Mereja.Forum

[Eripoblikan]

ድሕሪ ናይ ሰላሳ ዓመታት መሪር ደማዊ ቃልሲ፡ ኣብ 24 ጉንበት 1991 ዓ/ም ወነንቲ ነጻን ክብርትን ሃገረ ኤርትራ ክንከውን በቒዕና።

ኣብዚ ከይተደረትና፡ ነቲ ብደምና ዝዓደግናዮ ነጻነት ሃገር፡ ብዓለማዊ ሕጊ ንምውሓሱ ብተወፋይነት ሰሪሕና። ሓቀኛን ቊኑዕን ሃገራዊ ረፌረንደም ብምክያድ፡ መወዳድርቲ ኣልቦ ብዝኾነ ቊጽሪ ናይ ኣድመጽቲ፡ ነጻነት ይሕሸና ዝብል ድምጺ ኣብ ዓለም ኣቃሊሕና፡ ንሃገራዊ ነጻነትና ብማሕበረ ሰብ ዓለም ኣፍልጦ ከም ዝረክብ ጌርናን ነባሪ ዋሕስ ተኺልናን።

ሃገርና ኤርትራ፡ ህዝባ ዝቐስነሉ፣ ብሰላም ወፊሩ ብሰላም ዝምለሰሉ፣ ሃገራዊ ግዴትኡ ምፍጻም ጥራይ ዘይኮነስ፡ ውልቃዊ መሰላቱ`ውን ዘውሕሰሉ ጥጡሕ እዋን ንምብጻሕ ዘኽእለና፡ ሃገራዊ ቅዋም ነዲፍናን ኣጽዲቕናን ናብኡ ዘሰጋግረና ቅጥዒታት ሃገራውን መንግስታውን ምርጫታት ኣዳሊና፡ ግዝያዊ መንግስትን ባይቶን መስሪትና። እንተኾነ ግን፡ `ዘራጊ እንከሎ ጽሩይ ማይ ኣይስተን ከም ዝበሃል፡ ነቲ ንነዊሕ ሓሊምና ብትብዓትን ተወፋይነትን ተጋዲልና ኣብ ዓወት ዘብጻሕናዮ ዕላማታትናን ራኢታትናን ኣብ ሓደጋ ዘእቱ ኲነት ተፈጢሩ።

እወ!! ንዓና መሲሎም ኣብ ቱሽቱሽ ገድልና ዝተጸፍዩ ተዃሉ፡ ናይ በጊዕ ባህሪ ተላቢሶም ኣብ ጉዕዞ ቃልስና ተኣማንነት ኣጥርዮም ላዕለዋይ ቦታ መሪሕነት ክቆጻጸሩ ዕድል ረኺቦም እዮም። እዞም ብኣጻብዕ ዝቑጸሩ ጠላማት፡ ብዓሎቕ ነቲ ንነዊሕ ትጽቢት ዝተገብረሉን ናብኡ ንምብጻሕ`ውን ብሓያል ተወፋይነት ዝተሰርሓሉን ጉዕዞ ናብ ፍትሒ፣ ጉዕዞ ናብ ሕጋውን ህዝባውን ምሕደራ፣ ብዘይ ድልየትና ጨውዮም ንህዝብን ሃገርን ናብ ገደል ዘእቱ ናይ ጫካ ምሕደራ ከተኣታትዉ ኣብ ዝህቕንሉ ዝነበሩ እዋን፡ እቶም ብጉጅለ-15 ዝፍለጡ፥ ቃንዛ ህዝቦም ዘሳቕዮም ምዑታት ጀጋኑ ገዳይም ተጋደልትን ላዕለዎት መራሕትን ናይዛ ውልዶ ሃገረ ኤርትራ፡ ካብ ሓደጋ ጥፍኣትን ጽንተትን ከድሕኑ፣ ባህግን ትምኒትን ህዝቢ መታን ክሕሎ፣ ኣንጻር ጨወይትን መለኽትን ብጋህዲ ክቃወሙ ጀሚሮም።

