ሰበይቲ ኪከይድ ከሎ ንሳ ከኣ ብወገና ናብ ኣቡነ በጸሎተ ሚካኤል መልእኽተይና ለዓኸት።
እቶም ልዑኻት መልዕኽቲ እታ ሰበይቲ ሒዞም ናብ ኣቡነ በጸሎተ ሚካኤል ምስ ኣብጽሑ፣ እቶም ኣቡን ከምዚ በልዎም “ተንሥኡ እዞም ደቀይ፣ እግዚኣብሔር ምእንቲ ኪዓዪይ ንለምኖ። ብዘይካ ክዳን ውሽጥኩም ኩሉ ኣውጽእዎ። ኣብ ቅድሚኡ ተደፊእና’ውን ብልቢ ንለምኖ”። ምሉዕ ለይቲ ብንብዓትን ስግደትን፣ በጸሎትን ማዕጠንትን ንእግዚኣብሔር ኪልምኑ ሓደሩ። ገሊኡ ሰብ ኪበኪን ኪነብዕን ከሎ ንምድሪ ብንብዓቱ ዜርሕስ ኣሎ። ገሊኡ ኪሰግድ ከሎ ድማ ብስግደቱ ንምድሪ ዜጎድጉድ ኣሎ። ገሊኡ ድማ ብምሒር ሓዘን ኣፍ ልቡ ኪወቅዕ ከሎ ክሳብ ርሑቅ ዚስማዕ ኣሎ። ገሊኡ ድማ ማዕጠንቲ ብምግባር ኪዓጥን እንከሎ ብብዝሒ ንብዓቱ ነቲ ሓዊ ናይ ማዕጠንቲ ዜጥፍእ ኣሎ።
ሳላ እዚ’ ኩሉ ልባዊ ጸሎት፣ ለይቲ እቲ ንጉሥ ብርቱዕ ሕማም ሓመመ። ነፍሱ’ውን ኪትወጽዕ ደለየት። ሽዑዑ መሳርሕቱን ኣማኸርቱን ቀረብዎ። ንሱ’ውን “እዚ ሕማመይ ብሰንኪ መን ከምዝለገበኒ ፈሊጠዮ ኣሎኹ፤ እዚ ኩሉ ዝመጽኣኒ ብሰንኪ ነታ ጓል በጸሎተ ሚካኤል ከርክሳ ቢለ ብምሕሳበይ ኢዩ። ሕጂውን ቀልጢፍኩም ናብኡ ኪዱ’ሞ ይቕረ ኪብለኒ ሃብሩለይ።” ብምባል ኣብ ውሽጢ ቤተመንግሥቱ የገልግሉ ንዝነበሩ ካህናት ለኣኾም።
እቶም ካህናት’ዉን ናብ ኣባ በጸሎተ ሚካኤል ምስበጽሑ፣ አባ በጸሎተ ሚካኤል “ተንሥኡ’ዞም ደቀይ፣ ጸሎትና እግዚአብሔር ተሰሚዑዎ ኢዩ። ክዳውንትኩም ምለሱ፣ ልዑካት እቲ ንጉሥ መጺኦምና ኣለው።” ብምባል ሓበሩዎም። እቶም ኣብ ጸሎት ተጸሚዶም ዝነበሩ ደቆም’ዉን ተንሲኦም ካብ መቅደስ ኪወጽኡ ከለው፣ ካብ ንጉሥ ተላኢኾም ንዝመጽኡ መልዕኽተይናታት ረኸብዎም። መልዕኽተይናታት ንጉሥ’ውን መልዕኽቶም ንኣባ በጸሎተ ሚካኤል ኣቕረቡ። ኣባ በጸሎተ ሚካኤል’ውን “እግዚአብሔር ይቕረ ይበለልካ በልዎ” ብምባል ሓበርዎም። ነቶም ኣገልገልቲ ካህናት ናይ ንጉሥ ግን ኣበርቲዖም ነቐፍዎም።
