ክልተ ሰብ መዚ ጊዚያዊ ምምሕዳር ትግራይ፡ ካብ ስልጣኖም ተኣልዮም (BBC Tigrigna)
ኣብ ጊዚያዊ ምምሕዳር ትግራይ ከገልግሉ ዝጸንሑ፡ ምክትል ሓላፊ ቢሮ ርክብ ህዝብን መንግስትን ኣይተ ዓምዶም ገብረስላሴ ከምኡ ድማ ሓላፊ ቢሮ ኮንስትራክሽን፣ መንገድን ትራንስፖርትን ዝነበሩ ኣይተ ኣሉላ ሃብተኣብ (ኢንጅነር) ካብ መዝነቶም ከምዝተኣለዩ ተገሊጹ።
ብዛዕባ'ዚ ቢቢሲ ዘዛረቦ ኣይተ ዓምዶም ገብረስላሴ፡ ብሓላፊ ጊዚያዊ ምምሕዳር ትግራይ ኣይተ ሙሉ ነጋ (ዶክተር) ካብ ስርሖም ከምዝተሰናበቱ ከምዝተነገሮምን፡ ካብ ትማሊ ዓርቢ ጀሚሩ ስርሖም ደው ከብሉ ዝገልጽ ደብዳቤ ከምዝበጽሖምን ተዛሪቡ።
ኣይተ ዓምዶም፡ ኣብ ሚድያታት ዝሃቦም መግለጽታት ከምኡ ድማ ብውድብ ዓረና ዝወጸ መግለጺ ካብ መዝነቱ ክእለ ምኽንያት ከምዝኾኑዎ ይገልጽ።
ውድብ ዓረና ኣብ ቀረባ እዋን፡ ኣብ ኲናት ትግራይ ንዝተፈጸሙ ገበናት ዘጻሪ 'ዘይሻራዊ ኮሚሽን' ክምስረት ዝጽውዕ መግለጺ ምውጽኡ ዝዝከር እዩ።
ዓረና ወሲኹ፡ ሓይልታት ክልል ኣምሓራን ኤርትራን ኣብ ልዕሊ ህዝብን ንብረትን ጉድኣትን ዕንወትን ኣውሪዶም ክብል'ውን ኣብ መግለጺኡ ከሲሱ ነይሩ።
ሓላፊ መንገድን ትራንስፖርትን ዝነበሩ ኣይተ ኣሉላ ሃብተኣብ'ውን ብተመሳሳሊ፡ ብሰንኪ'ዚ ቅልውላው ኣብ ትግራይ ዝወረደ ዕንወት ብምዝርዛር ኣብ ቀረባ እዋን ንሚድያታት ውሽጢ ዓዲ መግለጺ ምሃቡ ዝዝከር እዩ።
Continue reading