28ga6cctg9tns2mh06h1fd9 ·
ዓለምለኻዊ ምትእኽኻብ ምሁራት ደቂ ትግራይ (GSTS)፦ "ዘተ ሰላም ኣብ ናጽነት ትግራይን መሰል ምጥቃም ባሕርን'ዩ ዝሙርከስ"
=====
ሕልምታት ጃንዳ ማለሊት መወዳእታ ከም ዘይብሉ መድረኽ ድሕሪ መድረኽ ተመስኪሩ'ዩ። ካብ 04 ሕዳር 2020 ጀሚሩ ዘጋጠመ ፍጻመታት ብተረተር ምስ እንምልከቶ፡ ዕብዳን ልሂቃን ጃንዳ ማለሊት፡ ኣብዚ ሕጂ እዋን ኣብ ኢትዮጲያ ሓዊ ወሊዑ ጥራይ ዘይኮነ፡ ኣብ ዞባ ቐርኒ ኣፍሪቃ'ዉን ከቢድ ናይ ጥፍኣት ደበና ንኸንጸላሉ ኣገዲዱ ይርከብ። 1 ዓመት ድሕሪ ከቢድ ዕንወት፡ ሕጂ'ዉን ልሂቃን ዓድዋ ኣብ ሕልሚ ምንጋርጋር መሪጾም ይርከቡ።
ዓለምለኻዊ ምትእኽኻብ ምሁራት ደቂ ትግራይ (Global Society of Tigray Scholars) ተባሂሉ ዝጽዋዕ ኣብ ደገ ዝነጥፍ ጉጅለ፡ ሎሚ ናብ መንግስታት ኣሜሪካ፡ ሕብረት ኤዉሮጳ፡ ዉድብ ሕቡራት ሃገራት ኣብ ዝሰደዶ መልእኽቲ (ጠለብ)፡ እዘን ዝስዕባ ኣገደስቲ ነጥብታት ከም ቕድመ ኩነት ንዝርርብ ሰላም ኣቕሪቡ ኣሎ።
1- ሰራዊት ኣምሓራ፡ ሰራዊት ኢትዮጲያ፡ ሰራዊት ኤርትራ ናብቲ ቕድሚ 04 ሕዳር 2020 ዝነበሩዎ ቦታ ክምለሱ- እዚ ማለሊት ሰራዊት ኢትዮጲያን ኣምሓራን ወልቃይትን ሑመራን ለቒቖም ክወጹ፡ ሰራዊት ኤርትራ ድማ ንባድመ ለቒቑ ክወጽእ።
2- ህዝቢ ትግራይ ዕድሉ ባዕሉ ብረፈረንዱም ክዉስን። ብመሰረት ቑዋም 1995፡ ህዝቢ ትግራይ ልክዕ ከም ካልኦት ህዝብታት ኢትዮጲያ መሰሉ ክዉስን ክፍቀዶ።
3- TDF (ሓይልታት ምክልኻል ትግራይ)፡ ኣብ ዞባ ቐርኒ ኣፍሪቃ ሰላም ንምዉሓስ ዓንዲ ሕቖ ኮይኑ ከገልግል ከም ዝኽእል ክእመነሉ። ሃገራት ምዕራብ'ዉን ነዚ ሓቂ ኣሚነን፡ ምክልኻል ትግራይ ንምድልዳል ክተሓጋገዛ።
4- ድሕሪ ናጽነት ትግራይ፡ ብመሰረት ዓለምለኻዊ ሕጊ፡ ትግራይ መሰል ምጥቃም ባሕሪ ክሕለወላ። እዚ ማለት ትግራይ ናጽነታ ምስ ረኸበት ባሕሪ ኤርትራ ክትጥቀም መሰል ክወሃባ ኣለዎ።
እዘን 4 ኣገደስቲ ነጥብታት፡ ዉሑዳት ካብተን ከም ጠለብ ቐሪበን ዘለዋ እየን። ከምቲ ክምሰል ደርሆ እንተሓለመት ጥረ ምረ ከም ዝበሃል፡ ዓለምለኻዊ ምትእኽኻብ ምሁራት ደቂ ትግራይ ድማ ኣብ'ቲ "ናይ ደቂቕ ፍሩይ" ዝብል ኣምር ፕ/ት ኢሰያስ ኣፎርቂ ከንገርግሩ መሪጾም ይርከቡ።