ኣባ በጸሎተ ሚካኤል ዝወቐስዎም ካህናት እቲ ዘመን “ካህናተ-ደብተራ” ይበሃሉ ነበሩ። እዚ ስያሜ ዝተወሃቡ፡ ኣብ ውሽጢ ቤተመንግሥት ንጉሥ ንእትርከብ፡ ኣብ ድንኳን ንትርከብ ቤተክርስትያን የገልግሉን ይዓጥኑን ስለዝነበሩ ኢዮም። ናይቲ ግዜ ነገሥታት ካብ ሃገር ናብ ሃገር ይዘዋወሩ ስለዝነበሩ፡ ቤተክርስትያኖም ኣብ ውሽጢ ድንኳን ኢያ ዝነበረት። ኣብ’ቲ ድንኳን ዜገልግሉ ድማ ካህናት ይምደቡ ነበሩ።
ጠባይ ኣብ ከምዚ ዓይነት፡ ኣብ ጥቃ ቤተመንግሥቲ ዘላ ናይ ድንኳን ቤተክርስትያን ዜገልግሉ ካህናት ድማ፡ ኣብ ካልእ ቦታ ካብ ዜገልግሉ ካህናት አዚዩ ዝተፈልየ ነበረ። እዞም ካህናተ ደብተራ፡ ኣዚዮም ዚልለዩሉ ጠባያት ነበሮም። ፋልማይ ጠባዮም ኣብ ውሽጢ ገዳም ምስ ዚነብሩ ቅዱሳን ኣበው ዘይሰማምዑ ምዃኖም ኢዩ። ከም ኣተሓሳስባ ካህናተ ደብተራ፣ ገዳማዊ ህይወት ግዜካ ንከንቱ ተጥፍኣሉን ንርእስኻ ተዐሽወሉን ህይወት ጌሮም ምሕሳቦም ኢዩ። ኣብ ውሽጢ ገዳም ንዝነብሩ ኣቦታት ድማ ትሑታት ብምኳኖም ጥራህ ይንዕቕዎም ነበሩ። ኣብ ልዕሊ እዞም ገዳማውያን ኣቦታት ምውርዛይ፡ ቃል ኩነኔ ምምሕልላፍ ከምኡውን ካብ ገዛእ ገዳሞም ከምዚስደዱ ምግባር ናይ ወትሩ ተግባር ካህናተ ደብተራ ኔሩ። ገዳማት ፈተና ኪገጥሞም ከሎ፣ ማኅበረ መነኮሳት ኪበታተኑ ከለው፡ እዞም ካህናተ ደብተራ ስክፍ’ኳ ኣይብሎምን ነበሩ። ገለ ገለ ግዜ ከኣ’ሞ ንኣበው ገዳማት እቶም ወተሃደራት ንጉሥ ኪሓዝኑሎም ከለው፣ ክንድ’ቶም ወተሃደራት ጌሮም እቶም ካህናተ ደብተራ ኣይሓዝኑሎምን ነበሩ። ገዳማውያን መነኮሳት ናብ ቅድሚ ንጉሥ ቀሪቦም ጉዳዮም ንከየሳልጡ ቀንዲ ዕንቅፋትን ጸገምን ዝኾኑዎም ዝነበሩ እዞም ካህናተ ደብተራ ኢዮም ኔሮም።
ካልኣይ ጠባይ ካህናተ ደብተራ ንኩሉ ጉዳይ ብዓይኒ ሥጋዊ ጠቅሚ ጥራይ ምጥማቶም ኢዩ። ሥርዓትን ሕግን ቤተክርስትያን፣ ከምኡ’ውን ቁጠዐን መቕጻእቲን እግዚአብሔር ኣይረአዮምን ነበረ። ካብ መዓዲ ንጉሥ እናተመገቡን ተረፍ መረፍ እናኣራረዩን፣ ብባርኖስን ቃልን ንጉሥ እናተሸለሙ ስለዚነብሩ፣ እቲ ዚሰርሕዎ ዘበለ ኩሉ ነቲ ዝግብኦም ዘይኾነስ፡ ነቲ ምግቢ ዚረክቡሉ ጥራይ ኢዩ። ኣብ ቤተመንግሥቲ ንዝረኽብዎ ክብርን መዓድን ንከይስእኑ ንዝኾነ ይኹን ኢሃይማኖታዊ ዝኾነ ተግባር ካብ ምፍጻም ኣየድሐርሕሩን።
