ጉጂለ ኢሳያስ ንኤርትራ ብግዳም ዝተፈንፈነት ብውሽጢ ድማ ዝባደመት ገይሩ ኣብ ሓደጋ ኣሳጢሕዋ ይርከብ፤ እቲ ዝድለ ኣራሚ ለውጢ ናይ ስርዓት ምእላይን መተካእታ ምቋምን እዩ
ኣብ ኤርትራ ዘሎን ንነዊሕ ዝጸንሐን ኩለመዳያዊ ፖለቲካዊ ዕልቕልቕ ኣብዚ ዘይርጉእ እዋን ብጸቢብ መረዳእታ ክተሓዝ የድሊ። ህግደፍ ወይ እቲ ብሽም ህግደፍ ስልጣን ብሒቱን ባዕሊጉን ዘሎ ጉጂለ ኢሳያስ ብምልኻዕን ምጥቃንን ዝዝወር ፖለቲካዊ ስነ መጎት ተወንዚፉ እዩ ንህዝና ዘናቑት።
ብዓንደ ርእሱ ነቲ ዝቐርበሉ ክስታት ካብ ምሕደራዊ ሕቶ ናብ ሉኣላዊ ሕቶ ወይ ድማ ግዝኣታዊ(ሃገርነት) ሕቶ እናቐያየረን ብታሕቲ ታሕቲ ድማ ኣውራጃዊ ቀቢላዊ ወይ ሃይማኖታዊ ትሕዝቶታት እናለቀበ የሳውሮ። እዚ ንውሽጢ ዝውርውሮ ቐስቲ ንግዳም ስለዘየገልግል ድማ ንደገ ዝውርውሮም መደናገሪ ሓሳባት ምስ ርእሰ ምርኮሳ ወይ ምስ ኣሰላልፋ ዓብለልቲ ሓያላን ዓለምና ዝጓነጽ ገይሩ ይትንትን።
እዚ ኣካይዳ እዚ ሺሕ እኳ ዕምሪ ናይቲ ስርዓት ከንውሕ አንተሓገዘ ንሃገርና ኤርትራ ግን ብግዳም ዝተፈንፈነት ብውሽጢ ድማ ዝባደመት ገይሩ ኣብ ሓደጋ ኣሳጢሕዋ ይርከብ። ሎሚ ኤርትራ ትርከበሉ ኩነታት ኣፋፌት ኩለንተናዊ ዕንወትን ወተሃደራዊ ረጽምን እዩ ምባል ድማ ምግናን ኣይከውንን። ስለዚ ድማ ንተቓውሞ ውድባትን ውልቀ ሰባትን ጥራይ ዘይኮነ በቶም ነቲ ስርዓት ንድግፍ ኢና ዝብሉ ባእታታት እውን ጉዳይ ኤርትራ ጉዳይ ጉጉይ ምሕደራን ንምእራሙ ዝድለ መፍትሕን እምበር ግዛታዊ ወይ ሉአኣላዊ ሕቶ ዘኽተተ ከምዘይኮነ ኣነጺሩን ብዕቱብን ክሕዞ ዝግባእ እዩ።
እቲ ብመግዛእቲ ዝረቐቐ ካርታ ድሒሩ ድማ ብዶባዊ ምኽላል ዝተፈጸመ ግዘኣታዊ ዶባትን መሬታዊ ሓድነትን ኤርትራ ኣብ ሕቶ ዘእተወ ዉዱብ ወይ ዉልቀ ሰብ የለን። ስለዚ ድማ ዝኾነ ይኹን ናብዚ ዘሳብብ ምልኻዕ ናይቲ ስርዓት ክንጸግ ይግባእ።
ቀጺሉ ድማ ህዝቢ ኤርትራ ኣብዚ ናይ ታሪኽ ህሞት ገዛእ ርእሱ (ዓይነት ስርዓት ብዘየገድስ) ብገዛእ ሉኣላውነቱ የማሓድር ኣሎ። በዚ ድማ ናይ ሉኣላውነት ለውጢ ወይ መተካእታ ከም ሕቶ ኣልዒሉ ዝቃለስ ውዱብ ይኹን ውልቀ ሰብ የለን። ኣብዚ ዝግበር መላኽዒ ምስምስ ናይቲ ስርዓት ክንጸግ ይግባእ።
እቲ እንኮ ፖለቲካዊ ሕቶ ኤርትራውያን ድማ ምሕደራዊ ሕቶ እዩ። ስለዝኾነ ድማ ምሕደራዊ ሕቶ ብውሽጣዊ ምሕደራዊ ለውጢ ስለዝእለ ምስ ግዘኣታዊ (ሃገርነት) ወይ ሉኣላዊነት ሕቶ ብፍጹም ዝላገብ ኣይኮነን። እቲ ሕቶ ምሕደራ ኣዝዩ ግዜ በሊዑ እቲ ስርዓት ኣብዘይጽገነሉ ብርኪ ስለዘንቆልቆለ እቲ ዝድለ ኣራሚ ለውጢ ናይ ስርዓት ምእላይን መተካእታ ምቋምን እዩ።
ሓደጋ ምትእትታው ግዳማውያን ሓይልታት ንቡር ተርእዮ ብምዃኑ እንተተኻእለ ንምግታኡ እንተጽበበ ድማ ንምቁጽጻሩ ክሕግዝ እቲ ምቋም መንግስቲ ኣብ ስደት ሓደ ስሉጥ ኣማራጺ እዩ። ክሳብ ዝኾነ ዝኸውን ግን ምስዚ ዝምዕብል ዘሎ ኩነታት እቶም ምስቲ ስርዓት ዝደናገጹ ባእታታት ንንጹር ምሕደራዊ ሕቶ ፍትሕን ርትዕን ኤርትራውያን ናብ ሕቶ ግዝኣታዊ ወይ ሉኣላዊ ብምልኻዕ ነቲ ዝኸይድ ዘሎ ሃልሃልታ ነዳዲ ኣይትኽዓውሉ። ብሕልናን ብግብርን ንርእስኹም እውን ናብ ውድቀትን ጣዕሳን ከየእትወኩም።
http://awate.com/eritreas-bittersweet-m ... 5402868858