ዘይከም`ቲ ነቶም ንጻዕዳ ጸሊም እናበሉ ኣዒንትና ክደፍኑና ከንቱ ፈተነ ዝገብሩ ናይ ሎሚ ሕሉፋት መለኽቲ፡ ቀንዲ ሕቶ ናይቶም ላዕለዎት ሓለፍቲ መንግስቲ፡ "ደጊም ኤርትራ ሃገር እያ`ሞ ብሕጊ ጫካ ክንመሓደር የብልናን፣ ተወንዚፉ ዘሎ ሃገራዊ ቅዋም ብህጹጽ ይተግበር፣ ዕድመን ስልጣንን ግዝያዊ መንግስቲ ኣብቂዑ ህዝባዊ ተሳትፎ ማእከል ዝገበረ ፍትሕን ሕግን ዝሕላገቱ ህዝባውን ነባሪን መንግስቲ ኣብዛ ውልዶ ሃገር ይተኸል" እዩ ዝብል ዝነበረ።

እዚ ሕቶ'ዚ፡ ብግዱሳት ሓገራውያን ድኣ ይተሓተት'ምበር፡ ከም ሕቶስ ሃገራዊ ሕቶ እዩ ዝነበረን ክሳብ ሕጂ`ውን ዘሎ። ነዚ ሃገራውን እዋናውን ሕቶ፡ ፈለማ ብወግዒ ነቶም ብቐጥታ ዝምልከቶም ሰበ ስልጣናት፡ ቀጺሉ`ውን ኣብ መንግስታዊ ኣኼባታትን ርክባትን`ኳ እንተ ነበረ፡ ንሕቶ ሰሚዑ ቅኑዕ መልሲ ዝህብ ኣይተረኽበን። ኣብ ክንድኡ፡ ንሓተትቲ ብቓጻ ንምጥፋእ ተንኮላት ክፈሓሱ ምስ ጀመሩ ግና፡ ካልእ ኣማራጺ ስለ ዘይነበረ፡ ህዝቢ ምእንቲ ብወግዒ ክፈልጥን ንመሰሉ ደው ክብልን፡ ህዝባዊ ሕቶኦም ብመገዲ እተን ሽዑ ናብ ህዝቢ ጠቓሚ ሓበሬታ ዝዝርግሓ ዝነበራ ዘይመንግስታውያን ጋዜጣታትን ኣቢሎም፡ ተቓውሞኦም፣ መርገጺኦም፣ ኣረኣእየኦምን ሕቶኦምን ናብ ህዝቢ ከዝርግሑ ጀመሩ።

እቲ ንሃገራውያን ሕቶታት ብጎነጽ ምእላይ ዝኣመሉ ዓንዳሪ ናይ ጥፍኣት ጉጅለ ግን ከም ልማዱ፡ ሕቶ እዞም ምዑታት ሓርበኛታት ሃንሳብን ንሓዋሩን ንምቕሃም ወጢኑ፡ ኣብ መስከረም 18, 2001 ነተን ሕቶታቶም ዘአንገዳ ጋዜጣታት ብምዕጻው፡ ነቶም ሓርበኛታት መራሕትናን ነቶም ሕቶኦም ሕቶ ህዝቢ ምዃኑ ብምርዳእ ብመንገዲ ጋዜጣታት ናብ ህዝቢ ከም ድዝርጋሕ ዝገበሩ ጀጋኑ ጋዜጠኛታት ክሶም ኣብ ዘይሰመዓሉ፡ ስድርኦም ኣብ ዘይርእይሉ፡ ጠበቓ ኣብ ዘይቆጽሩሉን ፍርዲ ኣብዘይረኽቡሉን መጻኢ ዕድሎም በስቢስካ ምሟት ጥራይ ኣብዝኾነ ዘይ ወግዓዊ ኣብያተ ማእሰርቲ ሸንኮለል የብሎም ኣሎ። ምእንቲ እዛ ክብርቲ ሃገር ካብ ንእስነቶም ኣትሒዞም ሕሉቦም ንጹፎም ዝወፈዩ ኣብ ክንዲ ሽልማት ኣብ ጊዜ ዕብየቶም ምዓት ክዘንቦም ምርኣይ ሃየንታ'ዶ ኣይኮነን?