ከምቲ ኣብ ገድለ ኣቡነ ፊልጶስ ዘደብረ ሊባኖስ ተሰኒዱ ዝርከብ፣ ንዓምጸ ጽዮን ከማኡ’ውን ንወዱ ሰይፈ ኣርእድ ቅኑዕ ዘይኾነ ትምህርቲ ምሂሮም ከምዚጋገዩ ዝገበርዎም ካህናተ ደብተራ ኢዮም። ኣቡነ ፊልጵስ ዘደብረ ሊባኖስ ናብ ዓምደ ጽዮን ብምኻድ ስለምንታይ ነዚ ገበን ማለት ንሰይቲ ኣቦኡ ከምዘእተወ ምስ ሓተትዎ “ፈላጣት ዚኾኑ ካህናት፣ ንኣአ እንተዘየእተኻ ወይ እንተዘይተመርዓኻ መንግሥትኻ ኣይኽጸንዕን ኢዩ ስለዝበሉኒ ኢዩ” ዝበሎም። ሓደ ካብቶም ካህናተ ደብተራ ዝነበረን ክፍቶ ቢሉ ዘውደኽድኽ ዝነበረ ዘኣማኑኤል ዝተባህለ ሰብ ድማ ድሕሪ ንጉሥ ዓምደ ጽዮን ንዝነገሠ ንሰይፈ ኣርእድ ብተመሳሳሊ ጌጋ ኣጋግይዎ ነበረ። “ድሕሪ ገለ እዋናት’ዉን ዘኣማኑኤል ዚተባህለ ሰብ ተሥኣ። እዚ ድማ ብሽም እምበር ብግብሪስ ኣይኾነን፤ ነቲ ንጉሥ’ውን ከም’ዚ ብምባል ኣጋገዮ ‘ንስኻ ንጉሥ ስለዝኾንኻ ብሓንቲ ሰበይቲ ጥራሕ ኪትድረት ግቡእ ኣይኾነን፣ ንጉሥ ክሳብ ሠለስተ ኣንስቲ ኪምርዖ ወይ ኬእቱ ትእዛዝ ኢዩ ቢሉ መሃሮ” (ገድለ አቡነ ፊልጶስ፣ ገጽ 225)
ካህናተ ደብተራ ንንጉሥ ዘሓጉስ ወይ ንረብሃኦም ዜገድሶም እንተደኣ መሲልዎም ብኪንየው ንጉሥ ከይዶም ግፍዒ ካብ ምፍጻም ኣይዕገቱን ነበሩ። ኣብ ዘመነ መንግሥት ሰይፈ አርእድ ተመሳሳሊ ጌጋ ከምዝተፈጸመ ርእዮም ኣበው ካብ ዝተፈላለየ ኣንፈት መጺኦም ምስገሰጽዎ ኣቡነ አኖሬዎስ’ውን ንንጉሥ ብኃይሊ ኣሰምዕዎ። ነዚ ብኣንክሮ ዚርኢ ዝነበረ ባራኪ ማዕድ ንጉሥ ወይ ቄስ ሐፄ ድማ ቅድሚ እቶም ወተሃደራት ነዲሩ ንኣቡነ አሮን ጸፍዖም። እዚ ካህናተ ደብተራ ስለምንታይ ንኣቡነ ኣሮን ከምዝጸፍዖም ገድለ ኣቡነ ኣኖሬዎስ ኬብርህ ከሎ “ብንጉሥ መታን ኪሙገስ ደልዩ ኢዩ” ይብሎ። ሽዑዑ’ውን ኣቡነ ኣኖሬዎስ “ስለምንታይ ትሃርመኒ? ኣብ ክንዲ ሻራ ሰብ ትከውን ሻራ እግዚኣብሔር’ዶ ክትከውን ኣይምሓሸኻን ኔሩ፧” በልዎ ይብል። እቲ ባራኪ ማዕድ ንጉሥ ወይ ቄስ ሓፄ ግን ከምቲ ዝደለዮ ሞገስን ምስጋናን ኣይረኸበን። ብሰንኪ ጌጋ ተግባራቱ ብዝሰዐበ ጓሂ ኣበው፡ ሽዑ ንሽዑ ተቐዝፈ።
