እቲ ኣህጉራዊ ፊናንስያዊ ትካል፣ 196 ሃገራት፣ ምስ ለበዳ ኮረና ቫይረስ ተተሓሒዙ ዝወስድኦ ዘለዋ ናይ ቁጠባን ፊናንስን ስጉምታት ብዝምልከት፣ ብ31 ነሓሰ ኣብ ዘውጽኦ ዝርዝራዊ ጸብጻብ’ዩ መንግስቲ ኤርትራ ዝወሰዶ ቁጠባዊ ስጉምቲ ከምዘየለ ዘነጸረ።
መንግስቲ ኤርትራ፣ ኣብ 21 መጋቢት ናይ መጀመርያ መልከፍቲ ኮረና ቫይረስ ከምዝመዝገበ ንውድብ ጥዕና ዓለም ድሕሪ ምሕባሩ፣ ካብ 2 ሚያዝያ ኣትሒዙ ህዝቢ ኣብ ገገዝኡ ክዕጾ ከምዝኣወጀ እቲ ጸብጻብ ኣዘኻኺሩ።
እንተኾነ፣ መንግስቲ ኤርትራ ካብ 28 ሰነ ኣትሒዙ ከፊላዊ ምጅማር ትምህርቲ እኳ እንተኣወጀ፣ እቲ ናይ ምዕጻው ኣዋጅ፣ በብእዋኑ ብዝወሃብ ሓበሬታ ከይተሰነየ ናይ ግዜ መቓን ዘይብሉ ኮይኑ ከምዝቐጸለ ኣፍሊጡ።
እቲ መንግስቲ፣ ምስ ለበዳ ኮረና ቫይረስ ተተሓሒዙ ኣብ ቁጠባ፣ ፊስካል፣ መጠን ሸርፊን ካልእ ፊናንስያዊ ንጥፈታትን ዝወሰዶ ስጉምቲ ከምዘይነበረ ከኣ ኣህጉራዊ ማዕከን ገንዘብ ኣነጺሩ።
መንግስቲ ኤርትራ፣ ድሕሪ ለበዳ ኮረና ቫይረስ ብዛዕባ ዝህሉ ቁጠባዊ ጥፈታትን ፊናንስያዊ መደባትን’ውን ከምዘይብሉ’ዩ ትጥቐስ።
ኤርትራ ኣብዚ ዝሓለፈ 29 ዓመታት፣ ንህዝቢ ብወግዒ ዝንገር ስሩዕ ባጀትን ቁጠባዊ መደባትን ከምዘይጸንሓ ይፍለጥ።
ኣብዚ ናይ ለበዳ ኮረና ቫይረስ እዋን፣ ብሰንኪ’ቲ ብሃውሪ ዝኸይድ ዘሎ መደባት መንግስቲን ዝተናውሐ ኣዋጅ ምዕጻውን፣ ህዝቢ ንከቢድ ቁጠባዊ ቅልውላውን ጥሜትን ተቓሊዑ ከምዘሎ ብሰፊሑ ይዝረብ።