እዞም ምዑታት ጀጋኑና ቀደም ናብ ገድሊ ኢሎም ክወጹ ከለዉ፡ ነዛ ሓንቲ ህይወቶም ወፍዮም ንሕና ብነጻነት ክንነብረላ እንኽእል ሃገር ምምጻ`ዶ ኣይነበረን? ከምኡ እንተ ኾይኑ፡ እቲ ሓቂ ንሳቶም ንመስዋእትን ስቕያትን ወትሩ እተዳለዉ እዮም ነይሮም።

ከምኡ ስለ ዝኾነ ድማ፡ ነዚ ሕቶ እዚ ከልዕሉ ከለዉ ክቡር ዋጋ ከኽፍሎም ምዃኑ ዝሰሓቱዎ ኣይኮኑን። ንምዃኑ ሎሚ ድሕሪ 19 ዓመታት ምስዋር ጀጋኑና ህላወኦም ከመይ ይኸውን? ብህይወት ደኾን ይሕልዉ? እቶም ብህይወት ዘለዉ'ኸ ኣበይ ይህልዉ? ኲነታት ዕለታዊ መነባብሮኦም ካብ ንግሆ ክሳብ ምሸት በብሓንቲ ከመይ ይመስል ኢልናስ ንሓስብ'ዶ? ነዛ ገዛእ ርእስና፡ ኣነ ኣብ ቦታ`ዞም ጀጋኑና እንተ ዝህሉስ ከመይ ምኾንኩ ኢልና ንሓንቲ ካልኢት`ውን ትኹን ሓሲብና`ዶ ንፍልጥ?

እወ!! ን19 ዓመታት ካብ እትፈትዋ ብዓልቲ ቤትካ ወይ`ውን ብዓል ቤትኪ፣ ካብ እትፈትዎም ውሉድካ ወይ ውሉድኪ፣ ካብ ዝሸምገሉን ሓገዝካ ዝደልዩን ወለድኻ ወይ`ውን ወለድኺ፡ ካብ ትፈትዎም የሕዋትካ/የሕዋትኪ ተፈሊኻ/ተፈሊኺ ን19 ዓመታት ተስፋ ኣልቦ ዝኾነ ህይወት እናሕለፍካ/እናሕለፍኪ፡ ሎሚ ደኾን ጽባሕ ደቂ ሃገረይ ብሓድነት ተቓሊሶም መላኺ ብምዕናው ፍትሒ ኣንጊሶም ሓራ የውጽኡኒ እናበልካ/እናበልኪ፡ ነታ ወትሩ ዕጽውቲ ዝኾነት ሽላኻ/ሽላኺ እናማዕዶኻ/እናማዕዶኺ ምውዓል፣ ተስፋኻ/ተስፋኺ ካብ ኣሳሪኻ/ኣሳሪኺ ዘይኮነስ ተስፋኻ/ተስፋኺ ካብ ኣምላኽካን ህዝብካን ክትርኢ እናተመነኻ/እናተመነኺ ተሕልፎ/ተሕልፍዮ መንብሮስ ክንደይኮን መሪር ምኾነ?

ኣስማት እሱራት፥

1. በራኺ ገብረስላሴ
2. ብርሃነ ገብረእግዚኣብሄር
3. ሃይለ ወልደትንሳኤ
4. ጀርማኖ ናቲ
5. ዕቑበ ኣብርሃ
6. ጴጥሮስ ሰለሙን
7. ሓሚድ ሕምድ
8. እስጢፋኖስ ስዩም
9. መሓመድ ኣሕመድ ሸሪፎ
10. ኣስቴር ፍስሃጽየን
11. ሳልሕ ኢድሪስ ኬክያ

ፍትሒ ንናይ ሕልና እሱራት ኤርትራ!

ኤልሳ ጭሩም