ካልእ ጠባይ ካህናተ ደብተራ ድማ ንጻዕዳ ጸሊም ምባል ንጸሊም እውን ጻዕዳ ምባል ኢዩ። ንሓቂ ዝመዝንዋ ብመንጽር ስጋዊ ጠቅሞም ጥራይ ስለዝነበረ ኃጢአት ኪፍጸም እናረኣዩ ጽድቂ ኢዩ ይብሉ፣ ግፍዒ ኪፍጸም እና ክርእዩ ቅድስና ኢዩ ምባል ይፍተዎም ነበረ። ነገሥታትን መዃንንትን ኣብ ልዕሊ በደል በደል ንኪውስኹ ዝገብሩዎሞ ዝነበሩ እዞም ካህናተ ደብተራ ነበሩ። እዚ ክንዲ ዝኾነ’ውን ኢዩ ናብ ኣቡነ በጸሎተ ሚካኤል ከማልዱ ንዝመጽእዎም ካህናተ ደብተራ “ብዘይካ እቶም ደባትር እትብሃሉ ነዚ ኩሉ ጸይቂ መን’ዶ ጌርዎ ኢዩ፧ ተመስግንዎ፣ ትውድስዎ፣ ከማካ መን’ዶ አሎ ኢዩ ትብልዎ፤ ከማካ ወትሩ ዕውት መን’ዶ አሎ ኢዩ፣ ከማኻ ለጋስ’ከ መን’ዶ አሎዩ፧ ከማኻ መጽዋቲ ብጭራሽ ኣይተራእየን! ትብልዎ። ከምዚ ጌርኩም ከተመስግንዎ ከለኹም ከኣ ኣብ ልዕሊ ኅጢአት ኅጢአት ይውስኽ።” ዚበሉዎም በዚ ምክንያት ኢዩ።
ገሊኦም ወገናት ካህናተ ደብተራ ሽመት እምበር እምነት ኣይነበሮምን። ኣብ ገድለ ኣቡነ ኣኖሬዎስ ከምዝተገልጸ ግብጦን ኣብ ዝተባህለ ስፍራ ንቡረ እድ ተባሂሉ ተሸይሙ ዝነበረ ሓደ ካብ ወገን ካህናተ ደብተራ ነበረ። እዚ ሰብ እዚ ወላ ሓንቲ ከይገበሮ እንከሎ ንኣቡነ አኖሬዎስ ይጸልኦ ነበረ።
ሓደ መዓልቲውን “እንታይ ትሰርሕ ከምዘሎካ ንኽርኢ ክመጸኻ ኢየ” ብምባል ለኣኸሉ። እዚ ሰብ እዚ ሽመትን ሽልማትን ደልዩ ንቡረ እድ ኮነ እምበር ንእግዚአብሔር ብጭራሽ ዜምልኽ ሰብ ኣይነበረን። ገድለ ኣቡነ ኣኖሬዎስ ከምዚ ይብል “እቲ ቅዱስ ኣብ ገዳሙ እንከሎ ሓደ ጳውሎስ ዝስሙ ብትዕቢት ዝተነፍሓ ሰብ “መጺኤ ሥራሕካ ክርእይ ኢየ” ብምባል መልእኽቲ ለኣኸሉ። እቲ ሰብ ግን ብስም መነኾስን ንቡረ እድ ዝኾነ ብንጉሥ’ዉን ዝተሸመ ሰብ ነበረ። እዚ ሰብ እዚ ንቤተ ክርስትያን ኣጥፍኣ። ንመእመናን’ውን ኣዚዩ ከምዝሓዝኑ ገበሮም። እቲ ልዑክ ሰብ’ውን ነኣቦና ንኩሉ ፍጻሜታት ነገሮም። ኣቦናውን ነዚ ሰሚኦም “ሓጥእ ከም ጽሕዲ ሊባኖስ ልዕል ልዕል ኪብል ረኣኵዎ፤” ቢሎም ተዛረቡ። ምእንቲ እዚ ሰብው’ን ናብ እግዚኣብሔር ኣእወዩ። እቲ ዕቡይ ድማ ብሰንኪ ትዕቢቱ ሞት መጸቶ። ንቕዱስ ኣቦናውን እቲ ዕቡይ ከምዝሞተ ነገሩዎም። ንሶም’ውን “ምስ ተመለስኹ ግን ሰኣንኩዎ” በሉ። ቀጺሎም’ውን “ብሰንኪ እንታይ’ከ ሞተ?” ቢሎም ሓተቱሉ። ንሳቶም’ውን “ካልኦት ኣማልኽቲ የምልኽ ነበረ” በልዎም። ቅዱስ ኣቦናውን መሪር ብኽያት በኸዩ። “ደለኹዎ ንስፍራኡ ግን ክረኽቦ ኣይከኣልኩን” በሉ።
ገሊኣቶም ካህናተ ደብተራ ንክህነት ዕለታዊ እንጌራ ዝረኽቡሉን ንኽብርን ዝናን እምበር ብእምነት ዘገልግልዎ ጸዋዕታ ጌሮም ኣይቆጽርዎን ነበሩ። ርስትን ጉልትን ዚረኽቡሉ፣ ኣብ ማዕዲ ንጉሥ ኪቕረቡ ዕድል ስለዚኸፍተሎም፣ ክዳንን ማዕረግን ኪረኽቡ ስለዝሕግዞም በዚን ከምዚን ስጋዊ ነገር ጥራህ ተሳሒቦም ኢዮም ናብ ክህነት ዚኣተዉ።
ካህናተ ደብተራ ንትምህርቲ ቤተክርስትያን እንጌራ ዝማእርሩሉ ክብሪ ዚጎናጸፉልን እምበር ምእንቲ ድሕነት ስለዘይጥቀሙሉ ገለ ገለ ግዜ ንነገሥታት ኣብ ክንዲ ናብ ኣምልኾ እግዚአብሄር ናብ ጥንቁልና ዘእትውዎም ዝነበሩ እዞም ካህናተ ደብተራ ኢዮም ኔሮም። ኣብ ዘመን ዐፄ ዳዊት ንአባ ጊዮርጊስ ዚሟገትዎም ዝነበሩ ብሰንኪ ንጽሕናኦም’ውን ሓሲዶሞም ናብ ዳሞት ዚበሃል ስፍራ ከምዚስደዱ ዚገበርዎም ኣብ ስራሕ ጥንቁልና ዚነጥፉ ዝነበሩ ካህናተ ደብተራ ነበሩ።
ካህናተ ደብተራ ብፍልጠትን ብቅድስናን ካባኦም ጸብለል ይብልዎም ንዝነበሩ ሊቃውንቲ ኣቦታት ኣይፈትውዎምን ነበሩ። ንቤተክርስትያን ከማዕርጉን ኬበልጽጉን፣ ብግቡእ ኪውድቡን ኣብ ምስፋሕ ስብከተወንጌል ዚነጥፍ ዘበለ ሰብ ኩሉ ጸላዒኦም ኢዩ። ግብጻዊ ጳጳስ ኣቡነ ያዕቆብ ንኣቡነ ፊልጶስ ኤጲስ ቆጶስነት ኪሾምዎም ምስተበገሱ፣ ኣትሪሮም ዝተቃወሙ ካህናተ ደብተራ ከምዝኾኑ ገድለ ኣቡነ ፊልጶስ ይሕብረና “ከምዚስ ኣይትግበር፤ ከመይ ኢሉ ኣብ ሓደ ሃገር ክልተ ኤጲስ ቆጶስ ይግበር? ሕዝቢ ኪመቃቀል ኢዩ፤ ናትካ’ውን ክብርኻ ኪጠፍእ ኢዩ፤ ምድረ ሸዋ እንተኾነት ክፋል መንግሥቲ ኢያ፤ ከመይ ኢልኻ ኢኻ ከምዚ ትብል ዘሎኻ፧ ድሕሬና ዚመጽእ ትውልዲ’ውን ነዚ ኣይፈቅድን ኢዩ፤ ቅድሜና ከምዝነበረ ኢዩ ኪከውን ዘሎዎ። ስለምንታይ ቀዳሞት ኣቦታትና ንዘይገበርዎ ንገብርን ንዛረብን” (ገድለ ኣቡነ ፊልጶስ፣ ገጽ 197)
ኣብቲ እዋን ዝነበረ ደቡባዊ ክፋል ካብ ኣሰርተ ክልተ ተከፊሉ ኣሰርተ ክልተ ወንጌላዉያን ንዝሾመ ብሸነኽ ሰሜን’ውን ንሓዋርያት ዚዋፈረ ንግብጻዊ ኣቡነ ያዕቆብ እቶም ካህናተ ደብተራ ኣይፈተውዎን። ምስፋሕ ስብከተ ወንጌልን ምድላብ ፍልጠት ሕዝቢ ንግብዝነቶምን ስራህ ኅጢኣት እዞም ካህናተ ደብተራ ዕንቕፋት ኪከውን ኢዮም ቢሎም ሓሲቦም። ብሰንኪ እዚ’ውን ነዚ ውዳበ ጉስነት ስብከተ ወንጌልን ኪድምስሱ መደቡ። ኮነ ድማ ሓደ ካብቶም ካህናተ ደብተራ ዝኾነ ዘአማኑኤል፣ ነቲ ንጉሥ ንኣቡነ ያዕቆብ ናብ ግብጺ ንኪመልሶ መዓዶ። ኣቡነ ያዕቆብ’ውን ብጊድኡ ንዘኣማኑኤል ስለዝወገዞ ብደዌ ተወቂዑ ሞተ። ኣቡነ ያዕቆብ’ውን ናብ ግብጺ ተመልሰ።
ኣብ ታሪኽ ቤተክርስትያን ናይቶም ሓቐይና ኣበዋት፣ ሊቃውንትን ካህናትን ኣገልግሎትን ትሩፋትን ንቤተክርስትያን ምእንቲ ከየሰስና ዜሰናክሉን ሓቂ ንከይግለጽ ዕንቅፋት ዚኾኑ ካህናተ ደብተራ ኢዮም። ክርዳድ ወይ ጻሕያይ ምስ ስርናይ ክሳብ ግዜ ቀውዒ ብሓንሳብ ከምዚጸንህ ጠባይን ኣሰራርሓን ካህናተ ደብተራ ሎሚ’ውን ንቤተክርስትያን ኬናውጻ ይነብር ኣሎ። ከም ኣቡነ ኣሮን፣ ኣቡን በጸሎተ ሚካኤልን ኣቡነ ፊልጶስን ኣቡነ ኣኖሬዎስን ዝኣመሰሉ ጀጋኑ ክሳብ ትረክብ!
ብዲያቆን ዳንኤል ክብረት
መበቖላዊ ጽሑፍ ኣብዚ ይርከብ http://www.danielkibret.com/2012/05/225-197.html
ሃየ’ሞ ስራህ ካህናተ ደብተራ ጌረ እፈልጥ’ዶ፧
ካህናተ ደብተራ ዚኾኑ ሰባት ኬጓንፉኒ ከለው እንታይ እገብር፧
ቀንዲ ጸገም ዞባና ዝርጋን ወይ ምጽቓጥ ካህናተ ደብተራ ኪከውን’ዶ ይኽእል፧
ነዚ ርኡይ ጸገም ንምፍዋስ ኣነ ብውልቀይ እንታይ ኪገብር እኽእል፧ ወዘተ እናበልና ንቕሓትናን ንቕሓት ኅብረተሰብናን እስከ ነበርኽ! ሰሰናዩ እናተመነኩልኹም!